Bɔfo 22

1“Mamimɛ kɛ tsaatsɛmɛ, nyɛɛ bu ye nya jemi nɛ ɔ tue.” 2Nɛ benɛ a nu kaa Hebri gbi e kɛ mɛ ngɛ tue ɔ, a pee kɔ dii pe kekle ɔ. Nɛ e ke: 3“I mi lɛɛ Yuda no ji mi, nɛ a fɔ mi ngɛ Tarso ngɛ Kilikia mohu, se ma nɛ ɔ mi a lɛ mi ngɛ, nɛ Gamaliel nane nya a tsɔse mi ngɛ, ngɛ wa tsɛmɛ ɔmɛ a Mlaa a nya fitsofitso, nɛ ye hɛ dɔɔ ngɛ Mawu sane he, kaa bɔ nɛ nyɛ tsuo nyɛ ngɛ pee mwɔnɛ nɛ ɔ. 4I waa nihi nɛ hɛɛ kikɛmɛ a tsɔɔmi nɛ ɔ yi mi kɛ ya suu gbenɔ mi, nɛ i fiɔ nyumuhi kɛ yihi tsuo ngɔ haa nɛ a woɔ mɛ tsu mi, 5bɔ nɛ osɔfo nɔkɔtɔma a tete kɛ nikɔtɔma amɛ kulaa yeɔ mi odase ɔ. Ni nɛ ɔmɛ nɔuu hu lɛ a ha mi womi nɛ jinɛ ma kɛ ya ha nyɛmimɛ nɛ ngɛ Damasko ɔ, nɛ ma fi nihi nɛ ngɛ lejɛ ɔ hu kɛ ba Yerusalem, konɛ a gbla a tue.”

Paulo sɛɛ e tsakemi

6“Se e ba mi kaa benɛ i nyɛɛ blɔ ɔ nɔ nɛ i su Damasko ta maa pee pudami be mi ɔ, tlukaa a la ko nɛ kpemi nya wa je hiɔwe ba bɔle mi; 7nɛ i tsɔ fia si, nɛ i nu gbi ko de mi ke: ‘Saulo, Saulo, mɛ he je o ngɛ mi yi mi wae?’ 8Nɛ i he nɔ ke: ‘Mo mɛnɔ, Nyɔmtsɛ?’ Nɛ e de mi ke: ‘Imi Yesu, Nazareno ɔ, nɛ o ngɛ lɛ yi mi wae ɔ ʼi.’ 9Nihi nɛ kɛ mi nyɛɛ ɔ na la a, nɛ a ye gbeye, se a nui nɔ nɛ kɛ mi tu munyu ɔ gbi. 10Nɛ i ke: ‘Mɛni ma pee, Nyɔmtsɛ?’ Nɛ Nyɔmtsɛ ɔ de mi ke: ‘Tee si nɛ o ya Damasko, nɛ lejɛ ɔ a maa tsɔɔ mo nihi kulaa nɛ a to kaa o pee ɔ.’ 11Nɛ benɛ i hyɛ we nɔ́ hu ngɛ jamɛ a la a kpemi ɔ nya a, nihi nɛ kɛ mi nyɛɛ ɔ pɛtɛ ye nine mi nɛ a ya sɛ mi Damasko.

12“Nyumu ko ngɛ nɛ a tsɛɛ lɛ Anania nɛ yee Mawu gbeye ngɛ Mlaa a nya, nɛ Yudafo ɔmɛ kulaa nɛ ngɛ lejɛ ɔ tuɔ e he munyu kpakpa. 13Lɛ nɛ e ba ye ngɔ nɛ e ba da ye kasa nyɛ nɛ e de mi ke: ‘Maminyumu Saulo, hyɛ nɔ!’ Nɛ jamɛ a ngmlɛfia a nɔ nɔuu ɔ i na lɛ. 14Nɛ e ke: ‘Wa tsɛmɛ a Mawu ɔ hla mo ngɔ to nɛ o le e suɔmi nya ni nɛ o na Dalɔ ɔ nɛ o nu e nya mi gbi ko; 15ejakaa o ma plɛ e he odaseyelɔ, konɛ o ye nihi tsuo kulaa nɛ o na nɛ o nu ɔmɛ a he odase ngɔ tsɔɔ nimli kulaa. 16Nɛ jeha nɛ ɔ mɛ he je o ngɛ tslee toe? Tee si nɛ o ha a baptisi mo nɛ a fɔ o he yayami ɔmɛ ngɔ pue he nɛ o tsɛ Nyɔmtsɛ ɔ biɛ.’

A tsɛ Paulo kɛ ha majemaje fiɛmi

17“Benɛ i kpale ye se kɛ ba Yerusalem ekohu nɛ i ngɛ sɔlee ngɛ sɔlemi we ɔ, e pee kaa nɔ́ nɛ nɔ́ nɔ ye nɔ, 18nɛ i na lɛ nɛ e ngɛ mi dee ke: ‘Pee esɔ nɛ o je Yerusalem, ejakaa a be ye he odase nɛ o ngɛ yee ɔ tue bue.’ 19Nɛ i ke: ‘Nyɔmtsɛ, mɛ nitsɛmɛ a le kaa imi nɔuu ji nɔ nɛ sa a i woɔ nihi nɛ heɔ o nɔ yeɔ ɔ tsu mi, nɛ i fiaa mɛ ni ngɛ kpe he tsuaa kpe he, 20nɛ benɛ a pue Stefano, o he odaseyelɔ ɔ, muɔ si ɔ, imi hu i daa si ngɛ lejɛ ɔ, nɛ ye bua jɔ e gbenɔ he, nɛ i bu nihi nɛ gbe lɛ ɔmɛ a bo ɔmɛ a he.’ 21Nɛ e de mi ke: ‘Yaa, ejakaa ma tsɔ mo majemajeli nɛ ngɛ lokoo ɔmɛ a ngɔ.’ ”

22Nɛ a bu lɛ tue kɛ ba su kikɛmɛ a munyu nɛ ɔ nɔ, nɛ a wo a gbi nɔ nɛ a de ke: “A kɛ kikɛmɛ a nɔmlɔ nɛ ɔ nɛ je zugba a nɔ! Ejakaa e sɛ́ kaa e hii je mi.” 23Se benɛ a ngɛ ngmlaa kpae nɛ a ngɛ a tadehi kpɔe nɛ a ngɛ bunyuku gbee kɛ ngɛ kɔɔyɔ mi woe ɔ, 24asafoatsɛ nɔkɔtɔma a fa ke a kɛ lɛ nɛ ya mɔ ɔ mi, nɛ e de ke a ngɔ kplibi kɛ hla e yi mi, konɛ e le nɔ́ sane he je nɛ a ngɛ ngmlaa kpae kɛ ngɛ lɛ woe kikɛ nɛ ɔ. 25Se benɛ a fi lɛ nɛ a maa fia lɛ kpa a, Paulo bi asafoatsɛ nɛ daa si ngɛ lejɛ ɔ ke: “Nyɛ ngɛ he blɔ kaa nyɛ fiaa Roma no ko nɛ a bui lɛ fɔ ɔ kplibi lo?” 26Se benɛ asafoatsɛ ɔ nu enɛ ɔ ɔ, e ya asafoatsɛ nɔkɔtɔma a ngɔ nɛ e ya de lɛ ke: “Mɛni o maa pee nɛ ɔ? Ejakaa kikɛmɛ a nɔmlɔ nɛ ɔ Roma no ʼi.” 27Asafoatsɛ nɔkɔtɔma a ba nɛ e ba bi lɛ ke: “De mi, anɛ Roma no ji mo lo?” Nɛ Paulo ke: “Ee.” 28Nɛ asafoatsɛ nɔkɔtɔma a he nɔ ke: “Sika fuu i kɛ he kikɛmɛ a ma mi no plɛmi nɛ ɔ.” Nɛ Paulo ke: “Se imi lɛɛ pe a kɛ fɔ mi.” 29Kɛkɛ nɛ amlɔ ɔ nɔuu nɛ nihi nɛ yaa hla e yi mi ɔ je e kasa nya. Asafoatsɛ nɔkɔtɔma a hu, akɛnɛ e fi lɛ he je ɔ, benɛ e na le kaa Roma no ji lɛ ɔ, e tsui po.

Paulo ngɛ gua ngua a hɛ mi

30Se akɛnɛ asafoatsɛ nɔkɔtɔma a ngɛ hlae nɛ e le nɔ́ tutuutu he je nɛ Yudafo ɔmɛ po e nya a, e nɔ je na nɔ ɔ, e pɛne lɛ, nɛ e fa ke osɔfo nikɔtɔma amɛ kɛ gua ngua a kulaa nɛ ba. Nɛ e kɛ Paulo kple si, nɛ e kɛ lɛ ya da a hɛ mi.

Currently Selected:

Bɔfo 22: DAN77

Highlight

Copy