Bɔfo 16

Paulo kɛ Sila ngɔ Timoteo

1Kɛkɛ nɛ Paulo ba Derbe kɛ Listra. Nɛ oʼɛ, kaselɔ ko ngɛ lejɛ ɔ nɛ a tsɛɛ lɛ Timoteo, Yudayo ko nɛ he ye ɔ bi, se e tsɛ ɔ Helano ʼi. 2Nyɛmimɛ ɔmɛ nɛ ngɛ Listra kɛ Ikoniom ɔ yeɔ e he odase kpakpa. 3Paulo hla kaa e kɛ Timoteo nɛ ya, lɔ ɔ he ɔ e ngɔ lɛ nɛ e po lɛ ngɛ Yudafohi nɛ ngɛ lejɛ ɔ ni ɔmɛ a mi ɔ he; ejakaa mɛ kulaa a le kaa e tsɛ ɔ Helano ʼi. 4Se benɛ a ngɛ ma amɛ a nɔ kpae ɔ, a kɛ mlaahi nɛ bɔfo ɔmɛ kɛ nikɔtɔma amɛ nɛ ngɛ Yerusalem ɔ wo ɔ ha mɛ, konɛ a ye nɔ. 5Lɔ ɔ he ɔ asafo ɔ na he wami ngɛ hemi kɛ yemi mi, nɛ a he hiɛɛ daa ligbi.

Paulo ninami ngɛ Troia

6Akɛnɛ Mumi Klɔuklɔu ɔ tsi mɛ blɔ ke a ko fiɛ munyu ɔ ngɔ tsɔɔ ngɛ Asia he je ɔ, a po mi ngɛ Frigia kɛ Galatia zugba a nɔ. 7A ba Misia ni ɔmɛ a mi, nɛ a ka kaa a maa ya Bitinia, se Yesu Mumi ɔ ngmɛ́ mɛ blɔ. 8Kɛkɛ nɛ a gu Misia nɛ a ba Troia. 9Nɛ nyɔ ɔ mi ɔ Paulo na ni, kaa nyumu Makedonia no ko daa si ngɛ lɛ pɛɛ kpae ke: “Ba Makedonia nɛ o ba ye bua wɔ!” 10Se benɛ e na ni ɔ pɛ ɔ, amlɔ ɔ wa hla kaa waa ya Makedonia, ejakaa wa na le tutuutu kaa Nyɔmtsɛ ɔ tsɛ wɔ kɛ yaa lejɛ ɔ, konɛ wa ya fiɛ sane kpakpa a ngɔ tsɔɔ mɛ.

Lidia tsakemi ngɛ Filipi

11Lɔ ɔ he ɔ wa hia kɛ lɛ kɛ je Troia nɛ wa nyɛɛ tɛ̃ɛ kɛ ya Samotrake, nɛ e nɔ je na a wa ba Neapoli. 12Nɛ wa je lejɛ ɔ, wa ya Filipi nɛ ji Makedonia zugba a nɔ ma ngua kɛ Romabi a nɔ yemi he. Wa hi ma nɛ ɔ mi be saii. 13Nɛ Hejɔɔmi Ligbi ɔ nɔ ɔ, wa je ma a mi kɛ ya pa nya he nɛ wa juɛmi de wɔ ke a pɔɔ sɔlemi ngɛ ɔ, nɛ wa hi si nɛ waa kɛ yihi nɛ ba bua a he nyɛ ngɛ lejɛ ɔ tu munyu. 14Nɛ yo ko nɛ a tsɛɛ lɛ Lidia nɛ ji kɔjai jualɔ ko nɛ je Tiatira ma a mi nɛ yee Mawu gbeye ɔ hu nu. Nɛ Nyɔmtsɛ ɔ bli e tsui nya, kaa e bu nihi nɛ Paulo ngɛ dee ɔ tue. 15Nɛ benɛ a baptisi lɛ kɛ e we ɔ, e kpa wɔ pɛɛ ke: “Ke nyɛ bu mi kaa i he Nyɔmtsɛ ɔ ye anɔkuale mi ɔ, lɛɛ nyɛɛ ba ye we ɔ nɛ nyɛ ba hi lejɛ ɔ.” Nɛ e hɛɛ wɔ hluu nɛ wa kplɛɛ nɔ.

A wo Paulo kɛ Sila tsu mi

16E ba mi kaa ligbi ko benɛ wa yaa he nɛ a sɔlee ngɛ ɔ, tsɔlɔyo ko nɛ klaami mumi ngɛ e mi kɛ wɔ ba kpe; e kɛ e klaami ɔ haa e nyɔmtsɛmɛ naa ni fuu. 17E nyɛɛ waa kɛ Paulo se, nɛ e kpa ngmlaa ke: “Kikɛmɛ a nimli nɛ ɔmɛ ɔ, Mawu nɛ ngɛ hiɔwe lokoo ɔ tsɔli ji mɛ, nɛ a ngɛ yi wami hemi blɔ ɔ jajee kɛ ngɛ nyɛ tsɔɔe.” 18Nɛ e pee ja ligbihi fuu. Se e dɔ Paulo wawɛɛ, nɛ e plɛ e he nɛ e de mumi ɔ ke: “I ngɛ mo fae ngɛ Yesu Kristo biɛ mi kaa o je e mi.” Nɛ e je kpo ngɛ jamɛ a ngmlɛfia a nɔ nɔuu. 19Se benɛ e nyɔmtsɛmɛ ɔmɛ na kaa a ni nami hɛ kɛ nɔ fɔmi ɔ be hu ɔ, a nu Paulo kɛ Sila nɛ a sã mɛ kɛ ya ganɔ ɔmɛ a hɛ mi ngɛ jua a nɔ. 20Benɛ a kpaka mɛ kɛ ya asafoatsɛmɛ ɔmɛ a hɛ mi ɔ, a ke: “Kikɛmɛ a nimli nɛ ɔmɛ nɛ ji Yudafohi ɔ ngɛ wa ma a mi hliihlii woe. 21Nɛ a ngɛ kusumihi komɛ tsɔɔe nɛ wa be he blɔ ka wa pɛtɛɛ he loo wa yeɔ nɔ, ejakaa Romabi ji wɔ.” 22Nɛ ma mi bi ɔmɛ hu te si wo mɛ nɛ a po klaangma wo a he, nɛ asafoatsɛmɛ ɔmɛ ha a je a tade ɔmɛ ngɛ a he, nɛ a fa ke a fia mɛ kpa. 23Nɛ benɛ a fia mɛ kpa saminya a, a wo mɛ tsu mi, nɛ a wo pa mi tsɛmɛ a nɔ hyɛlɔ ɔ kita ke e ngɔ mɛ ngɔ to sɔkee. 24Nɛ akɛnɛ a wo lɛ kikɛmɛ a kita he je ɔ, e kɛ mɛ ya wo tsu nɛ ngɛ se je ɔ mi, nɛ e bɔ a nanehi pa.

25Se nyɔ mi kpɛti ɔ Paulo kɛ Sila ngɛ sɔlee nɛ a ngɛ lae kɛ ngɛ Mawu yi jee; nɛ pa mi tsɛmɛ ɔmɛ ngɛ mɛ tue bue. 26Nɛ tlukaa a, zugba mimiɛ wawɛɛ; nɛ tsu ɔ fanesi ɔmɛ mimiɛ, nɛ amlɔ ɔ sinya amɛ kulaa bli, nɛ mɛ tsuo a kɔsɔkɔsɔ ɔmɛ kplɔ ngɛ a he. 27Se benɛ pa mi tsɛmɛ a nɔ hyɛlɔ ɔ hɛli si kɛ je mahɛ mi nɛ e na kaa tsu ɔ sinya amɛ kulaa a nya fɔɔ si ɔ, e hia klaate nɛ jinɛ e maa gbe e he, ejakaa e susu kaa pa mi tsɛmɛ ɔmɛ tu fo. 28Se Paulo nga ke: “Koo pee o he yayami ko, se wɔ tsuo wa ngɛ hiɛ ɔ.” 29Kɛkɛ nɛ pã mi tsɛmɛ a nɔ hyɛlɔ ɔ tsɛ nɛ a ba ha lɛ la, nɛ e sa fo kɛ sɛ tsu ɔ mi, nɛ e kɛ hedomi be nɔ Paulo kɛ Sila hɛ mi; 30nɛ e kɛ mɛ je kpo nɛ e ke: “Nyɔmtsɛmɛ, kɛ ma pee kɛɛ nɛ ma na yi wami hemi?”

31Nɛ a ke: “He Nyɔmtsɛ Yesu Kristo nɔ ngɔ ye, nɛ a ma he o kɛ o we ɔ kulaa yi wami.” 32Nɛ a jaje Nyɔmtsɛ ɔ munyu ɔ tsɔɔ lɛ kɛ nihi kulaa nɛ ngɛ e we ɔ mi ɔ. 33Nɛ e ngɔ mɛ jamɛ a nyɔ ɔ mi ngmlɛfia a nɔuu, nɛ e fɔ a kpa amɛ a nya ha mɛ, nɛ a baptisi lɛ kɛ e we ɔ mi bimɛ kulaa amlɔ ɔ nɔuu. 34Nɛ e kɛ mɛ ya e we ɔ mi, nɛ e ya ngmɛ mɛ okplɔɔ, nɛ e kɛ e we ɔ kulaa nya kaa e he Mawu ye.

35Se benɛ je na a, asafoatsɛmɛ ɔmɛ tsɔ aslaafohi ba de ke: “Ngmɛɛ nimli ɔmɛ a he nɛ a ho”. 36Se pa mi tsɛmɛ a nɔ hyɛlɔ ɔ jaje kikɛmɛ a munyu nɛ ɔ ngɔ tsɔɔ Paulo ke: “Asafoatsɛmɛ ɔmɛ tsɔ kɛ ba ke a ngmɛɛ nyɛ he, lɔ ɔ he ɔ jeha nɛ ɔ nyɛɛ je kpo, nɛ nyɛɛ kɛ nyɛɛmi saminya.” 37Se Paulo de mɛ ke: “Wɔ nɛ Romabi ji wɔ nɛ a bui wɔ fɔ ɔ, a fia wɔ kpa, nɛ a wo wɔ tsu mi hulɔ, nɛ kpaako a ngɛ wɔ fiee zaa lo? Dɛbi, se mohu ha mɛ nitsɛmɛ a ba nɛ a ba je wɔ.” 38Nɛ aslaafo ɔmɛ ya jaje kikɛmɛ a munyu nɛ ɔ ngɔ tsɔɔ asafoatsɛmɛ ɔmɛ. Nɛ benɛ a nu kaa Romabi ji mɛ ɔ, a ye gbeye. 39Nɛ a ba ba kpa mɛ pɛɛ, nɛ benɛ a je mɛ ɔ, a kpa mɛ pɛɛ ke a je ma a mi. 40Se benɛ a je tsu ɔ mi ɔ, a ho Lidia we ɔ mi ya. Nɛ benɛ a na nyɛmimɛ ɔmɛ nɛ a jɔɔ a bua a, a pue nɔ kɛ ho.

Currently Selected:

Bɔfo 16: DAN77

Highlight

Copy