Bɔfo 19

Paulo ngɛ Efeso

1Benɛ Apolo ngɛ Korinto ɔ, Paulo ya kpa mahi nɛ ngɛ yo ɔmɛ a ɔ nɔ mi kɛ ba je Efeso. Nɛ e ba na kaseli komɛ, 2nɛ e bi mɛ ke: “Benɛ nyɛ he ye ɔ nyɛ na Mumi Klɔuklɔu ɔ lo?” Nɛ a de lɛ ke Mumi Klɔuklɔu ko ngɛ he ko jio, wa nui tete.” 3Nɛ e bi mɛ ke: “Lɛɛ mɛni mi a baptisi nyɛ ngɔ wo mɔ?” Nɛ a ke: “Yohane baptisimi ɔ mi.” 4Nɛ Paulo ke: “Yohane ɔ, tsuitsakemi baptisimi e kɛ baptisi, se e de ma a ke, a he nɔ nɛ ma ngɛ e se ɔ mohu nɔ ngɔ ye, lɛ ji Nyɔmtsɛ Yesu ɔ nɛ.” 5Nɛ benɛ a nu enɛ ɔ ɔ, a ha a baptisi mɛ ngɔ wo Nyɔmtsɛ Yesu biɛ mi. 6Nɛ benɛ Paulo kɛ e ninehi pue a nɔ ɔ, Mumi Klɔuklɔu ɔ kple a nɔ, nɛ a tu munyu slɔɔtohi nɛ a gba. 7Se nyumu ɔmɛ tsuo maa pee nyɔngma kɛ enyɔ.

8Paulo ya kpe he ɔ, nɛ e ya tu munyu kɛ kã, nɛ e tsɔɔ mɛ ni hlami etɛ sɔuu, nɛ e bɔ mɔde nɛ e ha a le Mawu matsɛ yemi ɔ he sane ɔ. 9Se benɛ ni komɛ wlua a tsui nɛ a bui tue nɛ a tu tsɔɔmi ɔ he munyu yaya ngɛ asafo ɔ hɛ mi ɔ, e je a ngɔ nɛ e je kaseli ɔmɛ hu kɛ je a kpɛti, nɛ daa nɛ ɔ e ya tuɔ munyu tsɔɔ nihi ngɛ nɔ ko nɛ a tsɛɛ lɛ Tirano ɔ ni kasemi he ɔ. 10Nɛ e pee enɛ ɔ jeha enyɔ sɔuu, nɛ nihi tsuo nɛ ngɛ Asia, Yudafohi nɛ Helabi kulaa, nu Nyɔmtsɛ Yesu munyu ɔ.

Skeva bimɛ ɔmɛ

11Nɛ Mawu gu Paulo nine nɔ e kɛ tsu he wami ni tsumihi hulɔ nɛ pɔɛ he, 12hluu po nɛ a ngɔɔ e dukuhi kɛ e tade hɛ mi hami bohi tete ya haa hiɔtsɛmɛ a nɔ nɛ a hiɔ ɔmɛ jɔɔ, nɛ mumi yayami ɔmɛ hu jee a mi. 13Se Yudafohi klaali nɛ nyɛɛ kɛ kpaa si ɔ, a ti ni komɛ hu ka nɛ a kɛ Yesu biɛ nɛ ke nihi nɛ mumi yayamihi ngɛ a mi ɔmɛ a yi ke: “I na Yesu nɛ Paulo ngɛ fiɛɛe ɔ.” 14Osɔfo nɔkɔtɔma Skeva, Yuda no ɔ, bimɛ nyumuhi kpaago ɔmɛ ji nihi nɛ peɔ kikɛmɛ a ni nɛ ɔmɛ ɔ nɛ. 15Se mumi yayami ɔ he nɔ nɛ e de mɛ ke: “Yesu ɔ, i le lɛ, nɛ Paulo hu i le lɛ; se nyɛɛ lɛɛ mɛnɔmɛ ji nyɛ?” 16Nɛ nɔmlɔ nɛ mumi yayami ngɛ e mi ɔ tua mɛ, nɛ e nine gu a nɔ nɛ e pee mɛ pasaa, nɛ a kɛ a he gu kɛ plaamihi tu fo kɛ je jamɛ a we ɔ mi. 17Nɛ benɛ Yudafohi kɛ Helabihi tsuo nɛ ngɛ Efeso ɔ nu enɛ ɔ ɔ, gbeye nu mɛ, nɛ a wo Nyɔmtsɛ Yesu biɛ ɔ hɛ mi nyami nitsɛnitsɛ. 18Nɛ nihi nɛ he ye ɔmɛ a kpɛti nihi fuu hu ba nɛ a ba jaje a ni peemi ni ɔmɛ paa ngɔ tsɔɔ. 19Nɛ kunya tsuli ɔmɛ hu a ti nihi babauu ba nɛ a kɛ a womi ɔmɛ ba pue si nɛ a sã ngɛ ni ɔmɛ tsuo a hɛ mi; nɛ benɛ a bu nya a e pee sika hiɔ kpɔ akpe-nyingmi enuɔ. 20Blɔ nɔ nɛ Nyɔmtsɛ ɔ munyu ɔ gu nɛ e kɛ wa nɛ e kɛ ye kunimi ɔ ji nɛ ɔ nɛ.

Basabasapeemi ba te si ngɛ Efeso

21Benɛ a gbe ni nɛ ɔmɛ a nya a, Paulo to e yi mi ngɛ mumi ɔ nya kaa e ma ya gu Makedonia kɛ Akaia kɛ ya Yerusalem, nɛ e ke: “Ke i su lejɛ ɔ, ja i ya slaa Roma hulɔ.” 22Lɔ ɔ he ɔ, e tsɔ nihi nɛ sɔmɔɔ lɛ ɔ a ti nihi enyɔ, Timoteo kɛ “Erasto, Makedonia, se lɛ nitse lɛɛ e hi Asia be bɔɔ.

23Se jamɛ a be ɔ mi nɔuu ɔ, basabasa peemi wawɛɛ ko ba te si ngɛ tsɔɔmi ɔ he. 24Sika hiɔ galɔ ko nɛ a tsɛɛ lɛ Demetrio ɔ kɛ sika hiɔ peɔ Artemi sɔlemi tsuhi nɛ haa jamɛ a gali ɔmɛ naa ni fuu ngɛ mi. 25E tsɛ ni ɔmɛ kɛ nihi tsuo nɛ tsuɔ jamɛ a ni ɔ eko ɔ kɛ ba kpe, nɛ e ke: “Tsaatsɛmɛ, nyɛ le kaa kikɛmɛ a ga nɛ ɔ waa kɛ naa wa ni fuu ɔ, 26nɛ jeha nɛ ɔ nyɛ ngɛ hyɛe nɛ nyɛ ngɛ nue kaa, pi Efeso nɛ ɔ kɛkɛ, se mohu piɛ bɔɔ nɛ e su Asia kulaa nɛ kikɛmɛ a Paulo nɛ ɔ plɛ nihi babauu yi mi nɛ e deɔ ke: ‘Nihi nɛ a kɛ nine pee ɔ pi mawuhi ji mɛ’. 27Nɛ pi wa ni tsumi nɛ ɔ kɛkɛ he guɛ nɛ ma gbo, se mohu mawuyo Artemi ngua a sɔlemi we ɔ hu a be lɛ bue ha nɔ́ ko nɔ́ ko, nɛ e nyami kpetekpleenyɛ ɔ nɛ Asia kɛ je mluku ɔ hu jaa a nya maa ba si.”

28Benɛ a nu enɛ ɔ ɔ, a mi mi wo la saminya nɛ a kpa ngmlaa ke: “Efesobi Artemi ɔ, he walɔ ngua ʼi!” 29Nɛ ma a mi kulaa pee basabasa; nɛ a kɛ juɛmi kake sa kɛ ho ni hyemi he ɔ ya, nɛ a ya nuu Gaio kɛ Aristarko nɛ ji Makedoniabi nɛ piɛ Paulo he kɛ hia blɔ ɔ. 30Se benɛ Paulo susu kaa e maa ya ni ɔmɛ a kpɛti ɔ, kaseli ɔmɛ kplɛɛ we lɛ; 31nɛ Asia ganɔ ɔmɛ a ti ni komɛ hu nɛ ji Paulo huɛmɛ ɔ tsɔ e ngɔ ba wo lɛ ga ke e ko ka kãa e maa ya ni hyemi he ɔ. 32Jeha nɛ ɔ benɛ ni komɛ ngɛ ngmlaa kpae kikɛ ɔ, ni komɛ hu ngɛ ekpã dee; ejakaa ni ɔmɛ kulaa ngɛ gidigidi pee, se a ti nihi fuu li nɔ́ nɛ he je nɛ a ba kpe ɔ tete. 33Nɛ a sã Aleksandro kɛ je ni ɔmɛ a kpɛti, ejakaa Yudafo ɔmɛ ngɛ e kuɛ se tsitsɛe kɛ ma hɛ kpɛ. Se Aleksandro fɔ̃ e nine; e ngɛ hlae nɛ e je e nya kɛ tsɔɔ ni ɔmɛ. 34Se benɛ a kpa si kaa Yudano ji lɛ ɔ, mɛ kulaa a kɛ gbi kake kpa ngmlaa maa pee ngmlɛfia enyɔ sɔuu ke: “Efesobi Artemi ɔ he walɔ ngua ʼi!”

35Se benɛ ma a mi womi ngmalɔ ɔ kpata ni ɔmɛ ɔ, e ke: “Tsaatsɛmɛ Efesobi, mɛnɔ po lɛ li kaa Artemi ngua a kɛ amaga nɛ kple si kɛ je Dio ngɔ ɔ Efesobi a ma nɛ ɔ mi nɛ e wɔnɔ ɔ ngɛ? 36Jeha nɛ ɔ akɛnɛ enɛ ɔ he be nɔ́jemi ko he je ɔ e sa kaa nyɛɛ pee kɔ dii, nɛ nyɛ ko pee gidigidi ko. 37Nyɛɛ kɛ kikɛmɛ a nyumu nɛ ɔmɛ ba hiɛ ɔ nɔ; a pi sɔlemi we ɔ ni juli ɔ, a pi nyɛ mawuyo ɔ he musu bɔli hulɔ. 38Lɔ ɔ he ɔ, ke Demetrio aloo e huɛmɛ gali ɔmɛ kɛ nɔ ko ngɛ sane ko ɔ, kojomi ligbihi ngɛ, nɛ amlaalofo ɔmɛ hu ngɛ; nyɛ ha a kɛ sane ɔ nɛ ya a hɛ mi. 39Se ke munyu kpa komɛ a nya nyɛ ngɛ hlae ɔ, ma gua a nɛ ye ngɛ mlaa nya. 40Ejakaa piɛ nguɛ nya nɛ wa ko na sane, ke mwɔnɛ ligbi nɛ ɔ nɔ hoo peemi nɛ ɔ he nɛ a ya po wa nya kaa atua wa ngɛ tsɔe ɔ, mɛni nya jemi wa ngɛ?” 41Nɛ benɛ e de enɛ ɔ se ɔ, e wo asafo ɔ blɔ.

Currently Selected:

Bɔfo 19: DAN77

Highlight

Copy