Bɔfo 5

Anania kɛ Safira

1Se nyumu ko nɛ a tsɛɛ lɛ Anania nɛ a tsɛɛ e yo hu ke Safira a ya jua zugba ko, 2nɛ e kɛ yi ni ɔ fã ko to se, nɛ e yo ɔ hu le he nɔ́ ko. Nɛ e kɛ fã ko ba nɛ e kɛ ba pue bɔfo ɔmɛ a nane nya. 3Se Petro ke: “Anania, mɛni he je Satan hyi o tsui mi tɔ, nɛ o ye lakpa ngɔ tsɔɔ Mumi Klɔuklɔu ɔ, nɛ o kɛ zugba a yi ni ɔ fã ko to se? 4Benɛ e ngɛ ɔ, pi o nɔ ʼi, nɛ benɛ o jua hu ɔ, sika a pi mo nitse o nɔ lo? Mɛni he je o susu kikɛmɛ a nɔ́ ko ngɛ o tsui mi? Tsa pi nimli nɛ o ye lakpa ngɔ tsɔɔ nɛ ɔ, se Mawu mohu ʼi.” 5Nɛ benɛ Anania nu kikɛmɛ a munyu nɛ ɔmɛ ɔ, e nɔ si nɛ e gbo. Nɛ gbeye ngua nu ni ɔmɛ tsuo nɛ nu ɔ. 6Nihewi ɔmɛ te si, nɛ a ba dla gbogboe ɔ, nɛ a wo lɛ kɛ je kpo nɛ a ya pu.

7Nɛ maa pee ngmlɛfia etɛ se ɔ, e ba mi kaa e yo ɔ hu nɛ li sane nɛ ba a ba lejɛ ɔ. 8Nɛ Petro bi lɛ ke: “De mi, anɛ bɔ nɛ nyɛ jua zugba a ha ji nɛ ɔ lo?” Nɛ Safira ke: “Ee ja ʼi.” 9Kɛkɛ nɛ Petro de lɛ ke: “Kɛ pee kɛɛ nɛ nyɛ pee kake nɛ nyɛ ka Nyɔmtsɛ ɔ Mumi ɔ nɛ ɔ? Oʼɛ, nihi nɛ ho ya pu o huno ɔ a nanehi a nya lɛ ngɛ sinya a nya a nɛ, nɛ a ma wo mo hu kɛ ho.” 10Kɛkɛ nɛ amlɔ ɔ nɔuu nɛ e nɔ si ngɛ e nane nya nɛ e gbo. Nɛ benɛ nihewi ɔmɛ ba nɛ a ba na kaa e gbo ɔ, a wo lɛ kɛ ho nɛ a ya pu ngɛ e huno ɔ kasa nya. 11Nɛ gbeye kpetekpleenyɛ nu asafo mluku ɔ tsuo kɛ nihi nɛ nu ni nɛ ɔmɛ ɔ.

Okadihi kɛ nyakpɛ nihi

12A gu bɔfo ɔmɛ a nine nɔ kɛ pee okadihi kɛ nyakpɛ nihi fuu ngɛ ma a mi; nɛ mɛ tsuo a kɛ juɛmi kake hi Salomo ablanaa a nɔ. 13Nihi nɛ piɛ ɔmɛ a ti nɔ ko nɔ ko kɛ́ kaa e kɛ yi flɛflɛ ma ya bɔ a he, se maa buu mɛ saminya. 14Nɛ jeha nɛ ɔ hu a kɛmihi nɛ heɔ Nyɔmtsɛ ɔ nɔ yeɔ ɔ, nyumuhi kɛ yihi babauu ba piɛ a he, 15hluu tete po nɛ a woɔ hiɔtsɛmɛ kɛ baa blɔ ɔmɛ a he ba pueɔ sahi kɛ sa tsohi a nɔ, konɛ ke Petro bee ɔ, e nini kɛkɛ nɛ pue a ti ni kome a nɔ. 16Nɛ nihi fuu je mahi nɛ bɔle Yerusalem ɔ mi ba bua a he nya, nɛ a hɛɛ hiɔtsɛmɛ kɛ nihi nɛ mumi yayamihi ngɛ mɛ haoe ɔ kɛ ba nɛ a tsa mɛ kulaa.

A wa bɔfo ɔmɛ yi mi

17Kɛkɛ nɛ osɔfo nɔkɔtɔma a te si kɛ nihi tsuo nɛ kɛ lɛ ngɛ nɛ ji Sadukifo ɔmɛ a ku ɔ, nɛ a hɛ̃ dɔ wawɛɛ. 18Nɛ a ba nuu bɔfo ɔmɛ, nɛ a ya wo mɛ tsu mi. 19Se nyɔmi ɔ Nyɔmtsɛ ɔ bɔfo ba bli tsu ɔ sinya amɛ nɛ e je mɛ, nɛ e ke: 20“Nyɛɛ ya sɔlemi we ɔ nɛ nyɛ ya da si nɛ nyɛɛ jaje kikɛmɛ a wami he nɛ ɔ mi munyu ɔmɛ kulaa ngɔ tsɔɔ maa.” 21Nɛ a pee bɔ nɛ a de mɛ ɔ, nɛ a pue nɔ mɔtu mla kɛ ho sɔlemi we ɔ ya nɛ a ya tsɔɔ ni.

Jeha nɛ ɔ osɔfo nɔkɔtɔma a kɛ nihi nɛ kɛ lɛ ngɛ ɔ ba, nɛ a ba tsɛ gua ngua a kɛ Israelbi ɔmɛ a nikɔtɔma amɛ tsuo kɛ kpe, nɛ a tsɔ kɛ ya tsu ɔ mi konɛ a ya je bɔfo ɔmɛ kɛ ba 22Se benɛ tsɔli ɔmɛ ba lejɛ ɔ, a nɛ mɛ ngɛ tsu ɔ mi, nɛ a kpale a se ba sɛɛ ke: 23“Tsu ɔ wa na kaa a nga nya kpɛii, nɛ buli ɔmɛ hu daa si ngɛ sinya amɛ a nya; se benɛ wa bli ɔ, wa nɛ́ nɔ ko ngɛ mi.” 24Se benɛ osɔfo ɔ kɛ sɔlemi we ɔ asafoatsɛ ɔ kɛ osɔfo nikɔtɔma amɛ nu kikɛmɛ a munyu nɛ ɔ ɔ, a hɛ mi pee mɛ yaa kaa kɛ enɛ ɔ nyagbeni ma ya ba ha kɛɛ? 25Nɛ nɔ ko ba ba sɛɛ ha mɛ ke: “Oʼɛ, nyumu ɔmɛ nɛ nyɛ ngɔ wo tsu ɔ mi ɔ daa si ngɛ sɔlemi we ngɛ ma a ni tsɔɔe.” 26Kɛkɛ nɛ asafoatsɛ ɔ kɛ tsɔli ɔmɛ pue nɔ kɛ ho nɛ a ya kpaka mɛ kɛ ba, pi kã nya, ejakaa a ngɛ ma a gbeye yee nɛ a ko ba fia mɛ tɛ.

27Nɛ benɛ a kɛ mɛ ba a, a kɛ mɛ ba da gua ngua a hɛ mi; nɛ osɔfo nɔkɔtɔma a bi mɛ ke: 28“Pi kita nɛ wa wo nyɛ kadikadi ke nyɛ ko tsɔɔ ni ngɛ kikɛmɛ a biɛ nɛ ɔ mi ɔ? Oʼɛ, nyɛ ha Yerusalem hyi tɔ kɛ nyɛ tsɔɔmi ɔ, nɛ nyɛ ngɛ hlae kaa nyɛɛ kɛ kikɛmɛ a nyumu nɛ ɔ muɔ baa wa nɔ.” 29Se Petro kɛ bɔfo ɔmɛ he nɔ nɛ a ke: “E sa kaa a buɔ Mawu mohu tue pe nimli. 30Yesu nɛ nyɛ sɛu ngɛ tso nɔ nɛ nyɛ gbe lɛ ɔ, wa tsɛmɛ a Mawu ɔ tle lɛ si. 31Lɛ e nɔ Mawu wo kɛ ho e hiɛ ɔ nɔ ya, nɛ e wo lɛ ganɔ kɛ yi wami helɔ, konɛ e ha Israel nɛ na tsui tsakemi kɛ yayami pami. 32Nɛ wɔ ji kikɛmɛ a sane nɛ ɔmɛ a he odase yeli, ja nɔuu ji Mumi Klɔuklɔu ɔ hu nɛ Mawu ngɔ ha nihi nɛ buɔ lɛ tue ɔ.”

33Benɛ a nu ɔ, e gbɔ a tsui mi, nɛ a to a yi mi ke a maa gbe mɛ. 34Se Farisifono ko nɛ a tsɛɛ lɛ Gamaliel, mlaa tsɔɔlɔ nɛ ma a kulaa buu lɛ ɔ, te si da si ngɛ gua ngua a kpɛti, nɛ efa ke a kɛ bɔfo ɔmɛ nɛ je kpo bɔɔ, 35nɛ e de mɛ ke: “Tsaatsɛmɛ Israelbi, nyɛɛ hyɛ nɛ hi ngɛ kikɛmɛ a nimli nɛ ɔmɛ a he, bɔ nɛ nyɛɛ kɛ mɛ maa ye ha. 36Ejakaa ningmi nɛ ɔ ɔ, Teuda te si nɛ e ke nɔ ko ji lɛ, nɛ nyumuhi maa pee lafa eywiɛ kɛ a he ya bɔ e he; se a gbe lɛ, nɛ nimli abɔ nɛ bu lɛ tue ɔ kulaa gbɛ fia, nɛ a yi hɛ si. 37Nɔ nɛ ɔ se ɔ Yuda, Galilea no ɔ te si ngɛ nihi a kanemi ligbi ɔmɛ ami, nɛ e muɔ asafo babauu ngɔ pue e se. Lɛ hu e hɛ mi kpata, nɛ nihi nɛ bu lɛ tue ɔ tsuo hu gbɛ fia. 38Lɔ ɔ he ɔ, i ngɛ nyɛ dee ke: Nyɛɛ ngmɛɛ kikɛmɛ a nimli nɛ ɔmɛ a he nɛ nyɛ ko di a se, ejakaa ke nimli a dɛ mi kikɛmɛ a yi mi tomi nɛ ɔ loo kikɛmɛ a ni tsumi nɛ ɔ je ɔ, e ma puɛ. 39Se ke Mawu dɛ mi e je ɔ, nyɛ be nyɛe ma puɛ; konɛ nyɛ ko ba pee nyɛ he kaa nihi nɛ a kɛ Mawu ngɛ ta hwue.” 40Nɛ a bu lɛ tue; nɛ a tsɛ bɔfo ɔmɛ kɛ ba, nɛ a fia mɛ kpa nɛ a wo mɛ kita ke a ko tu munyu ngɛ Yesu biɛ mi hu, nɛ a ngmɛɛ a he. 41Kɛkɛ nɛ a je gua ngua a hɛ mi kɛ ho kɛ bua jɔmi kaa e biɛ ɔ he ɔ, a bu mɛ nihi nɛ sa kaa a bɔ mɛ ahlua. 42Nɛ daa ligbi ɔ, a jɔɔ we ni tsɔɔmi kɛ Yesu Kristo fiɛmi ngɛ sɔlemi we ɔ kɛ wehi a mi.

Currently Selected:

Bɔfo 5: DAN77

Highlight

Copy