Bɔfo 23

1Paulo tɛ̃tɛ̃ e hɛ mi nɛ e hyɛ gua ngua a kɛ kpe nɛ e ke: “Tsaatsɛmɛ kɛ mamimɛ, imi lɛɛ he nile kpakpa sɔuu i kɛ ba ye je mi ngɛ Mawu hɛ mi kɛ ba su mwɔnɛ ligbi nɛ ɔ.” 2Kɛkɛ nɛ osɔfo nɔkɔtɔma Anania fa nihi nɛ daa si ngɛ e kasa nya a ke a gba e nya ma. 3Kɛkɛ nɛ Paulo de lɛ ke: “Ma kɛ̃ Mawu ma gba mo, mo gli nɛ a sa he kalo! O hii si ngɛ mi kojoe ngɛ Mlaa a nya, nɛ o pa jee Mlaa a se faa ke a gba mi ma?” 4Se nihi nɛ daa si ngɛ e kasa nya a de lɛ ke: “Ee! Mawu osɔfo nɔkɔtɔma a o ngɛ jɛe nɛ ɔ?” 5Nɛ Paulo ke: “Mamimɛ, i li kaa osɔfo nɔkɔtɔma ʼi; ejakaa a ngma ke: ‘Koo tu o ma mi nɔkɔtɔma he munyu yaya.’ ”

6Se benɛ Paulo kpa si kaa fã kake ɔ Sadukifohi ji mɛ, nɛ fã kpa a Farisifohi ʼi ɔ, e nga ngɛ gua ngua a kpɛti ke: “Tsaatsɛmɛ kɛ mamimɛ, imi lɛɛ Farisifo no ji mi kɛ Farisifo no bi hulɔ. Hɛ nɔ kami kɛ ni gbogboehi a si temi ɔ he a ngɛ mi kojoe nɛ ɔ nɛ.” 7Benɛ e de kikɛ ɔ, kɛkɛ nɛ pɛ sɛ Farisifo ɔmɛ kɛ Sadukifo ɔmɛ a kpɛti, nɛ aafo ɔ mi gba enyɔ. 8Ejakaa Sadukifo ɔmɛ deɔ ke ni gbogboehi a si temi ko be nɛ jeha nɛ ɔ hu hiɔwe bɔfo loo mumi ko hu be. Se Farisifo ɔmɛ deɔ ke enyɔ ɔ tsuo ngɛ. 9Nɛ huhui babauu ba te si, nɛ mlaatsɔɔli ɔmɛ nɛ ngɛ Farisifo ɔmɛ a se ɔ te si nɛ a pɛ de ke: “Wa nɛ nɔ ko yaya ko ngɛ kikɛmɛ a nɔmlɔ nɛ ɔ he. Se ke alinɔ mumi ko loo hiɔwe bɔfo ko nɛ e kɛ lɛ tu munyu ɔ nɛɛ?”

10Se benɛ pɛ ɔ mi ba wa a, asafoatsɛ nɔkɔtɔma a ye gbeye kaa eko ɔ a ma tsɔtslɔɔ Paulo mi he je ɔ, e fa aslaafo ɔmɛ ke a kple si nɛ a ya kpɔ lɛ ngɛ a dɛ, nɛ a kɛ lɛ nɛ ba mɔ ɔ mi.

11Se e nɔ nyɔ ɔ mi ɔ, Nyɔmtsɛ ɔ ba da e kasa nyɛ nɛ e ke: “Paulo, ha o tsui nɛ nɔ o mi, ejakaa bɔ nɛ o ye hye odase ngɛ Yerusalem nɛ ɔ ɔ, ja o ya ye odase jã nɔuu ngɛ Roma hulɔ.”

A so Paulo yi nɔ

12Se e nɔ je na a, Yudafo ɔmɛ a ti ni komɛ ya so, nɛ a kã a he kita kaa a be ni yee nɛ jeha nɛ ɔ hu a be nɔ́ ko nue ja a gbe Paulo lolo. 13Nihi nɛ ya so nɛ a kã a he kita nɛ ɔmɛ pe nimli nyingmi eywiɛ. 14Nɛ a ya osɔfo nikɔtɔma amɛ kɛ ma nikɔtɔma amɛ a ngɔ ya de ke: “Waa kɛ kita kami so kaa, wa be wa nya mi nɔ́ ko nɔ́ ko woe ja wa gbe Paulo lolo. 15Lɔ ɔ he ɔ jeha nɛ ɔ nyɛɛ kɛ gua ngua a tsuo ya de asafoatsɛ nɔkɔtɔma a, konɛ e kɛ Paulo nɛ kple si kɛ ba nyɛ ngɔ, kaa nɔ́ nɛ e sane ɔ mi nyɛ ma hyemi fitsofitso. Se wɔɔ lɛɛ loko e maa su nyɛ ngɔ ɔ, wa dla wa he nɛ wa maa gbe lɛ.”

16Se Paulo nyɛmiyo bi ko nu a ka womi ɔ he, nɛ e pue nɔ kɛ ya mɔ ɔ mi, nɛ e ya wo Paulo tue nɔ. 17Paulo tsɛ asafoatsɛmɛ ɔmɛ a kpɛti nɔ kake kɛ ba e ngɔ, nɛ e ke: “Ngɔɔ kikɛmɛ a niheyo nɛ ɔ nɛ o kɛ lɛ nɛ ya asafoatsɛ nɔkɔtɔma a ngɔ, ejakaa e ngɛ munyu ko nɛ e maa sɛɛ ha lɛ.” 18Kɛkɛ nɛ e ngɔ lɛ nɛ e kɛ lɛ ya asafoatsɛ nɔkɔtɔma a ngɔ nɛ e ya de ke: “Pamino Paulo ɔ tsɛ mi kɛ ya e ngɔ, nɛ e kpa mi pɛɛ ke i kɛ kikɛmɛ a niheyo nɛ ɔ nɛ ba o ngɔ, ejakaa e ngɛ munyu ko nɛ e maa sɛɛ ha mo.” 19Nɛ asafoatsɛ nɔkɔtɔma a nu e nine si, nɛ e kɛ lɛ ya se, nɛ e bi lɛ ke: “Mɛni sane o ngɛ nɛ o ma de mi?” 20Nɛ e ke: “Yudafo ɔmɛ pee kake ke a ma ba bi mo nɛ hwɔɔ ɔ nɛ o kɛ Paulo nɛ kple si kɛ ba gua ngua a hɛ mi, kaa nɔ́ nɛ e sane ɔ mi a ma hlami fitsofitso. 21Se moo lɛɛ koo kplɛɛ ha mɛ, ejakaa a kpɛti nihi pe nyingmi eywiɛ wo ka, a kɛ kita kami ya so kaa a be ni yee, hɛ jeha nɛ ɔ hu a be nɔ́ ko nɔ́ ko nue ja a gbe lɛ lolo. Nɛ jeha nɛ ɔ a dla a he, nɛ a ngɛ o nya tue bue.” 22Kɛkɛ nɛ asafoatsɛ nɔkɔtɔma a wo niheyo ɔ blɔ, nɛ e wo lɛ hiɔngɔ ke: “Ko de nɔ ko nɔ ko ke o wo sane nɛ ɔ nɔ tã de mi.”

A kɛ Paulo ya ha amlaalo Felike

23Nɛ e tsɛ asafoatsɛmɛ ɔmɛ a kpɛti ni enyɔ kɛ ba e ngɔ, nɛ e ke: “Nyɛ dla aslaafohi lafa enyɔ kɛ okpɔngɔtsɛmɛ nyingmi kpaago kɛ hlɔtsɛmɛ hu lafa enyɔ nɛ a ya Kaisarea gbɔkuɛ ngmlɛɛ nɛɛ mi.” 24Nɛ e de ke, a dla okpɔngɔhi hulɔ ngɔ to nɛ a ha Paulo nɛ hi nɔ, nɛ a kɛ lɛ ya ha amlaalo Felike sɔkee. 25Nɛ e ngma womi nɛ e de ngɛ mi ke:

26“Klaudio Lisia biɔ amlaalo kpakpa Felike saminya! 27Kikɛmɛ a nyumu nɛ ɔ ɔ, Yudafo ɔmɛ nu lɛ nɛ jinɛ a maa gbe lɛ. Se benɛ i na le kaa Roma no ji lɛ ɔ, ikɛ aslaafohi ya ya kpɔ lɛ. 28Nɛ akɛnɛ i ngɛ hlae nɛ ma le nɔ́ sane he je nɛ a ngɛ e nya poe ɔ, i kɛ lɛ ya a gua ngua a hɛ mi, 29nɛ i na kaa a Mlaa a he nguane jemi sane komɛ a he nɛ a ngɛ e nya poe ɔ nɛ, se sane ko nɛ sa gbenɔ aloo tsu mi womi ko be e he. 30Se benɛ a ba ju si de mi ke Yudafo ɔmɛ wo nyumu ɔ ka a, amlɔ ɔ, i tsɔ ke a kɛ lɛ nɛ ba o ngɔ, nɛ i fa le nya poli ɔmɛ hu ke a ba o hɛ mi nɛ a ba jaje sanehi nɛ a kɛ lɛ ngɛ ɔ. He manye!”

31Kɛkɛ nɛ aslaafo ɔmɛ ngɔ Paulo kaa bɔ nɛ a fa mɛ ɔ, nɛ a nyɛɛ nyɔ ɔ mi nɛ a kɛ lɛ ba Antipatri. 32E nɔ je na a, a ha okpɔngɔtsɛmɛ ɔmɛ kɛ lɛ ho, se mɛɛ lɛɛ a kpale a se kɛ ba mɔ ɔ mi ekohu. 33Benɛ a su Kaisarea nɛ a kɛwomi ɔ ya ha amlaalo ɔ, a kɛ Paulo hu ba da e hɛ mi. 34Nɛ benɛ amlaalo ɔ kane womi ɔ, e bi ke jije zugba nɔ e je, nɛ benɛ e na le kaa Kilikia e je ɔ, 35e ke: “Ke o nya poli ɔmɛ hu ba a, kɔlɔ ɔ loko ma bu mo tue saminya.” Nɛ e fa ke a kɛ lɛ ya to Herode mɔ ɔ mi.

Currently Selected:

Bɔfo 23: DAN77

Highlight

Copy