Bɔfo 15

A kpe ngɛ Yerusalem

1Ni komɛ je Yudea kɛ ba nɛ a ba tsɔɔ nyɛmimɛ ɔmɛ ke: “Ke a pui nyɛ ngɛ Mose Mlaa a nya a, a be nyɛ yiwami nyɛe ma he.” 2Nɛ benɛ Paulo kɛ Barnaba kɛ mɛ sa nya nɛ a kɛ mɛ je nɔ hluu ɔ, a to kaa Paulo kɛ Barnaba kɛ a ti ni komɛ hu nɛ ya bɔfo ɔmɛ kɛ nikɔtɔmahi nɛ ngɛ Yerusalem ɔmɛ a ngɔ ngɛ kikɛmɛ a munyu nɛ ɔ he.

3Lɔ ɔ he ɔ benɛ asafo ɔ ba je mɛ blɔ ɔ, a gu Foinike kɛ Samaria nɛ a sɛɛ majeli ɔmɛ a tsakemi ɔ he sane ha mɛ, nɛ a kɛ ha nyɛmimɛ ɔmɛ tsuo na bua jɔmi wawɛɛ. 4Nɛ benɛ a su Yerusalem ɔ, asafo ɔ kɛ bɔfo ɔmɛ kɛ nikɔtɔma amɛ he mɛ hɛmuɔ, nɛ a sɛɛ nihi kulaa nɛ Mawu kɛ mɛ tsu ɔ ha mɛ. 5Se ni komɛ nɛ je Farisifo ɔmɛ a ku ɔ mi nɛ he ye ɔ te si nɛ a de ke: “Ja a po mɛ nɛ a wo mɛ kita ke a ye Mose Mlaa a nɔ.”

6Nɛ bɔfo ɔmɛ kɛ nikɔtɔma amɛ ba bua a he nya konɛ a hla kikɛmɛ a sane nɛ ɔ mi. 7Se benɛ a sa nya hluu ɔ, Petro te si da si, nɛ e de mɛ ke: “Tsaatsɛmɛ kɛ mamimɛ, nyɛ nitsɛmɛ nyɛ le kaa kɛ je lokoo nɛ Mawu hla mi kaa majeli ɔmɛ a nu sane kpakpa a kɛ je ye nya, nɛ a he ye. 8Nɛ Mawu nɛ le tsui mi nihi ɔ ye mɛ odase nɛ e ha mɛ Mumi Klɔuklɔu ɔ kaa bɔ nɛ e ha wɔ ɔ nɔuu, 9nɛ e hlɛ́ nimli a mi ngɛ waa kɛ mɛ kpɛti, nɛ e kɛ hemi kɛ yemi tsukɔ a tsuihi a he. 10Lɔ ɔ he ɔ, jeha nɛ ɔ, mɛni he je nyɛ ngɛ Mawu kae nɛ nyɛɛ kɛ pã tso nɛ waa kɛ wa tsɛmɛ ɔmɛ kulaa nyɛ we tloomi fɔ́ɔ kaseli ɔmɛ a ko nɔ? 11Se wa heɔ yeɔ kaa Nyɔmtsɛ Yesu Kristo dloomi ɔ mohu nɔ a maa gu kɛ he waa kɛ mɛ tsuo yiwami.”

12Kɛkɛ nɛ mɛ tsuo a ma a nya nɛ a bu Barnaba kɛ Paulo nɛ sɛɛ mɛ okadihi kɛ nyakpɛ nihi abɔ nɛ Mawu gu a nine nɔ kɛ pee ngɛ majemajeli ɔmɛ a kpɛti ɔ tue. 13Benɛ a tu munyu ɔta a, Yakobo he nɔ nɛ e ke: “Tsaatsɛmɛ kɛ mamimɛ, nyɛɛ bu mi tue. 14Simeon sɛɛ bɔ nɛ Mawu ba slaa majemajeli ɔmɛ kekle, nɛ e hla a kpɛti ma ko ngɔ ha e biɛ ɔ. 15Nɛ gbali ɔmɛ a munyu ɔmɛ hu kɛ enɛ ɔ sɔ pɛpɛɛpɛ, bɔ nɛ a ngma ke:

16‘Ni nɛ ɔmɛ a se ɔ, ma kpale ye se kɛ ba,

Nɛ ma dla David bo tsu nɛ ku ɔ ma ma;

Nɛ o tsu kokue ɔmɛ hu ma fia ekohu,

Nɛ ma tle lɛ si ngɔ ma si;

17Benɛ pee nɛ nimli nɛ piɛ ɔ kɛ majemajeli ɔmɛ kulaa hu

Nɛ a kɛ ye biɛ wo mɛ ɔ

A hla Nyɔmtsɛ ɔ se blɔ.’

18Nyɔmtsɛ ɔ nɛ ha a le enɛ ɔmɛ kulaa kɛ je lokoo ɔ lɛ de.

19“Lɔ ɔ he ɔ nɔ́ nɛ i ngɛ dee ji kaa a ko doo nihi nɛ kpale a se kɛ je majeli ɔmɛ a kpɛti kɛ ba Mawu ngɔ ɔ nya tsɔ. 20Se mohu a ngma mɛ ke a nyɛ wɔ nihi kɛ a ajuama bɔmi kɛ lohwehi nɛ a kika mɛ kɛ gbe kɛ dmuɔ. 21Ejakaa kɛ je blema lokoo ɔ Mose ngɛ nihi nɛ fiɛɔ lɛ ngɛ ma tsuaa ma nɔ, nɛ daa Hejɔɔmi Ligbi ɔ a kaneɔ e womi ɔmɛ ngɛ kpe he ɔmɛ.”

Womi nɛ a ngma mane mejeli nɛ he ye ɔ

22Kɛkɛ nɛ bɔfo ɔmɛ kɛ nikɔtɔma amɛ kɛ asafo mluku ɔ kulaa ma nya si kaa a hia nyumuhi komɛ kɛ je mɛ nitsɛmɛ a kpɛti, nɛ a tsɔ mɛ kɛ Paulo kɛ Barnaba kɛ ya Antiokia. Mɛ ji Yuda, nɔ nɛ a tsɛɛ lɛ Barsaba hulɔ ɔ, kɛ Sila, nyɛmimɛ ɔmɛ a kpɛti nikɔtɔma amɛ. 23Nɛ a ngma womi ngɔ ha mɛ ke:

“Bɔfo ɔmɛ kɛ nikɔtɔma amɛ kɛ nyɛmimɛ ɔmɛ biɔ nyɛmimɛ nɛ je majeli ɔmɛ a kpɛti ngɛ Antiokia kɛ Siria kɛ Kilikia a saminya. 24Akɛnɛ wa nu kaa wa ti nikomɛ pue nɔ kɛ ba ba doo nyɛ nya kɛ munyuhi komɛ nɛ a kɛ puɛ nyɛ juɛmi de ke a po nyɛ nɛ nyɛɛ ye Mose Mlaa a nɔ, pohu wa wui mɛ jamɛ a kita ko he je ɔ, 25e sa wa hɛ mi kaa, nɛ wa nya pee kake nɛ ɔ ɔ, waa hia nihi ngɔ piɛ Barnaba kɛ Paulo nɛ wa suɔ ɔ he 26nihi nɛ ji nimli nɛ ngɔ a wami ngɔ ha ngɛ wa Nyɔmtsɛ Yesu biɛ ɔ he ɔ, konɛ waa tsɔ mɛ nyɛ ngɔ. 27Lɔ ɔ he ɔ wa tsɛ Yuda kɛ Sila, konɛ mɛ hu a kɛ a nya mi munyu ba jaje kikɛmɛ a ni nɛ ɔmɛ nɔuu ngɔ tsɔɔ nyɛ. 28Ejakaa e sa Mumi Klɔuklɔu ɔ hɛ mi, nɛ e sa wɔ hu wa hɛ mi kaa, waa kɛ tlomi ko nɛ ko fɔ nyɛ nɔ hu, kaa ja nihi nɛ he hia nɛ ɔmɛ nɔuu. 29Kaa nyɛɛ nyɛ lo nɛ a gbe ha wɔhi kɛ muɔ kɛ lohwehi nɛ a kika a kuɛ kɛ ajuama bɔmi. Ke nyɛ nyɛ enɛ ɔmɛ ɔ, nyɛ pee saminya. Nyɛɛ hi si saminya!”

30Jeha nɛ ɔ, benɛ a wo bɔfo ɔmɛ blɔ ɔ, a ba Antiokia, nɛ a ba bua asafo ɔ nya nɛ a je womi ɔ ngɔ ha mɛ. 31Nɛ benɛ a kane ɔ, a bua jɔ a he ngɛ a bua womi munyu ɔ he. 32Se Yuda kɛ Sila a, akɛnɛ mɛ nitsɛmɛ hu gbali ji mɛ he je ɔ, a kɛ munyuhi babauu jɔɔ nyɛmimɛ ɔmɛ a bua nɛ a wo mɛ he wami. 33Nɛ benɛ a se kɛ bɔɔ ngɛ lejɛ ɔ, nyɛmimɛ ɔmɛ wo mɛ blɔ ngɛ he jɔmi mi kɛ ho nihi nɛ tsɔ mɛ ɔmɛ a ngɔ ya. [ 34Se Sila lɛɛ, e suɔ kaa e maa hi lejɛ ɔ.]

35Paulo kɛ Barnaba hi Antiokia nɛ a tsɔɔ ni nɛ a fiɛ Nyɔmtsɛ ɔ he sane kpakpa a, nɛ ni kpa komɛ fuu hu pee ja.

Paulo kɛ Barnaba gba a mi

36Be ko se ɔ Paulo de Barnaba ke: “Ha waa kpale wa se ya slaa wa nyɛmimɛ ɔmɛ ngɛ ma tsuaa ma nɛ wa fiɛ Nyɔmtsɛ ɔ munyu ɔ ngɛ mi ɔ, nɛ waa hyɛ bɔ nɛ a ngɛ.” 37Barnaba hɛ ngɛ nɔ kaa a maa ngɔ Yohane nɛ a tsɛɛ lɛ Marko ɔ ngɔ piɛ a he. 38Se Paulo lɛɛ, e susu kaa e sɛ́ kaa a ngɔ nɔ nɛ kpale ngɛ a se ngɛ Pamfilia nɛ e kɛ mɛ yɛ́ ni tsumi ɔ ngɔ piɛ a he. 39Lɔ ɔ he ɔ, enɛ ɔ pee mɛ nya sami babauu nɛ e ha a gba a mi, nɛ Barnaba ngɔ Marko ngɔ piɛ e he, nɛ a gu lɛ mi kɛ ho Kipro ya. 40Se Paulo lɛɛ, e hia Sila ngɔ piɛ e he, nɛ benɛ nyɛmimɛ ɔmɛ tu lɛ ngɔ wo Mawu dloomi ɔ dɛ mi ɔ, e pue nɔ kɛ ho. 41Nɛ e gu Siria kɛ Kilikia ya wo asafo ɔmɛ he wami.

Currently Selected:

Bɔfo 15: DAN77

Highlight

Copy