Yohane 18
18
Yesu numi
(Mateo 26.47-56; Marko 14.43-50; Luka 22.47-53)
1Benɛ Yesu tu munyu nɛ ɔmɛ se ɔ, e kɛ e kaseli ɔmɛ je kpo nɛ a ya po Kedron pa a kɛ ho he nɛ abɔɔ ko ngɛ ɔ ya, nɛ e kɛ e kaseli ɔmɛ sɛ mi. 2Se Yuda, nɔ nɛ ya tsɔɔ e se blɔ ɔ, hu le lejɛ ɔ, ejakaa Yesu kɛ e kaseli ɔmɛ pɔɔ kpemi ngɛ lejɛ ɔ. 3Jeha nɛ ɔ Yuda ya ngɔ aslaafohi kɛ tsɔli kɛ je osɔfo nikɔtɔma amɛ kɛ Farisifo ɔmɛ a ngɔ, nɛ a hɛɛ kanehi kɛ hahi kɛ dadehi kɛ ba lejɛ ɔ. 4Akɛnɛ Yesu le nihi tsuo nɛ ma e nɔ ɔ, e je kpo nɛ e bi mɛ ke: “Mɛnɔ nyɛ ngɛ hlae?” 5A he nɔ ke: “Yesu Nazareno ɔ.” Yesu de mɛ ke: “Imi ji nɛ ɔ nɛ.” Se Yuda, nɔ nɛ ya tsɔɔ e se blɔ ɔ hu kɛ mɛ daa si. 6Jeha nɛ ɔ benɛ e de mɛ ke: “Imi ji nɛ ɔ” ɔ, a gbee senya senya nɛ a ya pue si. 7Kɛkɛ nɛ e kpale bi mɛ ekohu ke: “Mɛnɔ nyɛ ngɛ hlae?” Nɛ a ke: “Yesu, Nazareno ɔ.” 8Yesu he nɔ nɛ e de mɛ ke: “I de nyɛ ke: Ami ʼi; lɔ ɔ he ɔ ke imi nyɛ ngɛ hlae ɔ, lɛɛ nyɛ ha ni nɛ ɔmɛ nɛ a ya.” 9(Konɛ munyu nɛ a tu ke: “Nihi nɛ o ngɔ ha mi ɔ, i ha we nɛ a ti nɔ ko nɛ laa” a nɛ ba mi.) 10Kɛkɛ nɛ Simon Petro nɛ hɛɛ klaate ɔ hia nɛ e kɛ ja osɔfo nɔkɔtɔma a nyɔguɛ ɔ nɛ e po e hiɛ ɔ nɔ tue; se nyɔguɛ ɔ biɛ ji Malko. 11Lɔ ɔ he ɔ Yesu de Petro ke: “Ngɔɔ o klaate ɔ ngɔ wo e kpo ɔ mi. Anɛ kplu nɛ Tsaatsɛ ngɔ ha mi ɔ, ma ko nu lo?”
Yesu ngɛ Hana hɛ mi
12Kɛkɛ nɛ aslaafo ɔmɛ kɛ asafoatsɛ nɔkɔtɔma a kɛ Yudafo ɔmɛ a tsɔli ɔmɛ nu Yesu nɛ a fi lɛ, 13nɛ a kpaka lɛ kɛ ho Hana ngɔ ya kekle, ejakaa Kaiafa nɛ ngɛ osɔfo nɔkɔtɔma yee ngɛ lɛ jeha a nɔ ɔ ngatsɛ ji lɛ. 14Kaiafa ji nɔ nɛ wo Yudafo ɔmɛ ga kaa e hi kaa nɔ kake gboɔ ngɛ ma a nane mi ɔ nɛ.
Petro kua Yesu
(Mateo 26.69-70; Marko 14.66-68; Luka 22.55-57)
15Nɛ Simon Petro kɛ kaselɔ kpa ko hu nyɛɛ Yesu se. Se osɔfo nɔkɔtɔma a le jamɛ a kaselɔ ɔ, nɛ e kɛ Yesu sɛ osɔfo nɔkɔtɔma a mɔ ɔ kpo ɔ kpɛti; 16se Petro daa si ngɛ agbo ɔ se. Lɔ ɔ he ɔ jamɛ a kaselɔ kpã a nɛ osɔfo nɔkɔtɔma a le ɔ je kpo, nɛ e ya de yo nɛ ngɛ sinya a nya bue ɔ, nɛ e ngɔ Petro kɛ ba we ɔ mi. 17Kɛkɛ nɛ yiheyo ɔ nɛ ngɛ sinya a nya bue ɔ de Petro ke: “Tse mo hu nyumu nɛ ɔ kaseli ɔmɛ eko ji mo?” E ke: “Dɛbi.”
18Se nyɔguɛ ɔmɛ kɛ sɔmɔli ɔmɛ daa si ngɛ lejɛ ɔ, a kɛ hã slɛ la, ejakaa fiɛ ngɛ, nɛ a ngɛ la hluee; nɛ Petro hu kɛ mɛ daa si ngɛ la a eko hluee.
Osɔfo nɔkɔtɔma a bi Yesu sane
(Mateo 26.59-66; Marko 14.55-64; Luka 22.66-71)
19Jeha nɛ ɔ osɔfo nɔkɔtɔma a bi Yesu e kaseli ɔmɛ kɛ e tsɔɔmi ɔ he munyu. 20Yesu he nɔ nɛ e de lɛ ke: “Pãa i tuɔ munyu kɛ tsɔɔ je ɔ. Daa nɛ ɔ i tsɔɔ ni ngɛ kpe he ɔmɛ kɛ sɔlemi we ɔ, he nɛ Yudafo ɔmɛ tsuo kpee ngɛ ɔ, nɛ i de we nɔ́ ko nɔ́ ko ngɛ laami mi. 21Mɛni he je o ngɛ imi mohu bie? Bi ninɛmɛ nɛ ba buɔ mi tue ɔ nɔ́n ɛ i deɔ mɛ; oʼɛ, ni nɛ ɔmɛ le nihi nɛ i deɔ ɔ.” 22Se benɛ e de kikɛ ɔ, sɔmɔli nɛ daa si ɔmɛ a ti nɔ kake gba Yesu ma nɛ e ke: “Heto nɛ o ha osɔfo nɔkɔtɔma a ji nɛ ɔ?” 23Yesu he nɔ ke: “Ke i de nɔ́ yaya ko ɔ, ye nɔ́ yaya a he odase, se ke kpakpa a, mɛni he je o ngɛ mi gbee?”
24Nɛ Hana ha a kɛ lɛ ya osɔfo nɔkɔtɔma Kaiafa ngɔ ngɛ kpa mi.
Petro kua Yesu ekohu
(Mateo 26.71-75; Marko 14.69-72; Luka 22.58-62)
25Se Simon Petro daa si nɛ e ngɛ la hluee. Jeha nɛ ɔ a de lɛ ke: “Tse mo hu e kaseli ɔmɛ e ko ji mo?” E kua nɛ e ke: “Dɛbi.” 26Osɔfo nɔkɔtɔma a nyɔguɛ ɔmɛ a ti nɔ kake nɛ ji nɔ nɛ Petro po e tue ɔ wekuno ɔ, ke: “Anɛ i nɛ o kɛ lɛ ngɛ abɔɔ ɔ mi lo?” 27Nɛ Petro kua ekohu, kɛkɛ nɛ nɔuu nɛ kungwɔ kpa nɔ.
Yesu ngɛ Pilato hɛ mi
(Mateo 27.1-2, 11-14; Marko 15.1-5; Luka 23.1-5)
28Kɛkɛ nɛ a kpaka Yesu kɛ je Kaiafa ngɔ kɛ ho kojomi he ɔ ya. Nɛ e su makɛ. Mɛ nitsɛmɛ ɔ lɛɛ a sɛ we kojomi he ɔ, konɛ a ko ble a he, benɛ pee nɛ a nyɛ nɛ a ye Hetsɔmi ɔ. 29Jeha nɛ ɔ Pilato je kpo kɛ ba a ngɔ nɛ e ke: “Mɛni sane nyɛɛ kɛ ba ngɛ nyumu nɛ ɔ nɔ fɔe?” 30A he nɔ nɛ a de lɛ ke: “Pi yayami peelɔ ji lɛ jinɛ waa kɛ lɛ ba be mo hae.” 31Kɛkɛ nɛ Pilato de mɛ ke: “Nyɛɛ ngɔ lɛ nɛ nyɛ nitsɛmɛ nyɛ ya kojo lɛ ngɛ nyɛ mlaa a nya.” Yudafo ɔmɛ de lɛ ke: “Wɔɔ lɛɛ wa be he blɔ kaa wa gbee nɔ ko.” 32(Konɛ Yesu munyu nɛ e tu kɛ tsɔɔ nɔ gbenɔ nɛ e ma gbo ɔ nɛ ba mi.) 33Kɛkɛ nɛ Pilato kpale sɛ kojomi he ɔ ekohu, nɛ e tsɛ Yesu nɛ e bi lɛ ke: “Anɛ mo ji Yudafo ɔmɛ a matsɛ ɔ lo?” 34Yesu he nɔ ke: “Mo nitsɛ o yi mi o to ngɛ enɛ ɔ dee nɛ ɔ, aloo ni komɛ lɛ a de mo ja ngɛ ye he?” 35Pilato he nɔ nɛ e de lɛ ke: “Anɛ Yuda no ji mi lo? Mo nitsɛ o ma mi bi kɛ osɔfo nikɔtɔma amɛ lɛ a ngɔ mo ha mi. Mɛni o pee?” 36Yesu he nɔ ke: “Ye matsɛ yemi ɔ ji je nɛ ɔ mi; ye matsɛ yemi ɔ je je nɛ ɔ mi jinɛ, ye sɔmɔli ɔmɛ maa plee he, konɛ a ko ngɔ mi ngɔ ha Yudafo ɔmɛ; se enɛ ɔ ɔ, ye matsɛ yemi ɔ ji hiɛ ɔ.” 37Lɔ ɔ he ɔ Pilato bi lɛ ke: “Lɛɛ matsɛ ji mo kɛ̃ lo?” Yesu he nɔ ke: “Jã o de ɔ nɛ; ejakaa matsɛ ji mi. Imi lɛɛ enɛ ɔ he a fɔ mi, nɛ enɛ ɔ he nɔuu i ba je ɔ mi ngɛ, konɛ ma ba ye anɔkuale ɔ he odase. Nɔ tsuaa nɔ nɛ je anɔkuale ɔ mi ɔ nuɔ ye gbi.” 38Pilato bi lɛ ke: “Mɛni ji anɔkuale?”
A bu Yesu gbenɔ fɔ
(Mateo 27.15-31; Marko 15.6-20; Luka 23.13-25)
Nɛ benɛ e de enɛ ɔ ɔ, e je kpo kɛ ho Yudafo ɔmɛ a ngɔ ya ekohu, nɛ e ya de mɛ ke: “Imi lɛɛ i nɛ fɔ bumi sane ko kulaa ngɛ e he. 39Se nyɛ ngɛ blɔ nya ko kaa i ngmɛɔ nɔ kake he haa nyɛ ngɛ Hetsɔmi nyami ligbi ɔ nɔ; lɔ ɔ he ɔ, nyɛ suɔ nɛ ma ngmɛɛ Yudafo ɔmɛ a matsɛ ɔ he ha nyɛ lo?” 40Kɛkɛ nɛ mɛ tsuo a kpa ngmlaa ekohu ke: “Tsa pi nɔ nɛ ɔ, se Baraba mohu!” Kpahu Baraba a ojo fialɔ ji lɛ.
Currently Selected:
Yohane 18: DAN77
Highlight
Copy
Compare
Share
Want to have your highlights saved across all your devices? Sign up or sign in
Dangme New Testament © United Bible Societies, 1977.
