ROMANOS 5
5
Kélmaseso ektémakxa nelsexnánémaxche
1Ẽltemésesegkek negko'o nelpéwomo eñama magya'áseyam, nelásekháxchekxók nahan negko'o Dios, eñama m'a Wese' egegkok Jesucristo. 2Cristo keñamak negkegwagko negko'o agyo'ókxak kaxwo' Dios eñama m'a magya'áseyam nak, yakwayam enxoho kalkohok apwáxok negko'o Dios. Magyensakmok nahan negyennaktésamo nenteme magya'áseyam, awanhek nahan negko'o ekpayheykekxa egwáxok neyseksók nelhaxanma hegwatámhok negko'oxa m'a ektémakxa nak Dios apcheymákpoho. 3Háwe ekwánxa agkok sempeykesásekxo egwáxok xa, akke nahan empeykesáseykxak negko'o egwáxok ma'a nenlegeykegkoho nak; hakte negya'ásegkok negko'o xa nenlegeykegkoho nak segmésama yakwayam ólenmaxaxkohok yetlo nelwaskápeykekxoho, 4hegméshok nahan cha'a negko'o yakwayam kalkohok apwáxok Dios nentahakxa xa nelwaskápeykekxoho nak, kayágwomhok nahan cha'a nelhaxneykha m'a ekleyawo enxoho apwáxok Dios nentahakxa. 5Mehegmések nahan cha'a negko'o ekyakhapweykmoho egwáxok xa nelhaxneykha nak, hakte awanhek axta negko'o appekkenma egwáxok Dios segásekhayo eñama m'a Espíritu Santo segmésama axta.
6Xama axta magkegwagko negko'o ólwagkasaxchek teyp, apketsekkek axta Cristo ekyanmaga m'a énxet'ák elmasagcha'a nak apkeltémakxa, cham'a ekwokmo axta ekhem yakwánxa katnehek xa. 7Askehek yakwayam yohok emátog xama énxet ekyanmaga pók. Askehek nahan yakwayam yohok emátog xama énxet ekyanmaga m'a énxet meyke aptémakxa nak; agwetak kexaha xama énxet, apmáheyo yetsapok yakwayam etnehek ekyanmaga xama énxet ektakmela nak aptémakxa. 8Wánxa agkok, enxekmósek axta eyke negko'o Dios ektémakxa segásekhayo, cham'a nentémakxa axta makham negko'o mólya'asáxma, apketsekkek axta Cristo segyanmaga negko'o. 9Kaxwo' eyke ẽltemésesek negko'o nelpéwomo eñama m'a apketsapma axta Cristo, ékeso eñamakxa peya sat kayágwomhok nelmeyamáxche negko'o neyseksa ektemegwánxa néxa senlegasáseykegkoho, eñama m'a Cristo. 10Entemésesek axta negko'o nelásekhamaxchekxoho Dios eñama m'a apketsapma axta Apketche, cham'a nentémakxa axta makham nenmexeykha Dios, sat eyke ekyagwánxa agkok yakwayam ólwagkasaxchek teyp keso nelásekháxchekxoho nak kaxwo' Dios. 11Háwe ekwánxa agkok xa, payhekxeyk nahan negko'o egwáxok xamo' Dios eñama m'a Wese' egegkok Jesucristo, hakte Cristo axta keñamak nelásekháxchekxoho negko'o Dios.
Adán tén han Cristo
12Xama énxet axta keñamak ektaxnama mólya'asáxma keso náxop, apsókmók axta anhan nétsapma,#Gn 3.6-19. wákxók nahan apyókxoho énxet xa nétsapma nak, hakte apyókxoho énxet apkeláneykegkok melya'asáxma. 13Nano' axta ekteyapma mólya'asáxma keso náxop, cham'a megkatyapmakxa axta makham segánamakxa; megkólyetsetagkek eykhe cha'a nentémakxa mólya'asáxma, cham'a méko enxoho segánamakxa. 14Wánxa agkok, yetnegkek axta eyke nétsapma nepyeseksa m'a énxet'ák apkeláneyak axta melya'asáxma eyeynamókxa m'a aphamakxa axta Adán ekwokmoho m'a aphamakxa axta Moisés, háwe axta eykhe eñama melyaheykekxa segánamakxa apkeláneyak melya'asáxma xa énxet'ák nak, megkaxnawok ma'a aptémakxa axta Adán,#Gn 2.16-17; 3.11-12. cham'a Adán apyetchesamakpoho axta m'a apxénamakpo axta ewa'.
15Magwanchek eyke aghéshok aptémakxa ekmaso Adán ma'a aksok segméso naksa axta negko'o Dios. Xama énxet aksok ekmaso apkelané axta keñamak apxámokma cha'a apkeletsapma énxet; wánxa agkok, méko eyke kaxhok ma'a aksok segméso naksa axta Dios meyke ekyanmaga eñama m'a xama énxet apwesey nak Jesucristo, cham'a ekpasmoma nak han apxámokxoho énxet. 16Megkólwanchek kólhéshok aksok segméso naksa Dios ma'a apkelané axta mey'asáxma xama énxet, hakte xama énxet apkelané mey'asáxma axta keñamak ekwaya yakwayam hẽlyekpelcháseshok cha'a negko'o, wánxa agkok, katnéseshok eyke cha'a apkelpéwomo énxet'ák ma'a aksok segméso naksa nak Dios neyseksók axta eykhe ekyawe melya'asáxma énxet'ák. 17Yetnegkek axta nétsapma eñama m'a aksok ekmaso apkelané axta xama énxet, sat eyke ekyagwánxa agkok keytek axnagkok elyennakte apnenya'ák ma'a énxet'ák apxeyenma nak Dios aptaha apkelpéwomo eñama ekyawe apkelásekhayo, cham'a aptemésesama axta meyke ekyanmaga apmésama xa, eñama m'a xama énxet apwesey nak Jesucristo.
18Adán aksok ekmaso apkelané axta keñamak kéltéma cha'a kélyekpelchásesamo apyókxoho énxet, ekhawo nahan ma'a aksok ekpéwomo apkelané axta Cristo, temésesegkek cha'a apkelpéwomo apyókxoho énxet, yakwayam enxoho étak elyennakte apnenya'ák. 19Xama énxet melyaheykekxoho axta keñamak apxámokma énxet kélteméseso melya'asáxma; ekhawo nahan ektémakxa m'a xama énxet ekha nak apkelyaheykekxoho, sat kañék apxámokma énxet kélteméseso apkelpéwomo xa.
20Wa'ak axta segánamakxa yakwayam enxoho kayánchesagkohok mólya'asáxma; xama axta ekyawa mólya'asáxma, yáwegkek axta anhan ma'a Dios segásekhayo nak. 21Yetnegkek axta ekmowána mólya'asáxma yakwayam katekkesek nétsapma, ekhawo nahan ektémakxa m'a Dios segásekhayo nak, yetnegkek axta nahan ma'a yakwayam enxoho hẽltemésesek nelpéwomo, tén han hegmések ekyennakte egnenya'ák megkatnegwayam enéxa eñama m'a Jesucristo Wese' egegkok.
Currently Selected:
ROMANOS 5: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
