Bɔfo 9

Saulo tsuitsakemi

(Bɔfo 22.6-16; 26.12-18)

1Saulo ngɛ nɔ ngɛ he gbeye womi kɛ nɔ gbemi mumi mue kɛ ngɛ Nyɔmtsɛ ɔ kaseli ɔmɛ a nɔ puee kɛ mwɔɔ. E ya osɔfo nɔkɔtɔma a ngɔ, 2nɛ e ya bi lɛ womihi nɛ e kɛ ya Damasko kpe he ɔmɛ, benɛ pee nɛ ke e na ni kome nɛ hɛɛ kikɛmɛ a tsɔɔmi nɛ ɔ mi ɔ, nyumuhi jio, yihi jio, nɛ e fi mɛ nɛ e kpaka mɛ kɛ ba Yerusalem.

3Se bnɛ e nyɛɛ blɔ ɔ nɔ kɛ yaa nɛ e su Damasko ta a, si kake too ɔ, la kpɛ kɛ je hiɔwe kɛ ba bɔle lɛ, 4nɛ e tsɔ fia si, nɛ e nu gbi ko nɛ ngɛ lɛ dee ke: “Saulo, Saulo, mɛ he je o ngɛ mi yi mi wae?” 5Nɛ e ke: “Mo mɛnɔ, Mawetsɛ?” Se Nyɔmtsɛ ɔ ke: “Imi ji Yesu, nɔ nɛ o ngɛ lɛ yi mi wae ɔ nɛ. 6Tee si nɛ o ya ma a mi nɛ a maa tsɔɔ mɔ nɔ nɛ sa kaa o pee.” 7Kɛkɛ nɛ nyumuhi nɛ kɛ lɛ nyɛɛ ɔmɛ a nya ma kɛ daa si, a ngɛ gbi ɔ nue mohu se a nɛ nɔ ko nɔ ko. 8Saulo te si; se benɛ e bli e hɛngmɛ ɔ, e hyɛ we nɔ; nɛ a pɛtɛ e nine nya nɛ a kɛ lɛ ya Damasko. 9E hyɛ we nɔ, jeha nɛ ɔ hu e yi ni nɛ e nui nɔ ko hulɔ ligbi etɛ sɔuu.

10Se kaselɔ ko ngɛ Damasko nɛ a tsɛɛ lɛ Anania; nɛ Nyɔmtsɛ ɔ de lɛ ngɛ ninami mi ke: “Anania!” Nɛ e ke: “Ne mi, Nyɔmtsɛ.” 11Nɛ Nyɔmtsɛ ɔ de lɛ ke: “Tee si nɛ o ya gbɛjegbɛ nɛ a tsɛɛ Tlɔmɔɔ ɔ nɔ, nɛ o ya bi nɔ ko nɛ a tsɛɛ lɛ Saulo nɛ je Tarso ɔ si ngɛ Yuda we ɔ mi; oʼɛ, e ngɛ sɔlee.” 12Nɛ Saulo na ngɛ ninami mi kaa nyumu ko nɛ a tsɛɛ lɛ Anania a ma e ngɔ, nɛ e kɛ eninehi ngɛ e nɔ fɔe, benɛ pee nɛ e hyɛ nɔ ekohu. 13Se Anania he nɔ nɛ e ke: “Nyɔmtsɛ, i nu kikɛmɛ a nyumu nɛ ɔ he sane ngɛ nihi fuu a nya kaa e pee o ni klɔuklɔu ɔmɛ nɛ ngɛ Yerusalem ɔ ni yayami babauu. 14Nɛ hiɛ ɔ hu tete, e na he blɔ kɛ je osɔfo nikɔtɔma amɛ a ngɔ kaa e ba fi nihi tsuo nɛ tɛliɔ ngɛ o biɛ ɔ mi ɔ.” 15Se Nyɔmtsɛ ɔ de lɛ ke: “Yaa, ejakaa nɔ nɛ ɔ ji ye dɛ mi dade nɛ a hla ha mi, konɛ e hɛɛ ye biɛ ɔ kɛ ya majemajeli kɛ matsɛmɛ kɛ Israelbi ɔmɛ hu a hɛ mi. 16Ejakaa ma tsɔɔ lɛ dengmehi abɔ nɛ e maa na ngɛ ye biɛ ɔhe.”

17Kɛkɛ nɛ Anania pue nɔ kɛ ho nɛ e ya sɛ we ɔ mi, nɛ e kɛ e ninehi pue e nɔ nɛ e ke: “Maminyumu Saulo, Mawetsɛ Yesu, nɔ nɛ je e he kpo tsɔɔ mo benɛ o ma ngɛ blɔ ɔ nɔ ɔ tsɔ mi o ngɔ, benɛ pee nɛ o hyɛ nɔ ekohu nɛ o hyi fuu kɛ Mumi Klɔuklɔu ɔ.” 18Nɛ amlɔ ɔ ni komɛ je e hɛngmɛ nɔ pue si kaa lo toto nɛ e hyɛ nɔ́ amlɔ, nɛ e te si nɛ a baptisi lɛ; 19nɛ e ye ni, nɛ e he wa lɛ. Nɛ e kɛ kaseli nɛ ngɛ Damasko ɔ hi si be bɔɔ ko.

Saulo fiɛ ngɛ Damasko

20Nɛ amlɔ ɔ nɔuu, e fiɛ ngɛ kpe he ɔmɛ ke Yesu ji Mawu bi ɔ nɛ. 21Nɛ nihi kulaa nɛ nu ɔ nya kpɛ a he, nɛ a ke: “Anɛ pi nɔ nɛ ɔ nɛ kpataa nihi nɛ tɛliɔ ngɛ kikɛmɛ a biɛ nɛ ɔ mi ɔ a hɛ mi ngɛ Yerusalem ɔ ji nɛ ɔ lo? Nɛ hiɛ ɔ hu tete, lɔ ɔ nɔuu he e ba ngɛ, konɛ e ba fi mɛ nɛ e kpaka mɛ kɛ ya osɔfo nikɔtɔma amɛ a ngɔ?”

22Se Saulo na hewami babauu, nɛ e ha Yudafohi nɛ ngɛ Damasko ɔmɛ a nya mi munyu ta, ejakaa e tsɔɔ mɛ pãa kaa nɔ nɛ ɔ ji Kristo ɔ nɛ.

23Be saii se ɔ, Yudafo ɔmɛ ya sae yi nɔ ke a maa gbe lɛ. 24Se Saulo ba nu a somi ɔ he. Nɛ a buu ma a agbo ɔmɛ a nya daa nyɔ kɛ pia benɛ pee nɛ a gbe lɛ. 25Se kaseli ɔmɛ ngɔ lɛ wo kusii mi nyɔ mi, nɛ a siu lɛ kɛ gu gli ɔ nɔ kɛ ya ma si.

Saulo ngɛ Yerusalem

26Benɛ Saulo ba Yerusalem ɔ, e ka e he kɛ kaseli ɔmɛ a he bɔmi, se mɛ tsuo a ngɛ lɛ gbeye yee, a he we yi kaa kaselɔ ji lɛ. 27Se Barnaba ngɔ lɛ kɛ ya bɔfo ɔmɛ a ngɔ, nɛ e ya sɛɛ ha mɛ bɔ nɛ Paulo na Nyɔmtsɛ ɔ ngɛ blɔ ɔ nɔ nɛ e kɛ lɛ tu munyu, kɛ bɔ nɛ e pee kã ngɛ Yesu biɛ ɔ mi ngɛ Damasko. 28Nɛ e kɛ mɛ yaa baa ngɛ Yerusalem nɛ e pee kã ngɛ Yesu biɛ ɔ mi. 29Nɛ e kɛ Helenebi ɔmɛ tu munyu nɛ e kɛ mɛ hla nihi a nya; se mɛɛ lɛɛ a ngɛ lɛ hlae nɛ a gbe. 30Benɛ nyɛmimɛ ɔmɛ nu he ɔ, a ya sɛ lɛ Kaisarea, nɛ a ha e ho Tarso ya.

31Jeha nɛ ɔ asafo ɔ na he jɔmi ngɛ Yudea kɛ Galilea kɛ Samaria tsuo, nɛ a nane nu si, nɛ a nyɛɛ ngɛ Nyɔmtsɛ ɔ gbeye yemi mi, nɛ a he sange mɛ ngɛ Mumi Klɔuklɔu ɔ bua womi mi.

Petro ngɛ Lida kɛ Yopa

32E ba mi kaa benɛ Petro ya kpa he ɔmɛ tsuo ɔ, e ba ni klɔuklɔuhi nɛ ngɛ Lida a hu a ngɔ. 33Nɛ e ba na nyumu ko ngɛ lejɛ ɔ nɛ a tsɛɛ lɛ Ainea nɛ e fɔɔ si ngɛ sa nɔ kɛ kuɔmi hiɔ jeha kpaanyɔ sɔuu. 34Nɛ Petro de lɛ ke: “Ainea, Yesu Kristo ngɛ mo tsae; tee si nɛ mo nitsɛ o dla o sa a!” Nɛ amlɔ ɔ, e te si. 35Nɛ nihi tsuo nɛ ngɛ Lida kɛ Saron ɔ na lɛ, nɛ a tsake kɛ ba Nyɔmtsɛ ɔ ngɔ.

36Se yo kaselɔ ko ngɛ Yopa nɛ a tsɛɛ lɛ Tabita, e sisi ji Dorka (odabɔ). Lɛɛ e hyi tɔ kɛ ni tsumi kpakpahi kɛ ohiafohi a hyemi. 37Se e ba mi kaa jamɛ a be ɔmɛ a mi ɔ, e ba nu hiɔ nɛ e gbo. A du ha lɛ nɛ a kɛ lɛ ya fɔ hiɔwe tsu ko mi. 38Se akɛnɛ Lida kɛ Yopa kɛ we, nɛ kaseli ɔmɛ nu kaa Patro ngɛ lejɛ ɔ he je ɔ, a tsɔ nyumuhi enyɔ kɛ ya e ngɔ ya kpa lɛ pɛɛ ke e ko hlua si, se e ba a ngɔ oya. 39Petro te si nɛ e kɛ mɛ ho. Nɛ benɛ e su lejɛ ɔ, a kɛ lɛ ya hiɔwe tsu ɔ mi, nɛ yaloyi ɔmɛ tsuo ba daa si ngɛ e kasa nya ngɛ ya foe, nɛ a kɛ gugue tadehi kɛ tadehi nɛ Dorka pee benɛ e kɛ mɛ ngɛ ɔ ngɛ lɛ tsɔɔe. 40Nɛ Petro fie mɛ kulaa kɛ je kpo, nɛ e kpla si nɛ e sɔle, nɛ e plɛ e he kɛ ya nɔ gbogboe ɔ ngɔ nɛ e ke: “Tabita, tee si!” Nɛ e bli e hɛngmɛ, nɛ benɛ e na Petro ɔ, e te si hi si. 41Nɛ Petro nu e nine si, nɛ e wo e nɔ; nɛ e tsɛ ni klɔuklɔu ɔmɛ kɛ yalɔyi ɔmɛ kɛ ba, nɛ e kɛ lɛ ba da a hɛ mi hɛkalɔ. 42Nɛ a nu he ngɛ Yopa tsuo, nɛ nihi fuu he Nyɔmtsɛ ɔ nɔ ye. 43Nɛ Petro hi Yopa be saii ngɛ Simon, lohwe he womi tsopa wolɔ ɔ ngɔ.

Currently Selected:

Bɔfo 9: DAN77

Highlight

Copy