Romabi 9
9
Mawu hla Israel
1Anɔkuale i ngɛ dee ngɛ Kristo mi, i yi lakpa, nɛ ye he ni lemi hu yeɔ mi odase ngɛ Mumi Klɔuklɔu ɔ mi, 2kaa i ngɛ kɔmɔ yee babauu, nɛ ye tsui yeɔ daa. 3Ejakaa i na nɛ jinɛ a je mi ngɛ Kristo he kaa musutsɛ ngɛ ye nyɛmimɛ nɛ ji ye wekuli ngɛ he lo blɔfami ɔmɛ a nane mi, 4nihi nɛ ji Israelbi nɛ a nɔ ji bimɛ a plɛmi ɔ kɛ nyami ɔ kɛ somi ɔ, kɛ mlaa hami kɛ jami ɔ kɛ si womi ɔ, 5ninɛmɛ nɛ a nɔ́ nɛ ji tsɛmɛ ɔmɛ, nihi a mi hu nɛ Kristo tete je ngɛ he lo blɔfami ɔ, lɛ nɛ ji Ope ngɛ nihi kulaa nɔ, Mawu nɛ a gbaa kɛ yaa neneene ɔ. Amen.
6Se pi kaa Mawu munyu ɔ pee yaka. Ejakaa tsa pi nihi nɛ je Israel mi ɔ tsuo ji Israel; 7nɛ jeha nɛ hu, pi kaa nɛ Abraham nina ji mɛ ɔ he je ɔ, bimɛ ji mɛ tsuo kulaa, se mohu: “Nihi nɛ je Isak mi ɔ, a ma tsɛ mɛ o nina.” 8Lɔ ɔ ji kaa, tsa pi he lo nya bimɛ ɔmɛ ji Mawu bimɛ, se si womi bimɛ ɔmɛ mohu a buu kaa nina. 9Ejakaa si womi munyu ɔ ji nɛ ɔ nɛ: “Hiɛ ɔ jeha nya kpemi ɔ ma ba, nɛ Sara ma na bi nyumu.”
10Se pi enɛ ɔ kɛkɛ, se mohu wa tsɛ Isak kake ɔ nɔuu nɛ Rebeka kɛ na muklii. 11Se benɛ a na we nɛ a fɔ bimɛ, nɛ jeha nɛ a tsu we nɔ kpakpa loo nɔ yaya ko ɔ, benɛ pee nɛ Mawu yi mi nɛ e to ngɛ e hlami nya a nɛ ma si, 12nɛ e ko je ni tsumihi a mi, se mohu e je nɔ nɛ tsɛɛ nɔ ɔ, Mawu de lɛ ke: “Nɔkɔtɔma a ma sɔmɔ jokuɛ ɔ.” 13Kaa bɔ nɛ a ngma a ke: “Yakob ɔ, i suɔ lɛ, se Esau ɔ, i nyɛ lɛ” ɔ.
14Lɛɛ kɛ wa ma de kɛɛ? Anɛ Mawu yeɔ sane ko nɛ dɛ lo? Dɛbi! 15Ejakaa Mawu de Mose ke: “Nɔ nɛ i naa lɛ mɔbɔ ɔ, lɛ nɔuu mɔbɔ ma na, nɛ nɔ nɛ ye mi mi saa mi haa lɛ ɔ, lɛ nɔuu ye mi mi maa sa mi ha.” 16Lɔ ɔ he ɔ jeha nɛ pi nɔmlɔ suɔmi nya aloo e mɔdebɔmi nya, se mohu Mawu nɛ naa mɔbɔ ɔ sane ʼi. 17Ejakaa ngami ɔ de Farao ke: “Enɛ ɔ nɔuu he je nɛ i tle mo si konɛ ma je ye he wami kpo kɛ gu o nɔ, konɛ a wo ye biɛ ta ngɛ zugba a kulaa nɔ.” 18Lɔ ɔ he je ɔ, nɔ nɛ e suɔ ɔ, e naa lɛ mɔbɔ; nɛ nɔ nɛ e suɔ hu ɔ, e wluaa e tsui.
Mawu mimifumi kɛ e mɔbɔnami
19Se jeha nɛ o ma bi mi ke: “Mɛni he je Mawu piaa nɔ mɔ?” Ejakaa mɛnɔ ma nyɛ e yi mi tomi ɔ nya maa ku? 20Se mɛnɔ ji mo, mo nɔmlɔ, nɛ o kɛ Mawu tsuaa nuku? Anɛ buɛ ɔ ma de nɔ nɛ puɛ lɛ ɔ ke: “Mɛni he je o puɛ mi kikɛ” ɔ lo? 21Aloo buɛpuɛlɔ ɔ be he wami ngɛ zu ɔ nɔ, kaa e kɛ zu kake nɛ a pɔtɔ ɔ nɔuu eko maa puɛ nɔ́ ko nɛ hɛ mi ngɛ nyami, nɛ e kɛ eko hu maa puɛ nɔ́ ko nɛ hɛ mi be nyami lo?
22Se ke Mawu suɔ kaa e je e mi mi fumi kpo ngɔ tsɔɔ nɛ e ha a le e he wami ɔ, se kɛ̃ ɔ, e toɔ e tsui si babauu kɛ hɛɛ mi mi la womi nihi nɛ sa hɛ mi kpatami ɔ, 23nɛ jeha nɛ hu ke e haa a leɔ e hɛ mi nyami hiɛmi ɔ hu ngɛ e mɔbɔ nami nihi nɛ e dla ngɔ to ha hɛ mi nyami ɔ, mɛni o ma de? 24Se jã e tsɛ wɔ hulɔ, pi ninɛmɛ nɛ je Yudafo ɔmɛ a kpɛti ɔ kɛkɛ, se nihi nɛ je majeli ɔmɛ a kpɛti ɔ hulɔ. 25Kaa bɔ nɛ e de ngɛ Hosea womi ɔ mi ke:
“Ma tsɛ ninɛmɛ nɛ pi ye nihi ɔ ke ye nihi,
Nɛ ma nɛ a sume lɛ ɔ ke ma nɛ a suɔ.
26Nɛ e maa ba mi kaa,
He nɛ a de mɛ ngɛ ke:
‘Pi ye ma ji nyɛ’ ɔ,
Lejɛ ɔ nɔuu a ma tsɛ mɛ Mawu hɛkalɔ ɔ
bimɛ ngɛ.”
27Se Yesaia kpa ngmlaa ngɛ Israel he ke: “Ke Israelbi ɔmɛ a yibɔ ngɛ kaa wo nya zia a, nihi nɛ piɛ ɔmɛ kɛkɛ a yi wami a ma he. 28Ejakaa sane kpiti Nyɔmtsɛ ɔ maa ye ngɛ zugba a nɔ.” 29Nɛ kaa bɔ nɛ Yesaia de ngɔ to momo ɔ ke: “E ji e ya pee kaa tahi a Nyɔmtsɛ ɔ piɛ́ nina ko ngɔ hi wɔ jinɛ, wa ngɛ kaa Sodoma, nɛ wa plɛ kaa Gomora pɛ.”
Israel kɛ Sane Kpakpa a
30Lɛɛ kɛ wa ma de kɛɛ? Lɔ ɔ ji majeli a bimɛ nɛ di dami se ɔ na dami nɛ ji dami nɛ je hemi kɛ yemi mi ɔ; 31se Israel mohu nɛ dii dami mlaa a se ɔ, e nine sui dami mlaa a nɔ. 32Mɛni he je? Ejakaa a gui hemi kɛ yemi nɔ kɛ hla we, se mohu kaa nihi nɛ guu ni tsumihi a nɔ kɛ hlaa. 33Ejakaa a tɛ tɛmi tɛ ɔ, kaa bɔ nɛ a ngma a ke:
“Oʼɛ, i kɛ tɛ kɛ nane kpatami tɛ sa ko
Ngɛ si mae ngɛ Zion,
Nɛ nɔ tsuaa nɔ nɛ heɔ e nɔ yeɔ ɔ,
Zo be lɛ gbee.”
Currently Selected:
Romabi 9: DAN77
Highlight
Share
Copy
Want to have your highlights saved across all your devices? Sign up or sign in
Dangme New Testament © United Bible Societies, 1977.
