METIYU 27
27
Jisun Pilat Dookub Boanum
(Mk 15:1; Lk 23:1-2; Jn 18:28-32)
1Ar komc nyub buda tulu ngvla Lvpw hoq nyi nyiixa tulungv Jisun mengdwb hvl ywrs nyiaknum. 2Mwam tagv korcuptvl Roman Gora ab Pilatg alaqb jilwqnum.
Judas Sinam
(Bn 1:18-19)
3Kokw so nyepinbo Judas, Jisun mengdkub bvrwq loornam mam tapa tvl mwv mwwkur kunv rup twngk cammum mam nyub buda tulu, nyi nyiixa tulug dookub bwkurl haanum. 4Mwv benum, “Ngo yolu dooma bo nyi akam nyepin tukul simnam si ngo nyic nyipa ku.’’
Bulv birwqnum, “Hoq pagoq ham ngulv hog mwwdwq dwqs dooma. No atv ham cengs tvka!’’
5Judas twngkam xumk nam urahv hurpaqpel wleqnum hoo kokw so mwv atv pvqswrl siknum.
6Kokw so nyub buda tulungv hoq twngkam naarab banv benum, “Soq si nyi hijum korv, hoo so xumk nam noosu lo vlwq dvb nyima dvn.’’ 7Kokw so goomin sul goody kunv, Dvkam pwcw mvnbo hoq kedam nyoodo nyi tulungam svma liikum koob hog twngkam rvn kunum. 8Hoqgab soolo godab hoq kedam “Hijumg kediv’’ hvl soolo godab begdvn.
9Hoqgab nyiqry kaanbo Jerimiya benamv niqtuq lengknum, “Israel nyi tulungv mwam rup twngk cammum mam jidkub loor kunam mam naaknv, 10hoo At Sw ngam gaml jinam hvbkalam pwcw mvnbo kedam rvn kunum.’’
Jisun Pilat Toxnam
(Mk 15:2-5; Lk 23:3-5; Jn 18:33-38)
11Jisu mwam toxbo Roman Gora abwg agaho daqnum, Pilat toxnum, “No Juhudi tulug Lvpw atv jaq i?’’
Jisu birwqnum, “Noqg begdvn hv sulak.’’
12Hvbmabde mwv nyub buda tuluho nyi axa tulug yolu benam mam hog gokam birwq maanum.
13Hoqgab Pilat mwam benum, “Bulv soq mwlw yolu sam nam benam sam no tapa maadwn i?’’
14Hvbmabde Jisu agam gamgkam birwq maanum, ham kaatwl Gora ab akv vigo lomnum.
Jisun Mengdkub Hwwbwq Kunam
(Mk 15:6-15; Lk 23:13-25; Jn 18:39—19:16)
15Nyedarko durum vxiam Roman Gora ab akv nyi tulungv topaq mvdkub begam gab pvtwq lwqnam nyi ak tolin jiknum. 16Hoq apoho mwlwngv cimpwnam nyuum akv pvtwq uraho doomnum, mwwg eminv Barabas. 17Kokw so nyi tulug olum gob hookum dvkho Pilat bulam toxnum, “Ngo hogloq akam nulam tolin jitayin? Barabaswn hvbmab Ywwnbo hvl benam Jisun?’’ 18Hoqgab mwv cengnum Juhudi tulungv hang baqbnv Jisun mwwg alaqho jilwqnum.
19Pilat pw-hwwdul doodu dvkho mwwg nywxwngv mwam pui bilwqnum, “Hoq yolu doomabo nyiidar nyi akwg aoho alaq idaq maab, hoggab mwwg pagoq gab ngo soi yuma maanyi altvn.’’
20Nyub buda ngvla nyi axa tulungv nyi tulungam Pilatnvn Barabaswn tolin tvk ho Jisu mengtwk hvl gumnum. 21Hvbmabde Pilat nyi tulungam toxnum, “Soq nyi pengko so hogloq akam ngam nulv tolin tvbwk hvl bedwn?’’ Bulv birwqnum, “Barabaswn.’’
22“Hvbnyiloqkam Ywwnbo hvl benam, Jisun ngo hoggub mvtayin?’’ Hvl Pilat toxnum. Bulv birwqnum, “Daapo tol mengto!’’
23Hvbmabde Pilat bulam toxnum “Mwv hognvk nyimurv nyipan?’’
Hvb beda kalam vc alwb sogoql kiir nool benum, “Mwam daapo tol mengto!’’
24Kokw so Pilat kaanamv soq sam bidul doodub nyikma, hvbmab nyi tulug pengko ho yolu parab kimpa mwwnv, iss naabnv mwwg alaqngam nyi tulug kaagaho losuqnum, hoo mwv benum, “Soq ak soq sinam pagoq so ngoqg so yolu dooma! Soq sam nulv atv cengs laka!’’
25Nyi acamv birwqnum, “Mwwg sinam yolungam ngulug aoso hoo ngulug ko tulug aoho doomto!’’
26Hoqgab Pilat Barabaswn bul gab tolin jinum kokw so mwv Jisun xigurl mvtwl daapo aoho mengm dukub jilinum.
Sipai Tulungv Nyij-nyiparnam
(Mk 15:16-20; Jn 19:2-3)
27Hoq kokw so Pilatg sipai tulungv Jisun Gora ab dookum namho boalayil sipai acam campwngam mwwg taqg-loosaqb bookumnum. 28Bulv mwwg vjam pipaqtvl lwwsa-lwwma bo pobaqnam vj rumg mwam pobaql koomnum. 29Bulv taag ywr dumtup ak mwwg dumpo ho tulwq jinum, ho mwwg alaq lvqbwqho beqnyia daag gvqlwqnum ho lwbwngv kumbwl nyij-nyiparnum. Bulv benam, “Juhudi tulug Lvpw atv swwiyu nvka!’’ 30Bulv mwam tacorv curxabnum, hoo beqnyiangam naabnv mwwg dumpongam xigoql mukub nanum. 31Bulv nyij-nyipar mwam nyixo kokw so hoq vj poqbaqngam lok pilin tukul mwwg vjam mwam koom kunum. Hoq kokw so mwam daapo aoho mengkwb mwam agab boolin wg kunum.
Jisun Daapo Aoho Mengnam
(Mk 15:21-32; Lk 23:26-43; Jn 19:17-27)
32Kokw so Jisun boolayil agab lengd kukho, Siren gvda hoqgv haanbo Simonvk hvl benam nyi ak kaapa tvl, Sipai tulungv mwam nootul Jisug daapongam joom dvb ninlwqnum. 33Bulv Golgota hvl benam, “Dungklo alo Nyook ho wc kunum.’’ 34Ho Jisun kacaqbo dvrab mviyonam opongam jinum, hvbmabde mwv ham twwka tvl, twwmab apaqnum.
35Bulv mwam daapoho mengknum hoo mwwg vjam naal mvpin-mvral naaknum. 36Hoq kokw so hoqho dootwl mwam kaal doonum. 37Mwwg dumpo ao daapoho pota taqg mwwg ceebio yolu pota taqg hvl xeqpnum, “Soq si Juhudig Lvpw atv.’’ 38Mwwg lvgab hoq ditaqho dvcobo nyi vnyi go, akwn lvqbwq taqc ho hoo akwn laqc taqc daapoho mengnum.
39Lamta wpeq bo nyi tulungv kaatwl bulug dumpongam pvk-pvknv Jisun bej-bepar benum. 40“No xumk nam mam sapia tvl aal loum deenam mvdar tainvk hvl benum! No Pwnbog Ko Tuupv jaqloqkam atam ywws toloqkam! Daapo hoqgv ipoqtuk loqkam.’’
41Hoq hvbkalam, nyub buda tulungv, Pvvb tomswrbo nyi tulungv hoo nyi axa tulungv mwam bej-bepar benyanum. 42“Mwv nyi asaqkam ywwnum, hvbmabde mwv atam ywwny suma! Mwv Israelwg Lvpw at ak hvvma i? Mwv daapo toloqgv ipoq kubnyiloqkam ngulv mwam mwwjw tayin. 43Mwv Pwnboam hingw do hoo atam Pwnbog Ko Tuupv hvl bisdvn. Hoqgab ngulv sija mwam kaaya tuj. Pwnbog mwam ywwnam mam!’’
44Daapo aoho mwwg lvgab mengnam dvcobo tulu ngvkam mwam bej-bepar benum.
Jisug Sinam
(Mk 15:33-41; Lk 23:44-49; Jn 19:28-30)
45Aal doonyi caada dvk hoqgv itoq nagub hog mwlwngv kanv pulubnum, ho hoq wm swlw duur oum gob doonum. 46Ariyum oum moodho vc alwb sogoql benum, “Ili, Ili, lama sabaktani?’’ hvl benamv “Ngoqg Pwnbo, Ngoqg Pwnbo hoggub ngam apaq pakun?’’
47Hoq ditaqho daqnbo nyi tulungv mwwg hoq benam mam talayil benum, “Mwv Ilijanvn goqdo!’’ 48Bulug pengko hoqgv akwn nyebia alwb xarbnv hiipu ak naal ham roo ala golo subum tvl mwam toolo niqtuqho cabxeqtvl hwca jinv mwam twwm dvb nyinum.
49Hvbmabde tuugin benum, “Apaqto, mwam Ilija haal ywwnam mam kaaya tuj!’’
50Jisu lokta vc alwb sogoq kunv swwrw bingknum.
51Ho xumk nam ura hoqg vj torciqnam vjv odum hoqkv ako nagub tvqnyi gob pajeq kunum. Nyioby hwqnum, lwwnv pwnyi gob buqcnum. 52Nyubungv ukonum, Pwnbog dvrwqbo nyi tulungv sik bov vigo turab kunum. 53Bulv nyubungam apaq peekul Jisu sixo kokw so turab dvkho bulam dvrwqbo bopam urab haanam mam nyi tulungv kaapanum. 54Kokw so Sipai Saabv la Sipai tulungv Jisun kaayal doon bov nyioby hwqnam mam hoo hog mwlw luuxy nyinam mam kaatwl, bos soma vrram sonum, hoo benum, “Mwv jvqtw jaqb Pwnbog Ko Tuup goj kunyi!’’
55Jisug kokwb wba bo mwam svka bo Galili hoqgv haanbov nyemv vigo hoq ditaqho daqtwl aado hoqgv kootul koodunum. 56Bulug pengko ho doon bov Meeri Magdalin, Jems, Josap bunyig ann Meeri ho Jebedig nywxw akv yvnum.
Jisun Svma Liinam
(Mk 15:42-47; Lk 23:50-56; Jn 19:38-42)
57Ariyum kan tadwkho, Arimatiya nampam hoqgv nyetbo nyi Josapvk hvl eminam Jisug buub swwnbo ak. 58Mwv Pilat dookub haabnv Jisug gv vpam konum. Pilat Josapnvn svmangam naamdvb gaml jinum. 59Hoqgab Josap svmangam joolayil nit albo topum vj rumg hwwtumnum. 60Oyu maadab dukol wlw lwwraq hoqgv mwwg gab apnam nyubu uraho liinum. Ho mwv wlw lwiyab pwt albo pwg nyubungam ngurtuml ap pel wleqnum. 61Meeri Magdalin, ho Meeri akwn hv nyubu taqcib doqkurl hoqho doodu nyanum.
Nyubungam Rvkybo
62Loogwn ho Juhudi hvdwg Doonu dvk aalwb nyinum, hoo nyub buda tulungv la Parisi tulungv Pilat dookub haabnv benum. 63Gora ab ngulv mwwgab do, xaalyo bo akv mwv simab doodwkho benum, “Ngo aal loum kokwngam lokta turab tayin. 64Hoqgab aal loumv wnam gob mwwg nyubungam hengab jaqb rvkil aptvl mwwg buu tulungam wl svmangam dvcol joosil wg mvma dvb hoo nyi tulungam mwv sinam hoqgv turab nukun hvl bekin mvma dvb rvky boloq jito. Soq kokwg xaalyo si otuqg xaalyongam alyama bo gob nyitayin.’’
65Pilat bulam benum, “Rvky boam boogwn hoo wgdvl nyubungam hog hwdgo rvky kitayin hwdgo nulv rvky ta.’’
66Hoqgab wknv nyubu hoqg wlw aoho morxtubnam mam apnum hoo nyubungam kaayal rvky mvdwb apaqnum.
Currently Selected:
METIYU 27: NYISBSI
Highlight
Copy
Compare
Share
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
