San Lucas 6:27-49

‘Peẽ che rendúvape katu ha'e: Pehayhúke umi ija'e'ỹvape pende rehe, pejapo porã umi pende rayhu'ỹva rehe, pehovasa umi pende rehe oñe'ẽ vaívape, peñembo'e umi pende ja'óva rehe. Ha oime ramo ne nupãva nde rova yke peteĩme, eme'ẽ avei ichupe pe nde rova yke ambue; ha oime ramo pe nde ao arigua oipe'áva nde hegui, eheja togueraha avei ne camisa. Oimeraẽva ojerurévape ndéve eme'ẽ; ha pe ne mba'éva oipe'a reívape nde hegui ani rejerureve ome'ẽ jevy haguã ndéve. Peipota háicha opavave ojapo pende rehe, upéicha avei pejapo peẽ opavave rehe. ‘Peẽ pehayhu ramo umi pende rayhúvapente, ¿piko mba'e oime iporãva pejapóva? Umi tekove vai niko ojapónte avei upéicha. Terã pejapo porã ramo umi ojapo porãvapente pende rehe, ¿piko mba'e oime iporãva pejapóva? Umi tekove vai niko ojapónte avei upéicha. Ha peiporuka ramo umi peha'arõvaguipe oiporuka jevýne haguã peẽme, ¿piko mba'e oime iporãva pejapóva? Umi tekove vai niko oiporukánte avei hapicha vai kuérape ha oha'arõ upéicha oñembyekovia jevy ichupe kuéra. Peẽ katu pehayhu vaerã umi pende rehe ija'e'ỹvape, ha pejapo vaerã iporãva, ha peiporuka peha'arõ'ỹ rehe ichugui kuéra mba'eve. Ha hetavépe hekovia vaerã peẽme, ha pejerereko vaerã Tupã Yvatetegua ra'y ramo; ha'e niko ipy'aporã umi ohechakuaa'ỹva ha iñañáva ndive. Pende py'aporiahuverekókena peẽ, pe pende Ru yvága pegua ipy'aporiahuvereko háicha avei. ‘Ani peporojuzga, ani haguã pejejuzga. Ani peporocondena, ani haguã peñecondena. Peporoperdona, peñeperdona haguã avei peẽ. Peme'ẽ, ha oñeme'ẽne peẽme, medida porã, ojejopypa porãva, oñembokachapa porãpyre, ha tenyhẽte chovi pende vosápe. Pe medida peẽ peiporúva pende rapicha rehe ojeporu jevy vaerã pende rehe. Jesús omoĩ avei ichupe kuéra ko ñembojoja: --¿Ikatu nga'u piko pe ohecha'ỹva oisambyhy pe hapicha ohecha'ỹvape avei? ¿Ndo'ái chénepa mokõive yvykuápe? Pe temimbo'e niko nda tuichavéi pe imbo'eháragui, pe hekoitépe oikuaapa porãva opaite mba'e niko pe imbo'eháraichante vaerã avei. ‘¿Mba'éicha piko ikatu rema'ẽ pe yvyra ku'i nde ryvy resápe oĩva rehe, ha nderehechái pe yvyra poguasu oĩva nde resápe? ¿Terã mba'éicha piko eréta nde ryvýpe: “Che ryvy, tanohẽna ndéve pe yvyra ku'i oĩva nde resápe”, nde voi rehecha'ỹ ramo pe yvyra poguasu oĩva nde resápe? ¡Tekove rova mokõi! enohẽ raẽ pe yvyra oĩva nde resápe, ha uperire katu rehecha porãne renohẽ haguã pe yvyra ku'i oĩva nde ryvy resápe. ‘Ndaipóri yvyra porã hi'a vaíva, terã yvyra vai hi'a porãva. Pe yvyra hi'a rehe ojekuaa mba'eichaguápa: ñuatĩ mátagui niko nañamono'õi higo, terã jukeri mátagui ndajaipo'ói parral. Pe kuimba'e imba'e porãva, umi mba'e porã ipy'a peguágui oguenohẽ iporãva; pe tekove vai katu umi mba'e vai ipy'a peguágui oguenohẽ ivaíva. Pe ñande py'a omohenyhẽvagui oñe'ẽ ñande juru. ‘¿Mba'érehe piko peje chéve, “Che Jára, che Jára”, ha ndapejapói che ha'éva peẽme? Ha'éta peẽme mávapepa ojogua pe oúva che rendápe, ohendúva che ñe'ẽ, ha ojapóva upe che ha'éva: ojogua peteĩ kuimba'e ojogapo va'ekuépe, ha upevarã ojo'o raẽ yvykua ha ombopypuku ojuhuha peve ita ha omoĩ hóga rendaguã ita ári. Uperire ou sapy'a peteĩ ysyry guasu imbaretéva ha ojejapipa pe óga rehe, ha opáichavo ndaikatúi omomýi hendágui oñemboguapy porãgui ita ári. Pe ohendu ha ojapo'ỹva pe che ha'éva katu ojogua pe kuimba'e ojogapo va'ekuépe yvy rei ári omoĩ'ỹ rehe hóga rendaguã, ha pe ysyry mbarete okakuaáma ramo ou ojejapipa hese ha upévo ojaparo pe óga ha oiko ichugui tapere tuicháva.