Bɔfo 17

Paulo kɛ Sila ngɛ Tesalonika

1Jeha nɛ ɔ a gu Amfipoli kɛ Apolonia, nɛ a ba Tesalonika, he nɛ Yudafohi a kpe he ko ngɛ ɔ. 2Nɛ Paulo ya a ngɔ kaa bɔ nɛ e pɔɔ peemi ɔ, nɛ e kɛ mɛ ya sa nya Hejɔɔmi Ligbi etɛ sɔuu ngɛ ngmami ɔmɛ a he. 3E blɛke munyu ɔ mi tsɔɔ mɛ faii kaa ja Kristo ɔ na amanehlu nɛ e te si kɛ je gbeje, nɛ kaa “kikɛmɛ a Yesu, nɛ i ngɛ e he sane jajee kɛ ngɛ nyɛ tsɔɔe nɛ ɔ, ji Kristo ɔ nɛ.” 4Nɛ a ti ni komɛ kplɛɛ nɛ a kɛ a he bɔ Paulo kɛ Sila he, kɛ Helabi Mawu gbeye yeli ɔmɛ a kpɛti nihi babauu, kɛ yihi nɛ a buu mɛ hu fuu.

5Se e pee Yudafo ɔmɛ tai, nɛ a ya kpaka yakayaka nimli ɔmɛ a kpɛti dikali komɛ ngɔ piɛ a he, nɛ benɛ a nya ba kpane fuu ɔ, a wo ma a mi hliihlii. A ya tua Yason we ɔ, nɛ a ngɛ hlae nɛ a kpaka Paulo kɛ Sila ya ha ma a. 6Se benɛ a nɛ́ mɛ ɔ, a kpaka Yason kɛ nyɛmimɛ ɔmɛ a ti ni komɛ kɛ ya ma a mi nikɔtɔma amɛ a hɛ mi nɛ a kpa ngmlaa ke: “Ni nɛ ɔmɛ nɛ plɛ je mi hɛ mi ngɔ bu si nɛ ɔ ba hiɛ ɔ hulɔ, 7nɛ Yason he mɛ to. Ni nɛ ɔmɛ tsuo kuɔ Kaisare mlaa a nya deɔ ke matsɛ kpa ko ngɛ nɛ ji Yesu ko.” 8Nɛ a ha ma a mi bi ɔmɛ kɛ nikɔtɔma amɛ tsuo nu sawale kɛ kikɛmɛ a munyu nɛ ɔmɛ. 9Nɛ benɛ a he se dami ni ngɛ Yason kɛ ni kpa amɛ a dɛ ɔ, a ngmɛɛ a he.

Paulo kɛ Sila ngɛ Beroia

10Nɛ amlɔ ɔ nyɛmimɛ ɔmɛ je Paulo kɛ Sila blɔ nyɔ mi kɛ ho Beroia ya. Nɛ benɛ a su lejɛ ɔ a ya sɛ Yudafo ɔmɛ a kpe he ɔ. 11Ni nɛ ɔmɛ a su hi pe ninɛmɛ nɛ ngɛ Tesalonika a, mɛɛ lɛɛ a je a yi mi pɛtɛ munyu ɔ he, nɛ daa a kpaa ngmami ɔmɛ a mi hyɛɛ kaa ni nɛ ɔmɛ ngɛ mi ja lo? 12Lɔ ɔ he ɔ a ti nihi fuu he ye, kɛ Helayi nɛ ngɛ biɛ kɛ nyumuhi hu fuu. 13Se benɛ Yudafohi nɛ ngɛ Tesalonika a nu he kaa Paulo ya jaje Mawu munyu ɔ ngɛ Beroia hulɔ ɔ, a ba lejɛ ɔ hu nɛ a ba wo ni ɔmɛ yi, nɛ a pee basabasa. 14Kɛkɛ nɛ amlɔ ɔ nyɛmimɛ ɔmɛ ya je Paulo blɔ nɛ e ya gu wo hɛ mi; se Sila kɛ Timoteo hi lejɛ ɔ. 15Se nihi nɛ ya sɛ Paulo ɔ kɛ lɛ ya su Atene tɔɔ. Akɛnɛ Paulo sɛ mɛ ke a ha Sila kɛ Timoteo nɛ a ba e ngɔ oya he je ɔ, a pue nɔ kɛ ho.

Paulo ngɛ Atene

16Jeha nɛ ɔ benɛ Paulo ngɛ mɛ mlɛe ngɛ Atene ɔ, e mumi mi wo la ngɛ e mi, benɛ e na ma a nɛ mi hyi tɔ kɛ amagahi sɔuu ɔ. 17Lɔ ɔ he ɔ e kɛ Yudafohi nɛ ngɛ kpe he ɔ kɛ Mawu gbeye yeli ɔmɛ kɛ nihi nɛ kɛ lɛ kpee daa nɛ ɔ ngɛ jua a nɔ ɔ saa nya. 18Se ni leli nɛ je Epikurotsɛmɛ kɛ Stoatsɛmɛ ɔmɛ a ti ni komɛ kɛ lɛ sa nya; nɛ ni komɛ ke: “Mɛni nyapuutsɛ nɛ ɔ ma de po?” Ni komɛ hu ke: “E ngɛ kaa nɔ ko nɛ jajeɔ ma se wɔhi a he sane tsɔɔ;” ejakaa e jaje Yesu kɛ e si temi he sane kpakpa a tsɔɔ mɛ. 19Nɛ a ngɔ lɛ kɛ ya Areopago (kojomi he) ɔ, nɛ a ke: “Anɛ o ma ha waa le tsɔɔmi he nɛ o ngɛ he munyu tue nɛ ɔ lo? 20Ejakaa o ha wa tue nu ma se sanehi; lɔ ɔ he ɔ wa ngɛ sisi hlae nɛ waa le.” 21Se Atenebihi tsuo kɛ nibwɔhi nɛ ngɛ lejɛ ɔ, nɔ́ nɛ piɛ mɛ pɛ ji sane he ko sɛɛmi kɛ tue bumi.

22Paulo ya da Areopago ɔ kpɛti nɛ e ke: “Tsaatsɛmɛ Atenebihi, i naa ngɛ nihi kulaa mi kaa nyɛ jaa wɔhi pɛpɛɛpɛ. 23Ejakaa benɛ i bee nɛ i hyɛ nihi nɛ nyɛ ngɛ jae ɔ, i na bɔ sami latɛ ko hu nɛ a ngma ngɛ nɔ ke: ‘Mawu nɛ a li ɔ nɔ ʼi.’ Lɔ ɔ he ɔ, nɔ nɛ nyɛ li lɛ se kɛ̃ ɔ nyɛ jaa lɛ ɔ, lɛ nɔuu e he sane i ngɛ jajee kɛ ngɛ nyɛ tsɔɔe ɔ nɛ. 24Mawu nɛ pee je ɔ kɛ e mi nihi kulaa, nɛ ji hiɔwe kɛ zugba nyɔmtsɛ ɔ, e hi sɔlemi tsuhi nɛ a kɛ nine pee mi, 25nɛ jeha nɛ ɔ hu a kɛ nimli a ninehi ja we lɛ, kaa nɔ ko nɛ nɔ́ ko fiɔ lɛ; lɛ mohu e dɛ mi wami kɛ mumi kɛ nihi tsuo jee kɛ baa haa nimli kulaa. 26Muɔ kake e kɛ pee nimli adesahi kulaa nɛ a hi zugba a tsuo hɛ mi, nɛ yinɔhi nɛ e to ɔ kɛ a sihi he ɔmɛ a huzu ɔmɛ ɔ, e kpɛ mi ngɔ to momo, 27konɛ a hla Mawu se blɔ, kaa eko ɔ ke a lilaa si ɔ, a maa na lɛ lo; pohu e kɛ wa ti nɔ tsuaa nɔ kpɛti kɛ we. 28Ejakaa

‘E mi nɔuu wa hɛ ngɛ ngɛ, nɛ wa tsɛ̃ɛ wa he,

nɛ wa ngɛ ngɛ.’

Kaa bɔ nɛ nyɛ nitsɛmɛ nyɛ latsɛmɛ ɔmɛ ekomɛ hu de ɔ ke:

‘Se lɛ nɔuu e nina ji wɔ hulɔ’ ɔ.

29Se ke Mawu nina ji wɔ ɔ, e sɛ kaa wa susuu kaa Mawu su ɔ ngɛ kaa sika tsu loo sika hiɔ loo tɛ ko nɛ nɔmlɔ kɛ e ga kɛ e juɛmi pee. 30Lɔ ɔ he ɔ, be nɛ a li ɔ Mawu ku e hɛ ngɔ fɔ nɔ, se jeha nɛ ɔ lɛɛ e ngɛ nimli kulaa nɛ ngɛ he tsuaa he ɔ kita woe kaa a tsake a tsui. 31Ejakaa e to ligbi ko nɛ e maa gu nyumu ko nɛ e to ɔ nɔ kɛ kojo je mluku ɔ tsuo ngɛ dami nya; e ha nɔ tsuaa nɔ le enɛ ɔ, ejakaa e tle lɛ si kɛ je gbeje.”

32Se benɛ a nu ni gbogboehi a si temi he ɔ, ni komɛ ye e he fɛu, nɛ ni komɛ hu ke: “Wa maa kpale bu mo tue ekohu ngɛ enɛ ɔ he.” 33Bɔ nɛ pee nɛ Paulo je a kpɛti ji nɛ ɔ nɛ. 34Se nyumuhi komɛ kɛ a he bɔ e he nɛ a he ye. A kpɛti ni komɛ ji Dionisio, Areopagono ɔ, kɛ yo ko nɛ a tsɛɛ lɛ Damari ɔ, kɛ ni kpa komɛ nɛ piɛ a he.

Currently Selected:

Bɔfo 17: DAN77

Highlight

Copy