1 Korintobi 9
9
Bɔfo blɔ nya kɛ e nitsumi
1Anɛ i hɛɛ we ye he lo? Anɛ pi bɔfo ji mi lo? Anɛ i nɛ Yesu Kristo, wa Nyɔmtsɛ ɔ lo? Pi ye nine nya ni tsumi ji nyɛ ngɛ Nyɔmtsɛ ɔ mi lo? 2Ke pi bɔfo ji mi kɛ ha ni kpahi ɔ, nyɛɛ lɛɛ i ji kɛ ha nyɛ; ejakaa ye bɔfo ni tsumi ɔ nya sɔumi nɔ ji nyɛ ngɛ Nyɔmtsɛ ɔ mi.
3Enɛ ɔ ji nɔ́ nɛ i kɛ faa ye he ngɛ nihi nɛ biɔ ye he sane ɔmɛ a hɛ mi. 4Anɛ wa be he blɔ kaa wa yeɔ ni nɛ wa nuu lo? 5Anɛ wa be he blɔ kaa waa kɛ nyɛmi yo nɛ ji wa yo nvɛɛ kaa bɔfo kpa amɛ hu kɛ Nyɔmtsɛ ɔ nyɛmimɛ ɔmɛ kɛ Kefa? 6Aloo i kɛ Barnaba kɛkɛ lɛ be he blɔ kaa wa jɔɔ ni tsumi lo? 7Aslaafono te nɛɛ nɛ bɔ lɛ nitsɛ e he apaa kɛ ya ta hyɛ? Mɛnɔ lɛ peɔ wai ngmɔ nɛ e yi e mi yiblii ɔ eko? Aloo mɛnɔ lɛ lɛɛ lohwehi a kuu nɛ e nui a nyɔ nyu ɔ eko?
8Nɔ nɛ i ngɛ dee nɛ ɔ, anɛ nimli kɛkɛ lɛ peɔ ja? Anɛ mlaa hu de we ja nɔuu lo? 9Ejakaa a ngma ngɛ Mose Mlaa a mi ke: “Koo wo na nɛ gblɛɛ blɛfo ɔ nya kotoku.” Anɛ nahi a he nɛ dɔɔ Mawu he je 10nɛ pi wa he munyu nɛ e ngɛ tue nɛ ɔ lo? Ejakaa wa he nɔuu nɛ a ngma ke, nɔ nɛ huɔ ɔ, e kɛ hɛ kɛ nɔ fɔmi nɛ hu, nɛ nɔ nɛ hluɛɛ blɛfo hu e hɛ nɛ hi nɔ kaa e maa ye eko. 11Ke wɔɔ lɛɛ wa duɔ mumi mi nihi haa nyɛ ɔ, anɛ e ji nɔ ko tsɔ kaa wa ma kpa he lo mi nihi lo? 12Jehanɛ hu ke ni kpahi ngɛ kikɛmɛ a he blɔ ngɛ nyɛ nɔ ɔ, anɛ pi wɔ mohu nɛ wa ngɛ pe mɛ po lo? Se kɛ ɔ, wa pee we kikɛmɛ a he blɔ nɛ ɔ he nɔ ko, se mohu wa to wa tsui si ngɛ nɔ tsuaa nɔ mi, konɛ wa ko tsi Kristo Sane Kpakpa a blɔ? 13Anɛ nyɛ li kaa nihi nɛ tsuɔ ni ngɛ sɔlemi we ɔ, sɔlemi we ni ɔmɛ eko nɔuu a yeɔ lo? Nɛ ninɛmɛ nɛ sɔmɔɔ ngɛ bɔ sami latɛ ɔ he ɔ, bɔ sami latɛ ɔ nɔ ni ɔmɛ eko nɔuu a naa lo? 14Jã nɔuu kɛ Nyɔmtsɛ ɔ to kaa ninɛmɛ nɛ jajeɔ Sane Kpakpa a, a ye sane kpakpa a he ni.
15Se imi lɛɛ, i pee we kikɛmɛ a ni nɛ ɔmɛ kake po he nɔ ko. Nɛ i ngmɛ́ enɛ ɔ konɛ a pee ja ngɔ ha mi, ejakaa ke ka nɔ́ nɛ nɔ ko ma ha ye fiami ɔ nɛ pee yaka a, afani nɛ i gbo mohu. 16Ejakaa ke i jaje sane kpakpa a po hu ɔ, e pee we mi fiami; ejakaa a ngɔ fi ye nɔ kaa ma jaje, ejakaa ke i jaje we sane kpakpa a, kusiɛ ha mi! 17Ejakaa ke imi nitsɛ ye suɔmi nya nɛ i tsu enɛ ɔ ɔ, i ngɛ hiɔwo, se ke pi suɔmi nya tete ɔ, a tu sɔmɔlɔ nɔkɔtɔma yemi ni tsumi ngɔ wo ye dɛ kɛ̃. 18Jehanɛ mɛni ji ye hiɔwo mɔ? Lɔ ɔ ji kaa ke i ngɛ sane kpakpa a jajee ɔ, ma jaje lɛ yaka, nɛ i he we nɔ ko ngɛ Kristo Sane Kpakpa a he, benɛ pee nɛ ma ko pee ye he blɔ nɛ i ngɛ ngɛ Sane Kpakpa a fiɛmi mi ɔ he nɔ ko tsɔ ko.
19Pohu i hɛɛ ye he nɛ i pi nɔ ko nɔ ko nyɔguɛ, kɛ̃ ɔ, i kɛ ye he pee nihi tsuo a sɔmɔlɔ, benɛ pee nɛ ye nine nɛ su nihi babauu a nɔ. 20I plɛ Yudafono ha Yudafo ɔmɛ benɛ pee nɛ ye nine nɛ su Yudafohi a nɔ. Ninɛmɛ nɛ ngɛ mlaa sisi hulɔ ɔ, i pee kaa nɔ ko nɛ ngɛ mlaa sisi ngɔ ha mɛ, pohu imi nitsɛ ɔ, i be mlaa sisi, benɛ pee nɛ ye nine nɛ su ninɛmɛ nɛ ngɛ mlaa sisi ɔmɛ a nɔ. 21I plɛ kaa nɔ ko nɛ be mlaa ngɔ ha ninɛmɛ nɛ be mlaa a, pohu i pi nɔ ko nɛ be Mawu mlaa; se mohu i ngɛ Kristo mlaa sisi, benɛ pee nɛ ye nine nɛ su ninɛmɛ nɛ be mlaa amɛ a nɔ. 22I plɛ kaa nɔ nɛ gbɔjɔ ha gbɔjɔli ɔmɛ benɛ pee nɛ ye nine nɛ su gbɔjɔli ɔmɛ a nɔ. I plɛ ye he nɔ́ tsuaa nɔ́ ngɔ ha nihi kulaa konɛ bɔ tsuaa bɔ nɛ pee ɔ ma kɛ he ni komɛ a yi wami.
23Sane Kpakpa a he nɛ i peɔ enɛ ɔmɛ kulaa ngɛ, benɛ pee nɛ imi hu ma na e mi ni ɔmɛ eko. 24Anɛ nyɛ li kaa ninɛmɛ nɛ tuu fo ɔ, mɛ kulaa a tuu mohu se nɔ kake kɛkɛ nɛ naa ayekoo ni ɔ lo? Nyɛɛ tu fo ɔ ja konɛ nyɛ nine nɛ su nɔ. 25Nɔ tsuaa nɔ hu nɛ kaa e he mi kɛ kunɔ ɔ, e hɛ kaa si ngɛ nihi kulaa mi. Jehanɛ mɛɛ lɛɛ a peɔ ja konɛ a na jlasi nɛ puɛɔ, se wɔɔ lɛɛ konɛ wa na nɔ nɛ puɛ we. 26Lɔ ɔ he ɔ, fo nɛ i ngɛ tue nɛ ɔ, i tui lɛ putuputu; kunɔ nɛ i ngɛ nɔe nɛ ɔ, pi kɔɔhiɔ nɛ i kɛ ngɛ nɔe; 27se mohu i gbaa imi nitsɛ ye nɔmlɔ tso ɔ mahi nɛ i yeɔ lɛ nyɔguɛ, konɛ imi nɛ i fiɛɛ ngɔ tsɔɔ ni kpahi ɔ, imi nitsɛ lɛɛ a ko sake mi ngɔ fɔ he.
Currently Selected:
1 Korintobi 9: DAN77
Highlight
Copy
Compare
Share
Want to have your highlights saved across all your devices? Sign up or sign in
Dangme New Testament © United Bible Societies, 1977.
