Romabi 6

Kristo mi wami kɛ yayami mi gbenɔ

1Lɛɛ kɛ wa ma de kɛɛ? Waa hi yayami ɔ mi konɛ Mawu dloomi nɛ hiɛ lo? 2Dɛbi! Wɔ nɛ wa gbo ngɔ ha yayami ɔ, kɛ maa pee kɛɛ nɛ wa hɛ maa tsa nɔ hi ngmengmle ngɛ e mi? 3Aloo nyɛ li kaa wa ti nihi abɔ nɛ a baptisi ngɔ wo Kristo Yesu mi ɔ, e gbenɔ ɔ mi a baptisi wɔ ngɔ wo lo? 4Lɔ ɔ he ɔ, a kɛ baptisimi nɛ a baptisi wɔ ngɔ wo e gbenɔ ɔ mi ɔ pu waa kɛ lɛ tsuo, konɛ kaa bɔ nɛ a tle Yesu si kɛ je gbeje ngɛ Tsɛ ɔ hɛ mi nyɛmi nya a, ja nɔuu kɛ wɔ hu waa nyɛɛ ngɛ wami nɛ plɛ ehe mi.

5Ejakaa ke waa kɛ lɛ pee kake ngɛ e gbenɔ nɛ e gbo ɔ mi ɔ, lɔ ɔ lɛɛ waa kɛ lɛ maa pee kake ngɛ e si temi ɔ mi hulɔ. 6Wa le enɛ ɔ kaa a sɛu wa nɔmlɔ tso momo ɔ ngɔ piɛ e he konɛ yayami nɔmlɔ tso ɔ hɛ mi nɛ kpata nɛ wa ko sɔmɔ yayami hu. 7Ejakaa ke nɔ ko gbo ɔ, e kɛ yayami gba mi. 8Ke waa kɛ Kristo gbo ɔ, wa heɔ yeɔ kaa waa kɛ lɛ ma na wami hulɔ, 9ejakaa wa le kaa nɛ a tle Kristo si kɛ je gbeje nɛ ɔ ɔ, e be gboe hu; gbenɔ be e nɔ nyɔmtsɛ yee hu. 10Ejakaa nɛ e gbo ɔ, yayami e gbo ha si kake pɛ; se nɛ e hɛ ngɛ nɛ ɔ ɔ, Mawu e hɛ ngɛ ha. 11Ja nyɛ hu nyɛɛ bu nyɛ he kaa nihi nɛ a gbo ha yayami nɛ a hɛ ngɛ kɛ ha Mawu ngɛ Yesu Kristo wa Nyɔmtsɛ ɔ mi.

12Lɔ ɔ he ɔ nyɛ ko ha yayami nɛ ye nyɛ nɔmlɔ tso nɛ ma gbo ɔ nɔ tsɛ nɛ nyɛ bu lɛ tue ngɛ e kɔnɔ ɔmɛ a mi. 13Nɛ jeha nɛ ɔ nyɛ ko ngɔ nyɛ he ni ɔmɛ ngɔ ha yayami kaa ni yayami ɔmɛ a tahwumi nihi, se mohu nyɛɛ ngɔ nyɛ he ngɔ ha Mawu kaa ninɛmɛ nɛ a hɛ tsɛ kɛ je gbeje, nɛ nyɛɛ kɛ nyɛ he ni ɔmɛ nɛ pee dami tahwumi nihi ngɔ ha Mawu. 14Ejakaa yayami be nyɛ nɔ he wami nae, ejakaa pi mlaa sisi nɛ nyɛ ngɛ, se mohu dloomi sisi nyɛ ngɛ.

Dami mi nyɔguɛhi

15Lɛɛ kɛ ji lɛ kɛɛ? Waa pee yayami akɛnɛ wa be Mlaa sisi se dloomi mohu sisi wa ngɛ ɔ lo? Dɛbi! 16Anɛ nyɛ li kaa nɔ nɛ nyɛ ngɔɔ nyɛ he ngɔ peɔ nyɔguɛhi haa nɛ nyɛ buɔ lɛ tue ɔ, lɛ nɔuu e nyɔguɛhi ji nyɛ nɛ nyɛ buɔ lɛ tue ɔ lo? — yayami nɛ kɛ nɔ yaa gbenɔ mi ɔ jio, loo tuebumi nɛ kɛ nɔ yaa dami mi ɔ jio. 17Se sina ha Mawu kaa jinɛ sa a yayami nyɔguɛhi ji nyɛ, se jeha nɛ ɔ nyɛ je nyɛ tsui tsuo mi kɛ bu kikɛmɛ a tsɔɔmi nɛ a ngɔ nyɛ ngɔ wo mi nɛ ɔ tue. 18A kpɔ nyɛ kɛ je yayami dɛ mi nɛ nyɛ ye nyɛ he nɛ nyɛ plɛ dami nyɔguɛhi. 19Bɔ nɛ nɔmlɔ tuɔ munyu i ngɛ tue nɛ ɔ nɛ, ngɛ nyɛ he lo gbedemi ɔ he. Ejakaa kaa bɔ nɛ nyɛ ngɔ nyɛ he ni ɔmɛ ngɔ pee hiemi nihi kɛ mlaa tɔmi nyɔguɛhi kɛ sɛ mlaa tɔmi mi ɔ, ja nɔuu kɛ jeha nɛ ɔ nyɛɛ ngɔ nyɛ he ni ɔmɛ ngɔ pee dami nyɔguɛhi kɛ ha klɔuklɔu peemi.

20Be mi nɛ nyɛ ji yayami nyɔguɛhi ɔ, nyɛ ye nyɛ he kɛ je dami ɔ dɛ mi. 21Lɛɛ mɛni yiblii nyɛ wo ngɛ lɛ be ɔ mi? Yiblii nɛ zo gbe nyɛ ngɛ he jeha nɛ; ejakaa kɔlɔ ɔmɛ a nyagbe ji gbenɔ. 22Se jeha nɛ ɔ, nɛ a kpɔ nyɛ kɛ je yayami dɛ mi nɛ nyɛ plɛ Mawu nyɔguɛhi nɛ ɔ, nyɛɛ wo yiblii ha klɔuklɔu peemi nɛ we nyagbe ji neneene wami ɔ. 23Ejakaa yayami dɛ mi hiɔwe ɔ gbenɔ ʼi; se Mawu dloomi nike ni ɔ neneene wami ʼi ngɛ Kristo Yesu wa Nyɔmtsɛ ɔ mi.

Currently Selected:

Romabi 6: DAN77

Highlight

Copy