Romabi 2

Mawu kojomi

1Lɔ ɔ he ɔ mo, nɔ tsuaa nɔ nɛ o kojoɔ ɔ, o be nya jemi ko; ejakaa nɔ he nɛ o kojoɔ nɔ kpa ngɛ ɔ, o kɛ buu mo nitsɛ o he fɔ; ejakaa mo nɛ o kojoɔ nihi ɔ, jamɛ a ni ɔmɛ nɔuu o tsuɔ. 2Wa le kaa Mawu fɔ bumi ɔ sa nihi nɛ tsuɔ jamɛ a ni ɔmɛ pɛ. 3Se mo nɔmlɔ nɛ o kojoɔ nihi nɛ tsuɔ jamɛ a ni nɛ ɔmɛ nɛ o peɔ ja nɔuu ɔ, anɛ o susuu kaa moo lɛɛ o he maa je Mawu kojomi ɔ mi lo? 4Aloo pe o ngɛ e mi mi himi kɛ e nɔ he tsui nami kɛ e tsui si tomi babauu ɔ he guɛ gbee, se o li kaa Mawu mi mi jɔmi ɔ pe e ngɛ o he piɛe nɛ o pia o he lo? 5Se o kɛ o tsui wami kɛ o he nɛ o pia we ɔ ngɛ mi mi fumi nyɛ buae ngɔ ha mo nitsɛ o he ngɔ to mi mi fumi kɛ Mawu dami kojomi kpo jemi ligbi ɔ. 6Ejakaa e maa wo nɔ tsuaa nɔ hiɔ bɔ nɛ sa e ni tsumi ɔmɛ: 7Nihi nɛ kɛ kpakpa peemi kɛ tsui si tomi hlaa hɛ mi nyami kɛ bu kɛ si himi nɛ puɛ we ɔ, Mawu ma ha mɛ neneene wami. 8Se nihi nɛ suɔ pɛ nɛ a bui anɔkuale ɔ tue, se a buɔ ni yayahi mohu tue ɔ, a nɔ ji mi mi fumi kɛ mi mi la. 9Dengme kɛ he hiami maa ba nɔmlɔ tsuaa nɔmlɔ nɛ tsuɔ ni yaya nɛ ɔmɛ a nɔ, Yuda no nɔ kekle kɛ Hela no hu nɔ. 10Se hɛ mi nyami kɛ bu kɛ he jɔmi maa ba nɔ tsuaa nɔ nɛ tsuɔ ni kpakpahi ɔ nɔ, Yuda no kekle kɛ Hela no hulɔ. 11Ejakaa Mawu hlɛ nimli a mi.

12Ejakaa nihi abɔ nɛ be Mlaa nɛ a pee yayami ɔ, a maa laa hulɔ nɛ a be mlaa; nɛ nihi abɔ nɛ gu mlaa a nɔ pee yayami ɔ, Mlaa a nɔuu a kɛ maa kojo mɛ. 13Ejakaa pi mlaa nuli ɔmɛ ji dali ngɛ Mawu hɛ mi, se mlaa nɔ yeli mohu ji ninɛmɛ nɛ a maa bu kaa dali. 14Ejakaa, ke maje li a bimɛ nɛ be mlaa a kɛ a fɔmi mi su ɔ tsuɔ Mlaa a nya ni ɔ, mɛ nihi nɛ a be mlaa a, a ji mlaa ha mɛ nitsɛmɛ a he; 15kɔlɔ ɔ a kɛ tsɔɔ kaa a ngma Mlaa a ni tsumi ɔ ngɛ a tsui mi, nɛ a he nile hu yeɔ odase, nɛ a susumi ɔmɛ poo a nya aloo a jeɔ a nya 16ngɛ ligbi nɛ Mawu maa gu Yesu Kristo nɔ kɛ kojo nimli a laami mi ni ɔmɛ ngɛ ye Sane Kpakpa a nya a.

Yudafo ɔmɛ kɛ Mlaa a

17Se ke moo lɛɛ a tsɛɛ mo Yuda no, nɛ o hɛ ngɛ Mlaa a nɔ, nɛ o fiaa fɔɔ Mawu nɔ, 18nɛ o le e suɔmi nya ni ɔmɛ, nɛ o le nihi nɛ hi, ejakaa a je Mlaa a mi kɛ tsɔɔ mo, 19nɛ o buu o he kaa o ji hɛ yuyuili a blɔ tsɔɔlɔ kɛ nihi nɛ ngɛ diblii mi ɔmɛ a la, 20kɛ nihi nɛ li ni a tsɔselɔ, kɛ bimwɔwi a tsɔɔlɔ, nɔ nɛ hɛɛ nile kɛ anɔkuale nɛ ngɛ Mlaa a mi ɔ su ɔ, 21jeha nɛ ɔ mo nɛ o tsɔɔ ni kpahi a ni ɔ, o tsɔɔ we mo nitsɛ o he lo? O fiɛɔ ke “a ko ju,” se o ju we lo? 22O deɔ ke “a ko bɔ ajuama,” se o bɔɛ ajuama lo? O nyɛɛ amagahi, se o ju we a sɔlemi we nihi lo? 23Mo nɛ o kɛ Mlaa a fia a, o kɛ Mlaa a nɔ tɔmi ɔ gbee Mawu he guɛ. 24Ejakaa nyɛ he ɔ, a tuɔ Mawu biɛ ɔ he musu bɔmi munyuhi ngɛ majeli ɔmɛ a kpɛti, kaa bɔ nɛ a ngma a.

25Se ke o yeɔ Mlaa a nɔ ɔ, jinɛ nɔ pomi he ngɛ se nami; se ke o pee o he Mlaa a nɔ tɔlɔ ɔ, o pomi ɔ plɛ mɔmlɔtɔ. 26Se ke mɔmlɔtɔsɛ yeɔ Mlaa a blɔnya amɛ a nɔ ɔ, anɛ a be e mɔmlɔtɔ ɔ bue kaa pomi lo? 27Fɔmi mi mɔmlɔtɔsɛ nɛ yeɔ Mlaa a nɔ ɔ maa kojo mo nɛ o gu ngmami okadi kɛ nɔ pomi nɔ kɛ pee o he mlaa nɔ tɔlɔ ɔ. 28Ejakaa pi nɔ nɛ a naa lɛ kaa Yuda no kɛkɛɛkɛ ɔ ji Yuda no, nɛ jeha nɛ ɔ hu pi kpo nɔ nɔ nɛ ngɛ he lo mi ɔ ji pomi; 29se mohu nɔ nɛ ji Yudafo no ngɛ mi mi je ɔ lɛ ji Yuda no; nɛ tsui mi nɔ pomi nɛ ngɛ mumi mi, nɛ pi ngmami okadi mi ɔ, ji nɔ pomi nɛ e yi jemi ɔ ji nimli a ngɔ, se mohu Mawu ngɔ e jee.

Currently Selected:

Romabi 2: DAN77

Highlight

Copy