ROMANOS 6
6
Mólmexmo ektémakxa mólya'asáxma, wánxa ampasmekxak ma'a Cristo
1¿Háxko sat antehek kaxwo' nempeywa? ¿Anlenxanmohoya sat nenlané mólya'asáxma, yakwayam enxoho kayágwomhok Dios segásekhayo? 2¡Magwanchek antehek xa! Nelwateságkek axta negko'o nenlané mólya'asáxma; ¿háxko katnehek anlenxanmohok nenlané mólya'asáxma? 3¿Yagkólya'ásegkok kéxegke nétsapawo xamo' Cristo, cham'a nentamhákxo axta negyepetcheyo Cristo eñama yakpasama yegmen? 4Nelatawanyexchek axta negko'o xamo' Cristo eñama m'a yakpasama yegmen nak, neletsepmeyk axta anhan yakwayam enxoho hẽlnakxátekhásók negko'o, tén han antehek axnagkok nentémakxa, ekhawo ektémakxa axta kélxátekháseykmo Cristo eñama apmopwána m'a Apyap ekha nak apcheymákpoho.#Col 2.12.
5Negyepetchákxeyk axta negko'o Cristo nétsapawo xamo', cham'a ektahakxa axta apketsapma, sat nahan katnehek agyepetkohok ma'a, nenxátekhágwokmo sat xamo' Cristo. 6Negya'ásegkok negko'o kélyepetchesama xamo' Cristo aksok ektegyéso m'a nentémakxa axta, yakwayam enxoho kamassegwók ma'a nentémakxa axta mólya'asáxma, tén han kamaskok sẽlma m'a ektémakxa nak mólya'asáxma.#Gá 2.20. 7Apketsekkek agkok enxama, kamaskok ekma mólya'asáxma. 8Nétsapawok agkok xamo' Cristo, magya'ásemek negko'o peya agmok ekyennakte egnenyek xamo' Cristo. 9Negya'ásegkok negko'o peya megyetsepek cha'a Cristo, hakte apxátekhágwokmek axta. Yawanchek kaxwo' kayeykhágwomhok nétsapma m'a Cristo. 10Xama apketsapma axta Cristo eñama mólya'asáxma, wánxa m'a, cham'a apketsapa axta. Aphaxnagkok kaxwo' aptemegwokmok yakwayam enxoho exek xamo' Dios. 11Ekhawo nak han kéxegkáxa, kaxén kélwáxok kéltemesásamáxkoho kélagko' máxa kélhapák neyseksa megkólenmexmo m'a mólya'asáxma nak, kaxének nahan kélwáxok kéltaha kélhaxnagcha'ak nápakto' ma'a Dios, eñama kélyepetcheyo m'a Cristo Jesús.
12Nágkólho aksa keytek kélyókxa étsapmo m'a mólya'asáxma ekmowána nak, cham'a ekyáteyeykegkohol'a cha'a yakwayam kólyahakxohok aksok ekmáheyo nak cha'a kalának kélyókxa. 13Nágkólmés kélyókxa mólya'asáxma, yakwayam enxoho kóltemésesek elané aksok ekmaso, akke tásek kólmések kélyókxa m'a Dios, kélhawók kéxegke m'a énxet'ák apkeletsapma axta, kélhawók nahan ma'a ektémakxa nak apnakxétekhágwayam, kólmés kélyókxa m'a Dios yakwayam enxoho kóltemésesek elané aksok ektakmela kélyókxa. 14Keñe sat mekeytek ekmowána mólya'asáxma kélnepyeseksa kéxegke kéltaha enxoho xa, massegkek kéxegke kélyateyeykegkoho kólsawhohok kélyaheykekxoho m'a eltémókxa nak antehek segánamakxa, wánxa m'a Dios segásekhayo nak.
Enxet apkelmomap kélyetcháseykekxoho
15¿Háxko sat antehek kaxwo'? ¿Anlánaya sat kaxwo' mólya'asáxma hakte megkañamak kaxwo' nelwagkásamáxche teyp eñama nentakmelcheso m'a eltémókxa nak antehek segánamakxa, wánxa eñama m'a Dios segásekhayo nak? ¡Magwanchek anlának cha'a mólya'asáxma! 16Kélya'ásegkok kéxegke ektakmela m'a kélmeyásexkoho enxoho kélagko' xama wese' yakwayam kólyahakxohok, keñe kóltehek kéxegke kélmomaxche apkelma xa wese' nak, yakwayam kólyahakxoho. Katnohok cha'a xa, cham'a kéltaha enxoho kéxegke kélyaheykekxoho mólya'asáxma eknaklamol'a cha'a nétsapmakxa, ekhawo nahan ektémakxa m'a kéltaha enxoho kélyaheykekxoho Dios, yakwayam enxoho kóltehek ekpéwomo kéltémakxa. 17Negmések negko'o ekpayheykekxa egwáxok Dios, kéxegke ñokxa kélyahákxoho ekmámnaksoho agko' ma'a ektahakxa axta kélxekmowásamáxche, kéxegke kéltaha axta elma mólya'asáxma nano' axta. 18Massék kaxwo' ektemésesa kéxegke kélmomaxche m'a mólya'asáxma nak, kéltemék kaxwo' kélyaheykekxoho m'a nentémakxa ekpéwomo nak. 19(Ektahak ko'o sekpeywa m'a aptémakxal'a cha'a appeywa énxet, hakte megkólwanchek kéxegke kólya'asagkohok xa aksok nak, hakte kélyelkáxkók kéxegke.) Kólmés kaxwo' kélyókxa yakwayam kalának ma'a nentémakxa ekpéwomo nak, yakwayam enxoho kóltehek ektakmela kéltémakxa nápakto' Dios, ekhawo ektémakxa axta cha'a kélméso kélyókxa aksok ekmanyása nano' axta, tén han ma'a aksok ekmaso nak, yakwayam enxoho kóllának aksok ekmaso.
20Axta kólláneyk kéxegke kéltémakxa ekpéwomo, cham'a elmomakxa axta makham mólya'asáxma; 21¿Pasmomcheya axta kéxegke xa aksok ekmésa nak kaxwo' kélmegkakto, wánxa aksa cha'a kanaklók énxet ma'a nétsapmakxa nak? 22Massék eyke kaxwo' elma kéxegke m'a mólya'asáxma, kéltemék kaxwo' kélyaheykekxoho Dios. Akke nakso' ekpasmoma kéxegke xa, hakte kótaksohok cha'a kéxegke ektakmela kéltémakxa xa, keñe natámen, kótaksek cha'a ekyennakte kélnenya'ák megkatnegwayam enéxa.#Pr 12.28. 23Nétsapma ekteme ekyanmaga m'a mólya'asáxma nak, wánxa agkok, ekyennakte egnenya'ák megkatnegwayam enéxa eñama negyepetcheyo Cristo Jesús Wese' egegkok akke m'a aksok segméso naksa nak Dios.
Currently Selected:
ROMANOS 6: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
