Yohane 17
17
Yesu kpa pɛɛ kɛ ha e kaseli ɔmɛ
1Benɛ Yesu de ni nɛ ɔmɛ se ɔ, e wo e hɛ nɔ kɛ ya hiɔwe, nɛ e ke: “Tsaatsɛ, ngmlɛfia a su. Wo o bi ɔ hɛ mi nyami, konɛ o bi ɔ hu nɛ wo o hɛ mi nyami. 2Ejakaa o ha lɛ he blɔ ngɛ he lo tsuo nɔ, konɛ nihi tsuo nɛ o ngɔ ha lɛ ɔ, e ha mɛ neene wami. 3Se enɛ ɔ ji neneene wami ɔ nɛ, kaa a le mo, anɔkuale Mawu kake ɔ, kɛ Yesu Kristo nɔ nɛ o tsɔ ɔ. 4Imi lɛɛ i wo o hɛ mi nyami ngɛ zugba a nɔ, akɛnɛ ni tsumi ɔ nɛ o ha mi tsumi ɔ i gbe nya a. 5Nɛ jeha nɛ ɔ, Tsaatsɛ, ngɔɔ hɛ mi nyami nɛ i ngɛ ngɛ o ngɔ loko a bɔ je ɔ ngɔ wo ye hɛ mi nyami.
6“I je o biɛ ɔ si ngɔ tsɔɔ nimli nɛ o ngɔ kɛ je je ɔ mi ha mi ɔ. O nihi ji mɛ, nɛ o ngɔ mɛ ngɔ ha mi, nɛ a ye o munyu ɔ nɔ. 7Jeha nɛ ɔ a le kaa nihi kulaa nɛ o ngɔ ha mi ɔ, o ngɔ a je, 8ejakaa munyu ɔmɛ nɛ ɔ ngɔ ha mi ɔ, i ngɔ ha mɛ; nɛ a he, nɛ a na le faii kaa o ngɔ i je, nɛ a he ye kaa mo lɛ o tsɔ mi. 9Imi lɛɛ, mɛ i ngɛ pɛɛ kpae kɛ ngɛ hae; tsa pi je ɔ nɛ i ngɛ pɛɛ kpae kɛ ngɛ hae, se mohu nihi nɛ o ngɔ ha mi ɔ, ejakaa o nihi ji mɛ; 10nɛ ye nihi tsuo kulaa a, o nɔ ʼi, nɛ o nɔ hu ɔ, ye nɔ ʼi, nɛ ye hɛ mi ba nyami ngɛ a mi. 11Nɛ i be je ɔ mi hu, se ni nɛ ɔmɛ ngɛ je ɔ mi, nɛ imi lɛɛ i ma o ngɔ. Tsaatsɛ klɔuklɔu, nihi nɛ o ngɔ ha mi ɔ, to mɛ ngɛ o biɛ ɔ mi, benɛ pee nɛ a pee kake kaa wɔ. 12Benɛ i kɛ mɛ ngɛ je ɔ mi ɔ, i to mɛ ngɛ o biɛ ɔ mi; nihi nɛ o ngɔ ha mi ɔ, i bu a he, nɛ a ti nɔ ko nɔ ko laa we, ja laami bi ɔ, konɛ nɔ́ nɛ a ngma a nɛ ba mi. 13Se jeha nɛ ɔ ɔ, i ma o ngɔ, nɛ i ngɛ ni nɛ ɔmɛ dee ngɛ je ɔ mi, konɛ a na ye bua jɔmi ɔ nɛ e nu si ngɛ a mi? 14I ngɔ o munyu ɔ ngɔ ha mɛ, nɛ je ɔ ngɛ mɛ nyɛe, ejakaa a ji je ɔ mi, kaa bɔ nɛ imi hu i ji je ɔ mi ɔ? 15I bi we kaa o je mɛ kɛ je je ɔ mi, se mohu kaa o bu a he kɛ je nɛ ɔ yayami ɔ dɛ mi. 16A ji je ɔ mi kaa bɔ nɛ imi hu i ji je ɔ mi ɔ. 17Pee mɛ klɔuklɔu ngɛ anɔkuale ɔ mi; o munyu ɔ anɔkuale ʼi. 18Kaa bɔ nɛ o tsɔ mi je ɔ mi ɔ, ja nɔuu imi hu i ngɛ mɛ je ɔ mi tsɔe. 19Nɛ a he nɛ imi nitsɛ i peɔ ye he klɔuklɔu ɔ nɛ, konɛ mɛ hu a pee mɛ klɔuklɔu ngɛ anɔkuale mi.
20“Se pi ni nɛ ɔmɛ a he kɛkɛ nɛ i ngɛ pɛɛ kpae ngɛ ɔ, se nihi nɛ ma he ye nɔ maa ye ngɛ a munyu ɔ nya a hulɔ. 21Konɛ mɛ tsuo a pee kake, kaa bɔ nɛ mo, Tsaatsɛ, o ngɛ ye mi nɛ imi hu i ngɛ o mi ɔ, konɛ mɛ hu a pee kake ngɛ wa mi, konɛ je ɔ nɛ he ye kaa mo lɛ o tsɔ mi. 22Nɛ hɛ mi nyami nɛ o ngɔ ha mi ɔ, i ngɔ ha mɛ, konɛ sa pee kake, kaa bɔ nɛ wɔ hu wa ngɛ kake ɔ. 23I ngɛ a mi, nɛ mo hu o ngɛ yɛ mi, konɛ a pee kake kɛ pi si, nɛ je ɔ nɛ le kaa mo lɛ o tsɔ mi, nɛ o suɔ mɛ kaa bɔ nɛ o suɔ mi ɔ.
24“Tsaatsɛ, nihi nɛ o ngɔ ha mi ɔ i suɔ kaa he nɛ i ngɛ ɔ mɛ hu a kɛ mi ba hi lejɛ ɔ, konɛ a na ye hɛ mi nyami nɛ o ngɔ ha mi ɔ, ejakaa o suɔ mi loko a to je ɔ sisi. 25Tsaatsɛ dalɔ, je ɔ li mo, se imi lɛɛ i le mo, nɛ ni nɛ ɔmɛ le kaa mo lɛ o tsɔ mi; 26nɛ i je o biɛ ɔ si ngɔ tsɔɔ mɛ, nɛ ma kpale je lɛ si ngɔ tsɔɔ, konɛ suɔmi nɛ o kɛ suɔ mi ɔ nɛ hi a mi nɛ imi hu ma hi a mi.”
Currently Selected:
Yohane 17: DAN77
Highlight
Copy
Compare
Share
Want to have your highlights saved across all your devices? Sign up or sign in
Dangme New Testament © United Bible Societies, 1977.
