Bɔfo 14

Paulo kɛ Barnaba ngɛ Ikoniom

1E ba mi kaa benɛ a ngɛ Ikoniom ɔ, Paulo kɛ Barnaba ya Yudafo ɔmɛ a kpe he ɔ nɛ a ya tu munyu tsɔɔ mɛ saminya, nɛ Yudafo ɔmɛ kɛ Helabi ɔmɛ a ti nihi babauu he ye. 2Se Yudafohi tue gboli ɔmɛ puɛ majeli ɔmɛ a tue, nɛ a ha a plɛ a hɛ mi ngɔ wo nyɛmimɛ ɔmɛ. 3Lɔ ɔ he ɔ, a se kɛ ngɛ lejɛ ɔ nɛ a kɛ kã tu Nyɔmtsɛ ɔ he munyu, nɛ lɛ hu e ye e dloomi munyu ɔ he odase nɛ e ha a gu a nine nɔ pee okadihi kɛ nyakpɛ nihi fuu. 4Se ma a mi bi ɔmɛ a mi gba enyɔ: Fã piɛ Yudafo ɔmɛ a he, nɛ fã hu piɛ bɔfo ɔmɛ a he.

5Se benɛ majeli ɔmɛ kɛ Yudafo ɔmɛ kɛ a nikɔtɔma amɛ bu kɛ ba nɛ a ba pee mɛ hãihãi nɛ a fia mɛ tɛ ɔ; 6a na le, nɛ a tu fo kɛ ho Likaonia mahi nɛ ji Listra kɛ Derbe kɛ lejɛ ɔ ni ɔmɛ a mi ya, 7nɛ a ya fiɛ Sane Kpakpa a tsɔɔ mɛ ngɛ lejɛ ɔ hulɔ.

Paulo kɛ Barnaba ngɛ Listra

8Nyumu ko ngɛ Listra nɛ e nyɛ we si nɛ e da, se si e hii nɛ e ji nɔ nɛ hule kɛ je e nyɛ muklii mi lokoo nɛ e nyɛɛ we gblee. 9Nɛ benɛ Paulo ngɛ munyu tue ɔ, e bu lɛ tue. Nɛ benɛ Paulo hyɛ lɛ too nɛ e na kaa e ngɛ hemi kɛ yemi kaa a ma tsa lɛ ɔ, 10e kɛ gbi wawɛɛ de lɛ ke: “Tee si nɛ o da o nane nɔ tlɔmɔɔ!” Nɛ e hlu ma si nɛ e nyɛɛ. 11Nɛ benɛ ni ɔmɛ na nɔ́ nɛ Paulo pee ɔ, a de ngɛ Likaonia gbi mi ke: “Mawu ɔmɛ plɛ a he kaa nimli kɛ kple si kɛ ba wa ngɔ.” 12Nɛ a tsɛ Barnaba ke Dio, kɛ Paulo hu ke Herme, ejakaa lɛ titli lɛ e ngɛ munyu ɔ tue ɔ nɛ. 13Se Dio osɔfo nɛ ngɛ a ma a agbo ɔ nya a hɛɛ nakuhi kɛ nyinyla kɛ ba agbo ɔ nya, konɛ lɛ kɛ asafo ɔ kɛ sa bɔ. 14Se benɛ bɔfo ɔmɛ nɛ ji Barnaba kɛ Paulo nu he ɔ, a gba a tadehi nɛ a sa fo kɛ ya sɛ asafo ɔ kpɛti kɛ ngmlaa 15ke: “Tsaatsɛmɛ, mɛni nyɛ ngɛ pee nɛ ɔ? wɔ hu nimli adesahi ji wɔ kaa nyɛ nɔuu, nɛ wa ngɛ sane kpakpa a fiee kɛ ngɛ nyɛ tsɔɔe, konɛ nyɛɛ kpale nyɛ se kɛ je kikɛmɛ a yakayaka ni nɛ ɔmɛ a he kɛ ba Mawu hɛkalɔ ɔ ngɔ, nɔ nɛ pee hiɔwe kɛ zugba kɛ wo kɛ nihi kulaa nɛ ngɛ a mi ɔ; 16nɔ nɛ blemabi ɔmɛ a yinɔhi nɛ be ɔ mi ɔ, e ha majemajeɔ tsuo nyɛɛ mɛ nitsɛmɛ a blɔ ɔmɛ a nɔ. 17Se kɛ̃ ɔ, e jɔɔ we lɛ nitsɛ e he odase yemi, se mohu e peɔ kpakpa nɛ e haa hiɔmi jee hiɔwe nɛɛ haa nyɛ, kɛ jehahi nɛ baa ni fuu hulɔ, e kɛ ngma kɛ bua jɔmi woɔ nyɛ tsuihi a mi tɔ.” 18Nɛ a gbo dengme loko a kɛ kikɛmɛ a munyu nɛ ɔmɛ tsi bɔ nɛ jinɛ ni ɔmɛ maa sã ha mɛ ɔ nya.

19Se Yudafohi komɛ je Antiokia kɛ Ikoniom ba lejɛ ɔ ba wo asafo ɔmɛ a yi mi; a fia Paulo tɛ, nɛ a sã lɛ si kɛ je ma a mi, a susu kaa e gbo. 20Se benɛ kaseli ɔmɛ ba bɔle lɛ kɛ kpe ɔ, e te si nɛ e ho ma a mi ya. Nɛ e nɔ je na a, e kɛ Barnaba pue nɔ kɛ ho Derbe ya.

Paulo kɛ Barnaba ba Antiokia ekohu

21Benɛ a fiɛ sane kpakpa a tsɔɔ ma a, nɛ a ha nihi fuu tsake pee kaseli ɔ, a kpale a se kɛ ho Listra kɛ Ikoniom kɛ Antiokia ya. 22A kpale wo kaseli ɔmɛ a mumi mi wami ɔ he wami, nɛ a tu munyu tsɔɔ mɛ ke a hɛɛ hemi kɛ yemi ɔ mi, nɛ jeha nɛ ɔ hu e sa kaa wa guu dengme fuu mi kɛ sɛɛ Mawu matsɛ yemi ɔ mi. 23Nɛ a hia nikɔtɔmahi ngɔ to asafo tsuaa asafo nya, nɛ a kɛ sɔlemi kɛ hwɔ hami tu mɛ ngɔ wo Nyɔmtsɛ nɔ nɛ a he ye ɔ dɛ mi. 24Nɛ a po mi ngɛ Pisidia nɛ a ba Pamfilia. 25Nɛ benɛ a fiɛ munyu ɔ ngɔ tsɔɔ ngɛ Perge ɔ, a ngɔ pue nɔ kɛ ba Atalia. 26Nɛ a sɛ lɛ mi ngɛ lejɛ ɔ, nɛ a hia kɛ ba Antiokia, ngɛ he nɛ a tu mɛ ngɔ wo Mawu dloomi ɔ dɛ mi kɛ ha ni tsumi nɛ a tsu gbe nya a ngɛ ɔ.

27Benɛ a ba lejɛ ɔ nɛ a ba bua asafo ɔ nya a, a sɛɛ mɛ nihi nɛ Mawu kɛ mɛ ya tsu ɔ kulaa, kɛ bɔ nɛ e bli blɔ ngɔ ha majeli ɔmɛ. 28Nɛ a kɛ kaseli ɔmɛ hi si be saii.

Currently Selected:

Bɔfo 14: DAN77

Highlight

Copy