Bɔfo 7

Stefano fiɛmi

1Nɛ osɔfo nɔkɔtɔma a bi Stefano ke: “Anɛ munyu nɛ ɔmɛ ngɛ mi ja lo?” 2Nɛ Stefano ke: “Mamimɛ kɛ Tsaatsɛmɛ, nyɛɛ bu tue. Hɛ mi nyami Mawu ɔ je e he kpo tsɔɔ wa tsɛ Abraham, benɛ e ngɛ Mesopotamia, nɛ e na we nɛ e ba hi Haran ɔ, 3nɛ e de lɛ ke: ‘Jee o zugba a nɔ kɛ o weku mi kɛ ya zugba niɛ ma tsɔɔ mo ɔ nɔ.’ 4Kɛkɛ nɛ e je Kaldeabi ɔmɛ a zugba a nɔ, nɛ e ya hi Haran. Nɛ benɛ e tsɛ gbo se ɔ, Mawu ha e je lejɛ ɔ kɛ ba kikɛmɛ a zugba nɛ nyɛ ngɛ nɔ mwɔnɛ mwɔnɛ nɛ ɔ nɔ; 5nɛ e hi lɛ zugba ko, bɔ nɛ a kɛ nane maa nɔ tete. Se e wo lɛ si kaa e ma ngɔ ha lɛ kɛ e nina nɛ ma ngɛ e se ɔ kaa a nɔ́, pohu jamɛ a be ɔ mi ɔ, e be bi po. 6Se bɔ nɛ Mawu kɛ lɛ tu munyu ji nɛ ɔ nɛ: ‘E nina ma ya to nibwɔ ngɛ ma se zugba ko nɔ, nɛ a maa ye mɛ nyɔguɛ, nɛ a maa wa mɛ yi mi jeha lafa eywiɛ.’ 7Nɛ Mawu ke: ‘Ma kojo jamɛ a ma nɛ a ma ya sɔmɔ ɔ, nɛ lɔ ɔ se ɔ a maa je lejɛ ɔ, nɛ a ba ja mi ngɛ hiɛ ɔ nɛ ɔ.’ 8Nɛ Mawu ngɔ nɔ pomi he somi ɔ ngɔ ha lɛ. Nɛ somi nɛ ɔ mi e fɔ Isak ngɛ, nɛ e po lɛ ligbi nɛ ji kpaanyɔ ɔ. Nɛ Isak fɔ Yakob, nɛ Yakob fɔ blematsɛmɛ nyɔngma kɛ enyɔ ɔ.

9“Nɛ blematsɛmɛ ɔmɛ kɛ hɛ tsumi jua Yosef kɛ ho Mizraim ya. Se Mawu kɛ lɛ ngɛ, 10nɛ e je lɛ ngɛ dengmehi kulaa mi, nɛ e ha e hɛ mi ba nyami, nɛ e ha e le ni ngɛ Mizraim matsɛ Farao hɛ mi, nɛ e wo lɛ ganɔ ngɛ Mizraim kɛ lɛ nitse e we ɔ kulaa nɔ. 11Se hwɔ kɛ dengme kpetekpleenyɛ ba Mizraim ke Kanaan zugba a tsuo kulaa nɔ, nɛ wa tsɛmɛ ɔmɛ nɛ́ ni nɛ a ye. 12Nɛ benɛ Yakob nu kaa blɛfo ngɛ Mizraim ɔ, kekleekle ɔ, e tsɔ wa tsɛmɛ ɔmɛ kɛ ya. 13Nɛ nɔ́ nɛ ji si enyɔ ɔ, Yosef ha e nyɛmimɛ ɔmɛ yo lɛ, nɛ Farao hu ba le Yosef weku ɔ. 14Nɛ Yosef tsɔ nɛ a ya ngɔ Yakob kɛ e weku ɔ tsuo kɛ ba, a yi bɔ ji nyingmi kpaago kɛ enuɔ. 15Yakob pue nɔ kɛ ho Mizraim ya, nɛ lɛ kɛ wa tsɛmɛ ɔmɛ ya gbo ngɛ lejɛ ɔ, 16nɛ a kɛ a gbogboe ɔmɛ ba Shekem, nɛ a ba pu mɛ ngɛ gɔ nɛ Abraham je sika kɛ he ngɛ Shekem tsɛ Hemor bi ɔmɛ a dɛ ɔ mi.

17“Se benɛ si womi be ɔ nɛ Mawu ka Abraham he kita a su ɔ, ma a ba kle, nɛ a he ba hiɛ ngɛ Mizraim zugba a nɔ, 18kɛ ya su be nɛ matsɛ kpa nɛ li Yosef ɔ ba ye Mizraim nɔ. 19Lɛ nɛ e kɛ wa tsɛmɛ ɔmɛ hi si ngɛ sisimi blɔ nɔ nɛ e pee mɛ yayami, kaa e ha a sake a bimɛ bimwɔwi ɔmɛ ngɔ pue he, benɛ pee nɛ a ko hi je mi. 20Jamɛ a be ɔ mi nɔuu a fɔ Mose. E he ngɛ fɛu ngɛ Mawu hɛ mi, nɛ a lɛ lɛ ngɛ e tsɛ we ɔ hlami etɛ. 21Nɛ benɛ a sake lɛ ngɔ fɔ he ɔ, Farao biyo ɔ ya wo lɛ, nɛ e lɛ lɛ, nɛ e kɛ lɛ pee lɛ nitse e bi. 22A tsɔɔ Mose Mizraim nile tsuo, nɛ e na he wami ngɛ munyuhi kɛ ni tsumihi a mi.

23“Benɛ Mose ye jeha nyingmi eywiɛ ɔ, e ba e yi mi kaa e ma ya slaa e nyɛmimɛ Israelbi ɔmɛ. 24Nɛ benɛ e na kaa a ngɛ a kpɛti nɔ kake yayami pee ɔ, e fã e he, nɛ e to Mizraim no nɛ a ngɛ lɛ yayami pee ɔ nane mi, nɛ e gbe Mizraim no ɔ. 25(Jinɛ e susu kaa e nyɛmimɛ ɔmɛ ma kɔ se kaa Mawu ngɛ e nine nɔ gue nɛ e kɛ kpɔ mɛ; se a kɔ we se.) 26E nɔ je na a, e ba na nyɛmimɛ enyɔ komɛ nɛ a ngɛ kunɔ nɔe, nɛ e kpata mɛ ke: ‘Tsaatsɛmɛ, nyɛɛ lɛɛ nyɛmimɛ ji nyɛ, mɛni he je nyɛ ngɛ nyɛ he yayami pee nɛ ɔ?’ 27Se nɔ nɛ pee e nyɛmi yayami ɔ tsɛ̃ lɛ kɛ ya se nɛ e ke: ‘Mɛnɔ lɛ wo mo wa nɔ ganɔ kɛ kojolɔ? 28Anɛ o ngɛ hlae nɛ o gbe mi kaa bɔ nɛ o gbe Mizraim no ɔ hiɛ ɔ?’ 29Munyu nɛ ɔ he ɔ Mose tu fo nɛ e ya to nibwɔ ngɛ Midian zugba a nɔ, nɛ e fɔ bimɛ nyumuhi enyɔ ngɛ lejɛ ɔ.

30“Jeha nyingmi eywiɛ se ɔ, Nyɔmtsɛ ɔ bɔfo ko ba je e he kpo tsɔɔ lɛ ngɛ Sinai yoku ɔ he nga a nɔ ngɛ la lilɛ mi ngɛ pu ko mi. 31Nɛ benɛ Mose na a, e hɛ mi pee lɛ yaa ngɛ ni nami ɔ he. Nɛ benɛ e ngɛ lɛ hɛe kɛ ngɛ he sue konɛ e hyɛ ɔ, Nyɔmtsɛ ɔ gbi de lɛ ke: 32‘Imi ji o tsɛmɛ a Mawu ɔ, Abraham kɛ Isak kɛ Yakob Mawu ɔ.’ Nɛ Mose he do blibliibli nɛ e ka kaa e ma ya hyɛ. 33Nɛ Nyɔmtsɛ ɔ de lɛ ke: ‘Je o tokota amɛ ngɛ o nane, ejakaa he nɛ o daa si ngɛ ɔ, zugba klɔuklɔu ʼi. 34I na ye ma nɛ ngɛ Mizraim ɔ a dengme ɔ, nɛ a zanuelami ɔ hu i nu, nɛ i kple si kɛ ma mɛ jemi. Lɔ ɔ he ɔ ba nɛ ma tsɔ mo Mizraim.’

35“Jamɛ a Mose ɔ kɛ̃ nɛ a kua nɛ a de ke: ‘Mɛnɔ lɛ wo mo wa nɔ ganɔ kɛ kojolɔ’ ɔ, lɛ kɛ̃ Mawu gu bɔfo ɔ nɛ je e he kpo tsɔɔ le ngɛ pu ɔ mi ɔ nɔ tsɔ lɛ kaa ganɔ kɛ kpɔlɔ. 36Lɛ nɔuu lɛ e kpaka mɛ ke je kpo, nɛ e pee nyakpɛ nihi kɛ okadihi ngɛ Mizraim zugba a nɔ kɛ Wotsu ɔ mi kɛ nga a nɔ jeha nyingmi eywiɛ. 37Lɛ ji jamɛ a Mose nɛ de Israelbi ɔmɛ ke: ‘Nyɔmtsɛ nyɛ Mawu ɔ ma tle gbalɔ ko nɛ ngɛ kaa imi si kɛ maa je nyɛ nyɛmimɛ ɔmɛ a kpɛti ngɔ ha nyɛ; nyɛɛ bu lɛ tue.’ 38Mose ji nɔ nɛ kɛ asafo ɔ hi nga a nɔ nɛ e da bɔfo ɔ nɛ kɛ lɛ tu munyu ngɛ Sinai yoku ɔ nɔ ɔ kɛ wa tsɛmɛ ɔmɛ a kpɛti nɛ e he wami munyu ɔmɛ ba ha wɔ ɔ nɛ. 39Nɔ nɛ ɔ wa tsɛmɛ ɔmɛ kplɛɛ we nɛ a bu lɛ tue se mohu a hɛɛ lɛ soisoi, nɛ a tsui kpale kɛ ho Mizraim ya ekohu, 40nɛ a de Aaron ke: ‘Pee mawuhi ngɔ ha wɔ nɛ a nyɛɛ wa hɛ mi, ejakaa kikɛmɛ a Mose nɛ kpakpa wɔ kɛ je Mizraim zugba a nɔ nɛ ɔ, wa li nɔ́ nɛ ya ba e nɔ.’ 41Nɛ jamɛ a be ɔmɛ a mi ɔ, a pee na bi, nɛ a sa bɔ ngɔ ha amaga a, nɛ a na mɛ nitse a nine nya ni tsumi ɔmɛ a he bua jɔmi. 42Se Mawu plɛ e he nɛ e ngmɛɛ a he kaa a ja hiɔwe nihi, kaa bɔ nɛ a ngma ngɛ gbali ɔmɛ a womi ɔ mi ke:

‘Nyɛ Israel we,

Anɛ imi nɛ nyɛ sã lohwehi kɛ ni yeni bɔ ɔ ngɔ ha

Ngɛ nga a nɔ jeha nyingmi eywiɛ ɔ lo?

43Molok bo tsu mohu nyɛ wo tloo

Kɛ nyɛ Mawu Remfan ɔ dodoe ɔ nɛ ji amagahi

Nɛ nyɛ puɛ nɛ nyɛ jaa mɛ ɔ;

Nɛ Babilon se ma muɔ nyɛ kɛ maa ho.’

44“Watsɛmɛ ɔmɛ hɛɛ odase Bo Tsu ɔ ngɛ nga a nɔ. A pee lɛ kaa bɔ nɛ nɔ nɛ kɛ Mose tu munyu ɔ tsɔɔ lɛ ke e pee lɛ ɔ, lɔ ɔ ji kaa bɔ nɛ e na a. 45Benɛ watsɛmɛ ɔmɛ a nine su nɔ ɔ, a kɛ Yosua hɛɛ kɛ ba majeli nɛ Mawu fie ngɛ watsɛmɛ ɔmɛ a hɛ mi ɔ a zugba a nɔ. Hiɛ ɔ e hi kɛ ba su David be ɔ mi. 46Lɛ e hɛ mi ba nyami ngɛ Mawu hɛ mi nɛ e kpa pɛɛ ke e maa pee sihi he ko ngɔ ha Yakob Mawu ɔ. 47Se Salomo ma tsu ha lɛ.

48“Pohu Hiɔwe no ɔ, tsa hi tsuhi nɛ a kɛ ninehi pee ɔmɛ a mi, kaa bɔ nɛ gbalɔ ɔ hu de ɔ ke:

49‘Hiɔwe ɔ ye matsɛ sɛ ʼi,

Nɛ zugba a ye nane si maangoo ʼi.

Mɛni tsu nyɛ maa ma ha mi mɔ?

Jeha nɛ ɔ jije ji ye he jɔɔmi he ɔ?

Nyɔmtsɛ ɔ ke:

50Anɛ pi ye nine nɛ pee enɛ ɔmɛ kulaa lo?’

51“Nyɛ kuɛ wali kɛ amaga jali ngɛ tsuihi kɛ tuehi a mi! Nyɛɛ lɛɛ daa nɛ ɔ nyɛ kuɔ Mumi Klɔuklɔu ɔ nya; bɔ nɛ nyɛ tsɛmɛ ɔmɛ pee ɔ, jã nyɛ hu nyɛ peɔ. 52Gbali ɔmɛ a ti mɛnɔ nyɛ tsɛmɛ ɔmɛ wɛ́ lɛ yi mi hyɛ? Nɛ a gbe nihi nɛ gba sa ngɛ dalɔ ɔ bami ɔ he ɔ, nɔ nɛ jeha nɛ ɔ nyɛ plɛ e se blɔ tsɔɔli kɛ awi yeli ɔ, 53nyɛ nɛ nyɛ na mlaa a ngɛ bɔfohi a ni tsumi nya nɛ nyɛ yi nɔ ɔ.”

A fia Stefano tɛ

54Se benɛ a nu kikɛmɛ a munyu nɛ ɔmɛ ɔ, e gbɔ a tsui mi, nɛ a kpe a lungu nya pue e nɔ. 55Se lɛɛ akɛnɛ Mumi Klɔuklɔu ɔ hyi lɛ tɔtɔɔtɔ ɔ, e hyɛ hiɔwe too, nɛ e na Mawu hɛ mi nyami ɔ kɛ Yesu nɛ daa si ngɛ Mawu hiɛ ɔ nɔ. 56Nɛ e ke: “Oʼɛ, i ngɛ hyɛe nɛ hiɔwe nya bli kɛ Nɔmlɔ Bi ɔ nɛ daa si ngɛ Mawu hiɛ ɔ nɔ.” 57Se a kpa ngmlaa wawɛɛ, nɛ a tsi a tue, nɛ a kɛ juɛmi kake ke kɛ ba e nɔ, 58nɛ a tsitsɛɛ e yi se kɛ je ma a mi, nɛ a ya fia lɛ tɛ. Nɛ odasefo ɔmɛ ngɔ a bo ɔmɛ ngɔ pue niheyo ko nɛ a tsɛɛ lɛ Saulo ɔ nane nya.” 59Nɛ benɛ a fia Stefano tɛ ɔ, e fã Yesu nɛ e ke: “Mawetsɛ Yesu, he ye mumi ɔ!” 60Nɛ e kpla si, nɛ e kpa ngmlaa wawɛɛ ke: “Mawetsɛ, koo ngɔ kikɛmɛ a yayami nɛ ɔ ngɔ fɔ a nɔ!” Nɛ benɛ e de kikɛ ɔ, e ngɔ e nya.

Currently Selected:

Bɔfo 7: DAN77

Highlight

Copy