1 Korintobi 10
10
Amagahi a he kɔkɔbɔmi
1Se, mamimɛ, i suɔ kaa nyɛ kai kaa wa tsɛmɛ ɔmɛ tsuo hi bɔ ku ɔ sisi, nɛ mɛ tsuo a po wo ɔ, 2nɛ a baptisi mɛ kulaa ngɔ wo Mose mi ngɛ bɔ ku ɔ kɛ wo ɔ mi, 3nɛ mɛ kulaa a, mumi mi niyeni kake ɔ nɔuu a ye, 4nɛ mɛ kulaa a nu mumi mi tɛ sa nɛ kɛ mɛ nyɛɛ ɔ mi nyu, nɛ tɛ sa a ji Kristo? 5Se kɛ̃ ɔ Mawu na we a ti nihi fuu a he tsui, ejakaa a kpata a hɛ mi ngɛ nga a nɔ.
6Se a kɛ enɛ ɔmɛ to wɔ okadi konɛ wa ko ha ni yayahi nɛ pee wɔ akɔnɔ kaa bɔ nɛ e pee mɛ ɔ. 7Jehanɛ hu nyɛ ko plɛ amaga jali kaa a ti ni komɛ pee ɔ, kaa bɔ nɛ a ngma a ke: “Ma a be hi si, nɛ a ye ni, nɛ a nu da, kɛkɛ nɛ a te si nɛ a bɔni fiɛmi.” 8Nɛ jehanɛ hu wa ko bɔ ajuama kaa bɔ nɛ a ti ni komɛ bɔ nɛ ligbi kake nɔ ɔ nihi akpe nyingmi enyɔ kɛ etɛ yi tã a. 9Nɛ jehanɛ hu wa ko ka Nyɔmtsɛ ɔ kaa bɔ nɛ a ti ni komɛ ka lɛ nɛ sinɔhi ba kpata a hɛ mi ɔ. 10Nɛ jehanɛ hu nyɛ ko tu munyu huitihuiti kaa bɔ nɛ a ti ni komɛ tu munyu huitihuiti nɛ nɔ́ puɛlɔ ɔ ba kpata a hɛ mi ɔ.
11A pee mɛ enɛ ɔmɛ kulaa nɛ a kɛ to okadi ha ni kpahi; nɛ a ngma kaa kɔkɔ bɔmi nɔ́ kɛ ha wɔ, wɔ nihi nɛ je ɔ nyagbe ligbi ɔmɛ na wɔ ɔ; 12benɛ pee nɛ nɔ nɛ susuu kaa e daa si ɔ, e hyɛ e he nɛ hi konɛ e ko nɔ si. 13Ka ko bɛ nyɛ nɔ nɛ pi nɔmlɔ he nɔ́; se anɔkualetsɛ ji Mawu, nɔ nɛ be hae nɛ a ka nyɛ pe bɔ nɛ nyɛ ma nyɛ, se mohu e kɛ ka a nɔuu maa je blɔ ha nyɛ nɛ nyɛɛ je mi hulɔ, konɛ nyɛ nyɛ nya nɛ nyɛɛ da.
14Lɔ ɔ he ɔ, mamimɛ, nyɛɛ tu wɔ jami nya fo! 15I kɛ nyɛ ngɛ munyu tue kaa a kɛ ni leli tuɔ munyu; nyɛ nitsɛmɛ nyɛ kɔ nɔ nɛ i ngɛ dee ɔ se. 16Gbaami kplu ɔ nɛ wa gbaa a, anɛ pi waa kɛ Kristo kake peemi ngɛ e muɔ ɔ mi lo? Abolo nɛ wa kuɔ ɔ, anɛ pi waa kɛ Kristo kake peemi ngɛ e nɔmlɔ tso ɔ mi lo? 17Ejakaa abolo kake ʼi, nɛ wɔ fuu ɔ, nɔmlɔ tso kake ji wɔ, ejakaa wɔ kulaa wa yeɔ abolo kake ɔ eko.
18Nyɛɛ hyɛ he lo blɔfami Israel ɔ; anɛ nihi nɛ yeɔ bɔ sami ni ɔmɛ ɔ pi huɛ nɛ a kɛ bɔ sami latɛ ɔ ngɛ bɔe ɔ lo? 19Lɛɛ kɛ i ngɛ tsɔɔe kɛɛ ɔ? Kaa amaga ji nɔ ko, aloo kaa amaga bɔ ji nɔ ko? 20Dɛbi, se mohu i ngɛ dee ke bɔ nɛ wɔ jali ɔmɛ saa a, mumi yayamihi a saa ngɔ haa se pi Mawu; se i sume kaa nyɛɛ kɛ mumi yayamihi bɔɔ huɛ. 21Nyɛ be Nyɔmtsɛ ɔ kplu ɔ kɛ mumi yayamihi a kplu ɔ nyɛe maa nu si kake. Nyɛ be Nyɔmtsɛ ɔ okplɔɔ ɔ nɔ ni kɛ mumi yayamihi a nɔ ɔ nɔ ni nyɛe maa ye si kake. 22Aloo Nyɔmtsɛ ɔ mi mi la wa ngɛ woe? Anɛ wa he wa pe lɛ lo?
23“Wa ngɛ nihi tsuo he blɔ,” se pi nihi tsuo nɛ hi. “Wa ngɛ nihi tsuo he blɔ,” se pi nihi tsuo nɛ haa nɔ nane nuu si. 24Nɔ ko nɔ ko nɛ ko plee ngɔ ha lɛ nitsɛ e he, se mohu nɔ tsuaa nɔ nɛ plee ngɔ ha e nyɛmi.
25Nɔ́ tsuaa nɔ́ nɛ a ngɛ juae ngɛ lo jua nɔ ɔ, nyɛɛ ye; se he ni lemi he ɔ, nyɛ ko bi mi; 26ejakaa “zugba a kɛ e mi ni ɔmɛ kulaa a, Nyɔmtsɛ ɔ nɔ ʼi.”
27Ke nihi nɛ he we yi ɔmɛ a ti nɔ ko kpee nyɛ ni yemi nɛ nyɛ suɔ kaa nyɛ maa ya a, nɔ́ tsuaa nɔ́ nɛ a kɛ maa ma nyɛ hɛ mi ɔ, nyɛɛ ye nɛ nyɛ ko bi mi, ngɛ he ni lemi he. 28Se ke nɔ ko de nyɛ ke: “Enɛ ɔ lɛɛ amaga bɔ sami nihi ʼi” ɔ, nyɛ ko ye ngɛ nɔ nɛ wo nyɛ tue nɔ ɔ kɛ he ni lemi he je. 29Se he ni lemi nɛ i ngɛ dee nɛ ɔ ɔ, pi mo nitsɛ o nɔ ɔ, se mohu nɔ kpa nɔ ɔ. Se mɛ he je nɔ kpa he ni lemi maa kojo ye he yemi ɔ? 30Ke sina i kɛ ye ɔ, mɛ he je a tuɔ ye he munyu yaya ngɛ nihi nɛ i na si ngɛ he ɔmɛ a he?
31Lɔ ɔ he ɔ, ke ni nyɛ ngɛ yee jio, ni nyɛ ngɛ nue jio, aloo nɔ kpa ko nɛ nyɛ ngɛ pee jio, nyɛɛ pee kulaa kɛ wo Mawu hɛ mi nyami. 32Nyɛ ko pee kpangmi ngɔ ha Yudafohi kɛ Helabihi kɛ Mawu asafo ɔ kulaa; 33kaa bɔ nɛ imi hu i suɔ kaa nihi kulaa mi ɔ ma sa nihi kulaa a hɛ mi, nɛ i hla we nɔ́ nɛ hi ha imi nitsɛ ye he, se mohu nɔ́ nɛ hi ha nihi fuu, konɛ a he a yiwami.
Currently Selected:
1 Korintobi 10: DAN77
Highlight
Copy
Compare
Share
Want to have your highlights saved across all your devices? Sign up or sign in
Dangme New Testament © United Bible Societies, 1977.
