Bɔfo 6

Hepiɛli kpaago ɔ

1Jamɛ a be ɔmɛ a mi, benɛ kaseli ɔmɛ a he ngɛ hiɛe ɔ, munyu huitihuiti ko ba te si ngɛ Helenibi ɔmɛ a kpɛti ngɛ Hebribi ɔmɛ a he, ejakaa hɛ jee a yalɔyi ɔmɛ a nɔ ngɛ a daa hyemi ɔ blɔfami. 2Lɔ ɔ he ɔ ni nyɔngma kɛ enyɔ ɔ tsɛ kaseli asafo ɔ kɛ ba, nɛ a de mɛ ke: “E sɛ kaa wa siɔ Mawu munyu ɔ nɛ wa ya sɔmɔɔ ngɛ okplɔɔ he. 3Lɔ ɔ he ɔ, mamimɛ, nyɛɛ hla nyɛ kpɛti ni kpaago nɛ ngɛ biɛ kpakpa nɛ Mumi Klɔuklɔu kɛ ni lemi hyi mɛ tɔ, konɛ waa ngɔ mɛ ngɔ to kikɛmɛ a ni tsumi nɛ he hia nɔ nya. 4Wɔɔ lɛɛ, wa maa hɛɛ sɔlemi kɛ munyu ɔ he sɔmɔmi ɔ mi.” 5Munyu ɔ sa asafo mluku ɔ tsuo hɛ mi; nɛ a hia Stefano, nyumu ko nɛ hemi kɛ yemi kɛ Mumi Klɔuklɔu hyi lɛ tɔ ɔ, kɛ Filipo kɛ Prokoro kɛ Nikanora kɛ Timon kɛ Parmena kɛ Yudafo ɔmɛ a he piɛlɔ Nikolao nɛ je Antiokia a, 6nɛ a kɛ ni nɛ ɔmɛ ba da bɔfo ɔmɛ a hɛ mi; nɛ a sɔle nɛ a kɛ a ninehi pue a nɔ. 7Nɛ Mawu munyu ɔ blɛke, nɛ kaseli ɔmɛ a he ba hiɛ babauu ngɛ Yerusalem; nɛ osɔfo ɔmɛ tete po a kpɛti nihi fuu buɔ hemi kɛ yemi ɔ tue.

A nu Stefano

8Nɛ Stefano, nɔ nɛ hemi kɛ yemi kɛ he wami hyi lɛ tɔtɔɔtɔ ɔ, pee nyakpɛ nihi kɛ okadi nguahi ngɛ ma a mi. 9Se ni kome nɛ je kpe he nɛ a tsɛɛ Nihi nɛ ye a he ɔmɛ a kpe he ɔ, kɛ Kireenebi kɛ Aleksandriabi kɛ nihi nɛ je Kilikia kɛ Asia a, a ti ni kome te si nɛ a kɛ Stefano sa nya. 10Se a nyɛ we ni lemi kɛ mumi nɛ e kɛ ngɛ munyu ɔ tue ɔ nya nɛ a da. 11Lɔ ɔ he je ɔ, a ya wo ni komɛ yi nɛ a ba de ke: “Wa nu kaa e tuɔ Mose kɛ Mawu he musu bɔmi munyuhi.” 12Nɛ a wo ma bi ɔmɛ kɛ ma nikɔtɔma amɛ kɛ mlaa tsɔɔli amɛ yi, nɛ a te si kɛ ba pue e nɔ nɛ a ba nu lɛ, nɛ a kpaka lɛ kɛ ya gua ngua a hɛ mi. 13Nɛ a kɛ lakpa odase yeli ba da si, nɛ a de ke: “Kikɛmɛ a nɔmlɔ nɛ ɔ jɔɔ we munyu tumi kɛ He Klɔuklɔu ɔ kɛ Mlaa a simi gblee; 14ejakaa wa nu kaa e de ke: ‘Yesu Nazare no ɔ, ma puɛ hiɛ ɔ, nɛ e ma tsake blɔnyahi nɛ Mose ngɔ ha wɔ ɔ.’ ” 15Nɛ nihi nɛ hii si ngɛ gua ngua a mi ɔ tsuo dɔ a hɛngmɛ ngɔ to e nɔ, nɛ a na e hɛ mi kaa Mawu bɔfo ko hɛ mi.

Currently Selected:

Bɔfo 6: DAN77

Highlight

Copy