Bɔfo 26

Paulo je e nya ngɛ Agripa hɛ mi

1Kɛkɛ nɛ Agripa de Paulo ke: “A ngmɛ mo blɔ kaa o ja o gbi.” Kɛkɛ nɛ Paulo fɔ e nine nɛ e je e nya ke:

2“Matsɛ Agripa, e ngɔ ye nya kaa ma je ye nya mwɔnɛ ngɛ o hɛ mi, ngɛ nihi tsuo nɛ Yudafo ɔmɛ kɛ ngɛ ye nya poe ɔ he. 3O le Yudafo ɔmɛ a blɔ nya ni ɔmɛ kɛ nguane jemi sane ɔmɛ kulaa mi pɛpɛɛpɛ; lɔ ɔ he ɔ i kpa mo pɛɛ nɛ o to tsui nɛ o bu mi tue.

4“Yudafo ɔmɛ tsuo le bɔ nɛ i hi si ha kɛ je ye nihe mi, bɔ nɛ i hi ye ma a mi kɛ Yerusalem ha kekle ɔ. 5Ke a suɔ kaa a maa ye he odase ɔ, a le mi sa kɛ je sisije ɔ, kaa i ba ye je mi ngɛ wa jami ɔ mi kuu nɛ ngɛ veveeve pe kulaa nya, kaa Farisifono. 6Nɛ jeha nɛ ɔ, si nɛ Mawu wo wa tsɛmɛ ɔmɛ hɛ kɛ nɔ fɔmi ɔ he nɛ i daa si ngɛ hiɛ ɔ, nɛ a ngɛ mi kojoe nɔ nɛ. 7Kɔlɔ ɔ nɔ wa wetso nyɔngma kɛ enyɔ ɔ hɛ ngɛ he je nɛ a hɛɛ nyɔ kɛ pia jami nɛ nya wa a mi, benɛ pee nɛ a nine nɛ su nɔ. Matsɛ Agripa, kikɛmɛ a hɛ kɛ nɔ fɔmi nɛ ɔ he je nɛ Yudafo ɔmɛ ngɛ ye nya poe nɛ ɔ nɛ. 8Mɛni he je mɔ nɛ nyɛ Yudafo ɔmɛ nyɛ buu kaa e be mi kaa Mawu tleɔ ni gbogboehi a si ɔ?

9“Imi nitsɛ hu e pee mi kaa e sa kaa ma pee nihi fuu nɛ ma kɛ te si ngɔ si Yesu, Nazareno ɔ biɛ ɔ. 10I na pee ja hulɔ ngɛ Yerusalem, nɛ akɛnɛ i na he blɔ kɛ je osɔfo nikɔtɔma amɛ a ngɔ he je ɔ, i wo ni klɔuklɔu ɔmɛ a kpɛti nihi fuu tsu mi, nɛ ke a maa gbe mɛ ɔ, ye nya ngɛ mi eko. 11Nɛ i pɔɔ mɛ yi mi wami ngɛ kpe he ɔmɛ kulaa, nɛ i waa mɛ yi mi kaa a tu musu bɔmi munyuhi, nɛ i nuu a he godo wawɛɛ nitsɛ, nɛ i waa mɛ yi mi kɛ yaa ma se mahi a mi tete.

Paul sɛɛ e tsakemi ɔ

12“Enɛ ɔ nɔ nɔuu i nyɛɛ nɛ i hia blɔ kɛ yaa Damasko ngɛ osɔfo nikɔtɔma amɛ a he wami blɔ ngmɛmi nya. 13Nɛ piani katakata, benɛ i nyɛɛ blɔ ɔ nɔ ɔ, matsɛ, i na la ko nɛ ngɛ kpɛe pe pu je hiɔwe ba bɔle mi kɛ nihi nɛ kɛ mi nyɛɛ ɔ. 14Nɛ benɛ wɔ tsuo wa ya nɔ si ɔ, i nu gbi ko nɛ kɛ mi tu munyu ngɛ Hebri gbi mi ke: ‘Saul, Saul, Mɛni he je o ngɛ mi yi mi wae? E wa ha mo kaa o maa hia nazi ngɔ si lohwehi a kpakami tso nya dade ɔ.’ 15Nɛ i ke: ‘Mo mɛnɔ ʼi, Nyɔmtsɛ?’ Nɛ Nyɔmtsɛ ɔ ke: ‘Imi Yesu nɛ o ngɛ lɛ yi mi wae ɔ ʼi. 16Tee si nɛ o da o nane nɔ; enɛ ɔ he nɛ i je ye he kpo tsɔɔ mo nɛ ɔ nɛ, konɛ ma pee mo sɔmɔlɔ kɛ odase yelɔ ngɛ nihi nɛ o na kɛ nihi nɛ ma je ye he kpo ngɔ tsɔɔ mo ngɛ he ɔmɛ a he. 17Ma je mo kɛ maa je ma a kɛ majemajeli nɛ i ngɛ mo a ngɔ tsɔe ɔ a dɛ mi, 18nɛ o ya bli a hɛngmɛ komɛ a kpale kɛ je diblii mi kɛ ba la he, kɛ je abosiami he wami mi kɛ ba Mawu ngɔ, nɛ a na a he yayami pami kɛ gbo si ni ngɛ nihi nɛ a kɛ ye nɔ hemi kɛ yemi pee mɛ klɔuklɔu ɔmɛ a kpɛti.’ ”

Paulo sɛɛ e nitsumi he ni

19“Lɔ ɔ he ɔ, Matsɛ Agripa, i gbo we kikɛmɛ a hiɔwe kpo jemi nɛ ɔ nɔ tue; 20se mohu i jaje ngɔ tsɔɔni hi nɛ ngɛ Damasko ɔ kekle, kɛ nihi nɛ ngɛ Yerusalem kɛ Yudea zugba a nɔ kulaa, kɛ majeli ɔmɛ hulɔ, ke a tsake a tsui nɛ a kpale kɛ ba Mawu ngɔ nɛ a tsu nihi nɛ sa tsui tsakemi. 21Enɛ ɔmɛ a he je nɛ Yudafo ɔmɛ nu mi ngɛ sɔlemi we ɔ, nɛ a ka mi gbemi ɔ nɛ. 22Se Mawu yemi kɛ buami nya i kɛ daa si kɛ ba su mwɔnɛ ligbi nɛ ɔ nɔ, nɛ i ngɛ odase yee kɛ ngɛ nimli tsɔwi kɛ nimli nguahi tsɔɔe nɛ ɔ nɛ. I tu we munyu ko kaa ja nihi nɛ gbali ɔmɛ kɛ Mose hu de ke a maa ba a, 23kaa Kristo ɔ maa na amanehlu, nɛ e ba plɛ kekleekle nɔ ngɛ ni gbogboehi a sitemi ɔ mi, nɛ e ba jaje la a he sane ngɔ tsɔɔ ma a kɛ majeli ɔmɛ.”

24Benɛ Paulo je e nya kikɛ ɔ, Festo de kɛ gbi wawɛɛ ke: “Paulo, godo o ngɛ nue nɛ ɔ! Womi kasemi sɔuu lɛ ha o ngɛ godo nue nɛ ɔ nɛ.” 25Se Paulo ke: “I nui godo, wa nɔmo Festo, se anɔkuale kɛ hɛ si kami munyu i ngɛ tue nɛ ɔ nɛ. 26Matsɛ ɔ nɛ i ngɛ munyu tue kɛ kã kɛ ngɛ lɛ tsɔɔe nɛ ɔ le sane nɛ ɔmɛ a mi. I kpa we si kaa ni nɛ ɔmɛ eko ngɛ nɛ a kɛ laa lɛ; ejakaa tsa pi laami mi nɛ a pee enɛ ɔ ngɛ. 27Tse o heɔ gbali ɔmɛ yeɔ, Matsɛ Agripa? I le kaa o heɔ yeɔ.” 28Agripa de Paulo ke: “Piɛ bɔɔ nɛ o ko ha ye yi mi plɛ nɛ i pee Kristofono.” 29Se Paulo ke: “I na nɛ jinɛ Mawu ha ba mi kaa, e piɛ bɔɔ jio, e piɛ fuu jio, pi mo o nɔ kake kɛkɛ, se mohu nihi kulaa nɛ ngɛ mi tue bue mwɔnɛ nɛ ɔ hu ko plɛ kaa i mi, se pã nɛ ɔmɛ eko kɛkɛ nɛ a ko ka mɛ.”

30Nɛ benɛ e de kikɛ ɔ, matsɛ ɔ kɛ amlaalo ɔ kɛ Bernike kɛ nihi nɛ kɛ mɛ hii si ɔ te si, 31nɛ a ya se, nɛ a ya da, nɛ a ke: “Nyumu nɔ pee we nɔ́ ko nɛ sa gbenɔ loo tsu mi womi.” 32Nɛ Agripa de Festo ke: “Kaa nyumu nɛ ɔ ngɔɛ e sane ɔ ngɔ ha we Kaisare yemi jinɛ, a ma nyɛ e he maa ngmɛɛ.”

Currently Selected:

Bɔfo 26: DAN77

Highlight

Copy