Romabi 5

Waa kɛ Kristo huɛbɔmi

1Jeha nɛ ɔ akɛnɛ a gu hemi kɛ yemi nɔ wo wɔ nguɔ he je ɔ, waa kɛ Mawu kpɛti ngɛ he jɔmi ngɛ wa Nyɔmtsɛ Yesu Kristo he. 2Lɛ e nɔ wa gu nɛ waa kɛ hemi kɛ yemi ɔ na blɔ kɛ ba dloomi nɛ wa daa si ngɛ mi ɔ mi, nɛ wa fiaa fɔɔ Mawu hɛ mi nyami ɔ nɛ wa hɛ ngɛ nɔ ɔ nɔ. 3Pi enɛ ɔ kɛkɛ, se mohu wa fiaa ngɛ dengme gbomihi a mi hulɔ, ejakaa wa le kaa dengme gbomi ɔ tsɛɛ tsui si tomi kɛ baa, 4nɛ tsui si tomi ɔ hu tsɛɛ nihi a si kpami kɛ baa, nɛ nihi a si kpami ɔ tsɛɛ hɛ kɛ nɔ fɔmi kɛ baa. 5Hɛ kɛ nɔ fɔmi ɔ gbi nɔ zo, ejakaa a gu Mumi Klɔuklɔu nɛ a ngɔ ha wɔ ɔ nɔ plɛ Mawu suɔmi ɔ ngɔ wo wa tsui mi.

6Ejakaa be mi nɛ wa he wɛ ɔ lokoo nɛ Kristo ba gbo ngɛ be nɛ sa mi ha yayami peeli. 7Ejakaa e maa wa loko nɔ ko ma gbo ha dalɔ ko; se nɔ́ kpakpa ko he ɔ, eko ɔ, nɔ ko ma si e gugue kaa e maa gbo. 8Se Mawu jeɔ e suɔmi nɛ e kɛ suɔ wɔ kpo tsɔɔ, kaa be mi nɛ wa ji yayami peeli lokoo nɛ Kristo ba gbo ngɛ wa nane mi. 9Lɔ ɔ he ɔ jeha nɛ ɔ, nɛ a wo wɔ nguɔ ngɛ e muɔ ɔ he he je ɔ, a maa gu e nɔ kɛ he wa yi wami hluu kɛ je mi mi fumi ɔ mi. 10Ejakaa ke be mi nɛ wa ji henyɛli ɔ nɛ a kɛ Mawu bi ɔ gbenɔ ba kpata waa kɛ Mawu kpɛti ɔ, jeha nɛ nɛ a kpata nɛ ɔ, a ma he wa yi wami hluu ngɛ e wami ɔ mi. 11Pi lɔ ɔ kɛkɛ, se mohu wa fiaa fɔɔ Mawu nɔ hulɔ ngɛ wa Nyɔmtsɛ Yesu Kristo he, nɔ nɛ nɔ nɛ wa gu jeha nɛ kɛ na kpatami ɔ.

Adam kɛ Yesu Kristo

12Enɛ ɔ he ɔ, kaa bɔ nɛ nɔmlɔ kake nɔ yayami gu kɛ ba je ɔ mi, nɛ gbenɔ gu yayami nɔ kɛ ba a, lɔ ɔ ha gbenɔ sa nimli tsuo, mɛni he je ɔ, mɛ tsuo a pee yayami. 13Yayami ngɛ je ɔ mi loko a ha Mlaa a; se akɛnɛ Mlaa be he je ɔ a bui yayami ɔ. 14Se kɛ ɔ gbenɔ ye tsɛ kɛ je Adam yi nɔ kɛ ba su Mose yi nɔ ngɛ nihi po nɛ pee we yayami nɛ ngɛ kaa Adam tɔmi ɔ nɔ, nɛ Adam ji nɔ nɛ maa ba a he okadi.

15Se bɔ nɛ si gbeemi ɔ ngɛ ɔ, pi ja nɛ dloomi nɔke nɔ ɔ hu ngɛ. Ejakaa ke nɔ kake si gbeemi he je nɛ nihi fuu gbo ɔ, Mawu dloomi kɛ nɔke nɔ nɛ gu nɔmlɔ kake nɛ ji Yesu Kristo ɔ dloomi nɔ kɛ ba a hiɛ kɛ be nɔ babauu ha nihi fuu. 16Bɔ nɛ si gbeemi ɔ gu nɔ kake nɛ pee yayami ɔ nɔ kɛ ba a, pi ja nɛ dloomi ɔ ngɛ: ejakaa kojomi ɔ je nɔ kake mi nɛ e plɛ fɔ bumi, se dloomi nɔke nɔ ɔ je si gbeemihi fuu a mi nɛ e plɛ nyɔguɛ yemi. 17Ejakaa ke nɔ kake si gbeemi ɔ he je nɛ gbenɔ gu lɛ nɔ kake ɔ nɔ ye tsɛ ɔ, lɛɛ nihi nɛ na dloomi kɛ dami nɔke nɔ nɛ hiɛ kɛ be nɔ ɔ maa gu nɔ kake nɛ ji Yesu Kristo ɔ nɔ maa ye tsɛ ngɛ wami mi.

18Lɔ ɔ he ɔ jeha nɛ, kaa bɔ nɛ a gu nɔ kake si gbeemi nɔ bu nimli tsuo fɔ ɔ, ja nɔuu kɛ a gu nɔ kake dami nɔ wo nimli kulaa wami nguɔ. 19Ejakaa kaa bɔ nɛ a gu nɔmlɔ kake tue gbomi ɔ nɔ ha nihi fuu plɛ yayami peeli ɔ, ja nɔuu kɛ a maa gu nɔ kake ɔ tue bumi ɔ nɔ a ma ha, nihi fuu hu ma plɛ dali. 20Se Mlaa a ba hɔ kpɛ konɛ si gbeemi ɔ nɛ hiɛ kɛ be nɔ. Se he nɛ yayami hiɛ ngɛ ɔ, lejɛ ɔ Mawu dloomi ɔ hiɛ kɛ be nɔ babauu ngɛ; 21konɛ bɔ nɛ yayami ɔ ye tsɛ ngɛ gbenɔ mi ɔ, ja nɔuu dloomi ɔ maa gu dami nɔ kɛ ye tsɛ hulɔ kɛ maa ya neneene wami mi ngɛ Yesu Kristo wa Nyɔmtsɛ ɔ he.

Currently Selected:

Romabi 5: DAN77

Highlight

Copy