Bɔfo 18

Paulo ngɛ Korinto

1Enɛ ɔ se ɔ Paulo je Atene nɛ e pue nɔ kɛ ho Korinto ya. 2Nɛ e ya na Yudano ko nɛ a tsɛɛ lɛ Akwila nɛ a fɔ lɛ ngɛ Ponto nɛ e je Italia kɛ ba kɛ we, kɛ e yo Priskila (ejakaa Kaesare Klaudio fa Yudafohi tsuo ke a je Roma), nɛ e ya a ngɔ. 3Nɛ akɛnɛ e kɛ mɛ tsuo tsuɔ ni tsumi kake he je ɔ, e kɛ mɛ hi si, nɛ a tsuɔ ni; a ni tsumi ji bo tsu peemi. 4Se daa Hejɔɔmi Ligbi ɔ nɔ ɔ, e ya tuɔ munyu ngɔ tsɔɔ nihi ngɛ kpe he ɔ, nɛ e bɔɔ mɔde kaa e tsake Yudafohi kɛ Helabi ɔmɛ.

5Benɛ Sila kɛ Timoteo je Makedonia ba a, munyu ɔ nyɛ Paulo nɔ, nɛ e ye odase veveeve ngɔ tsɔɔ Yudafo ɔmɛ ke Yesu ji Kristo ɔ nɛ. 6Benɛ a ku e nya nɛ a tu musu bɔmi munyuhi kɛ si lɛ ɔ, e huanya e tade ɔ mi nɛ e de mɛ ke: “Nyɛ muɔ nɛ tloo nyɛ. Imi lɛɛ musu ko be ye nɔ, kɛ je be nɛ ɔ kɛ yaa nɛ ɔ, ma ya majemajeli a bimɛ ɔmɛ a ngɔ.” 7Kɛkɛ nɛ e je lejɛ ɔ nɛ e ho Mawujalɔ ko nɛ a tsɛɛ lɛ Titio Yusto nɛ e we tsa kpe he ɔ nɔ ɔ ngɔ ya. 8Se kpe he ɔ nɔkɔtɔma Krispo ɔ kɛ e we mluku ɔ kulaa he Nyɔmtsɛ ɔ nɔ ye, nɛ Korintobi ɔmɛ a ti nihi fuu hu nɛ nu ɔ, a he ye, nɛ a baptisi mɛ.

9Nyɔ ko mi ɔ, Nyɔmtsɛ ɔ de Paulo ngɛ ninami mi ke: “Koo ye gbeye, se mohu de, nɛ o ko ma o nya, 10ejakaa i kɛ mo ngɛ, nɛ nɔ ko nɔ ko be o he tae, nɛ e be mo yayami ko pee; ejakaa yi ngɛ nihi fuu ngɛ ma nɛ ɔ mi.” 11Nɛ Paulo hi akpɛti jeha kake kɛ hlami ekpa, nɛ e tsɔɔ Mawu munyu ɔ.

12Benɛ Galio ngɛ amlaalo yee ngɛ Akaia a, Yudafo ɔmɛ kɛ juɛmi kake te si wo Paulo, nɛ a kpaka lɛ kɛ ya kojomi sɛ ɔ hɛ mi; 13a ya de ke: “Nyumu nɛ ɔ woɔ ni ɔmɛ a yi mi nɛ a je mlaa a se kɛ ja Mawu.” 14Se benɛ Paulo ma bli e nya pɛ ɔ, Galio de Yudafo ɔmɛ ke: “Yudafohi, e ji ju kɛ fɔ̃ sane ko ʼi jinɛ, e sa kaa ma bu nyɛ tue. 15Se ke munyu loo biɛhi loo nyɛ mlaa a he sane komɛ ʼi ɔ, lɔ ɔ lɛɛ nyɛ nitsɛmɛ nyɛɛ hyɛ nɔ; ejakaa i sume kaa i kojoɔ kikɛmɛ a sanehi.” 16Nɛ e fie mɛ kɛ je kojomi sɛ ɔ hɛ mi. 17Kɛkɛ nɛ Helabi ɔmɛ tsuo nu kpe he ɔ nɔkɔtɔma Sostene ɔ, nɛ a fia lɛ ni ngɛ kojomi sɛ ɔ hɛ mi, se enɛ ɔmɛ eko eko dɔɛ Galio.

Paulo kpale kɛ ba Antiokia

18Se benɛ Paulo hi lejɛ ɔ be saii se ɔ, e sɛ nyɛmimɛ ɔmɛ, nɛ e sɛ lɛ mi kɛ yaa Siria; nɛ Priskila kɛ Akwila kɛ lɛ ho. Nɛ e ya sɛ e yi ngɛ Kenkrea, ngɛ e si womi ko nya. 19Nɛ e ba Efeso, nɛ e si mɛ ngɛ lejɛ ɔ. Se lɛ nitse lɛɛ e ya kpe he ɔ, nɛ e kɛ Yudafo ɔmɛ ya sa nya. 20Nɛ benɛ a kpa lɛ pɛɛ ke e kɛ ngɛ a ngɔ bɔɔ ɔ, e kplɛɛ we. 21Se mohu e sɛ mɛ ke: “Bɔ tsuaa nɔ nɛ pee ɔ ja i ya ye nyami ligbi nɛ ma nɛ ɔ ngɛ Yerusalem; se ke Mawu suɔ ɔ, ma kpale ye se kɛ ba nyɛ ngɔ ekohu.” Nɛ e hia kɛ je Efeso.

22Benɛ e ya kple ngɛ Kaisarea a, e ya Yerusalem nɛ e ya nga asafo ɔ, nɛ e pue nɔ kɛ ho Antiokia ya. 23E hi lejɛ ɔ bɔɔ, nɛ kɔlɔ ɔ se ɔ, e pue nɔ ekohu nɛ e ya kpa Galatia kɛ Frigia zugba amɛ a nɔ pɛpɛɛpɛ, nɛ e wo kaseli ɔmɛ kulaa he wami.

Apolo ngɛ Efeso kɛ Korinto

24Yudano ko nɛ a tsɛɛ lɛ Apolo nɛ e se je Aleksandria nɛ ji nyumu nya mi tsɔlɔ nɛ ngɛ he wami ngɛ ngmami ɔmɛ a mi hulɔ ɔ ba Efeso. 25A tsɔɔ nyumu nɛ ɔ Nyɔmtsɛ ɔ blɔ ɔ he ni, nɛ e ngɛ kã ngɛ mumi mi, nɛ e tsɔɔ Yesu he ni fitsofitso, pohu Yohane baptisimi ɔ kɛkɛ e le. 26Nɛ e bɔni kã nya munyu tumi ngɛ kpe he ɔ. Se benɛ Akwila kɛ Priskila nu e he ɔ, a ngɔ lɛ kɛ ba a ngɔ, nɛ a tsɔɔ lɛ Mawu blɔ ɔ fitsofitso. 27Benɛ Apolo susu kaa e maa po mi kɛ ya Akaia a, nyɛmimɛ ɔmɛ na kã nɛ a ngma womi ya ha kaseli ɔmɛ kɛ wo mɛ ga ke a he lɛ hɛmuɔ. Benɛ e ba lejɛ ɔ, e ye bua nihi nɛ gu dloomi ɔ nɔ he ye ɔ babauu. 28Ejakaa e kɛ he wami ku Yudafo ɔmɛ a nya nɛ e kɛ ngmami ɔmɛ tsɔɔ mɛ faii kaa Yesu ji Kristo ɔ nɛ.

Currently Selected:

Bɔfo 18: DAN77

Highlight

Copy