Bɔfo 20

Paulo ya Makedonia kɛ Hela

1Se benɛ gidigidi peemi ɔ se po ɔ, Paulo tsɔ ya tsɛ kaseli ɔmɛ kɛ ba kpe, nɛ e tu munyu tsɔɔ mɛ nɛ e sɛ mɛ, nɛ e pue nɔ kɛ yaa Makedonia. 2Nɛ benɛ e ya gu lejɛ ɔ ni ɔmɛ a mi nɛ e wo mɛ ga kɛ munyuhi fuu ɔ, e ba Hela, 3nɛ e ye hlami etɛ ngɛ lejɛ ɔ. Akɛnɛ Yudafo ɔmɛ wo lɛ ka benɛ e ngɛ hlae nɛ e hia kɛ ya Syria a he je ɔ, e to e yi mi kaa e maa kpale e se kɛ ya gu Makedonia ekohu. 4Nɛ Sopatre, Beroia no ɔ nɛ ji Pirho bi ɔ, kɛ Aristarko kɛ Sekundo, Tesalonikabi ɔmɛ, kɛ Gaio, Derbe no ɔ, kɛ Timoteo, kɛ Tihiko kɛ Tromfimo, Asiabi ɔmɛ, kɛ lɛ ya Asia. 5Ni nɛ ɔmɛ sɛ hlami nɛ a ya mlɛ wɔ ngɛ Troia. 6Se wɔɔ lɛɛ wa hia kɛ je Filipi ngɛ akpiti ligbi ɔmɛ a se, nɛ ligbi nɛ ji ligbi enuɔ ɔ, wa ya su a ngɔ ngɛ Troia, nɛ wa hi lejɛ ɔ ligbi kpaago.

Paulo kɛ Troia asafo ɔ ye sɛ

7Otsi ɔ mi kekleekle ligbi ɔ nɔ ɔ, benɛ kaseli ɔmɛ kpane a he nya konɛ a kuɔ abolo ɔ, Paulo tu munyu tsɔɔ mɛ, nɛ e ngɛ nɔ kɛ ya su nyɔ mi kpɛti, ejakaa e nɔ je na mɔtu ɔ e maa je. 8A su kane fuu ngɛ hiɔwe tsu ɔ mi he nɛ a kpane a he nya ngɛ ɔ. 9Se niheyo ko nɛ a tsɛɛ lɛ Eutiko ɔ hii si ngɛ saflɛ ɔ nya, nɛ mahɛ gbe lɛ, ejakaa Paulo munyu ɔ se kɛ. Mahɛ ɔ sɔuu ha e tsɔ kɛ je siaudo etɛ ɔ nɔ kɛ ba nɔ si, nɛ a ya wo lɛ nɛ e gbo. 10Se Paulo kple si nɛ e ya bu e nɔ, nɛ e fua lɛ nɛ e ke: “Nyɛ ko pee hoo, ejakaa wami ngɛ e mi.” 11Nɛ benɛ e kuɔ kɛ ba ekohu ɔ, e ba ku abolo ɔ, nɛ e ye eko, nɛ e tsa e munyu ɔ nɔ hluu kɛ ba su je nami, kɛkɛ nɛ e pue nɔ. 12Nɛ a kɛ niheyo ɔ ho hɛ kalɔ nɛ a bua jɔ a he nitse.

Paulo si Troia kɛ ya Mileeto

13Se wɔɔ lɛɛ wa sɛ hlami kɛ ya sɛ lɛ mi, nɛ wa hia kɛ ya Aso nɛ wa ya ngɔ Paulo ngɛ lejɛ ɔ, ejakaa e de wɔ ngɔ to momo ke e maa gu zugba. 14Nɛ benɛ e ba na wɔ ngɛ Aso ɔ, wa ngɔ lɛ kɛ ba lɛ ɔ mi, nɛ wa ba Mitilene. 15Wa hia kɛ je lejɛ ɔ, nɛ e nɔ je na a, wa ba su Kio hanɔ. Nɛ e nɔ je na nɔ ekohu ɔ wa ba su Samo, nɛ wa hi Trogilo, nɛ e nɔ je na a wa ba Mileeto. 16Paulo pee e juɛmi kaa e maa tsɔ Efeso he, benɛ pee nɛ e ko kɛ ngɛ Asia; ejakaa e ngɛ esɔ mie, nɛ ke e ma nyɛ ɔ nɛ e ya ye Pentekoste ligbi ɔ ngɛ Yerusalem.

Paulo kɛ Efeso nikɔtɔma amɛ ye sɛ

17Paulo tsɔ kɛ je Mileeto nɛ a ya tsɛ Efeso nikɔtɔma amɛ ba ha lɛ. 18Nɛ benɛ a ba e ngɔ ɔ, e de mɛ ke: “Nyɛ le bɔ nɛ i kɛ nyɛ hi si be mluku ɔ tsuo, kɛ je kekleekle ligbi nɛ i ba Asia a. 19I sɔmɔ Nyɔmtsɛ ɔ kɛ he si bami juɛmi tsuo kɛ vo nyu fuu kɛ kahi nɛ ba ye nɔ ngɛ Yudafohi a ka womi ɔmɛ a mi, 20bɔ nɛ i laa we nyɛ nihi nɛ he ngɛ se nami ha nyɛ ɔ eko nɔ, nɛ i jaje tsɔɔ nyɛ faii ngɛ ma nɔ kɛ we tsuaa we mi hulɔ; 21nɛ i ye tsui tsakemi kɛ Mawu hami kɛ wa Nyɔmtsɛ Yesu Kristo nɔ hemi kɛ yemi ɔ he odase ngɔ tsɔɔ Yudafohi kɛ Helabihi kulaa. 22Nɛ jeha nɛ ɔ, oʼɛ e fi mi ngɛ mumi mi he je ɔ i yaa Yerusalem, nɛ i li nihi nɛ maa ba ye nɔ ngɛ lejɛ ɔ, 23kaa ja nɔ́ nɛ Mumi Klɔuklɔu ɔ yeɔ odase faii ngɛ ma tsuaa ma mi kaa kpa kɛ amanehluhi lɛ ngɛ mi mlɛe ɔ? 24Se kɛ̃ ɔ, i bui enɛ ɔmɛ a mi kake ngmelu, nɛ ye wami hu i bui kaa e he jua wa ngɛ ye hɛ mi, benɛ pee nɛ i kɛ bua jɔmi nɛ gbe ye blɔ nyɛɛmi ɔ kɛ sɔmɔmi nɛ i na kɛ je Nyɔmtsɛ Yesu dɛ mi, kaa ma ye Mawu dloomi sane kpakpa a he odase faii, ɔ nya.

25“Nɛ jeha nɛ ɔ, oʼɛ, i le kaa, nyɛ nihi tsuo nɛ i nyɛɛ nyɛ kpɛti kɛ fiɛ Mawu matsɛ yemi ɔ he sane ɔ, nyɛ be ye hɛ mi nae hu. 26Lɔ ɔ he ɔ, mwɔnɛ ligbi nɛ ɔ i ngɛ odase yee kɛ ngɛ nyɛ tsɔɔe, kaa i yi nyɛ ti nɔ ko nɔ ko muɔ yi musu. 27Ejakaa i jaje Mawu yi mi tomi mluku ɔ tsuo ngɔ tsɔɔ nyɛ nɛ i laa we eko nɔ. 28Lɔ ɔ he ɔ nyɛɛ le nyɛ he nɔ hyemi kɛ tohi a kuu ɔ kulaa nɛ Mumi Klɔuklɔu wo nyɛ a nɔ hyɛli ɔ, konɛ nyɛɛ lɛ Mawu asafo ɔ nɛ e kɛ lɛ nitsɛ e muɔ he ɔ. 29Ejakaa i le kaa ke i je ɔ, ogbetee ni hali maa sɛ nyɛ kpɛti, nɛ a be tohi a kuu ɔ yi baae. 30Nɛ nyɛ nitsɛmɛ nyɛ kpɛti hu ɔ, nyumuhi nɛ tuɔ nihi nɛ dɛ maa te si, nɛ a ma kpaka kaseli ɔmɛ ngɔ pue a se. 31Lɔ ɔ he je ɔ nyɛɛ huɔ nɛ nyɛ kai kaa jeha etɛ sɔuu i kɛ vo nyu jɔɔ we nyɛ ti nɔ tsuaa nɔ kɔkɔ bɔmi nyɔ kɛ pia.

32“Nɛ jeha nɛ ɔ, mamimɛ, i ngɛ nyɛ tue kɛ ngɛ Mawu kɛ e dloomi munyu ɔ dɛ mi woe, lɛ lɛ e ngɛ he wami nɛ e kɛ ma ha nyɛ nane nɛ pi si nɛ e ngɔ wɔfase ni ɔmɛ ngɔ ha nyɛ ngɛ nihi tsuo nɛ a tsukɔ a he ɔmɛ a kpɛti. 33Ye hɛ kɔɛ nyɛ ti nɔ ko sika hiɔ loo sika tsu loo tade nɔ. 34Nyɛ nitsɛmɛ nyɛ le kaa, nihi nɛ hiaa mi kɛ nihi nɛ kɛ mi ngɛ ɔ, kikɛmɛ a nine nɛ ɔmɛ nɔuu i kɛ tsu he ni. 35I kɛ kulaa tsɔɔ nyɛ kaa jã e sa kaa a tsu ni nɛ a kɛ ye bua nihi nɛ be he wami, nɛ a kai Nyɔmtsɛ Yesu munyu ɔmɛ kaa lɛ nitsɛ e ke: ‘Nɔ hami mi ngɛ gbaami pe hemi.’ ”

36Nɛ benɛ e de kikɛ ɔ, e kplã si nɛ mɛ tsuo a sɔle. 37Nɛ mɛ tsuo a fo ya wawɛɛ, nɛ a nɔ Paulo kuɛ nɔ, nɛ a fiɔ e nya he. 38Nɛ nɔ́ nɛ dɔ mɛ titli ji munyu nɛ e de ke a be e hɛ mi nae hu ɔ. Nɛ a ya je lɛ blɔ ngɛ lɛ ɔ mi.

Currently Selected:

Bɔfo 20: DAN77

Highlight

Copy