Romabi 3

1Jeha nɛ ɔ mɛni ji Yuda no ni nɛ e na kɛ be nɔ mɔ? Aloo mɛni se nami lɛ ngɛ nɔ pomi mi? 2E hiɛ ngɛ blɔ tsuaa blɔ nɔ. Kekleekle nɔ ji kaa a tu Mawu munyu ɔ ngɔ wo Yudafo ɔmɛ a dɛ. 3Se ke ni komɛ he we yi ɔ, mɛni ʼi? A he nɛ a he we yi ɔ ma ha Mawu anɔkuale yemi ɔ maa pee yaka lo? 4Dɛbi! Mawu ɔ, anɔkualetsɛ ʼi, se snɔmlɔ tsuaa nɔmlɔ ɔ, nya ngɔlɔ ʼi, kaa bɔ nɛ a ngma a ke:

“Bene pee nɛ o ye manye ngɛ o munyu ɔmɛ a mi,

Nɛ o ye nguɔ ngɛ o kojomi ɔ mi.”

5Se ke wa ni yayami ɔmɛ haa Mawu dami ɔ jee kpo ɔ, kɛ wa ma de kɛɛ? Anɛ Mawu tɔ ke e kɛ mimifumi ba wa nɔ ɔ lo? (I ngɛ munyu tue kaa bɔ nɛ nimli tuɔ munyu.) 6Dɛbi! Ejakaa ke ja a, kɛ maa pee kɛɛ nɛ Mawu maa kojo je ɔ?

7Se ke ye nya ngɔmi ɔ haa Mawu anɔkuale hiɛɛ kɛ bee nɔ ha e hɛ mi nyami ɔ, mɛni he je mɔ nɛ a yaa nɔ kojoɔ mi kaa yayami peelɔ? 8Mɛni he je nɛ e sɛ kaa waa pee yayami konɛ nɔ́ kpakpa nɛ ba? Enɛ ɔ ji nɔ́ nɛ ni komɛ poo ngɔ fɔɔ wa nɔ ke wa deɔ. Jamɛ a tsɛmɛ ɔmɛ a fɔ bumi ɔ da pɛ.

Nɔ ko be nɛ da

9Lɛɛ kɛ ji lɛ kɛɛ? Anɛ wɔ Yudafo ɔmɛ wa hi pe ni kpa amɛ lo? Tsa pi ja kulaa; ejakaa wa po Yudafohi kɛ Helabi tsuo a nya momo kaa mɛ tsuo a ngɛ yayami sisi; 10kaa bɔ nɛ wa ngma a ke:

“Dalɔ ko be, nɔ kake ngmelu be;

11Ni lelɔ ko be, nɔ ko nɔ ko be nɛ hlaa Mawu se blɔ.

12Mɛ tsuo kulaa a tla blɔ,

Mɛ tsuo kulaa a puɛ;

Nɔ ko nɔ ko be nɛ peɔ nɔ kpakpa,

Nɔ kake po be.

13Yɔkɔ nɛ a bli nya ji a kuɔ si;

A kɛ a lilɛ sisiɔ nɔ,

Sinɔ duɔ ngɛ a nya mi.

14Gbiɛmi kɛ doomi hyi a nya mi tɔ.

15A he sɔɔ ke muɔ si puemi.

16Hɛ mi kpatami kɛ kɔmɔ yemi ngɛ a blɔhi a nɔ,

17Nɛ he jɔmi blɔ ɔ a li.

18Mawu gbeye yemi ko be a hɛ mi.”

19Jeha nɛ ɔ wa le kaa nihi kulaa nɛ Mlaa a deɔ ɔ, nihi nɛ ngɛ Mlaa a sisi ɔ e ngɛ dee, konɛ nɔ ko nɔ ko ko na nya, nɛ je mluku ɔ tsuo nɛ ye fɔ ngɛ Mawu hɛ mi. 20Lɔ ɔ he ɔ, a be mlaa ni tsumi nɔ gue kɛ wo he lo ko he lo ko nguɔ ngɛ e hɛ mi; ejakaa mlaa a nɔ a guu kɛ leɔ yayami.

Yayamipami nɛ jee Kristo nɔhemikɛyemi mi

21Se jeha nɛ ɔ, a si Mlaa a se nɛ a je Mawu dami ɔ kpo paa, nɛ lɔ ɔ he odase Mlaa a kɛ gbali ɔmɛ yeɔ; 22kɔlɔ ɔ ji Mawu dami nɛ a guu Yesu Kristo nɔ hemi kɛ yemi nɔ a kɛ haa nihi tsuo nɛ heɔ yeɔ ɔ. 23Ejakaa slɔɔto ko be: ejakaa nihi tsuo peɔ yayami, nɛ Mawu hɛ mi nyami ɔ bɔ mɛ, 24nɛ a kɛ e dloomi ɔ woɔ mɛ nguɔ yaka kɛ guu kpɔmi nɛ ngɛ Kristo Yesu mi ɔ nɔ. 25Lɛ ji nɔ nɛ Mawu je ngɔ to kaa kpatami nɔ kɛ gu e muɔ ɔ nɔ hemi kɛ yemi nɔ, konɛ e je e dami ɔ kpo ngɛ e hɛ nɛ e je kɛ je yayamihi nɛ a pee sa a nɔ ngɛ Mawu tsui si tomi ɔ he; 26konɛ e je e dami ɔ ngɔ tsɔɔ ngɛ be nɛ ɔ mi, nɛ e ye nguɔ nɛ e wo nɔ nɛ heɔ Yesu nɔ yeɔ ɔ hu nguɔ.

27Jeha nɛ ɔ jije fiami ɔ ngɛ? A je lɛ kɛ je. Mɛni mlaa nɔ a gu? Ni tsumi hi a nɔ lo? Dɛbi, hemi kɛ yemi mlaa nɔ mohu a gu. 28Lɔ ɔ he ɔ wa ngɔɔ lɛ kaa hemi kɛ yemi nɔ a guu kɛ woɔ nɔmlɔ nguɔ, se pi mlaa ni tsumihi a nɔ. 29Anɛ Mawu ɔ, e ji Yudafohi kɛkɛ a Mawu lo? Anɛ pi majeli ɔmɛ hu a Mawu lo? Ee, majeli ɔmɛ hu a nɔ ʼi. 30Ke e ngɛ mi kaa Mawu ɔ Mawu kake ʼi, nɛ hemi kɛ yemi nya e buu nɔ pomi bemi, nɛ e kpale guu hemi kɛ yemi ɔ nɔ buu mɔmlɔtɔ bemi ɔ, 31lɛɛ wa ngɛ hemi kɛ yemi nɔ gue nɛ wa ha Mlaa a nɛ pee yaka lo? Dɛbi, waa kɛ ngɛ Mlaa a nɔ mi mae mohu.

Currently Selected:

Romabi 3: DAN77

Highlight

Copy