Bɔfo 11

Petro amaniɛ nɛ e bɔ Yerusalem asafo ɔ

1Bɔfo ɔmɛ kɛ nyɛmimɛ nɛ ngɛ Yudea a tsuo nu kaa majeli a bimɛ ɔmɛ hu pɛtɛ Mawu munyu ɔ he. 2Nɛ benɛ Petro ba Yerusalem ɔ, nihi nɛ je ninɛmɛ nɛ a po mɛ ɔmɛ a kpɛti ɔ kɛ lɛ na, 3a ke: “O ya mɔmlɔtɔtsɛmɛ a ngɔ nɛ o kɛ mɛ ya ye ni.” 4Se Petro je sisi nɛ e bɔ mɛ amaniɛ ɔ tsuo ke:

5“I ngɛ Yopa ma a mi i ngɛ sɔlee, nɛ e pee kaa nɔ́ nɛ nɔ nɔ ye nɔ, nɛ i na ninami ko kaa nɔ́ ko je hiɔwe kaa bo ngua ko nɛ a hɛɛ e kɔ nya eywiɛ ɔ mi, nɛ a ngɛ siue kɛ ma zugba, nɛ e ba ye ngɔ tataata. 6Se benɛ i hyɛ mi too ɔ, i na zugba lohwe nane eywiɛtsɛmɛ kɛ nga mi lohwehi kɛ waami nihi kɛ hiɔwe lohwe pɛlitsɛmɛ ngɛ mi. 7Nɛ i nu gbi ko hu nɛ de mi ke: ‘Petro, tee si, gbee nɛ o ye!’ 8Se i de ke: ‘Dɛbi, Nyɔmtsɛ, ejakaa i yi yakayaka nɔ́ ko loo nɔ́ ko nɛ he tsɔ we hyɛ.’ 9Se gbi nɛ je hiɔwe ɔ he nɔ nɔ́ nɛ ji si enyɔ ke: ‘Nɔ́ nɛ Mawu tsukɔ he ɔ, mo ko bu lɛ yakayaka nɔ́ ko.’ 10A pee jã si etɛ, nɛ a sa kulaa kɛ ho hiɔwe ya ekohu, 11Jamɛ a be ɔ mi nɔuu ɔ nyumuhi etɛ ba da we he nɛ i ngɛ ɔ agbo ɔ nya; a tsɔ mɛ kɛ je Kaisarea kɛ ba ye ngɔ. 12Nɛ mumi ɔ de mi ke i kɛ mɛ nɛ ya nɛ ma ko to tslee. Nyɛmimɛ ekpa nɛ ɔmɛ hu kɛ mi ya; nɛ wa ya sɛ nyumu ɔ we ɔ mi. 13Nɛ e sɛɛ wɔ bɔ nɛ e na bɔfo ɔ ngɛ e we ɔ mi nɛ e daa si nɛ e de lɛ ke: ‘Tsɔ nihi kɛ ya Yopa nɛ o ya kpee Simon nɛ a tsɛɛ lɛ Petro hulɔ ɔ kɛ ba, 14lɛ e ma de mo munyuhi nɛ a maa gu nɔ kɛ he mo kɛ o we ɔ kulaa yi wami.’ 15Se benɛ i bɔni munyu ɔ tumi ɔ, Mumi Klɔuklɔu ɔ ba ma a nɔ, kaa bɔ nɛ e ba ma wɔ hu wa nɔ kekle ɔ. 16Nɛ i kai Nyɔmtsɛ ɔ munyu ɔ nɛ e tu ke: ‘Yohane ɔ, e kɛ nyu baptisi, se nyɛɛ lɛɛ a maa baptisi nyɛ kɛ Mumi Klɔuklɔu’ ɔ. 17Jeha nɛ ɔ ke Mawu ha mɛ jamɛ a nɔke nɔ́ ɔ nɔuu nɛ e ha wɔ nɛ wa heɔ Nyɔmtsɛ Yesu nɔ yeɔ hulɔ ɔ, imi lɛɛ, mɛnɔ ji mi nɛ ma nyɛ Mawu nya ma tsi?” 18Se benɛ a nu munyu nɛ ɔmɛ ɔ, a ma a nya, nɛ a wo Mawu hɛ mi nyami de ke: ‘Lɛɛ majeli ɔmɛ hu Mawu ha mɛ tsui tsakemi nɛ a kɛ he a yi wami!’

Antiokia asafo ɔ

19Jeha nɛ ɔ nihi nɛ gbɛ fia ngɛ Stefano amanenlu ɔ mi ɔ po mi kɛ ya Foinike kɛ Kipro kɛ Antiokia lokoo, se a fiɛ we munyu ɔ ngɔ tsɔɔ we nɔ ko nɔ ko kaa ja Yudafo ɔmɛ kɛkɛ. 20Se a ti ni komɛ ɔ, Kiprobihi kɛ Kireenebihi ji mɛ, nɛ ni nɛ ɔmɛ ba Antiokia ba tu munyu tsɔɔ Helabi ɔmɛ hulɔ, nɛ a fiɛ Nyɔmtsɛ Yesu he sane kpakpa a ngɔ tsɔɔ mɛ. 21Nɛ Nyɔmtsɛ ɔ piɛ a he, nɛ nihi babauu he ye, nɛ a tsake kɛ ba Nyɔmtsɛ ɔ ngɔ.

22Nɛ a he sane nɛ ɔ ba su Yerusalem asafo ɔ tue mi, nɛ a tsɔ Barnaba Antiokia. 23Nɛ benɛ e su lejɛ ɔ nɛ e ba na Mawu dloomi ɔ, e bua jɔ e he, nɛ e tu munyu tsɔɔ mɛ tsuo ke a kɛ tsui nɛ fi si nɛ pɛtɛ Nyɔmtsɛ ɔ he. 24Nɔmlɔ kpakpa ji lɛ nɛ e hyi tɔ kɛ Mumi Klɔuklɔu kɛ hemi kɛ yemi. Nɛ a ngɔ nihi babauu kɛ ba Nyɔmtsɛ ɔ ngɔ.

25Nɛ Barnaba pue nɔ kɛ ho Tarso ya ya hla Saulo, nɛ benɛ e na lɛ ɔ, e kɛ lɛ ba Antiokia ekohu. 26Nɛ e ba mi kaa a kɛ asafo ɔ hi si jeha mluku, nɛ a tsɔɔ nihi babauu ni, nɛ Antiokia ji he nɛ a wo kaseli ɔmɛ biɛ kekleekle ngɛ ke Kristofohi.

27Se kikɛmɛ a be nɛ ɔmɛ a mi ɔ, gbali komɛ je Yerusalem kɛ ba Antiokia. 28Nɛ a kpɛti nɔ ko nɛ a tsɛɛ lɛ Agabo ɔ te si, nɛ e tsɔɔ ngɛ Mumi ɔ nya kaa hwɔ kpetekpleenyɛ maa ba je mi tsuo kulaa, nɛ e ba mi ja ngɛ Kaisare Klaudio yi nɔ. 29Kaseli ɔmɛ kpɛ mi kaa a ma tsu nɔ́ ko ngɔ mane nyɛmimɛ nɛ ngɛ Yudea a nɛ a kɛ ya pɛne mɛ, nɔ tsuaa nɔ bɔ nɛ o ma nyɛ. 30Nɛ a pee ja, nɛ a ngɔ mane nikɔtɔma amɛ kɛ gu Barnaba kɛ Saulo nɔ.

Currently Selected:

Bɔfo 11: DAN77

Highlight

Copy