Bɔfo 27

Paulo Roma yami

1Bɛnɛ a ma nya si kaa wa maa ya Italia a, a ngɔ Paulo kɛ pamitsɛmɛ kpa komɛ hu ngɔ wo asafoatsɛ nɛ a tsɛɛ lɛ Yulio nɛ je Agusto ta asafo ɔ mi ɔ dɛ mi. 2Benɛ wa sɛ Adramitio lɛ ko nɛ maa hia kɛ ya gu Asia wo nya ma amɛ a nɔ ɔ mi ɔ, wa hia, nɛ Aristarko, Makedonia no ko nɛ je Tesalonika a piɛ wa he. 3Nɛ e nɔ je na a, wa ya da Zidon, nɛ akɛnɛ Yulio hɛɛ Paulo dɔdɔɔdɔ he je ɔ, e ngmɛ lɛ blɔ ke e ya jɔɔ e he. 4Nɛ wa hia ngɛ lejɛ ɔ, wa tsɔ Kipro zugba nɛ wo bɔle lɛ ɔ he, ejakaa wa ngɛ kɔɔhiɔ kpee. 5Nɛ benɛ wa po Kilikia kɛ Pamfilia wo ɔ, wa ba da Mira ngɛ Likia. 6Asafoatsɛ ɔ na Aleksandria lɛ ko ngɛ lejɛ ɔ nɛ yaa Italia, nɛ e je wɔ ngɔ wo mi.

7Wa nyɛɛ blɛoo be saii, nɛ beble loko wa su Knido hanɔ, nɛ akɛnɛ kɔɔhiɔ ɔ ngmɛ́ wɔ blɔ he je ɔ, wa tsɔ Kreta he kɛ ba Salmone. 8Nɛ beble loko wa po mi ngɛ lejɛ ɔ kɛ ba he ko nɛ a tsɛɛ Lɛsimuɔmi he kpakpa nɛ kɛ Lasea ma a he kɛ we ɔ. 9Se jeha nɛ ɔ, benɛ wa puɛ be fuu nɛ wo hɛ mi nyɛɛmi ɔ hu pee dengme, ejakaa hwɔhami be ɔ be mo he je ɔ, Paulo wo mɛ ga. 10E ke: “Tsaatsɛmɛ, i na kaa dengme gbomi kɛ nihi a hɛ mi kpatami babauu maa ba blɔ hiami nɛ ɔ mi, pi lɛ mi ni ɔmɛ kɛ lɛ ɔ kɛkɛ, se mohu wa wami nitsɛ hulɔ.” 11Se asafoatsɛ ɔ heɔ kudɔɔtsɛ ɔ kɛ lɛtsɛ ɔ yeɔ pe munyu nɛ Paulo ngɛ tue ɔ. 12Se akɛnɛ lɛ si muɔmi he ɔ hi saminya bɔ nɛ a ma nyɛ maa ye fiɛ be ɔ ngɛ lejɛ ɔ he je ɔ, a ti nihi fuu wo ga ke a hia kɛ je lejɛ ɔ nɛ a hyɛ kaa a ma nyɛ su Foinike nɛ ji Kreta lɛ si muɔmi he nɛ ngɛ leneyi-bonyoku kɛ omleyi-bonyoku kpɛti ɔ lo, konɛ a ya ye fiɛ be ɔ ngɛ lejɛ ɔ.

Wo nɔ kɔɔhiɔ ngua

13Nɛ benɛ leneyi kɔɔhiɔ bɔni fiami blɛoo ɔ, e pee mɛ kaa nɔ́ nɛ a ngɛ hlae ɔ ba mi, nɛ a hia kɛ be ngɛ Kreta he tataata. 14Se e kɛ we kɛkɛ nɛ wo nɔ kɔɔhiɔ ko nɛ a tsɛɛ lɛ omleyi-beleku kɔɔhiɔ ɔ hia kɛ ba kpee mɛ. 15Se benɛ kɔɔhiɔ ɔ sɛ lɛ ɔ mi nɛ e nyɛ we nya dami hu ɔ, wa ngmɛɛ he nɛ e fɔ nɔ. 16Nɛ benɛ wa sa fo kɛ tsɔ zugba kpɔ nyafii ko nɛ wo bɔle lɛ nɛ a tsɛɛ lɛ Klaudia, kɔɔhiɔ ya he ɔ he ɔ, dengme kɛ pɔtɔ loko wa nyɛ boto ɔ nu. 17Nɛ benɛ a wo boto ɔ nɔ ɔ, a kɛ kpahi fi lɛ, nɛ akɛnɛ a ngɛ gbeye yee kaa alinɔ a ma ya nɔ zia mɔsɔ (Sirti) ɔ mi he je ɔ, a gbe abalaa a, nɛ a fɔ́ nɔ kɛkɛ. 18Nɛ akɛnɛ wo nɔ kɔɔhiɔ ɔ ngɛ wɔ fiae basabasa wawɛɛ he je ɔ, je na nɔ ɔ, a je lɛ ɔ mi ni ɔmɛ eko ngɔ pue he. 19Nɛ ligbi nɛ ji ligbi etɛ ɔ waa kɛ wɔ nitsɛmɛ wa ninehi je lɛ ɔ he ni ɔmɛ ngɔ pue he. 20Akɛnɛ wa nɛ́ pu loo dodoehi ligbihi fuu, nɛ jeha nɛ ɔ hu kɔɔhiɔ ɔ nɛ ngɛ fiae ngɛ wɔ kpee ɔ nya wa wawɛɛ he je ɔ, jeha nɛ ɔ wa hɛ̃ bé nɔ kaa wa maa yɛ.

21Se benɛ a yi ni be saii ɔ, Paulo te si da a kpɛti nɛ e ke: “Tsaatsɛmɛ, jinɛ e sa kaa nyɛ buɔ mi tue nɛ a ko hia ngɛ Kreta nɛ a ba na kikɛmɛ a dengme kɛ nihi a hɛ mi kpatami nɛ ɔ. 22Jeha nɛ ɔ hu i ngɛ nyɛ ga woe ke nyɛ na tsui; ejakaa nyɛ ti nɔ ko yi be tae, ja lɛ ɔ kɛkɛ. 23Ejakaa nyɔ nɛ ɔ mi ɔ, Mawu nɔ nɔ́ nɛ i ji kɛ nɔ hu nɛ i sɔmɔɔ ɔ bɔfo ba da ye kasa nya, 24nɛ e ke: ‘Koo ye gbeye, Paulo! Ja a kɛ mo ya da Kaisare hɛ mi kɛ̃. Nɛ oʼɛ, Mawu ngɔ nihi kulaa nɛ kɛ mo nyɛɛ lɛ ɔ mi ɔ ngɔ ke mo.’ 25Lɔ ɔ he ɔ nyɛ na tsui, tsaatsɛmɛ, ejakaa i heɔ Mawu yeɔ kaa bɔ nɛ a ba de mi ɔ, ja nɛ e maa ba mi. 26Se bɔ tsuaa bɔ nɛ pee ɔ, wa ma ya sa si ngɛ zugba kpɔ nɛ wo bɔle lɛ ko nɔ kɛ.”

27Se benɛ nyɔ nɛ ji nyɔngma kɛ eywiɛ ɔ su, nɛ wa ngɛ kpakae kɛ ngɛ yae kɛ ngɛ bae ngɛ Adria wo ɔ nɔ, maa pee nyɔ mi kpɛti ɔ, lɛ mi nitsuli ɔmɛ susu kaa a su zugba ko he. 28A fɔ kalemi kpa, nɛ a na gugue nyingmi enyɔ; nɛ benɛ a ya a hɛ mi bɔɔ ɔ, a f ɔ ekohu, nɛ a na gugue nyɔngma kɛ enuɔ. 29Kɛkɛ nɛ a ye gbeye kaa alinɔ wa ma ya nɔ tɛ sahi a nɔ, nɛ a fɔ osɛkɛhi eywiɛ ngɛ lɛ ɔ se je, a kɛ ngɛ je nami mlɛe. 30Se benɛ lɛ mi nitsuli ɔmɛ ngɛ hlae nɛ a tu fo kɛ je lɛ ɔ mi ɔ, a bua nɛ a si boto ɔ ngɔ ma wo ɔ hɛ kaa nɔ́ nɛ pe a yaa fɔ́ osɛkɛhi ngɛ lɛ ɔ yi je. 31Kɛkɛ nɛ Paulo de asafoatsɛ ɔ kɛ aslaafo ɔmɛ ke: “Ke ni nɛ ɔmɛ je lɛ ɔ mi ɔ, lɔ ɔ lɛɛ nyɛ yi be wami nae.” 32Kɛkɛ nɛ aslaafo ɔmɛ po boto ɔ he kpa amɛ, na a ha e ya nɔ si.

33Kɛ ma je nami mi ɔ, Paulo kpa mɛ tsuo pɛɛ ke a ye nɔ́ ko, nɛ e ke: “Mwɔnɛ ji ligbi nyɔngma kɛ eywiɛ sɔuu nɛ nyɛ yi ni, nɛ nɔ́ ko nɔ́ ko yɛ nyɛ nya mi. 34Lɔ ɔ he ɔ i kpa nyɛ pɛɛ nɛ nyɛɛ ye ni; ejakaa lɔ ɔ lɛ ma ha nyɛ yi ma na wa, ejakaa nyɛ ti nɔ ko nɔ ko yi bwɔmi kake be e yi mi jee ngɔ nɔ si.” 35Nɛ benɛ e de jã a e kɛ̃ loo e wo abolo nɛ e na Mawu si ngɛ mɛ kulaa a hɛ mi, nɛ e ku mi nɛ e bɔni yemi. 36Kɛkɛ nɛ mɛ kulaa a na tsui, nɛ mɛ hu a ye ni. 37Wɔ kula ngɛ lɛ ɔ mi ɔ wa nya suu nimli lafa enyɔ kɛ nyingmi kpaago kɛ ekpa. 38Se benɛ a ye ni nɛ a tɔ ɔ, a sake blɛfo nɛ a wo ɔ ngɔ pue wo ɔ mi, nɛ a ha lɛ ɔ pee huyɛhuyɛ.

Lɛ ɔ butumi

39Nɛ benɛ je na a, a li zugba a, se a na wo nya kɔkɔɔmi he ko kɛ e nya zia, nɛ a to a yi mi kaa, ke a ma nyɛ ɔ, a ma ha lɛ ɔ ya sa si ngɛ lejɛ ɔ. 40Lɔ ɔ he ɔ a po osɛkɛ ɔmɛ ngɔ wo wo ɔ mi, nɛ a pɛne kudɔɔ ɔ he kpa amɛ hulɔ, nɛ a wo kpɛti a balaa a kɛ kpee kɔɔhiɔ nɛ ngɛ fiae ɔ, nɛ a plɛ lɛ ɔ yi ngɔ ha wo nya blɔ. 41Se akɛnɛ a ya nɔ wo enyɔ kpe he he je ɔ, a kɛ lɛ ɔ ya sa si; e yi je ɔ ya hɛ si kpɛii, se e supa a, oslɔke ɔmɛ a nyawami ɔ ywia lɛ. 42Aslaafo ɔmɛ a yi mi tomi ji kaa a maa gbe pamitsɛmɛ ɔmɛ konɛ a ti nɔ ko nɛ ko sle kɛ ho nɛ e ba tu fo. 43Se akɛnɛ asafoatsɛ ɔ ngɛ hlae nɛ e he Paulo yi wami he je ɔ, e tsi a yi mi tomi ɔ nya, nɛ e fa ke ninɛmɛ nɛ le slemi ɔ kekle a tu ngɔ pue wo ɔ mi, nɛ a ya nu kpo; 44se ninɛmɛ nɛ piɛ ɔ a ti ni komɛ a bu gbegbelihi a nɔ. Bɔ nɛ pee nɛ Tnɛ kulaa a nu kpo sɔkee ɔ ji nɛ ɔ nɛ.

Currently Selected:

Bɔfo 27: DAN77

Highlight

Copy