Bɔfo 24
24
Yudafo ɔmɛ po Paulo nya
1Ligbi enyɔ se ɔ, osɔfo nɔkɔtɔma Anania kɛ ma nikɔtɔma amɛ ekomɛ kɛ otsiame ko nɛ a tsɛɛ lɛ Tertulo ɔ ba lejɛ ɔ, nɛ a ba jaje Paulo he sane ngɔ tsɔɔ amlaalo ɔ. 2Nɛ benɛ a ya tsɛ Paulo kɛ ba a, Tertulo bɔni e nya pomi, nɛ e ke: “Wa nɔmo Felike, akɛnɛ o yinɔ nɛ ɔ wa tue mi jɔ wɔ babauu, nɛ jeha nɛ ɔ hu o nɔ hyɛmi ɔ nya a o ha nihi fuu ba hɛngmɛ nɔ ngɛ kikɛmɛ a zugba nɛ ɔ nɔ he ɔ, 3wa naa mo si babauu daa nɛ ɔ ngɛ he tsuaa he ngɛ enɛ ɔmɛ kulaa he. 4Se benɛ pee nɛ ye munyu se nɛ ko kɛ fuu tsɔ he je ɔ, i kpa mo pɛɛ nɛ o bu wɔ tue bɔɔ ngɛ o mi mi himi nya. 5E ji anɔkuale kaa wa na nyumu nɛ ɔ kaa e ji nihi a tue puɛlɔ, e woɔ Yudafohi tsuo nɛ ngɛ zugba mluku ɔ kulaa nɔ ɔ yi mi nɛ a tsɔ atua, nɛ jeha nɛ ɔ hu e ji Nazaretsɛmɛ a kuu ɔ nya kpa. 6E ka sɔlemi we ɔ blemi nɛ wa nu lɛ. [Nɛ jinɛ wa ngɛ hlae nɛ waa kojo lɛ ngɛ wa Mlaa a nya. 7Se asafoatsɛ nɔkɔtɔma Lisia ba nɛ e ba kpɔ lɛ ngɛ wa dɛ ka nya, nɛ e kɛ lɛ ho, 8nɛ e fa e nya poli ɔmɛ ke a ba o ngɔ], nɛ ke mo nitsɛ o bi e nya mi munyu ɔ, o maa na sanehi nɛ wa ngɛ e nya poe ngɛ he ɔ kulaa.” 9Nɛ Yudafo ɔmɛ hu ka nɔ, nɛ a ma nɔ mi ke munyu nɛ ɔmɛ ngɛ mi ja.
Paulo je e nya ngɛ Felike hɛ mi
10Se benɛ amlaalo ɔ fɔ Paulo nine ke e tu munyu ɔ, e wo e nya nɔ nɛ e ke: “Akɛnɛ i le kaa tsa pi mwɔnɛ nɛ o je bɔni zugba nɛ ɔ nɔ amlaalo yemi he je ɔ, i na bua jɔmi nɛ ma kɛ je ye nya. 11Ke o bu ɔ, o maa na kaa ligbi nyɔngma kɛ enyɔ pɛ ji nɛ ɔ nɛ i ba be kɛ ho Yerusalem ya ke ma ya ja Mawu. 12Nɛ jeha nɛ ɔ hu a nɛ mi hyɛ kaa i kɛ nihi ngɛ nya sae, aloo i ngɛ nihi bue ngɛ sɔlemi we ɔ, aloo kpe he ɔmɛ, aloo ma a mi. 13Nɛ jeha nɛ ɔ hu sanehi nɛ a kɛ ngɛ ye nɔ fɔe nɛ ɔ, a be nya nyɛe maa tsɔɔ. 14Nɔ́ nɛ i ngɛ mi gbae pãa ngɛ dee ji enɛ ɔ kaa, tsɔɔmi nɛ a ngɛ tsɛe ke nyangɔ tsɔɔmi ɔ, kɔlɔ ɔ nɔuu nya i jaa wa tsɛmɛ a Mawu ɔ ngɛ; i heɔ nihi kulaa nɛ a ngma ngɛ Mlaa a kɛ gbali ɔmɛ a mi ɔ yeɔ. 15I ngɛ Mawu nɔ hɛ kɛ nɔ fɔmi kaa ni gbogboehi a si temi maa ba, nɛ dali kɛ nihi nɛ dɛ́ kulaa maa te si, kɔlɔ ɔ nɔuu blɔ ni nɛ ɔmɛ hu ngɛ hyɛe. 16Enɛ ɔ he nɛ i kɛ ye he fɔɛ si ɔ nɛ, benɛ pee nɛ ma na he nile nɛ yobu be he ngɛ Mawu kɛ nimli a hɛ mi ngɛ nihi kulaa mi.
17“Nɛ jehahi fuu a se ɔ, i ba nɛ i kɛ nike ni ba ha ye ma a nɛ ma sã bɔ hulɔ. 18Enɛ ɔ mi nɛ a na mi kaa i ngɛ ye he tsukɔe ngɛ sɔlemi we ɔ, se a nɛ́ mi kɛ asafo ko ɔ, a n nɛ́ mi kɛ hoopeemi ko hulɔ. 19Se Yudafohi komɛ nɛ je Asia a ngɛ lejɛ ɔ, jinɛ mɛ nɛ sa kaa a ba o hɛ mi, nɛ ke a ngɛ ye he sane ko ɔ nɛ a ba jaje. 20Aloo ni nɛ ɔmɛ nitsɛmɛ po, ke a na nɔ́ ko nɛ dɛ ngɛ ye he benɛ i daa si ngɛ gua ngua a hɛ mi ɔ, a de; 21kaa ja kikɛmɛ a munyu kake nɛ benɛ i da a kpɛti nɛ i wo ye gbi nɔ de ke: Ni gbogboehi a sitemi he je nyɛ ngɛ mi kojoe mwɔnɛ ligbi nɛ ɔ’ ɔ he kɛkɛ.”
22Se akɛnɛ Felike le kikɛmɛ a tsɔɔmi nɛ ɔ he sane pɛpɛɛpe he je ɔ, e tsɛ̃ mɛ ngɔ to, nɛ e ke: “Ke asafoatsɛ nɔkɔtɔma Lisia ba a, ma hyɛ nyɛ sane ɔ ma ye.” 23Nɛ e fa asafoatsɛ ɔ ke e ngɔ Paulo ngɔ to, nɛ e ha e na hejɔmi, nɛ ke e he nimli ma lɛ sɔmɔmi loo slaami ɔ e ko tsi mɛ blɔ.
Paulo ngɛ Felike kɛ Drusila hɛ mi
24Se be saii se ɔ, Felike kɛ e yo Drusila nɛ ji Yudayo ɔ ba, nɛ e ha a ya tsɛ Paulo kɛ ba, konɛ e bu Kristo nɔ hemi kɛ yemi he sane ɔ tue. 25Se benɛ e ngɛ dami kɛ he nɔ yemi kɛ kojomi nɛ maa ba a he munyu tue ɔ, Felike ye gbeye wawɛɛ, nɛ e de lɛ ke: “Yaa lolo; se ke i na ye he deka hu ɔ, ma tsɛ mo ekohu.” 26Se jamɛ a be ɔ mi nɔuu ɔ, e hɛ ngɛ nɔ kaa Paulo ma ha lɛ sika konɛ e ngmɛɛ e he, kɔlɔ ɔ he nɛ e tsɛɛ lɛ kpitikpiti nɛ e kɛ lɛ ba sɛɛ ni ɔ nɛ.
27Se jeha enyɔ se ɔ, Porkio Festo ba ye Felike nane mi; nɛ akɛnɛ Felike suɔ kaa e pee nɔ́ nɛ sa Yudafo ɔmɛ a hɛ mi he je ɔ, e si Paulo ngɛ tsu ɔ mi.
Currently Selected:
Bɔfo 24: DAN77
Highlight
Share
Copy
Want to have your highlights saved across all your devices? Sign up or sign in
Dangme New Testament © United Bible Societies, 1977.
