Romabi 16

Paulo sɛmanemi munyuhi

1I ngɛ wa nyɛmi yo Foibe nɛ ji Kenkrea asafo ɔ sɔmɔlɔ ɔ yi jee kɛ ngɛ nyɛ hae, 2konɛ nyɛ he lɛ hɛ muɔ ngɛ Nyɔmtsɛ ɔ mi bɔ nɛ sa ni klɔuklɔu ɔmɛ, nɛ nyɛɛ piɛ e he ngɛ ni tsumi tsuaa ni tsumi nɛ nyɛ he maa hia lɛ ngɛ mi ɔ mi; ejakaa lɛ nitsɛ hu, e ji nihi fuu kɛ imi nitsɛ hu ye he piɛlɔ.

3Nyɛ nga Priska kɛ Akwila, nɛ ji ye huɛmɛ ni tsuli ngɛ Kristo Yesu mi ɔ ha mi, 4nihi nɛ kɛ a he wo gbenɔ mi ngɛ ye wami he, nɛ pi imi kɛkɛ nɛ i naa mɛ si, se mohu majeli ɔmɛ a mi asafo ɔmɛ kulaa hu ngɛ mɛ si nae. 5Nyɛ nga asafo nɛ ngɛ a we ɔ hulɔ.

Nyɛ nga ye suɔlɔ Epaineto nɛ ji kekleekle nɔ ngɛ Asia nɛ kɛ e he ha Kristo ɔ. 6Nyɛ nga Maria nɛ gbo wa he dengme fuu ɔ. 7Nyɛ nga Androniko kɛ Yunia, ye wekuli nɛ a wo i kɛ mɛ tsu mi, nɛ a ngɛ biɛ ngɛ bɔfo ɔmɛ akpɛti nɛ a sɛ ye hlami ngɛ Kristo mi ɔ.

8Nyɛ nga Amplia, nɔ nɛ i suɔ ngɛ Nyɔmtsɛ ɔ mi ɔ. 9Nyɛ nga Urbano nɛ ji wa huɛ ni tsulɔ ngɛ Kristo mi ɔ, kɛ ye suɔlɔ Staki. 10Nyɛ nga Apele nɔ nɛ he nu si ngɛ Kristo mi ɔ. Nyɛ nga nihi nɛ je Aristobulo we mi bi ɔmɛ a kpɛti ɔ. 11Nyɛ nga ye wekuno Herodion ɔ. Nyɛ nga nihi nɛ je Marsiko we mi bi ɔmɛ a kpɛti nɛ a ngɛ Nyɔmtsɛ ɔ mi ɔ.

12Nyɛ nga Trifaina kɛ Trifosa nɛ bɔɔ mɔde ngɛ Nyɔmtsɛ ɔ mi ɔ. Nyɛ nga Persi, nɔ nɛ a suɔ nɛ e tsu ni fuu ngɛ Nyɔmtsɛ ɔ mi ɔ. 13Nyɛ nga Rufo, nɔ nɛ a hla ngɛ Nyɔmtsɛ ɔ mi ɔ nɛ e nyɛ pee mi bi hulɔ ɔ. 14Nyɛ nga Asinkrito, Felgon, Herma, Patroba, Herme kɛ nyɛmimɛ nɛ kɛ mɛ ngɛ ɔ. 15Nyɛ nga Filogo kɛ Yulia, Nerea kɛ e nyɛmi yo ɔ, kɛ Olimpa kɛ ni klɔuklɔu ɔmɛ nɛ kɛ mɛ ngɛ ɔ kulaa.

16Nyɛɛ kɛ nya he fiɔmi klɔuu nɛ nga nyɛ he. Kristo asafo ɔ tsuo biɔ nyɛ.

Nyagbe nitsɔɔmi

17Jeha nɛ, mamimɛ, i kpa nyɛ pɛɛ nɛ nyɛ hɛ nɛ hi nihi nɛ jee tsɔɔmi nɛ nyɛ kase ɔ se nɛ a kɛ mi gbamihi kɛ kpangmi tomi nihi baa amɛ a he, nɛ nyɛɛ hɛ nyɛ he kɛ je a he. 18Ejakaa nihi nɛ ngɛ kikɛ ɔ, pi wa Nyɔmtsɛ Yesu Kristo nɛ a sɔmɔɔ, se mohu mɛ nitsɛmɛ a muklii; nɛ a kɛ nya mi dɔkɔɔ kɛ sisimi munyuhi mlɔɔ nihi nɛ li yayami ɔmɛ a tsui. 19Se nyɛɛ lɛɛ, nyɛ tue bumi ɔ nihi tsuo nu he, lɔ ɔ he ɔ i na nyɛ he bua jɔmi. Se i suɔ kaa nyɛɛ pee nyɛ he ni leli ngɛ nɔ kpakpa blɔfami; se nɔ yayami blɔfami ɔ, nihi nɛ a li nɔ́ ko. 20Se e be kɛe nɛ he jɔmi Mawu ɔ maa naa Satan nɔ kulaa ngɛ nyɛ nane si.

Wa Nyɔmtsɛ Yesu Kristo dloomi ɔ kɛ nyɛ nɛ hi si!

21Ye huɛ ni tsulɔ Timoteo kɛ ye wekuli Lukio kɛ Yason kɛ Sosipatre biɔ nyɛ.

22Imi Tortio hu nɛ i ngma kikɛmɛ a womi nɛ ɔ i biɔ nyɛ ngɛ Nyɔmtsɛ ɔ mi.

23Gaio nɛ ji i kɛ asafo ɔ kulaa wetsɛ ɔ biɔ nyɛ. Erasto nɛ ji ma sika tolɔ ɔ, kɛ wa nyɛmi Kwarto biɔ nyɛ.

24[Wa Nyɔmtsɛ Yesu Kristo dloomi ɔ kɛ nyɛ tsuo kulaa nɛ hi si! Amen.]

Nyagbe yijemi sɔlemi

25Se nɔ nɛ ma nyɛ ma ha nɛ nyɛ fi si wawɛɛ ngɛ Sane Kpakpa a kɛ Yesu Kristo fiɛmi ɔ nya, ngɛ laami sane nɛ a ngɔ laa kɛ je neneene lokoo ɔ kpo jemi nya a, 26nɔ́ nɛ jeha nɛ je ngɔ tsɔɔ paa ngɛ neneene Mawu ɔ kita nya a, nɛ a gu gbali ɔmɛ a ngmami ɔmɛ a nɔ wo nɔ ta tsɔɔ majeli ɔmɛ kulaa konɛ a bu hemi kɛ yemi ɔ tue — 27lɛ Mawu nɛ ji ni lelɔ kake too ɔ, a ngɔ nyami ngɔ ha ngɛ Yesu Kristo mi kɛ ya neneene! Amen.

Currently Selected:

Romabi 16: DAN77

Highlight

Copy