Yohane 19
19
1Kɛkɛ nɛ Pilato ngɔ Yesu nɛ e fia lɛ kplibi, 2nɛ aslaafo ɔmɛ ngɔ mio kɛ pee jlasi nɛ a kɛ fi e yi, nɛ a wo lɛ tade tsutsu ko, 3nɛ a ba e ngɔ ba de ke: “Wa nga mo oo, Yudafohi a matsɛ!” Nɛ a gba e hɛ mi ma.
4Kɛkɛ nɛ Pilato je kpo ekohu nɛ e de mɛ ke: “Oʼɛ, i kɛ lɛ ngɛ kpo jee kɛ ma nyɛ ngɔ, konɛ nyɛ na le kaa i nɛ fɔbumi sane ko ngɛ e he.” 5Jeha nɛ ɔ Yesu je kpo nɛ mio jlasi ɔ fi e yi nɛ e wo tade tsutsu ɔ. Nɛ Pilato de mɛ ke: “Ne nɔmlɔ ɔ!” 6Jeha nɛ ɔ benɛ osɔfo nikɔtɔma amɛ kɛ sɔmɔli ɔmɛ na lɛ ɔ, a kpa ngmlaa ke: “Sɛu lɛ, sɛu lɛ!” Pilato de mɛ ke: “Nyɛ nitsɛmɛ nyɛɛ ngɔ lɛ nɛ nyɛ ya sɛu mɔ, ejakaa imi lɛɛ i nɛ fɔ bumi sane ko ngɛ e he.” 7Yudafo ɔmɛ he nɔ ke: “Wɔɔ lɛɛ wa ngɛ Mlaa, nɛ wa Mlaa a nya a, e sa gbenɔ, ejakaa e pee e he Mawu bi.”
8Lɔ ɔ he ɔ, benɛ Pilato nu kikɛmɛ a munyu nɛ ɔ, e ye gbeye pe kekle ɔ; 9nɛ e sɛ kojomi he ɔ ekohu, nɛ e bi Yesu ke: “Jije o je?” Se Yesu pui e nya mi. 10Nɛ Pilato de lɛ ke: “O be ye nya mi poe? Anɛ o li kaa i ngɛ he blɔ kaa i sɛuu mo, nɛ i ngɛ he blɔ hulɔ kaa i ngmɛɔ o he lo?” 11Yesu de lɛ ke: “Ke pi hiɔwe nɛ a je ngɔ ha mo ɔ, jinɛ o be he wami ko nae ngɛ ye nɔ; lɔ ɔ he ɔ nɔ nɛ je mi wo o dɛ mi ɔ he yayami ɔ kle pe o nɔ ɔ.” 12Kɛ je lɔ ɔ se ɔ Pilato hla kaa e maa ngmɛɛ e he; se Yudafo ɔmɛ kpa ngmlaa ke: “Ke o ngmɛɛ nɔ nɛ ɔ he ɔ, o pi Kaisare huɛ. Nɔ tsuaa nɔ nɛ peɔ e he matsɛ ɔ, e te si ngɔ wo Kaisare.” 13Lɔ ɔ he ɔ, benɛ Pilato nu kekɛmɛ a munyu nɛ ɔ ɔ, e kɛ Yesu je kpo, nɛ e ya hi kojomi sɛ ɔ nɔ, ngɛ he nɛ a ka tɛ ngɛ, nɛ Hebri mi ɔ a tsɛɛ lɛ Gabata a.
14Se Hetsɔmi ɔ dlami kɛ tomi ligbi ʼi, nɛ maa pee piani ngmlɛ nyɔngma kɛ enyɔ mi. Nɛ Pilato de Yudafo ɔmɛ ke: “Ne nyɛ matsɛ ɔ!” 15Se mɛɛ lɛɛ a kpa ngmlaa ke: “O kɛ lɛ nɛ ya, o kɛ lɛ nɛ ya! Sɛu lɛ!” Pilato bi mɛ ko: “Nyɛ matsɛ ɔ, ma sɛu lɛ lo?” Osɔfo nikɔtɔma amɛ he nɔ ke: “Wa be matsɛ ko kaa ja Kaisare.”
A sɛu Yesu
(Mateo 27.32-44; Marko 15.21-32; Luka 23.26-43)
16Kɛkɛ nɛ e ngɔ lɛ ngɔ ha mɛ nɛ a ya sɛu. Nɛ a ngo Yesu kɛ ho. 17Nɛ lɛ nitse e tloo e seumi tso ɔ kɛ ya he nɛ a tsɛɛ Yikoklodonya, nɛ Hebri mi ɔ a tsɛɛ lɛ Golgota a. 18Lejɛ ɔ a ya sɛu lɛ ngɛ; nɛ a kɛ ni kpahi enyɔ piɛ e he, nɔ kake ngɛ hiɛ ɔ, nɛ nɔ kɛke hu ngɛ hiɛ ɔ, nɛ Yesu ngɛ a kpɛti. 19Nɛ Pilato ngma womi ko ngɔ mɛtɛ e seumi tso ɔ yi mi; bɔ nɛ e ngma ji nɛ ɔ nɛ: “Yesu, Nazareno, Yudafo ɔmɛ a matsɛ ɔ.” 20Womi nɛ ɔ ɔ, Yudafo ɔmɛ a ti nihi fuu kane, ejakaa he nɛ a sɛu Yesu ngɛ ɔ kɛ ma a mi kɛ we; nɛ a ngma ngɛ Hebri kɛ Hela kɛ Roma gbi mi. 21Lɔ ɔ he ɔ Yudafo ɔmɛ a osɔfo nikɔtɔma amɛ de Pilato ke: “Koo ngma ke: ‘Yudafo ɔmɛ a matsɛ ɔ’ se mohu kaa lɛ lɛ e de ke: ‘Ami ji Yudafo ɔmɛ a matsɛ ɔ.’ ” 22Pilato he nɔ ke: “Nɔ nɛ i ngma a, i ngma.”
23Benɛ aslaafo ɔmɛ sɛu Yesu se ɔ, a kukuɔ e tade ɔmɛ, nɛ a dla mi mi dlami eywiɛ, aslaafo no kake nɔ́ kake, kɛ e gugue tade ɔ hulɔ. Se gugue tade ɔ be tsami he; a lo kɛ je hiɔwe kɛ ba ma si. 24Lɔ ɔ he ɔ a de ngɛ a kpɛti ke: “Nyɛ ko ha nɛ wa gba kɔlɔ ɔ, se nyɛ ha waa fɔ nɔ sɔ, konɛ waa na nɔ nɛ nɔ́ nɛ e maa pee.” Benɛ pee nɛ ngmami ɔ nɛ de ke:
‘A dla ye tade ɔmɛ ngɔ ha a he,
Nɛ ye he bo ɔ a fɔ́ nɔ sɔ’
ɔ nɛ ba mi. Enɛ ɔ ji nɔ́ nɛ aslaafo ɔmɛ pee ɔ nɛ.
25Se Yesu nyɛ kɛ e nyɛ nyɛmi yo, Maria, Klopa yo ɔ, kɛ Maria Magdalena daa si ngɛ Yesu sɛumi tso ɔ kasa nya. 26Nɛ, benɛ Yesu na e nyɛ kɛ kaselɔ nɛ e suɔ ɔ daa si ɔ, e de e nyɛ ke: “Maa, o bi ji nɛ ɔ nɛ!” 27Pee se ɔ, e de kaselɔ ɔ ke: “Oʼɛ, o nyɛ ji nɛ ɔ nɛ!” Nɛ kɛ je lɛ ngmlɛfia a nɔ ɔ, kaselɔ ɔ ngɔ lɛ kɛ ho lɛ nitsɛ e we mi ya.
Yesu gbenɔ
(Mateo 27.45-56; Marko 15.33-41; Luka 23.44-49)
28Nɛ enɛ ɔ se ɔ, akɛnɛ Yesu le kaa a gbe nihi kulaa nya momo ɔ, benɛ pee nɛ ngmami ɔ nɛ na ba mi ɔ, e ke: “Kuma ngɛ mi yee.” 29Jeha nɛ ɔ nɔ́ maa si ngɛ lejɛ ɔ ke e mi da nɛ kuã tɔtɔɔtɔ; nɛ a ngɔ wosuma ngɔ sɔ da nɛ kua a mi, nɛ a ngɔ ma paploo nya, nɛ a ngɔ to e nya he. 30Jeha nɛ ɔ benɛ Yesu he da nɛ kuã a, e ke: “A gbe nya!” Kɛkɛ nɛ e ma e yi si, nɛ e ngɔ e nya.
A gbɔ Yesu kasa mi nɔ́
31Kɛkɛ nɛ Yudafo ɔmɛ ya kpa Pilato pɛɛ ke a kuɔ a nanehi nɛ a je mɛ, benɛ pee nɛ a gbogboe ɔmɛ ko hi seumi tso ɔ nɔ ngɛ Hejɔɔmi Ligbi ɔ nɔ, ejakaa he dlami kɛ tomi ligbi ʼi, nɛ jamɛ a Hejɔɔmi Ligbi ɔ ji ligbi ngua. 32Lɔ ɔ he ɔ aslaafo ɔmɛ ho nɛ a ya kuɔ nihi nɛ a sɛu ngɔ piɛ Yesu he ɔmɛ a nanehi, kekleekle nɔ ɔ kɛ nɔ nɛ ji enyɔ ɔ tsuo. 33Se benɛ a su Yesu nɔ nɛ a na kaa e gbo momo ɔ, lɛɛ a kuɔ we e nanehi; 34se mohu aslaafo ɔmɛ a ti nɔ kake kɛ blɔ gbɔ e kasa mi, nɛ amlɔ ɔ muɔ kɛ nyu be kɛ je mi. 35Nɛ nɔ nɛ na a, lɛ e ye he odase nɛ ɔ nɛ, e odase ɔ anɔkuale ʼi, nɛ e le kaa anɔkuale e ngɛ tue, konɛ nyɛ hu nyɛ he ye. 36Ejakaa a pee ni nɛ ɔmɛ, konɛ nɔ́ nɛ a ngma ke: “A be e wu ko kue” ɔ nɛ ba mi. 37Nɛ jeha nɛ ɔ hu, ngmami kpa ko ke: “A maa hyɛ nɔ nɛ a gbɔ lɛ nɔ ɔ.”
Yesu pumi
(Mateo 27.57-61; Marko 15.42-47; Luka 23.50-56)
38Ni nɛ ɔmɛ a se ɔ, Yosef nɛ je Arimatia nɛ ji Yesu kaselɔ, se Yudafo ɔmɛ a he gbeye he ɔ e je we e he si ɔ, ya bi Pilato, konɛ e ha nɛ e ya je Yesu gbogboe ɔ; nɛ Pilato ha lɛ he blɔ. Lɔ ɔ he ɔ, e ho nɛ e ya je Yesu gebogboe ɔ kɛ ho. 39Nɛ Nikodemo, nɔ nɛ kekle ko nɛ e ba Yesu ngɔ nyɔ mi ɔ, hu kɛ mire kɛ aloe nɛ a futu maa pee sɛni tɛ jiɔmi lafa ba. 40Kɛkɛ nɛ a ngɔ Yesu gbogboe ɔ nɛ a kɛ kploba kɛ tsopa amɛ fi lɛ, kaa bɔ nɛ Yudafohi peɔ kɛ puɔ nɔ ɔ. 41Se he nɛ a sɛu Yesu ngɛ ɔ, abɔɔ ko ngɛ lejɛ ɔ, nɛ yɔkɔ he ko ngɛ abɔɔ ɔ mi nɛ a tui no ko ngɛ mi hyɛ; 42lɔ ɔ he ɔ, a ya dla Yesu ngɛ lejɛ ɔ ngɛ Yudafo ɔmɛ a he dlami kɛ tomi ligbi ɔ he, ejakaa yɔkɔ ɔ he kɛ we.
Currently Selected:
Yohane 19: DAN77
Highlight
Copy
Compare
Share
Want to have your highlights saved across all your devices? Sign up or sign in
Dangme New Testament © United Bible Societies, 1977.
