Bɔfo 10

Petro kɛ Kornelio

1Nyumu ko ngɛ Kaisarea nɛ a tsɛɛ lɛ Kornelio nɛ ji Italia aslaafo ɔmɛ a nɔ Sasafoatsɛ. 2Mawu jalɔ ji lɛ, nɛ e kɛ e we ɔ tsuo yee Mawu gbeye, nɛ e peɔ ma mi bi ɔmɛ kpakpahi fuu, nɛ e kpaa Mawu pɛɛ daa. 3Ligbi ko gbɔkuɛ maa pee ngmlɛ etɛ mi ɔ, e na ngɛ ninami mi paa kaa Mawu bɔfo ko ba e ngɔ ba de lɛ ke: “Kornelio!” 4Nɛ e hyɛ lɛ too, nɛ e ye gbeye nɛ e ke: “Mo mɛnɔ ʼi, Nyɔmtsɛ?” Nɛ Nyɔmtsɛ ɔ de lɛ ke: “O sɔlemihi kɛ ni kpakpahi nɛ o peɔ ɔ ba su hiɔwe nɛ, e pee kaimi nɔ́ ngɛ Mawu hɛ mi. 5Nɛ jeha nɛ ɔ tsɔ nihi kɛ ya Yopa nɛ o ya kpee Simon nɛ a tsɛɛ lɛ Petro hulɔ ɔ kɛ ba. 6E ya to Simon lohwe he womi tsopa wolɔ ɔ nɛ we ngɛ wo ɔ nya a ngɔ.” 7Benɛ bɔfo ɔ nɛ kɛ lɛ ba tu munyu ɔ je ɔ, e tsɛ e webi ɔmɛ a ti ni enyɔ kɛ aslaafono ko nɛ yee Mawu gbeye nɛ ji nihi nɛ sɔmɔɔ lɛ ɔ a ti nɔ kake, 8nɛ e sɛɛ ni nɛ ɔmɛ tsuo ngɔ ha mɛ, nɛ e tsɔ mɛ Yopa.

9Enɔ je na a, benɛ a nyɛɛ blɔ ɔ nɔ nɛ e piɛ bɔɔ nɛ a maa su ma a mi ɔ, Petro ho sɔlemi ya ngɛ tsu ɔ yi mi, maa pee ngmlɛ nyɔngma kɛ enyɔ mi. 10Hwɔ ye lɛ wawɛɛ, nɛ e ngɛ nɔ́ ko hlae nɛ e ye. Se benɛ a ngɛ niyeni ɔ pee ɔ, e pee kaa nɔ́ nɛ nɔ́ nɔ e nɔ, 11nɛ e na kaa hiɔwe nya bli, nɛ nɔ́ ko ngɛ si kplee kaa bo ngua nɛ a hɛɛ e kɔ nya eywiɛ ɔ mi nɛ a ngɛ siue kɛ ma zugba. 12Zugba nɔ lohwe nane eywiɛeywiɛtsɛmɛ kɛ waami lohwehi, kɛ hiɔwe lohwe pɛlitsmɛ slɔɔto ɔmɛ tsuo eko ngɛ mi. 13Nɛ gbi ko de lɛ ke: “Petro, tee si, gbee nɛ o ye!” 14Se Petro ke: “Dɛbi, Nyɔmtsɛ, ejakaa i yi yakayaka nɔ́ ko loo nɔ́ ko nɛ he tsɔ we hyɛ.” 15Nɛ gbi ɔ kpale de lɛ nɔ nɛ ji si enyɔ ke: “Nɔ́ nɛ Mawu tsukɔ he ɔ, koo bu lɛ kaa yakayaka nɔ́ ko.” 16A pee ja si etɛ, nɛ a wo nɔ́ ɔ kɛ ho hiɔwe ya ekohu.

17Jeha nɛ ɔ benɛ Petro dɛ yaa kaa kɛ ji nɔ́ nɛ e na nɛ ɔ sisi kɛɛ ɔ, oʼɛ, nyumu ɔmɛ nɛ Kornelio tsɔ ɔ ngɛ Simon we ɔ si bie, nɛ a ba da agbo ɔ nya. 18A tsɛ nɛ a bi ke: “Anɛ hiɛ ɔ Simon nɛ a tsɛɛ lɛ Petro hulɔ ɔ ba to ɔ lo?” 19Se benɛ Petro ngɛ nɔ́ nɛ e na a he susue ɔ, Mumi ɔ de lɛ ke: “Oʼɛ nyumuhi etɛ komɛ ngɛ mo hlae. 20Lɔ ɔ he ɔ tee si nɛ o kple si nɛ o kɛ mɛ nɛ ho, nɛ koo je nɔ, ejakaa imi lɛ i tsɔ mɛ.” 21Kɛkɛ nɛ Petro kple si, nɛ e ya de nyumu ɔmɛ ke: “Oʼɛ, imi ji nɛ ɔ nɛ nyɛ ngɛ hlae ɔ nɛ; mɛni sane he nyɛ ba ngɛ?” 22Nɛ a ke: “Asafoatsɛ Kornelio, nɛ ji nyumu dalɔ kɛ Mawu gbeye yelɔ nɛ Yudafohi a ma mluku ɔ kulaa tuɔ e he munyu kpakpa a, lɛ hiɔwe bɔfo klɔuklɔu ko de lɛ ke e tsɔ nɛ a ba kpee mo kɛ ba e we ɔ mi, konɛ e bu o nya munyu tue.” 23Kɛkɛ nɛ Petro tsɛ mɛ kɛ ba we ɔ mi nɛ e ba pee mɛ nibwɔ. Nɛ e nɔ je na a, Petro kɛ mɛ pue nɔ kɛ ho, nɛ nyɛmimɛ nɛ ngɛ Yopa a a ti ni komɛ piɛ e he.

24E nɔ je na ekohu ɔ, a ya su Kaisarea. Kornelio ngɛ mɛ blɔ hyɛe, nɛ e tsɛ e wekuli kɛ e huɛmɛ kpakpahi kɛ ba kpe. 25Nɛ e ba mi kaa benɛ Petro ngɛ we ɔ mi sɛe ɔ, Kornelio kɛ lɛ ba kpe, nɛ e ba bu si ngɛ e nane nya nɛ e ja lɛ. 26Se Petro wo e nɔ, nɛ e ke: “Tee si, se imi hu nɔmlɔ ji mi.” 27Nɛ e kɛ lɛ ngɛ ni sɛɛe kɛ ya sɛ we ɔ mi, nɛ eya na nihi babauu nɛ ba bua a he nya a. 28Nɛ Petro de mɛ ke: “Nyɛ nitsɛmɛ nyɛ le bɔ nɛ Yuda no be he blɔ kaa e kɛ nɔ ko nɛ ji ma kpã mi no bɔɔ aloo e baa e ngɔ. Se imi lɛɛ, Mawu tsɔɔ mi ke ma ko tsɛ nɔ ko nɔ ko yaka nɔmlɔ, loo nɔ nɛ he tsɔ we. 29Lɔ ɔ he hulɔ nɛ benɛ a tsɔ ba kpee mi ɔ, i je we nya nɛ i ba nɛ ɔ nɛ. Nɛ jeha nɛ ɔ i ngɛ nyɛ bie ke: Mɛni sane he je nɛ nyɛ tsɔ kɛ ba kpee mi ɔ?”

30Kornelio ha heto ke: “Mwɔnɔ ji ligbi eywiɛ ɔ, i ngɛ sɔlee ngɛ ye we ɔ mi maa pee gbɔkuɛ ngmlɛ etɛ mi; nɛ oʼɛ, nyumu ko nɛ wo tade klaiklai ba da ye hɛ mi, 31nɛ e ke: ‘Kornelio, a bu o sɔlemi ɔ tue, nɛ o ni kpakpahi nɛ o peɔ ɔ hu a kai ngɛ Mawu hɛ mi. 32Lɔ ɔ he ɔ tsɔ nihi kɛ ya Yopa, nɛ a ya kpee Simon nɛ a tsɛɛ lɛ Petro hulɔ ɔ kɛ ba. E ya to Simon lohwe he womi tsopa wolɔ ɔ nɛ we ngɛ wo ɔ nya a ngɔ.’ 33Kɛkɛ nɛ amlɔ ɔ nɔuu nɛ i tsɔ o ngɔ, nɛ o pee saminya kaa o ba. Lɔ ɔ he ɔ jeha nɛ ɔ wɔ tsuo wa ngɛ hiɛ ɔ ngɛ Mawu hɛ mi, konɛ waa bu nihi tsuo kulaa nɛ Mawu de mo ngɔ to ɔ tue.”

Petro munyu nɛ e tu

34Kɛkɛ nɛ Petro pa e nya mi nɛ e ke: “Niinɛ, i kpa si kaa Mawu pi nimli a hɛ mi hyɛlɔ; 35se mohu ma tsuaa ma mi ɔ, nɔ nɛ yee lɛ gbeye nɛ e tsuɔ dami nihi ɔ, lɛ ji nɔ nɛ saa e hɛ mi. 36Mawu tsɔ nɛ a kɛ munyu ɔ ya ha Israelbi, nɛ a gu Yesu Kristo nɔ kɛ jaje he jɔmi sane kpakpa a ngɔ tsɔɔ mɛ, lɛ ji nihi tsuo a Nyɔmtsɛ. 37Nyɛ nitsɛmɛ nyɛ le sane ɔ nɛ ba ngɛ Yudea tsuo, nɛ e je sisi kɛ je Galilea, ngɛ baptisimi nɛ Yohane fiɛ ɔ se ɔ, 38bɔ nɛ Mawu ngɔ Mumi Klɔuklɔu kɛ he wami ngɔ pɔ Yesu nɛ je Nazaret ɔ nu, nɛ e kpaa si peɔ kpakpa, nɛ e tsaa nihi kulaa nɛ abosiami haoɔ mɛ ɔ, ejakaa Mawu kɛ lɛ ngɛ. 39Nɛ wɔ ji nihi tsuo kulaa nɛ e pee ngɛ Yudafo ɔmɛ a zugba a nɔ kɛ Yerusalem ɔ he odase yeli; nɔ nɛ a sɛu ngɛ tso nɔ nɛ a gbe lɛ ɔ. 40Lɛ nɔuu Mawu tle si ligbi nɛ ji ligbi etɛ ɔ, nɛ e ha e je e he kpo ngɔ tsɔɔ paa, 41tsa pi ma mluku ɔ tsuo, se mohu odase yeli nɛ Mawu hla ngɔ to momo ɔ, nɛ ji wɔ nihi nɛ waa kɛ lɛ ye ni nɛ waa kɛ lɛ nu, benɛ e te si kɛ je gbeje ɔ se ɔ. 42Nɛ e wo wɔ kita ke waa fiɛ ngɔ tsɔɔ ma a nɛ waa ye odase kaa lɛ ji nɔ nɛ Mawu je ngɔ to nɛ e kojo hɛ kali kɛ ni gbogboehi ɔ nɛ. 43Lɛ e he odase gbali ɔmɛ kulaa yeɔ, kaa nɔ tsuaa nɔ nɛ heɔ e nɔ yeɔ ɔ ma na e he yayami pami ngɛ e biɛ ɔ he.”

Majemajeli ɔmɛ na Mumi Klɔuklɔu ɔ

44Benɛ Petro ngɛ kikɛmɛ a munyu nɛ ɔmɛ tue nɔuu ɔ, Mumi Klɔuklɔu ɔ ba nihi tsuo nɛ nu munyu ɔ nɔ. 45Nɛ Yudafohi nɛ he ye nɛ a kɛ Petro ba a nya kpɛ a he kaa a nɛ Mumi Klɔuklɔu nɔke nɔ ɔ ngɔ pue majemajeli ɔmɛ hu a nɔ. 46Ejakaa a nu kaa a ngɛ ma se munyuhi slɔɔtohi tue, nɛ a ngɛ Mawu yi jee. Kɛkɛ nɛ Petro he nɔ ke: 47“Anɛ nɔ ko ma nyɛ nyu nya maa tsi, nɛ a ko baptisi ni nɛ ɔmɛ nɛ na Mumi Klɔuklɔu ɔ ka wɔ kɛ̃ ɔ lo?” 48Nɛ e fa ke a baptisi mɛ ngɛ Nyɔmtsɛ ɔ biɛ ɔ mi. Kɛkɛ nɛ a kpa lɛ pɛɛ ke e kɛ mɛ nɛ hi si be bɔɔ ko.

Currently Selected:

Bɔfo 10: DAN77

Highlight

Copy