Bɔfo 28

Paulo ngɛ Melita

1Nɛ benɛ wa je mi sɔkee ɔ loko wa ba le kaa zugba kpɔ nɛ wo bɔle lɛ ɔ biɛ ji Melita. 2Lejɛ ɔ tsɛmɛ pee wɔ kpakpa babauu; ejakaa a slɛ la nɛ a he wɔ tsuo kulaa kɛ hɛmuɔ ngɛ hiɔmi nɛmi babauu kɛ fiɛ ɔ he. 3Se benɛ Paulo bua lɛ tsɔwi nya nɛ e kɛ yaa wo la a mi ɔ, sinɔ ko je la gligli ɔ mi mla e nine he. 4Se benɛ lejɛ ɔ tsɛmɛ ɔmɛ na lohwe ɔ nɛ mla Paulo nine he ɔ, a de a he ke: “Bɔ tsuaa bɔ nɛ pee ɔ, kikɛmɛ a nyumu nɛ ɔ awiyelɔ ji lɛ, nɛ a he e yi wami kɛ je wo ɔ mi lɛɛ, se lueyemi ngmɛ́ lɛ blɔ nɛ e yi nɛ na wa.” 5Se Paulo huanya lohwe ɔ ngɔ wo la a mi, nɛ e yi lɛ awi ko. 6Se a hɛ ngɛ nɔ kaa e maa fuu loo e maa fia si gbo tlukaa. Se benɛ a hyɛ blɔ hluu nɛ a na kaa nɔ́ ko slɔɔto ko pee we lɛ ɔ, a tsake a juɛmi nɛ a ke mawu ko ji lɛ.

7Jeha nɛ ɔ zugba kpɔ nɛ wo bɔle lɛ ɔ nɔ nɔkɔtɔma nɛ a tsɛɛ lɛ Publio ɔ ngɛ a bɔɔ ko ngɛ lejɛ ɔ ni ɔmɛ a mi. Lɛ lɛ e he wɔ kɛ hɛmuɔ nɛ e kɛ tsui mi jɔmi pee wɔ nibwɔ ligbi etɛ sɔuu. 8Se e ba mi kaa asla kɛ muklii mi pa nu Publio tsɛ kɛ fɔɔ si. Paulo ya e ngɔ, nɛ e sɔle nɛ e ngɔ e ninehi ngɔ pue e nɔ nɛ e tsa lɛ. 9Jeha nɛ ɔ benɛ a pee enɛ ɔ ɔ, ni kpa komɛ hu nɛ ngɛ gboe ngɛ zugba kpɔ nɛ wo bɔle lɛ ɔ nɔ ɔ ba, nɛ a tsa mɛ. 10Nɛ mɛ hu a wo wa hɛ mi nyami babauu, nɛ benɛ wa hia kɛ je lejɛ ɔ, a ha wɔ nihi nɛ hia wɔ.

Paulo je Melita kɛ ya Roma

11Hlami etɛ se ɔ wa ya sɛ Aleksandria lɛ ko nɛ e he so ji Dioskurioi (aloo hawi) nɛ ba ye fiɛ be ɔ ngɛ zugba kpɔ nɛ wo bɔle lɛ ɔnɔ ɔ mi, nɛ wa hia kɛ ho. 12Nɛ benɛ wa ya da si ngɛ Sirakusa a, wa hi lejɛ ɔ ligbi etɛ. 13Nɛ wa je lejɛ ɔ, wa lɔgɔ si kɛ ba Regio; nɛ je na nɔ ɔ, benɛ leneyi kɔɔhiɔ ɔ ba fia a, wa pue nɔ, nɛ ligbi nɛ ji enyɔ ɔ wa su Putueli. 14Wa ba na nyɛmimɛ komɛ ngɛ lejɛ ɔ. A kpa wɔ pɛɛ ke waa kɛ mɛ nɛ hi si ligbi kpaago. Kɛkɛ nɛ wa ba su Roma. 15Nɛ benɛ nyɛmimɛ nɛ ngɛ lejɛ ɔ nu wa he ɔ, a ba kpee wɔ ngɛ Apiiforo kɛ Tretaberna. Benɛ Paulo na mɛ ɔ e na Mawu si nɛ e na tsui.

Paulo ngɛ Roma

16Benɛ wa ba su Roma a, asafoatsɛ ɔ je pamitsɛmɛ ɔmɛ ngɔ ha asafoatsɛ nɔkɔtɔma a, se Paulo lɛɛ, a ngmɛ lɛ blɔ kaa e hi he nɛ e suɔ, se aslaafono ko buu e he. 17Nɛ e ba mi kaa ligbi etɛ se ɔ Paulo ha a tsɛ Yudafo ɔmɛ a nikɔtɔmahi nɛ ngɛ ɔ kɛ ba kpe; nɛ benɛ a nya ba bua a, e de mɛ ke: “Tsaatsɛmɛ kɛ mamimɛ, i tɔ̃ we ma a loo wa tsɛmɛ ɔmɛ blɔ nya ni ɔmɛ a nɔ, kɛ̃ ɔ, a ngɔ mi ngɔ wo Romabi ɔmɛ a dɛ mi ngɛ Yerusalem kaa pamino. 18Benɛ a hla ye sane ɔ mi ɔ, a suɔ kaa a ngmɛɛ ye he, ejakaa gbenɔ sane ko be ye he kulaa. 19Se akɛnɛ Yudafo ɔmɛ kplɛɛ we he je ɔ, e fi mi kaa ma ngɔ ye sane ɔ ngɔ ha Kaisare yemi, se pi kaa i ngɛ nɔ́ ko nɛ i kɛ maa po yema a nya. 20Jeha nɛ ɔ kikɛmɛ a sane nɛ ɔ he je nɛ i tsɛ nyɛ kɛ ba, konɛ ma na nyɛ nɛ ma kɛ nyɛ nɛ tu munyu; ejakaa Israel hɛ kɛ nɔ fɔmi ɔ he je nɛ a wo mi kikɛmɛ a kɔsɔkɔsɔ nɛ ɔ nɛ.” 21Nɛ a de lɛ ke: “Wɔɔ lɛɛ wa na we womi komɛ kɛ ji Yudea ngɛ o he, nɛ jeha nɛ ɔ hu nyɛmimɛ ɔmɛ a ti nɔ ko bɛ́ hiɛ ɔ ba sɛɛ we o he sane ko aloo o he munyu yaya ko. 22Se wa suɔ kaa wa maa bu o juɛmi ɔ tue; ejakaa kikɛmɛ a kuu nɛ ɔ wa le kaa a tuɔ e he munyu yaya ngɛ he tsuaa he.”

23Nɛ benɛ a to lɛ ligbi ɔ, a ti nihi fuu ba e ngɔ ngɛ e to he ɔ, nɛ e jaje Mawu matsɛ yemi ɔ he sane ɔ ngɔ tsɔɔ mɛ, nɛ e ye he odase faii, nɛ e je Mose Mlaa a kɛ gbali ɔmɛ a mi hla konɛ a yi mi nɛ plɛ̃ kɛ ba Yesu blɔfami kɛ je mɔtu kɛ ya su gbɔkuɛ. 24Ni komɛ he e munyuhi nɛ e tu ɔmɛ ye, se ni komɛ hu he we yi. 25Nɛ akɛnɛ a nya ya pee we kake he je ɔ, a je benɛ Paulo tu nyagbe munyu kake nɛ ɔ: “Niinɛ nɛ Mumi Klɔuklɔu de ngɛ gbalɔ Yesaia nya tsɔɔ wa tsɛmɛ ɔmɛ ke:

26‘‘Yaa ma nɔ ngɔ nɛ o ya de ke:

Numi ɔ nyɛ maa nu lɛɛ, se nyɛ be sisi nue,

Nɛ nami ɔ nyɛ maa na lɛɛ, se nyɛ be se kɔe.

27Ejakaa ma nɛ ɔ tsui ti,

Nɛ a tue wa kɛ nɔ numi,

Nɛ a mia a hɛngmɛ

Konɛ a ko na kɛ a hɛngmɛ

Nɛ a ko nu kɛ a tue,

Nɛ a tsui hu ko na sisi,

Nɛ a kpale nɛ i tsa mɛ.’

28“Lɔ ɔ he ɔ nyɛ na nyɛɛ le kaa, a tsɔ nɛ a kɛ Mawu Yi wami hemi sane ɔ ya ha majeli ɔmɛ, nɛ mɛɛ lɛɛ a maa bu tue hulɔ.” [ 29Nɛ benɛ Paulo tu munyu nɛ ɔmɛ ɔ Yudafo ɔmɛ je, nɛ a je nɔ babauu ngɛ a kpɛti.]

30Nɛ Paulo hi we nɛ a ba ha lɛ ɔ mi jeha mluku enyɔ, nɛ e heɔ nihi kulaa nɛ baa e ngɔ ɔ, 31nɛ e fiɛɔ Mawu matsɛ yemi ɔ he sane ɔ, nɛ e kɛ kã babauu jajeɔ Mawetsɛ Yesu Kristo he sane ɔmɛ tsɔɔ mɛ, nɛ nɔ ko nɔ ko tsi lɛ blɔ.

Currently Selected:

Bɔfo 28: DAN77

Highlight

Copy