Bɔfo 12
12
A wa asafo ɔ yi mi babauu
1Jamɛ a be ɔ mi nɔuu ɔ, matsɛ Herode wo e nine nɔ, konɛ e pee asafo ɔ mi bi ɔmɛ a ti ni komɛ yayami. 2E kɛ klaate gbe Yohane nyɛmi Yakobo. 3Nɛ benɛ e na kaa e ngɔ Yudafo ɔmɛ a nya a, e ya nɔ nɛ e nu Petro hulɔ. Se akpiti ligbi ɔmɛ a mi ʼi. 4Nɛ benɛ e nu lɛ ɔ, e wo lɛ tsu mi, nɛ e tu lɛ ngɔ wo aslaafohi eywiɛeywiɛ kuhi eywiɛ dɛ mi nɛ a bu e he. E susu kaa Hetsɔmi ɔ se ɔ e kɛ lɛ maa ba ma a hɛ mi. 5Lɔ ɔ he ɔ a tsi Petro nya ngɛ tsu ɔ mi mohu, se asafo ɔ hɛɛ sɔlemi mi kɛ ha lɛ wawɛɛ ngɛ Mawu hɛ mi.
A je Petro ngɛ tsu mi
6Se benɛ Herode ke e kɛ lɛ maa ba ma a hɛ mi ɔ, jamɛ a nyɔ ɔ mi ɔ, Petro hwɔɔ si ngɛ aslaafohi enyɔ a kpɛti, nɛ a wo lɛ kɔsɔkɔsɔhi enyɔ, nɛ buli hu daa si ngɛ sinya a nya ngɛ tsu ɔ he bue. 7Nɛ oʼɛ, Nyɔmtsɛ ɔ bɔfo ko ba da e kasa nya, nɛ la kpɛ ngɛ tsu ɔ mi. Bɔfo ɔ gba Petro kasa ma nɛ e tsɛ̃ɛ lɛ ke: “Tee si esɔesɔ!” Nɛ e kɔsɔkɔsɔ ɔmɛ kplɔ ngɛ e nine. 8Kɛkɛ nɛ bɔfo ɔ de lɛ ke: “Mia nɛ o fi o tokota amɛ!” Nɛ Petro pee ja. Nɛ e de lɛ ke: “Haa o bo ɔ nɛ o nyɛɛ ye se!” 9Nɛ Petro nyɛɛ e se kɛ je kpo, se e li kaa nɔ́ nɛ bɔfo ɔ ngɛ pee ɔ ngɛ mi, se e pee lɛ kaa e ngɛ ni nae. 10Se benɛ a be kekle buli ɔmɛ kɛ nihi nɛ ji enyɔ ɔmɛ a he ɔ, a su dade agbo nɛ ngɛ kɛ yaa ma a mi ɔ he nɛ lɛ nitse e bli ha mɛ, nɛ a je kpo kɛ po gbɛjegbɛ kake mi, kɛkɛ nɛ bɔfo ɔ si lɛ.
11Benɛ Petro hɛ mi tsɔ lɛ ɔ, e ke: “Kpaako i na le tutuutu kaa Nyɔmtsɛ ɔ tsɔ e bɔfo kɛ ba nɛ e ba je mi ngɛ Herode dɛ mi kɛ nɔ́ nɛ Yudafo ɔmɛ a ma a ngɛ blɔ hyɛe ɔ kulaa mi.”
12Nɛ benɛ e yo enɛ ɔ ɔ, e ba Yohane nɛ a tsɛɛ lɛ Marko hulɔ ɔ nyɛ Maria we ɔ mi, he nɛ nihi fuu ba bua a he nya ngɛ nɛ a ngɛ sɔlee ɔ. 13Se benɛ Petro si agbo ɔ, yiheyo ko nɛ a tsɛɛ lɛ Rode ɔ ba tue bumi. 14Benɛ e yo Petro gbi ɔ, bua jɔmi sɔuu nya a, e bli we agbo ɔ, se mohu e tu fo kɛ ho ya de ke Petro daa si ngɛ agbo ɔ se. 15Se a de lɛ ke: “O nu godo.” Se e ma nɔ mi ke e ngɛ mi ja. Kɛkɛ nɛ a ke: “Lɛɛ e dbɔfo ʼi.” 16Se Petro ngɛ nɔ ngɛ sie, nɛ benɛ a bli ɔ, a na lɛ, nɛ a nya kpɛ a he. 17Se e wo mɛ nine ke a pee kɔ, nɛ e bɔ mɛ bɔ nɛ pee nɛ Nyɔmtsɛ ɔ je lɛ ngɛ tsu ɔ mi ɔ; nɛ e ke: “Nyɛɛ ya nɛ nyɛ ya sɛɛ kikɛmɛ a ni nɛ ɔmɛ ngɔ ha Yakobo kɛ nyɛmimɛ ɔmɛ.” Nɛ e je lejɛ ɔ kɛ ho he kpa ya.
18Benɛ je na a, pi haomi bi nɛ ba aslaafo ɔmɛ a kpɛti akɛnɛ a li nɔ́ nɛ ba Petro nɔ ɔ. 19Se benɛ Herode hla lɛ nɛ e nɛ́ lɛ ɔ, e kojo buli ɔmɛ nɛ e fa ke a gbe mɛ. Nɛ Herode si Yudea kɛ ho Kaisarea ya nɛ e ya hi lejɛ ɔ.
Herode gbenɔ
20Jeha nɛ ɔ Herode muklii mi fu Tirobi ɔmɛ kɛ Zidonbi ɔmɛ wawɛɛ; nɛ a kɛ juɛmi kake ba e ngɔ. A ba hla matsɛ ɔ sɔmɔlɔ Blasto ɔ he blɔ nɛ a ba kpa pɛɛ, ejakaa matsɛ ɔ zugba nɔ ni a yeɔ.
21Se ligbi nɛ a to ko nɔ ɔ, Herode wo e matsɛ tade ɔ, nɛ e ya hi kojomi sɛ ɔ nɔ, nɛ e kɛ mɛ tu munyu. 22Nɛ ni ɔmɛ kpa ngmlaa ke: “Mawu gbi ji nɛ ɔ nɛ, se tsa pi nɔmlɔ gbi ʼi.” 23Nɛ amlɔ ɔ nɔuu ɔ, Nyɔmtsɛ ɔ bɔfo fia lɛ nɔ, ejakaa e kɛ nyami ɔ ha we Mawu, nɛ e wo gɔgɔ, nɛ e gbo.
24Se Mawu munyu ɔ keke nɛ e gbɛ fia.
25Benɛ Barnaba kɛ Saulo gbe a sɔmɔmi ɔ nya a, a kpale a se kɛ je Yerusalem, nɛ a ngɔ Yohane, nɔ nɛ a tsɛɛ lɛ Marko hulɔ ɔ ngɔ piɛ a he.
Currently Selected:
Bɔfo 12: DAN77
Highlight
Share
Copy
Want to have your highlights saved across all your devices? Sign up or sign in
Dangme New Testament © United Bible Societies, 1977.
