Bɔfo 25

Paulo ngɔ e sane ɔ ngɔ ha Kaisare yemi

1Festo ba ye amlaalo, ligbi etɛ se pɛ kɛkɛ nɛ e je Kaisarea kɛ ho Yerusalem ya. 2Kɛkɛ nɛ osɔfo nikɔtɔma amɛ kɛ Yudafo ɔmɛ a nikɔtɔma amɛ ba po Paulo nya ha lɛ, nɛ a kpa lɛ pɛɛ, 3nɛ a bi ke e hyɛ a hɛ mi nɛ e tsɔ nɛ a ya ngɔ Paulo kɛ ba Yerusalem; ejakaa a wo e he ka konɛ a gbe lɛ ngɛ blɔ ɔ nɔ. 4Se Festo he nɔ ke, Paulo nɛ hi tsu ɔ mi ngɛ Kaisarea, se lɛ nitsɛ hu e be kɛe nɛ e maa ya lejɛ ɔ, 5he je ɔ e ke: “Nyɛ ha nyɛ nya dali ɔmɛ nɛ a kɛ mi nɛ ya lejɛ ɔ, nɛ ke sane yaya ko ngɛ nyumu ɔ he ɔ nɛ a de.”

6Nɛ benɛ e ye maa pee ligbi kpaanyɔ loo nyɔngma ngɛ a ngɔ ɔ, e pue nɔ kɛ ho Kaisarea ya, nɛ e nɔ je na a e ya hi kojomi sɛ ɔ nɔ, nɛ e fa ke a kɛ Paulo nɛ ba. 7Se benɛ e ba lejɛ ɔ, Yudafohi nɛ je Yerusalem ba a ba bɔle lɛ kɛ kpe nɛ a kɛ nya pomi sanehi fuu nɛ nya wa ba pue Paulo nɔ, se a nyɛ we nya nɛ a tsɔɔ. 8Paulo je e nya de ke: “I tɔ́ we Yudafohi a mlaa ko ɔ, jeha nɛ ɔ hu, i tɔ́ we sɔlemi we ɔ loo Kaisare nɔ.” 9Se akɛnɛ Festo suɔ kaa e pee nɔ́ nɛ sa Yudafo ɔmɛ a hɛ mi he je ɔ, e bi Paulo ke: “O suɔ kaa o ya Yerusalem nɛ ma ya kojo mo ngɛ lejɛ ɔ ngɛ kikɛmɛ a sane nɛ ɔmɛ a he lo?” 10Se Paulo ke: “Kaisare kojomi sɛ ɔ hɛ mi i daa si ngɛ nɛ ɔ nɛ, he nɛ sa kaa a kojoɔ mi ngɛ ɔ. Yudafo ɔmɛ ɔ, i tɔ́ we a ɔ, kaa bɔ nɛ o le saminya a. 11Lɔ ɔ he ɔ ke i ye sane yaya ko nɛ i pee nɔ́ ko nɛ sa gbenɔ ɔ, i kua we gbenɔ. Se ke sanehi nɛ ni nɛ ɔmɛ ngɛ ye nya poe ngɛ he nɛ ɔ eko eko be mi ɔ, nɔ ko be nyɛe maa ngɔ mi ngɔ wo a dɛ mi. I ngɔ ye sane ɔ ngɔ ha Kaisare yemi.” 12Kɛkɛ nɛ Festo kɛ e ga woli ɔmɛ hla mi, nɛ e ke: “Nɛ o kɛ o sane ɔ ha Kaisare yemi nɛ ɔ ɔ, Kaisare ngɔ nɔuu o maa ya.”

Paulo ngɛ Agripa kɛ Bernike hɛ mi

13Be ko se ɔ, matsɛ Agripa kɛ Bernike ba Kaisarea nɛ a ba nga Festo. 14Nɛ benɛ a ye be saii ngɛ lejɛ ɔ, Festo jaje Paulo sane ɔ ngɔ tsɔɔ matsɛ ɔ nɛ e ke: “Nyumu ko ngɛ hiɛ ɔ nɛ Felike si lɛ ngɛ tsu mi; 15benɛ i ya Yerusalem ɔ osɔfo nikɔtɔma amɛ kɛ Yudafo ɔmɛ a nikɔtɔma amɛ ba ye ngɔ kɛ e nya pomi, nɛ a kpa mi pɛɛ ke ma bu lɛ fɔ. 16I ha mɛ heto ke, e be Romabi a mlaa mi kaa a gbaa nɔ ko nɔ ngɔ haa gbenɔ, ja nɔ nɛ a po e nya a kɛ e nya poli ɔmɛ kpe hɛ mi kɛ hɛ mi nɛ nɔ ɔ na he blɔ je e nya ngɛ sane nɛ a ngɔ fɔ e nɔ ɔ he lolo. 17Lɔ ɔ he ɔ, benɛ a nya ba bua ngɛ hiɛ ɔ ɔ, i tui tslee, se je na nɔ ɔ, i ya hi kojomi sɛ ɔ nɔ, nɛ i fa ke a ngɔ nyumu ɔ kɛ ba. 18Se benɛ e nya poli ɔmɛ ba da si ɔ, a kɛ sanehi nɛ i susu ɔmɛ a kpɛti ngu kake bɛ́ ba pui e nya, 19se mohu mɛ nitsɛmɛ a Mawu jami he nguane jemi sanehi komɛ kɛ Yesu ko nɛ e gbo nɛ Paulo ma nɔ mi ke e hɛ ngɛ ɔ he sanehi a hɛɛ kɛ ba. 20Se akɛnɛ i li bɔ nɛ ma pee kɛ hla kikɛmɛ a sane nɛ ɔmɛ a mi he je ɔ, i bi lɛ ke e maa suɔ kaa e ya Yerusalem nɛ a ya ye kikɛmɛ a sane nɛ ɔ ngɛ lejɛ ɔ lo? 21Se akɛnɛ Paulo dai e sane ɔ ngɔ ha Kaisare nitsɛ yemi he je ɔ, i fa ke a ngɔ lɛ ngɔ to kɛ ya su be nɛ ma ha a ngɔ lɛ kɛ ya Kaisare ngɔ.” 22Kɛkɛ nɛ Agripa de Festo ke: “Jinɛ imi hu ma suɔ kaa ma bu nɔmlɔ ɔ tue.” Nɛ e ke: “Hwɔɔ ɔ o maa bu lɛ tue.”

23Lɔ ɔ he ɔ, e nɔ je na a, benɛ Agripa kɛ Bernike mia gbegbelii kɛ ba nɛ a kɛ asafoatsɛmɛ nikɔtɔmahi kɛ ma a mi nimli ngua amɛ ba sɛ sane tue bumi he ɔ, Festo fa, nɛ a kɛ Paulo ba. 24Nɛ Festo ke: “Matsɛ Agripa, kɛ nyɛ nihi tsuo nɛ nyɛɛ kɛ wɔ ngɛ hiɛ ɔ, nyɛ ngɛ kikɛmɛ a nyumu nɛ ɔ nɛ Yudafohi asafo mluku ɔ kulaa ba kpa mi pɛɛ ngɛ Yerusalem kɛ hiɛ ɔ tsuo nɛ a kpa ngmlaa wo mi ke e sɛ́ kaa e hii je mi hu ɔ hyɛe. 25Se imi lɛɛ i na kaa e pee we nɔ́ ko nɛ sa gbenɔ, nɛ akɛnɛ lɛ nitsɛ e tu e sane ɔ ngɔ wo Kaisare dɛ mi he je ɔ, i ma nya si kaa a kɛ lɛ ya ha lɛ. 26Se i be sane tutuutu ko nɛ jinɛ ma ngma ya ha nyɔmtsɛ ɔ, lɔ ɔ he hulɔ nɛ i kɛ lɛ ba nyɛ hɛ mi, benɛ pee nɛ ke a hla sane ɔ mi ɔ, nɛ ma na nɔ́ ko ma ngma. 27Se e peɔ mi kaa e dɛ́ kaa a ngɔɔ pamino ko ngɔ maneɔ nɛ a tsɔɔ we nɔ́ nɛ a ke e pee.”

Currently Selected:

Bɔfo 25: DAN77

Highlight

Copy