Bɔfo 13

A hla Saulo kɛ Barnaba nɛ a tsɔ mɛ

1Gbali kɛ tsɔɔli komɛ ngɛ Antiokia asafo ɔ mi, mɛ ji Barnaba kɛ Simeon, nɔ nɛ a tsɛɛ lɛ Niger ɔ, kɛ Lukio Kireene no ɔ, kɛ Manahen, nɔ nɛ a lɛ lɛ kɛ amlalo Herode ɔ, kɛ Saulo. 2Benɛ a ngɛ Nyɔmtsɛ ɔ jae nɛ a ngɛ hwɔ hae ɔ. Mumi Klɔuklɔu ɔ ke: “Nyɛ je Barnaba kɛ Saulo ngɔ ha mi kɛ ha ni tsumi nɛ i tsɛ mɛ ngɛ he ɔ.” 3Kɛkɛ nɛ a ha hwɔ nɛ a sɔle, nɛ a kɛ a ninehi pue a nɔ nɛ a wo mɛ blɔ.

Saulo kɛ Barnaba ngɛ Kipro

4Jeha nɛ ɔ ni nɛ ɔmɛ ɔ, akɛnɛ Mumi Klɔuklɔu ɔ tsɔ mɛ ke a ya he je ɔ, a pue nɔ kɛ ho Seleukia ya, nɛ a sɛ lɛ mi ngɛ lejɛ ɔ, nɛ a hia kɛ ho Kipro ya. 5Benɛ a su Salami ɔ, a fiɛ Mawu munyu ɔ ngɛ Yudafo ɔmɛ a kpe he ɔmɛ. Nɛ a kɛ Yohane hu nyɛɛ kaa a sɔmɔlɔ.

6Nɛ benɛ a po mi ngɛ zugba kpɔ nɛ nyu bɔle lɛ ɔ nɔ kɛ ba su Pafo ɔ, a na Yuda no kunya yelɔ kɛ lakpa gbalɔ ko nɛ a tsɛɛ lɛ Bar-yesu ɔ, 7nɔ nɛ ngɛ amlaalo Sergio Paulo ngɔ lɛ be ɔ mi ɔ. Sergio Paulo ji nyumu hɛ si kalɔ ko; lɛ nɛ e tsɛ Barnaba kɛ Saulo kɛ ba e ngɔ, nɛ e ngɛ hlae nɛ e bu Mawu munyu ɔ tue. 8Se Elima, kunya yelɔ ɔ (ja ji e biɛ ɔ sisi ngɛ Hela gbi mi) ka nɛ e tsi a nya, nɛ e ngɛ hlae nɛ e kpale amlaalo ɔ kɛ je hemi kɛ yemi ɔ he. 9Nɛ Saulo, nɔ nɛ a tsɛɛ lɛ Paulo hulɔ, nɛ Mumi Klɔuklɔu hyi lɛ tɔtɔɔtɔ ɔ, hyɛ lɛ too, 10nɛ e ke: “Oo, abosiami bi nɛ sisimi kɛ kutupɔ tsuo hyi mo tɔtɔɔtɔ, mo dami kulaa henyɛlɔ; anɛ o be Nyɔmtsɛ ɔ blɔ tlɔmɔɔ ɔmɛ a kpemi jɔɔe? 11nɛ jeha nɛ ɔ oʼɛ, Nyɔmtsɛ ɔ nine fɔɔ si ngɛ o nɔ, nɛ o hɛ ma yu, nɛ o be pu hyɛe kɛ yaa su be ko.” Nɛ amlɔ ɔ nɔuu ɔ afua kɛ diblii wo lɛ, nɛ e lilaa si ngɛ nihi hlae nɛ a ta e dɛ mi nɛ a ya je lɛ blɔ. 12Kɛkɛ nɛ amlaalo ɔ, benɛ e na nɔ́ nɛ a pee ɔ, e he ye, nɛ e he nya si lɛ ngɛ Nyɔmtsɛ ɔ tsɔɔmi ɔ he.

Paulo ba Antiokia nɛ ngɛ Pisidia a

13Benɛ Paulo kɛ e nimli ɔmɛ hia kɛ je Pafo ɔ, a ba Perge ngɛ Pamfilia; nɛ Yohane kpale ngɛ a se, snɛ e kpale e se kɛ ho Yerusalem ya ekohu. 14Se mɛɛ lɛɛ a je Perge nɛ a po mi kɛ ba Antiokia ngɛ Pisidia. A ya kpe he ɔ ngɛ Hejɔɔmi Ligbi ɔ nɔ nɛ a ya hi si. 15Nɛ benɛ a kane a Mlaa a kɛ gbali ɔmɛ a womi ɔ se ɔ, kpe he ɔ nikɔtɔma amɛ tsɔ ba de mɛ ke: “Tsaatsɛmɛ kɛ mamimɛ, ke nyɛ ngɛ munyu kɛ tsɔɔmi ko nɛ nyɛ maa tu ngɔ tsɔɔ ni ɔmɛ ɔ, nyɛɛ tu.” 16Kɛkɛ nɛ Paulo te si da si, nɛ e fɔ e nine nɛ e ke:

“Tsaatsɛmɛ Israel nyumuhi kɛ nyɛ nihi nɛ nyɛ yee Mawu gbeye, nyɛɛ bu tue! 17Kikɛmɛ a Israel ma nɛ ɔ Mawu lɛ hla wa tsɛmɛ ɔmɛ, nɛ benɛ a ya to nibwɔ ngɛ Mizraim zugba a nɔ ɔ, e wo ma a nɔ, nɛ e kɛ e nine nɛ e wo nɔ ɔ je mɛ kɛ je lejɛ ɔ. 18E hɛɛ mɛ nɛ e lɛ mɛ ngɛ nga a nɔ maa pee jeha nyingmi eywiɛ, 19nɛ e kpata majemaje ma kpaago hɛ mi ngɛ Kanaan zugba a nɔ, nɛ ye dla a zugba a mi ngɔ ha mɛ, konɛ e plɛ a nɔ. 20Nɛ lɔ ɔ se maa pee jeha lafa eywiɛ kɛ nyingmi enuɔ ɔ, e ha mɛ kojoli kɛ ba su gbalɔ Samuel nɔ. 21Nɛ kɔlɔ ɔ se ɔ a bi matsɛ, nɛ Mawu ngɔ Kish bi Saul, nyumu ko nɛ je Benyamin wetso ɔ mi ɔ ha mɛ jeha nyingmi eywiɛ. 22Nɛ benɛ e kpa lɛ ɔ, e wo David nɔ, nɛ e wo lɛ a nɔ matsɛ, nɔ nɛ he odase nɛ e ye ke: ‘I na David, Ishai bi ɔ, nyumu nɛ i ngɛ e he tsui, nɔ nɛ maa pee ye suɔmi nya ni ɔmɛ kulaa.’ 23Nɔ nɛ ɔ nina mi Mawu je Yesu kɛ je, dngɛ si womi ɔ nya, nɛ e kɛ lɛ pee Israel yi wami helɔ. 24Yohane sɛ hlami ba fiɛ baptisimi nɛ a kɛ naa tsui tsakemi ngɔ tsɔɔ Israel ma mluku ɔ tsuo kulaa. 25Nɛ loko Yohane maa gbe e nitsumi ɔ nya a, e ke: ‘Mɛnɔ nyɛ susuu kaa i ji? Tsa pi imi ji nɔ nɛ blɔ nɛ nyɛ ngɛ hyɛe ɔ. Se oʼɛ, nɔ ko ma ngɛ ye se, nɛ i sɛ́ nɔ nɛ pɛneɔ e tokota ngɛ e nane.’

26“Tsaatsɛmɛ kɛ mamimɛ, Abraham nina kɛ nyɛ kpɛti nihi nɛ yee Mawu gbeye, nyɛ a kɛ kikɛmɛ a yi wami hemi muyu nɛ ɔ ba ha. 27Ejakaa nihi nɛ ngɛ Yerusalem ɔ kɛ a ma a mi nikɔtɔma amɛ ɔ, akɛnɛ a li Yesu, nɛ jeha nɛ ɔ hu anui gbali ɔmɛ a munyu nɛ a kaneɔ daa Hejɔɔmi Ligbi ɔ nɛ ɔ he je ɔ, a bu lɛ fɔ nɛ lɔ ɔ ha gbali ɔmɛ a gbami ɔmɛ ba mi. 28Nɛ pohu a nɛ́ gbenɔ sane ko ngɛ e he mohu, se kɛ ɔ a kpa Pilato pɛɛ ke e gbe lɛ. 29Nɛ benɛ a ha nihi kulaa nɛ a ngma ngɛ e he ɔ ba mi ɔ, a je lɛ ngɛ tso ɔ nɔ, nɛ a ya to lɛ ngɛ yɔkɔ ko mi. 30Se Mawu tle lɛ si kɛ je gbeje; 31nɛ e je e he kpo ligbihi fuu kɛ tsɔɔ nihi nɛ kɛ lɛ je Galilea kɛ ba Yerusalem ɔ, nihi nɛ ji e odase yeli ha ma a. 32Nɛ wɔɔ lɛɛ, si nɛ e wo wa tsɛmɛ ɔmɛ ɔ he sane kpakpa a wa ngɛ fiɛe kɛ ngɛ tsɔɔe nɛ ɔ nɛ, 33kaa kɔlɔ ɔ nɔuu Mawu ha e ba mi ha wɔ nɛ wa ji a bimɛ ɔ, kaa nɛ e tle Yesu si kaa bɔ nɛ a ngma ngɛ La nɛ ji enyɔ ɔ mi hu ke: ‘Ye bi ji mo, mwɔnɛ i fɔ mo’ ɔ.

34“Se akɛnɛ e tle lɛ si kɛ je gbeje nɛ e be e se kpalee kɛ ya puɛmi mi hu he je ɔ, e de kikɛ:

‘Ma ngɔ David dloomi nihi nɛ maa si kpɛii ɔ ngɔ ha nyɛ.’ 35Lɔ ɔ he hu nɛ e de ngɛ he kpa ke:

‘O be hae nɛ o nɔ klɔuklɔu ɔ nɛ na puɛmi’ ɔ nɛ.

36Ejakaa David ɔ, benɛ e tsu Mawu yi mi tomi nya ni ngɛ e yi nɔ ɔ, e gbo nɛ a ngɔ lɛ ngɔ piɛ e tsɛmɛ ɔmɛ a he nɛ e puɛ. 37Se nɔ nɛ Mawu tle lɛ si ɔ puɛ we. 38Lɔ ɔ he ɔ, tsaatsɛmɛ kɛ mamimɛ, nyɛ na nɛ nyɛɛ le kaa nɔ nɛ ɔ nɔuu nɔ a guu kɛ jajeɔ yayamipami ngɔ tsɔɔ nyɛ ɔ nɛ; ejakaa nihi kulaa nɛ a be nyɛ nguɔ nyɛe maa wo ngɛ he ngɛ Mose Mlaa a nya a, 39nɔ nɛ ɔ mi ɔ, nɔ tsuaa nɔ nɛ heɔ yeɔ ɔ, a woɔ lɛ nguɔ. 40Lɔ ɔ he ɔ nyɛɛ hyɛ nɛ hi, konɛ bɔ nɛ gbali ɔmɛ de ɔ ko ba nyɛ nɔ ke:

41‘Nyɛ he guɛ gbeli, nyɛɛ hyɛ nɛ nyɛ hɛ mi nɛ pee nyɛ

yaa, nɛ nyɛɛ laa;

Ejakaa ma tsu ni tsumi ko ngɛ nyɛ yi nɔ,

Ni tsumi ko nɛ ke nɔ ko sɛɛ ha nyɛ tete po ɔ,

Nyɛ be hee maa ye kɔkɔɔkɔ.’ ”

42Se benɛ Paulomɛ je Yudafo ɔmɛ a kpe he ɔ, majeli ɔmɛ kpa mɛ pɛɛ ke a ba jaje kikɛmɛ a munyu nɛ ɔmɛ ngɔ tsɔɔ mɛ ekohu ngɛ Hejɔɔmi Ligbi nɛ ma a nɔ. 43Se benɛ nihi nɛ ngɛ kpe he ɔ kpa a, Yudafohi kɛ nihi nɛ a tsake mɛ ngɔ pee Yudafohi nɛ a yee Mawu gbeye ɔmɛ a ti nihi fuu nyɛɛ Paulo kɛ Barnaba se, nɛ a tu munyu tsɔɔ mɛ nɛ a wo mɛ ga ke a pɛtɛ Mawu dloomi ɔ he.

44Nɛ Hejɔɔmi Ligbi nɛ nyɛɛ se ɔ nɔ ɔ, e piɛ bɔɔ nɛ ma mluku ɔ kulaa ba bua a he nya nɛ a ba bu Mawu munyu ɔ tue. 45Se benɛ Yudafo ɔmɛ na asafo ɔmɛ ɔ, hunga jemi babauu te si ngɛ a mi, nɛ a kɛ munyu tumi-kɛ-simi kɛ musu bɔmi munyu ku nihi nɛ Paulo ngɛ dee ɔ nya. 46Nɛ Paulo kɛ Barnaba tu munyu kɛ kã ke: “Nyɛ kekle e sa kaa a jajeɔ Mawu munyu ɔ ngɔ tsɔɔ, se akɛnɛ nyɛ kua munyu ɔ nɛ nyɛ bui nyɛ he kaa nyɛ sa neneene wami ɔ he je ɔ, oʼɛ, wa dɔ wa yi kɛ yaa majeli ɔmɛ a ngɔ. 47Ejakaa jã Nyɔmtsɛ ɔ wo wɔ kita ke:

‘I ngɔ mo ngɔ to kaa majeli ɔmɛ a la,

Konɛ o plɛ yi wami hemi kɛ ya su zugba a nyagbe he ɔmɛ.”

48Benɛ majeli ɔmɛ nu e nɛ ɔ ɔ, a na bua jɔmi, nɛ a wo Nyɔmtsɛ ɔ hɛ mi nyami, nɛ nihi abɔ nɛ a je ngɔ to neneene wami ɔ he ye.

49Nɛ Nyɔmtsɛ ɔ munyu ɔ gbɛ fia ngɛ lejɛ ɔ ni ɔmɛ a mi tsuo. 50Se Yudafo ɔmɛ wo yihi Mawu gbeye yeli nɛ a buu mɛ ɔ kɛ ma a mi nihi nɛ hɛ mi ka si ɔmɛ a yi mi, nɛ a ha yi mi wami te si ngɔ wo Paulo kɛ Barnaba, nɛ a fie mɛ kɛ je a kpo ɔmɛ a mi. 51Se mɛɛ lɛɛ a blɛ a nane he bunyuku ngɔ pue a nɔ, nɛ a pue nɔ kɛ ho Ikoniom ya. 52Nɛ kaseli ɔmɛ hyi tɔtɔɔtɔ kɛ bua jɔmi kɛ Mumi Klɔuklɔu.

Currently Selected:

Bɔfo 13: DAN77

Highlight

Copy