Bɔfo 4

Petro kɛ Yohane ngɛ gua a hɛ mi

1Se benɛ Petro kɛ Yohane ngɛ munyu ɔ tue kɛ ngɛ ma a tsɔɔe ɔ, osɔfo ɔmɛ kɛ sɔlemi we ɔ asafoatsɛ ɔ kɛ Sadukifo ɔmɛ ba pue a nɔ, 2ejakaa a muklii mi fu kaa a ngɛ ma a ni tsɔɔe, nɛ a ngɛ jajee ngɛ tsɔɔe ke Yesu te si kɛ je gbeje. 3Nɛ a nu mɛ, nɛ a wo mɛ tsu mi kɛ ya su e nɔ je na, ejakaa jamɛ a be ɔ mi ɔ je jɔ. 4Se nihi nɛ nu munyu ɔ a kpɛti nihi fuu he ye, nɛ nyumu ɔmɛ a yibɔ maa su akpe enyɔ.

5Jeha nɛ ɔ, e ba mi kaa e nɔ je na a, a ganɔ ɔmɛ kɛ ma nikɔtɔma amɛ kɛ mlaa tsɔɔli ɔmɛ ba bua a he nya ngɛ Yerusalem, 6kɛ osɔfo nɔkɔtɔma Hana, kɛ Kaiafa kɛ Yohane kɛ Aleksandro kɛ nihi abɔ nɛ je osɔfo nɔkɔtɔma a weku ɔ mi ɔ. 7Nɛ a ya ngɔ bɔfo ɔmɛ kɛ ba da kpɛti, nɛ a bi mɛ ke: “Mɛnɔ he wami nya, aloo mɛnɔ biɛ mi nyɛ pee enɛ ɔ ngɛ?” 8Kɛkɛ nɛ Petro nɛ Mumi Klɔuklɔu ɔ hyi lɛ tɔtɔɔtɔ ɔ, de mɛ ke: “Nyɛ ma mi ganɔ ɔmɛ kɛ Israel nikɔtɔmahi! 9Ke a kɛ wɔ ngɛ munyu yee mwɔnɛ ligbi nɛ ɔ ngɛ kpakpa nɛ a pee kikɛmɛ a hiɔtsɛ nɛ ɔ he kaa mɛnɔ nɔ a gu kɛ tsa lɛ ɔ, 10lɔ ɔ lɛɛ nyɛ tsuo kɛ Israel ma mluku ɔ kulaa a na nɛ a le kaa, Yesu Kristo, Nazare no ɔ, nɛ nyɛ sɛu, nɛ Mawu tle lɛ si kɛ je gbeje ɔ, lɛ nɔuu e biɛ mi nɔ nɛ ɔ daa si ngɛ nyɛ hɛ mi nɛ e he mi wa lɛ nɛ ɔ nɛ. 11Lɛ nɔuu ji tɛ ɔ nɛ nyɛ nɛ nyɛ ji tsu fiali ɔmɛ gbe he guɛ, nɛ e ba plɛ kɔ nya tɛ ɔ nɛ. 12Ejakaa yi wami hemi be nɔ ko nɔ ko mi; nɛ jeha nɛ ɔ hu, biɛ kpã ko be hiɔwe sisi nɛ a ngɔ ha nimli nɛ sa kaa a gu nɔ kɛ he wa yi wami.”

13Jeha nɛ ɔ benɛ a na Petro kɛ Yohane kã a nɛ a kpa si kaa pi womi mi leli kɛ ni leli kome ji mɛ ɔ, e pee a hɛ mi yaa, nɛ a kɔ se kaa a kɛ Yesu hi si. 14Nɛ jeha nɛ ɔ hu, akɛnɛ a na nɔmlɔ nɛ a tsa lɛ ɔ kɛ mɛ daa si he je ɔ, a nɛ nɔ́ ko nɛ a de. 15Lɔ ɔ he ɔ a fa mɛ ke a je gua a mi kɛ je kpo bɔɔ. A ya dami 16nɛ a ke: “Kɛ wa maa pee nimli nɛ ɔmɛ kɛɛ? ejakaa okadi ngua nɛ a pee ɔ ngɛ pãa ngɛ ni ɔmɛ kulaa nɛ ngɛ Yerusalem ɔ hɛ mi, nɛ wa be nyɛe ma kua. 17Se kɛ̃ ɔ, benɛ pee nɛ e ko gbɛ fia fuu ko hu ngɛ ma a mi he je ɔ, nyɛ ha waa wo a he gbeye, konɛ a ko tu munyu ngɛ kikɛmɛ a biɛ nɛ ɔ mi ngɔ tsɔɔ nɔ ko nɔ ko hu.” 18Nɛ a tsɛ mɛ kɛ ba, nɛ a wo mɛ kita kadikadi ke a ko wo nɔ tã, nɛ a ko tsɔɔ ni ngɛ Yesu biɛ mi kulaa hu.

19Se Petro kɛ Yohane he nɔ nɛ a de mɛ ke: “Ke e da blɔ ngɛ Mawu hɛ mi kaa a bu nyɛ mohu tue pe Mawu ɔ, nyɛɛ kojo. 20Ejakaa wɔɔ lɛɛ wa be nyɛe kaa ja wa de nihi nɛ wa na kɛ nihi nɛ wa nu ɔ.” 21Se mɛɛ lɛɛ, benɛ a kpale wo a he gbeye ɔ, a ngmɛɛ a he, ejakaa a nɛ́ bɔ nɛ a maa pee nɛ a maa pii mɛ ngɛ ma a he, ejakaa nihi tsuo ngɛ Mawu hɛ mi nyami woe ngɛ nɔ́ nɛ a pee ɔ he; 22ejakaa nɔmlɔ nɛ a tsa lɛ nyakpɛ tsami nɛ ɔ ye pe jeha nyingmi eywiɛ.

Asafo ɔ kpa pɛɛ kɛ bi hewamiwomi

23Se benɛ a ngmɛɛ a he ɔ, a ba a nyɛmimɛ ɔmɛ a ngɔ, nɛ a ba sɛɛ nihi kulaa nɛ osɔfo nikɔtɔma amɛ kɛ ma nikɔtɔma amɛ de mɛ ɔ ngɔ ha mɛ. 24Benɛ a nu ɔ, a kɛ juɛmi kake wo a gbi nɔ ha Mawu nɛ pee hiɔwe kɛ zugba kɛ wo kɛ nihi kulaa nɛ ngɛ a mi ɔ: 25“Mo nɔ nɛ o gu wa tsɛ David, o tsɔlɔ ɔ, nya de ke:

‘Mɛni he je je ma amɛ ngɛ hoo pee,

Nɛ ma a hu ngɛ yaka nihi susue nɛ ɔ?

26Zugba a nɔ matsɛmɛ ɔmɛ te da si,

Nɛ ganɔ ɔmɛ hu a nya ba bua

Ngɔ wo Nyɔmtsɛ ɔ kɛ nɔ nɛ a pɔ lɛ nu ɔ.’

27Niinɛ, Herode kɛ Pontio Pilato kɛ majemajeli ɔmɛ kɛ Israel ma amɛ hu ba bua a he nya ngɛ ma nɛ ɔ mi ngɔ wo o tsɔlɔ klɔuklɔu Yesu, nɔ nɛ o pɔ lɛ nu ɔ, 28konɛ a pee nihi tsuo nɛ o nine kɛ o yi mi tomi ɔ to ngɔ fɔ si ke a pee ɔ. 29Nɛ jeha nɛ ɔ hu Nyɔmtsɛ, hyɛ a he gbeye nɛ a ngɛ woe ɔ, nɛ o ha o sɔmɔli ɔmɛ kɛ kã fuu nɛ jaje o munyu ɔ, 30nɛ o kpã o nine mi nɛ o ha a tsa nihi, nɛ a gu o tsɔlɔ klɔuklɔu Yesu ɔ biɛ mi kɛ pee okadihi kɛ nyakpɛ nihi.” 31Benɛ a sɔle ɔ, he nɛ a nya ba bua ngɛ ɔ mimiɛ, nɛ Mumi Klɔuklɔu ɔ hyi mɛ tsuo tɔtɔɔtɔ, nɛ a kɛ kã jaje Mawu munyu ɔ.

Asafo ɔ pee a nihi kulaa kake

32Nihi babauu nɛ he ye ɔ kulaa hɛɛ tsui kake kɛ mumi kake, nɛ a ti nɔ ko nɔ ko tsɛ we e nihi nɛ e ngɛ ɔ mi eko ke lɛ nitse e nɔ, se mohu a ngɔ kulaa ngɔ pee kake. 33He wami kpetekpleenyɛ bɔfo ɔmɛ kɛ ye Nyɔmtsɛ Yesu sitemi ɔ he odase nɛ dloomi kpetekpleenyɛ ngɛ mɛ tsuo kulaa a nɔ. 34Nɔ ko nɔ ko be a kpɛti nɛ e fiɔ lɛ, ejakaa nihi abɔ nɛ ngɛ zugbahi loo wehi ɔ juaa, nɛ a kɛ nihi nɛ a jua amɛ a nya sika a baa, 35nɛ a kɛ ba pueɔ bɔfo ɔmɛ a nane nya, nɛ a dlaa ngɔ haa nɔ tsuaa nɔ bɔ nɛ he hiaa lɛ ɔ.

36Nɛ Yose, nɔ nɛ bɔfo ɔmɛ wo Barnaba (e sisi ji “Buawomibi”) ɔ, nɛ ji Levi no nɛ e se je Kipro ɔ, 37ngɛ zugba ko, nɛ e jua, nɛ e kɛ sika a ba nɛ e kɛ ba pue bɔfo ɔmɛ a nane nya.

Currently Selected:

Bɔfo 4: DAN77

Highlight

Copy