Bɔfo 21

Paulo ya Yerusalem

1Jeha nɛ ɔ e ba mi kaa benɛ waa kɛ mɛ ye sɛ nɛ wa gba mi ɔ, wa hia tɛ̃ɛ kɛ ba Koo, nɛ e nɔ je na a waba Rodo, nɛ wa je lejɛ ɔ kɛ ba Patara. 2Nɛ benɛ wa ya na lɛ ko nɛ yaa Foinike ɔ, wa sɛ mi nɛ wa pue nɔ. 3Se benɛ wa ngɛ Kipro hyɛe ngɛ wa hɛ mi ɔ, wa fia lɛ fɔ muɔ nɔ nɛ wa ba Siria, nɛ wa ba kple ngɛ Tiro, ejakaa lejɛ ɔ a ma je lɛ ɔ mi ni ngɛ. 4Wa bi kaseli ɔmɛ a si, nɛ benɛ wa na mɛ ɔ, wa hi lejɛ ɔ ligbi kpaago. Nɛ a gu mumi ɔ nɔ de Paulo ke e ko ya Yerusalem. 5Nɛ e ba mi kaa benɛ wa ye ligbi ɔmɛ tã a, wa pue nɔ, nɛ a kɛ a yihi kɛ a bimɛ kulaa ba je wɔ blɔ kɛ je ma a mi, nɛ wa kpla si ngɛ wo ɔ nya nɛ wa sɔle. 6Nɛ benɛ waa kɛ wa he ye sɛ ɔ, wa sɛ lɛ mi, nɛ mɛ hu a kpale a se kɛ ho a wehi a mi ya.

7Se wɔɔ lɛɛ wa je Tiro kɛ ba Ptolemai nɛ waa kɛ gbe wo hɛ mi nyɛɛmi ɔ nya. Wa ya nga nyɛmimɛ ɔmɛ nɛ waa kɛ mɛ hi si ligbi kake. 8E nɔ je na a wa pue nɔ kɛ ho Kaisarea ya, nɛ wa ya sɛ sane kpakpa fiɛlɔ Filipo nɛ ji ni kpaago ɔ a kpɛti nɔ kake ɔ we mi, nɛ waa kɛ lɛ hi si. 9E ngɛ bimɛ yihewi eywiɛ nɛ gbaa. 10Benɛ wa hi lejɛ ɔ be saii ɔ, gbalɔ ko nɛ a tsɛɛ lɛ Agabo ɔ je Yudea ba. 11Benɛ e ba wa ngɔ ɔ, e ngɔ Paulo mlɛ mi fimi nɔ́ ɔ nɛ e kɛ fi lɛ nitse e ninehi kɛ e nanehi nɛ e ke: Bɔ nɛ Mumi Klɔuklɔu ɔ de ji nɛ ɔ nɛ: Nyumu nɔ nɛ nɔ́ nɛ ji mlɛ mi fimi nɔ́ nɛ ɔ ɔ, kikɛ Yudafo ɔmɛ maa fi lɛ ngɛ Yerusalem, nɛ a maa ngɔ lɛ ngɔ wo majemajeli a bimɛ ɔmɛ a dɛ mi. 12Se benɛ wa nu enɛ ɔ ɔ, waa kɛ lejɛ ɔ bi ɔmɛ tsuo kpa lɛ pɛɛ ke e ko ya Yerusalem ɔ. 13Kɛkɛ nɛ Paulo he nɔ nɛ e ke: “Mɛni nyɛ ngɛ pee nɛ ɔ, nyɛ ngɛ ya foe kɛ ma tsɔ ye tsui? Se imi lɛɛ, pi fimi kɛkɛ nɛ i dla ye he ngɔ to, se mohu gbenɔ nitse ngɛ Nyɔmtsɛ Yesu biɛ ɔ he ngɛ Yerusalem.” 14Se akɛnɛ e kplɛɛ we he je ɔ, wa pee kɔ nɛ wa ke: “A pee nɔ nɛ Nyɔmtsɛ ɔ suɔ.”

15Enɛ ɔ se ɔ wa bo tlomi nɛ wa pue nɔ kɛ ho Yerusalem ya. 16Kaseli nɛ je Kaisarea a a ti ni komɛ kɛ wɔ ho, nɛ a ha wa yato Mnason, Kipro no ko nɛ ji kaselɔ kɛ je kɛ ɔ ngɔ.

Paulo ya slaa Yakobo

17Benɛ wa su Yerusalem ɔ nyɛmimɛ ɔmɛ he wɔ hɛmuɔ. 18Nɛ e nɔ je na a Paulo kɛ wɔ ya Yakobo ngɔ; nɛ nikɔtɔma amɛ tsuo hu ngɛ lejɛ ɔ. 19Nɛ benɛ e nga mɛ ɔ, e bɔ mɛ nihi nɛ Mawu gu e sɔmɔmi ɔ nɔ tsu ngɛ majemajeli ɔmɛ a kpɛti ɔ kakaaka. 20Benɛ a nu ɔ, a wo Mawu hɛ mi nyami, nɛ a de lɛ ke: “Mami, hyɛ Yudafohi akpehi abɔ nɛ a he ye nɛ ɔ; mɛ tsuo ɔ, Mlaa a he hɛdɔli ji mɛ. 21Se a ba sɛɛ o he sane ha mɛ kaa o tsɔɔ Yudafohi nɛ ngɛ majemajeli ɔmɛ a kpɛti ɔ ke a kua Mose, nɛ o deɔ ke a ko po a bimɛ, nɛ jeha nɛ ɔ hu a ko nyɛɛ a kusumi nɛ ɔmɛ a se. 22Jeha nɛ ɔ kɛ a maa pee kɛɛ? Bɔ tsuaa bɔ nɛ pee ɔ, ma a nya ma ba kpane sa; ejakaa a maa nu kaa o ba. 23Lɔ ɔ he ɔ pee nɔ́ nɛ wa ngɛ mo de nɛ ɔ: Wa ngɛ nyumuhi eywiɛ nɛ wo si. 24Ngɔɔ mɛ nɛ o kɛ mɛ tsuo ya tsukɔ nyɛ he, nɛ o wo nɔ́ nɛ a haa a ngɔ ha mɛ, konɛ a sɛ a yi nɛ ni ɔmɛ kulaa nɛ na kaa, nihi nɛ a ba sɛɛ ngɛ o he ɔ be mi, se mohu mo nitsɛ po o baa o je mi ngɛ Mlaa a nya, nɛ o yeɔ nɔ. 25Se majemajeli a bimɛ nɛ he ye ɔ a he ɔ, wɔ nitsɛmɛ wa ngma nɛ wa kpɛ mi kaa a ko ye kikɛmɛ a ni nɛ ɔmɛ eko nɔ, se mohu a nyɛ bɔ nɛ a sa ha wɔhi kɛ muɔ kɛ lohwehi nɛ a kita a kuɛ kɛ ajuama bɔmi kɛkɛ.” 26Kɛkɛ nɛ e nɔ je na a Paulo kpaka nyumu ɔmɛ kɛ ho, nɛ benɛ e kɛ mɛ kulaa tsukɔ a he ɔ, e kɛ mɛ sɛ sɔlemi we ɔ, nɛ e ya fiɛ he tsukɔmi ligbi ɔmɛ a nyagbe ɔ ngɔ tsɔɔ faii kɛ ya su be nɛ a sa bɔ ɔ ha a ti nɔ tsuaa nɔ.

A nu Paulo ngɛ sɔlemi we ɔ

27Benɛ e piɛ bɔɔ nɛ a maa gbe ligbi kpaago ɔ nya a, Yudafohi nɛ je Asia a na lɛ ngɛ sɔlemi we ɔ, nɛ a su asafo ɔ ngɔ wo e he. 28Nɛ a kpa ngmlaa ke: “Tsaatsɛmɛ Israelbi, nyɛ ba piɛ wa he! oʼɛ nyumu ɔ nɛ tuɔ ma nɛ ɔ kɛ Mlaa a kɛ hiɛ ɔ he munyu yaya ngɔ tsɔɔ nihi tsuo ngɛ he tsuaa he ɔ; nɛ jeha nɛ ɔ e kɛ Helabi ba sɔlemi we ɔ ba ble he klɔuklɔu nɛ ɔ hulɔ.” 29Ejakaa a na lɛ kɛ Trofimo nɛ je Efeso ɔ ngɛ ma a mi mo he je ɔ, a susu kaa lɛ nɛ Paulo kɛ ba sɔlemi we ɔ nɛ. 30Nɛ ma mluku ɔ kulaa bu, nɛ ma mi bi ɔmɛ sa fo kɛ ba kpane a he nya; nɛ a nu Paulo nɛ a sa lɛ kɛ je sɔlemi we ɔ kɛ je kpo, nɛ amlɔ ɔ nɔuu ɔ, a nga sinya amɛ. 31Se benɛ a ngɛ hlae nɛ a gbe lɛ ɔ, a ya ju si sɛɛ ha asafoatsɛ nɔkɔtɔma a ke Yerusalem kulaa pee gidigidi. 32Nɛ amlɔ ɔ, e ngɔ aslaafohi kɛ asafoatsɛmɛ nɛ e kɛ mɛ kple si kɛ fo kɛ ba na mɛ. Se benɛ a na asafoatsɛ nɔkɔtɔma a kɛ aslaafo ɔmɛ ɔ, a jɔɔ Paulo ni fiami. 33Kɛkɛ nɛ asafoatsɛ nɔkɔtɔma a hɛ lɛ su e he nɛ e pɛtɛ e he, nɛ e fa ke a wo lɛ kɔsɔkɔsɔhi enyɔ, nɛ e bi nɔ nɛ ji lɛ kɛ nɔ́ nɛ e pee. 34Se asafo ɔ mi ni komɛ ngɛ ngmlaa kpae kikɛ, nɛ ni komɛ hu ngɛ ekpa dee. Nɛ akɛnɛ e nɛ́ mi anɔkuale ngɛ hoo peemi ɔ he ɔ, e fa ke a kɛ lɛ nɛ ya mɔ ɔ mi. 35Nɛ benɛ e su atlaakpe ɔ nya a, e ba mi kaa asafo ɔ gidigidi peemi he je ɔ aslaafo ɔmɛ wo lɛ, 36ejakaa ma bi asafo jiji ɔ nyɛɛ se ngɛ ngmlaa kpae ke: “Agbe lɛ!”

Paulo je e nya

37Benɛ a kɛ Paulo ba sɛ mɔ ɔ mi ɔ, e bi asafoatsɛ nɔkɔtɔma a ke: “I ngɛ he blɔ kaa i kɛ mo tuɔ munyu ko lo?” Asafoatsɛ nɔkɔtama a ke: “O tuɔ Hela gbi lo? 38Lɛɛ pi mo ji Mizraim no ɔ nɛ lingmi nɛ ɔ nɛ e kɛ atua tsɔmi ba nɛ e kpaka nyumuhi awiyeli akpe eywiɛ ngɔ pue e se kɛ ho nga a nɔ ya a lo?” 39Nɛ Paulo ke: “Imi lɛɛ Yuda no ji mi, nɛ i je Tarso, Kilikia ma ko nɛ ngɛ biɛ ɔ mi. Se i kpa mo pɛɛ, ha mi blɔ nɛ ma tu munyu ngɔ tsɔɔ ma a.” 40Nɛ benɛ a ha lɛ blɔ ɔ, Paulo da atlaakpe ɔ nɔ, nɛ e fɔ ma a nine, nɛ benɛ lejɛ ɔ jɔ klanaa a, e tu munyu ngɛ Hebri gbi mi de ke:

Currently Selected:

Bɔfo 21: DAN77

Highlight

Copy