Bɔfo 8

Saulo wa asafo ɔ yi mi

1Stefano gbemi ɔ ngɔ Saulo hu nya. Nɛ jamɛ a ligbi ɔ nɔ nɔuu ɔ, yi mi wami kpetekpleenyɛ te si wo asafo nɛ ngɛ Yerusalem ɔ, nɛ mɛ tsuo a gbɛ fia Yudea kɛ Samaria ni ɔmɛ a mi, ja bɔfo ɔmɛ kɛkɛ e piɛ. 2Nyumuhi Mawu gbeye yeli komɛ ya dla Stefano ngɔ to, nɛ a fo lɛ wawɛɛ.

3Se Saulo lɛɛ, e ka asafo ɔ hɛ mi kpatami. E sɛɛ wehi a mi nɛ e ya nuu nyumuhi kɛ yihi nɛ e ya woɔ mɛ tsu mi.

Sane Kpakpa a fiɛmi ngɛ Samaria

4Kɛkɛ nɛ nihi nɛ gbɛ fia a ya kpa si, nɛ a fiɛ sane kpakpa a. 5Nɛ Filipo ya Samaria ma ko nɔ, nɛ e ya fiɛ Kristo he sane ɔ ngɔ tsɔɔ mɛ. 6Nɛ nihi babauu kɛ juɛmi kake bu munyuhi nɛ Filipo ngɛ tue ɔ tue, benɛ a nu nɛ a na okadihi nɛ e pee ɔ. 7Ejakaa nihi fuu nɛ mumi yayamihi ngɛ a mi ɔ mumi ɔmɛ kpa ngmlaa wawɛɛ nɛ a je a mi, nɛ a tsa nihi nɛ hule kɛ akpaketsɛmɛ fuu hulɔ. 8Nɛ bua jɔmi babauu ba jamɛ a ma a mi.

9Se nyumu ko ngɛ ma a mi momo nɛ a tsɛɛ lɛ Simon nɛ tsuɔ kunya nɛ e haa Samariabi ɔmɛ a nya kpɛɛ a he; e tsɔɔ e he kaa nɔmlɔ ngua je lɛ. 10Nimli wawi kɛ nimli nguahi kulaa buɔ lɛ tue nɛ a deɔ ke: “Nɔ nɛ ɔ ji Mawu he wami nɛ a tsɛɛ kpetekpleenyɛ ɔ nɛ.” 11Nɛ akɛnɛ e je kɛ kɛ e kunya tsumi ɔ ha a nya kpɛ a he he je ɔ, a buɔ lɛ tue. 12Se benɛ a he Filipo nɛ fiɛ Mawu matsɛ yemi ɔ kɛ Yesu Kristo biɛ ɔ he sane kpakpa a tsɔɔ mɛ ɔ ye ɔ, wa baptisi nyumuhi kɛ yihi. 13Kɛkɛ nɛ Simon nitse hu he ye, nɛ a baptisi lɛ, nɛ e kɛ Filipo bɔni nyɛɛmi, nɛ benɛ e na okadihi kɛ he wami ni tsumi nguahi nɛ a pee ɔ, e nya kpɛ e he.

14Se benɛ bɔfo ɔmɛ nɛ ngɛ Yerusalem ɔ na kaa Samariabi ɔmɛ pɛtɛ Mawu munyu ɔ he ɔ, a tsɔ Petro kɛ Yohane kɛ ya a ngɔ. 15Benɛ a ba lejɛ ɔ, a ba sɔle ha mɛ, benɛ pee nɛ a na Mumi Klɔuklɔu ɔ. 16Ejakaa Mumi ɔ bɛ a ti nɔ ko nɔ ko nɔ lolo, se baptisimi kɛkɛ a baptisi mɛ wo Nyɔmtsɛ Yesu biɛ mi. 17Kɛkɛ nɛ a kɛ a ninehi pue a nɔ, nɛ a na Mumi Klɔuklɔu ɔ.

18Benɛ Simon na kaa bɔfo ɔmɛ a ninehi kɛ nihi a nɔ puemi ɔ haa a naa Mumi Klɔuklɔu ɔ, e kɛ sika ba ba ha mɛ 19nɛ e ke: “Nyɛ ha imi hu kikɛmɛ a he wami nɛ ɔ eko, konɛ nɔ tsuaa nɔ nɛ i kɛ ye ninehi ma pue e nɔ ɔ, e na Mumi Klɔuklɔu ɔ.” 20Se Petro de lɛ ke: “O kɛ o sika a tsuo hɛ mi nɛ kpata, ejakaa o susuu kaa Mawu nɔke nɔ ɔ sika a kɛ heɔ! 21O be blɔ nya loo blɔ fami nɔ́ ko ngɛ kikɛmɛ a sane nɛ ɔ mi; ejakaa o tsui dɛ ngɛ Mawu hɛ mi. 22Lɔ ɔ he ɔ jeha nɛ ɔ pia o he ngɛ o nɔ yayami ɔ he, nɛ o kpa Mawu pɛɛ kaa alinɔ a maa ngɔ o tsui mi susumi ɔ ngɔ pa mo lo. 23Ejakaa i na kaa duɔ doomi kɛ nɔ́ yayami kpã a mi o ngɛ nɛ ɔ nɛ.” 24Nɛ Simon he nɔ ke: “Nyɛ nitsɛmɛ nyɛ kpa Nyɔmtsɛ pɛɛ ha mi, konɛ nihi nɛ nyɛ de nɛ ɔmɛ eko nɛ ko ba ye nɔ.”

25Jeha nɛ ɔ benɛ a ye odase nɛ a tu Nyɔmtsɛ munyu ɔ ngɔ tsɔɔ mɛ nɛ a kpale a se kɛ ma Yerusalem ɔ, a fiɛ sane kpakpa a ngɔ tsɔɔ ngɛ Samariabi ɔmɛ a kɔpehi fuu a mi.

Filipo kɛ Etiopia manye sɔmɔlɔ nɔkɔtɔma a

26Nyɔmtsɛ ɔ bɔfo ko ba de Filipo ke: “Tee si nɛ o ya leneyi (wo si je) ngɛ blɔ nɛ je Yerusalem kɛ yaa Gaza nɛ pee ma doku ɔ nɔ.” 27Nɛ e te si nɛ e pue nɔ kɛ ho. Nɛ oʼɛ, nyumu Etiopia no ko nɛ ji Etiopiabihi a manye Kandake ɔ sɔmɔlɔ nɔkɔtɔma nɛ a ta lɛ nɛ a buu nɛ hyɛɛ e juetli tsuo nɔ ji nɛ ɔ nɛ. E be kɛ ya Yerusalem ya ja Mawu, 28nɛ jeha nɛ ɔ e kpale e se ngɛ e zugba lɛ mi kɛ yaa, nɛ e ngɛ gbalɔ Yesaia womi ɔ kanee. 29Nɛ Mumi ɔ de Filipo ke: “Yaa e ngɔ nɛ o kɛ lɛ ya hi si.” 30Benɛ Filipo sa fo kɛ yaa a, e nu kaa e ngɛ gbalɔ Yesaia womi ɔ kanee, nɛ e bi lɛ ke: “Anɛ o ngɛ nɔ́ nɛ o ngɛ kanee ɔ sisi nue piɔ?” 31Nɛ e de lɛ ke: “Kɛ ma pee kɛɛ nɛ ma nyɛ hu, kaa ja nɔ ko tsɔɔ mi?” Kɛkɛ nɛ e kpa Filipo pɛɛ ke e ba nɛ e kɛ lɛ ba hi si. 32Se ngmami ɔ he nɛ e ngɛ kanee ɔ ji nɛ ɔ nɛ:

“A kpaka lɛ kɛ ho kaa jijɔ nɛ a yaa gbe lɛ,

Nɛ bɔ nɛ jijɔ bi peɔ kpoo ngɛ e he bwɔmi salɔ hɛ mi ɔ,

Ja nɔuu e kpɛ we e kuɔ si.

33E he si bami ɔ mi ɔ, a je e kojomi ɔ kɛ ho;

Se e nina a, mɛnɔ maa sɛɛ he ni?

Ejakaa a ngɔ e wami ɔ kɛ je zugba a nɔ.”

34Nɛ sɔmɔlɔ nɔkɔtɔma a de Filipo ke: “I kpa mo pɛɛ, mɛnɔ he munyu gbalɔ ɔ ngɛ tue ɔ? Lɛ nitsɛ e he loo nɔ kpa?” 35Filipo pa e nya mi nɛ e bɔni kɛ je kikɛmɛ a ngmami nɛ ɔ nɔ, nɛ e jaje Yesu he sane kpakpa a tsɔɔ lɛ. 36Nɛ benɛ a ngɛ blɔ ɔ nɔ ɔ, a ba su nyu ko he, nɛ maa je sɔmɔlɔ nɔkɔtɔma a nyɛ a, e ke: “Oʼɛ nyu; mɛni tsiɔ ye baptisimi nya?” [ 37Se Filipo ke: “Ke o heɔ yeɔ kɛ o tsui kulaa a, lɛɛ blɔ ngɛ he.” Nɛ e he nɔ ke: “I heɔ yeɔ kaa Yesu Kristo ji Mawu bi ɔ nɛ.”] 38Nɛ e fa ke zugba lɛ ɔ nɛ da si, nɛ Filipo kɛ sɔmɔlɔ nɔkɔtɔma a tsuo kple si kɛ ho nyu ɔ mi ya, nɛ e baptisi lɛ. 39Nɛ benɛ a je nyu ɔ mi ɔ, Nyɔmtsɛ ɔ Mumi ɔ sa Filipo kɛ je; nɛ sɔmɔlɔ nɔkɔtɔma a nɛ́ lɛ hu, se e pue nɔ kɛ ho kɛ nyami. 40Se Filipo ɔ lɛɛ a na lɛ ngɛ Azoto; nɛ benɛ e ngɛ mi poe ɔ, e jaje sane kpakpa a ngɔ tsɔɔ ngɛ ma amɛ kulaa a mi kɛ ya si e ba su Kaisarea.

Currently Selected:

Bɔfo 8: DAN77

Highlight

Copy