Romabi 15

Pee ha ni kpahi

1Wɔ ninɛmɛ nɛ wa ngɛ he wami ɔ, e sa kaa wa kpeɔ ɔ ninɛmɛ nɛ a be he wami ɔ kɛ a gbɔjɔmi ɔmɛ, nɛ wa ko susu wɔ nitsɛmɛ wa he. 2Wa ti nɔ tsuaa nɔ nɛ sa e nyɛmi hɛ mi, konɛ e hi ha lɛ nɛ e nane nɛ nu si. 3Ejakaa Kristo hu susu we lɛ nitsɛ e he; se mohu kaa bɔ nɛ a ngma a: “Ninɛmɛ nɛ bɔ mo ahlua a, a hlua bɔmi ɔ ba nɔ ye nɔ.” 4Ejakaa nihi abɔ nɛ a ngma ngɔ to momo ɔ, wɔ nitsɛmɛ wa he ni tsɔɔmi he a ngma ngɔ to ngɛ ɔ nɛ, konɛ waa kɛ tsui si tomi kɛ ngmami ɔmɛ a mi bua jɔmi ɔ nɛ na hɛ kɛ nɔ fɔmi. 5Se tsui si tomi kɛ bua jɔmi Mawu ɔ, e ha nɛ nyɛ na juɛmi kake ngɛ nyɛ kpɛti kaa Kristo Yesu; 6konɛ nyɛɛ kɛ juɛmi kake kɛ nya kake nɛ wo Mawu kɛ wa Nyɔmtsɛ Yesu Kristo Tsɛ ɔ hɛ mi nyami.

Sane Kpakpa nɛ a kɛ ha majeli ɔmɛ

7Lɔ ɔ he ɔ, nyɛ he nyɛ he kaa nyɛmimɛ, kaa bɔ nɛ Kristo he nyɛ kɛ ba Mawu hɛ mi nyami ɔ mi ɔ. 8Se i ngɛ dee ke Yesu Kristo plɛ sɔmɔlɔ kɛ ha Yudafo ɔmɛ ngɛ Mawu anɔkuale ɔ he, konɛ e kɛ ma si nɛ a wo tsɛmɛ ɔmɛ ɔ a nɔ mi, 9konɛ majeli ɔmɛ a wo Mawu hɛ mi nyami ngɛ mɔbɔ nami he, kaa bɔ nɛ sa ngma a ke:

“Enɛ ɔ he ɔ ma je o yi ngɛ majeli ɔmɛ a kpɛti,

Nɛ ma wo o biɛ ta kɛ la.”

10Nɛ e pa de ke:

“Nyɛ majeli, nyɛɛ kɛ e ma a nɛ nya!”

11Nɛ jeha nɛ ɔ hu:

“Nyɛ je Nyɔmtsɛ ɔ yi, nyɛ majeli kulaa,

Nɛ nyɛ je e yi wawɛɛ, nyɛ mahi kulaa!”

12Nɛ jeha nɛ ɔ Yesaia de ke:

“Isai sipoku ɔ maa ba,

Nɔ nɛ maa te si konɛ e baye majeli ɔmɛ a nɔ ɔ;

Lɛ e nɔ majeli ɔmɛ maa ngɔ a hɛ ngɔ fɔ.”

13Jeha nɛ hɛ kɛ nɔ fɔmi Mawu ɔ nɛ ngɔ bua jɔmi kɛ he jɔmi tsuo ngɔ wo nyɛ tɔtɔɔtɔ ngɛ hemi kɛ yemi mi, konɛ nyɛ na hɛ kɛ nɔ fɔmi nɛ be nɔ ngɛ Mumi Klɔuklɔu he wami mi.

Nɔ he je nɛ Paulo ngma womi kɛ kã

14Se mamimɛ, imi nitsɛ hu i ngɛ he wami ngɛ nɔ ngɛ nyɛ he kaa nyɛ nitsɛmɛ tete nyɛ hyi tɔtɔɔtɔ kɛ mi mi himi, nɛ ni lemi kulaa hyi nyɛ tɔ, nɛ nyɛ nyɛɔ tuɔ munyu tsɔɔ nyɛ he hulɔ. 15Se i kɛ kã fuu ngma munyu nɛ ɔmɛ ekomɛ mane nyɛ, konɛ ma kɛ kai nyɛ ngɛ dloomi nɛ Mawu ngɔ ha mi ɔ he, 16konɛ ma plɛ Yesu Kristo sɔmɔlɔ ha majeli ɔmɛ, nɛ ma tsu Mawu Sane Kpakpa a he osɔfo ni tsumi ɔ, konɛ majeli ɔmɛ nɛ plɛ bɔ nɛ sa Mawu hɛ mi saminya nɛ a tsukɔ he ngɛ Mumi Klɔuklɔu mi. 17Lɔ ɔ he ɔ i ngɛ fiami nihi ngɛ Kristo Yesu mi ngɛ Mawu blɔfami ni ɔmɛ a mi. 18Ejakaa i be kae kaa ma de nɔ́ ko kaa ja nɔ́ nɛ Kristo gu ye nɔ tsu ngɔ ha majeli ɔmɛ a tue bumi, ngɛ munyu kɛ ni peemi nihi a mi, 19ngɛ okadihi kɛ nyakpɛ nihi a he wami mi, ngɛ Mawu Mumi he wami mi; enɛ ɔ he nɛ i je Yerusalem kɛ bɔle si hluu kɛ ya su Ilirikum, nɛ i fiɛ Kristo Sane Kpakpa a kɛ gbe nya a nɛ. 20Nɔ́ nɛ i kɛ ma ye hɛ mi ji kaa, he nɛ a wui Kristo biɛ ta ngɛ ɔ, lejɛ ɔ ma jaje Sane Kpakpa a ngɛ, benɛ pee nɛ ma ko ya fia ngɔ to nɔ kpa sisitomi nɔ. 21Se mohu kaa bɔ nɛ a ngma a ke:

“Nihi nɛ a jaje we e he sane ko ngɔ tsɔɔ we mɛ ɔ,

A maa na,

Nɛ nihi nɛ nui ɔ,

A maa nu sisi.”

Paulo Romayami he blɔnyatomi

22Enɛ ɔ nɔuu lɛ tsi mi blɔ hluu nɛ i bɛ nyɛ ngɔ ɔ nɛ. 23Se jaha nɛ akɛnɛ i be nɔ́ ko peemi ngɛ hiɛ ɔ ni ɔmɛ a mi hu, nɛ jeha nɛ i je jehahi fuu hla kaa ma ba nyɛ ngɔ he ɔ, 24be tsuaa be nɛ ma hia blɔ kɛ maa ya Spania a, ma ba nyɛ ngɔ; ejakaa ye hɛ ngɛ nɔ kaa ke ma gu lejɛ ɔ blɔ ɔ, ma ba na nyɛ hɛ mi konɛ, ke i na bua jɔmi bɔɔ ngɛ nyɛ ngɔ se ɔ, nɛ nyɛ ya je mi blɔ kɛ ya lejɛ ɔ. 25Se jeha nɛ ɔ, i hia blɔ kɛ yaa Yerusalem, nɛ ma ya sɔmɔ klɔuklɔu bi ɔmɛ lolo. 26Ejakaa Makedonia kɛ Akaia tsuo kɛ tsui mi jɔmi tsu onia ko kɛ yaa ha klɔuklɔu bihi nɛ ngɛ Yerusalem ɔ a kpɛti ohiafo ɔmɛ.

27Tsui mi jɔmi nya a pee ngɛ niinɛ mohu, se jeha nɛ a hɛɛ mɛ hiɔ. Ejakaa ke majeli ɔmɛ na a mumi mi ni kpakpa amɛ eko ɔ, lɛɛ e sa kaa mɛ hu a kɛ he lo mi ni kpakpa amɛ eko nɛ sɔmɔ mɛ. 28Lɔ ɔ he ɔ ke i gbe enɛ ɔ nya nɛ i ngɔ nike ni nɛ ɔ kɛ ya ha mɛ ɔ, ma ba gu nyɛ ngɔ kɛ ya Spania. 29I le kaa ke i ba nyɛ ngɔ ɔ, Kristo gbaami hiɛmi ɔ mi ma ba ngɛ.

30Se i kpa nyɛ pɛɛ, mamimɛ, ngɛ wa Nyɔmtsɛ Yesu Kristo he kɛ Mumi ɔ suɔmi he, kaa nyɛɛ piɛ ye he kɛ plee ngɛ nyɛ sɔlemihi nɛ nyɛ sɔlee ngɔ haa mi ngɛ Mawu hɛ ni ɔ mi, 31konɛ a je mi kɛ je tue gboli nɛ ngɛ Yudea amɛ a dɛ mi, konɛ sɔmɔmi nɛ i yaa sɔmɔ ngɛ Yerusalem ɔ, e sa ni klɔuklɔu ɔmɛ a hɛ mi saminya, 32konɛ ngɛ Mawu suɔmi nya a, i kɛ bua jɔmi nɛ ba nyɛ ngɔ, nɛ ma ba wo ye tsui ngɛ nyɛ ngɔ. 33He jɔmi Mawu ɔ kɛ nyɛ tsuo nɛ hi si! Amen.

Currently Selected:

Romabi 15: DAN77

Highlight

Copy