Romabi 8

Mumi mi wami

1Lɔ ɔ he ɔ jeha nɛ fɔ ko fɔ ko be nɛ a kɛ maa bu nihi nɛ ngɛ Kristo mi ɔ. 2Ejakaa mlaa nɛ ji wami kɛ mumi mlaa a nɛ ngɛ Kristo Yesu mi ɔ kpɔ mi ngɛ yayami kɛ gbenɔ mlaa a dɛ mi. 3Ejakaa nɔ́ nɛ mlaa a nyɛ we nɛ e pee ngɛ gbedemi nɛ he lo ɔ gbede he je ɔ, Mawu tsɔ lɛ nitsɛ e bi ɔ ngɛ su nɛ ngɛ kaa yayami he lo su mi, nɛ ngɛ yayami he hulɔ, konɛ e bu yayami ɔ fɔ ngɛ he lo ɔ mi, 4konɛ a gbe mlaa a dami ɔ nya ngɛ wa mi, wɔ nihi nɛ wa nyɛɛ we ngɛ he lo nya, se mohu mumi nya wa nyɛɛ ngɛ ɔ. 5Ejakaa nihi nɛ hii si ngɛ he lo nya a, he lo nihi a he a susuu, se nihi nɛ hii si ngɛ mumi nya a susuu mumi mi nihi a he. 6Ejakaa he lo juɛmi ɔ lɛɛ gbenɔ ʼi, se mumi juɛmi ɔ, wami kɛ he jɔmi ʼi. 7Ejakaa he lo juɛmi ɔ Mawu nyɛmi ʼi, ejakaa e bɛ e he si ha we Mawu mlaa a, nɛ pohu e be nyɛe tete. 8Nihi nɛ hii si ngɛ he lo mi ɔ be nyɛe nɛ a sa Mawu hɛ mi.

9Se ke e ngɛ mi kaa Mawu Mumi hii nyɛ mi ɔ, lɔ ɔ lɛɛ nyɛ be he lo ɔ sisi, se mohu mumi ɔ sisi nyɛ ngɛ. Ke nɔ ko be Kristo Mumi ɔ, lɛɛ tsa pi Kristo nɔ́ ji lɛ. 10Se ke Kristo ngɛ nyɛ mi ɔ, nɔmlɔ tso ɔ gbo ngɛ yayami he lɛɛ, se mumi ɔ ji wami ngɛ dami he. 11Se ke nɔ nɛ tle Yesu si kɛ je gbeje ɔ Mumi ɔ hii nyɛ mi ɔ, nɔ nɛ tle Kristo si kɛ je gbeje ɔ ma ha nyɛ nɔmlɔ tsohi nɛ ma gbo ɔ hu yi ma na wami ngɛ e Mumi nɛ hii nyɛ mi ɔ he.

12Lɔ ɔ he ɔ, mamimɛ, hiɔtsɛmɛ ji wɔ, se pi he lo hiɔ nɛ wa hɛɛ nɛ wa maa hi si ngɛ he lo nya. 13Ejakaa ke he lo nya nyɛ hii si ngɛ ɔ, nyɛ ma gbo. Se ke nyɛɛ kɛ Mumi ɔ gbee he lo ɔ ni tsumi ɔmɛ ɔ, nyɛ yi ma na wa. 14Ejakaa nihi abɔ nɛ Mawu Mumi ɔ kpakaa mɛ ɔ, mɛ ji Mawu bimɛ. 15Ejakaa pi nyɔguɛ yemi mumi nɛ nyɛ na nɛ nyɛ ma pa ye gbeye, se mohu nyɛ na bimɛ a plɛmi mumi, nɔ́ mi nɛ wa kpaa ngmlaa ngɛ ke: “Abba,” Tsaatsɛ! ɔ. 16Mawu Mumi ɔ nitsɛ kɛ wa mumi ɔ yeɔ odase kaa Mawu bimɛ ji wɔ. 17Nɛ ke bimɛ ji wɔ ɔ, lɛɛ we ni yeli hu ji wɔ, Mawu we ni yeli kɛ Kristo nyɛmimɛ we ni yeli, ke e ngɛ mi kaa waa kɛ lɛ naa amanehlu ɔ, konɛ a wo waa kɛ lɛ hɛ mi nyami hulɔ.

Hwɔɔ se nyami

18Ejakaa i susuu kaa mwɔnɛ mwɔnɛ amanehlu nɛ ɔmɛ kɛ nyami nɛ hwɔɔ se a ma je kpo ha wɔ ɔ sɔɛ. 19Ejakaa adebɔ ni ɔmɛ a blɔ hyemi kpikpimaa a ngɛ Mawu bimɛ ɔmɛ wa kpo jemi ɔ mlɛe. 20Ejakaa a ngɔ adebɔ ni ɔmɛ ngɔ wo yakayaka ni a sisi, pi ngɛ mɛ nitsɛmɛ a suɔmi nya, se mohu ngɛ nɔ nɛ ba mɛ si ɔ he, ngɛ hɛ kɛ nɔ fɔmi mi, 21ejakaa adebɔ ni ɔmɛ hu maa ye a he kɛ maa je puemi nyɔguɛ yemi ɔ mi kɛ maa ya Mawu bimɛ ɔmɛ a nyami he yemi ɔ mi. 22Ejakaa wa le kaa adebɔ ni ɔmɛ tsuo kɛ wɔ ngɛ kɛmɛe nɛ a kɛ wɔ ngɛ kɔɔe kɛ ba su mwɔnɛ mwɔnɛ. 23Nɛ tsa pi mɛ kɛkɛ, se mohu wɔ nitsɛmɛ tete, wɔ ninɛmɛ nɛ wa na Mumi ɔ kekle yiblii ɔmɛ, wɔ nitsɛmɛ hu wa laa zanue ngɛ wa mi, nɛ wa hyɛɛ bimɛ a plɛmi nɛ ji wa nɔmlɔ tso kpɔmi ɔ blɔ. 24Ejakaa hɛ kɛ nɔ fɔmi nya a he wa yi wami ngɛ. Hɛ kɛ nɔ fɔmi nɛ a naa a, e pi hɛ kɛ nɔ fɔmi. Ejakaa mɛnɔ hɛ hii nɔ́ nɛ a naa a nɔ? 25Se ke nɔ́ nɛ wa nɛ́ ɔ nɔ wa hɛ ngɛ ɔ, lɛɛ wa kɛ tsui si tomi hyɛɛ lɛ blɔ.

26Ja nɔuu Mumi ɔ hu yeɔ buaa wa gbedemi ɔ; ejakaa bɔ nɛ sa kaa wa ko sɔle kɛ bi nɔ nɛ da a, wa li; se Mumi ɔ nitsɛ kɛ kɔmɔ yemi nɛ a be nyɛe maa kale daa mi haa wɔ. 27Se Mawu nɛ hlaa tsuihi a mi ɔ le nɔ́ nɛ ji Mumi ɔ juɛmi ɔ, ejakaa e daa mi haa ni klɔuklɔu ɔmɛ bɔ nɛ sa Mawu hɛ mi.

28Se wa le kaa, nihi tsuo mi ɔ, Mawu yeɔ buaa nihi nɛ suɔ lɛ ɔ konɛ e hi ha mɛ, mɛ ninɛmɛ nɛ a tsɛ mɛ ngɛ e yi mi tomi nya a. 29Ejakaa nihi nɛ e le mɛ momo ɔ, mɛ e je ngɔ to konɛ a subai nɛ hi kaa e bi ɔ nɔ ɔ, konɛ Bi ɔ e pee nyɛmimɛ fuu a kpɛti bi nɔkɔtɔma. 30Nihi nɛ e je ngɔ to ɔ, mɛ nɔuu e tsɛ; nɛ nihi nɛ e tsɛ ɔ, mɛ nɔuu nguɔ e wo; nɛ nihi nɛ e wo nguɔ ɔ, mɛ nɔuu a hɛ mi nyami e wo.

Mawu suɔmi ngɛ Kristo Yesu mi

31Lɛɛ kɛ wa ma de kɛɛ ngɛ ni nɛ ɔmɛ a he mɔ? Ke Mawu ngɛ wa se ɔ, mɛnɔ maa te si ngɔ wo wɔ? 32Mawu nɛ kamaa we wɔ elɛ nitsɛ e Bi ɔ, se mohu e ngɔ lɛ ngɔ ha ngɛ wɔ tsuo wa nane mi ɔ, anɛ e be nihi tsuo kulaa ngɔe ngɔ piɛ e he kɛ ke wɔ lo? 33Mɛnɔ maa po nihi nɛ Mawu hla amɛ a nya? Mawu ji nɔ nɛ woɔ nguɔ. 34Mɛnɔ ji nɔ nɛ buu fɔ ɔ? Yesu Kristo nɔ nɛ e gbo, se nɔ́ nɛ pe kɔlɔ ɔ, nɔ nɛ a tle lɛ si hulɔ, nɛ e ngɛ Mawu hiɛ ɔ nɔ, nɛ e pa daa mi haa wɔ. 35Mɛnɔ ma gba waa kɛ Kristo suɔmi ɔ mi? Amanehlu loo tsui pomi loo yi wami loo hwɔ loo he gu nyɛɛmi loo he gbeye womi loo klaate? 36Kaa bɔ nɛ a ngma ke:

“O he ɔ, a gbee wɔ hluu je nami kɛ ya siɔ du bubui,

A buu wɔ kaa tohi nɛ a yaa gbe mɛ.”

37Se kɛ̃ ɔ, enɛ ɔmɛ kulaa mi ɔ, wa guu nɔ nɛ suɔ wɔ ɔ nɔ yeɔ kunimi babauu. 38Ejakaa i ngɛ nɔ mi mami kaa gbenɔ jio, wami jio, hiɔwe bɔfohi jio, nɔ yeli jio, he wamihi jio, nihi nɛ ngɛ nɛ ɔmɛ jio, nihi nɛ maa ba amɛ jio, 39hiɔwe jio, sisi jio, aloo nihi nɛ a bɔ ɔmɛ a mi nɔ́ kpa ko jio, a be nyɛe ma gba waa kɛ Mawu suɔmi nɛ ngɛ Kristo Yesu, wa Nyɔmtsɛ ɔ, mi ɔ mi.

Currently Selected:

Romabi 8: DAN77

Highlight

Copy