ROMANOS 4
4
Aptémakxa axta Abraham
1¿Yaksak anxének apwetaya axta Abraham negko'o egyap nano'? 2Aptemésesek axta agkok appéwomo Dios Abraham eñama m'a aksok apkelané axta, keytek axta yakwánxa etnehek keyxkohok appeywa Abraham, háwe eyke m'a nápakto' Dios. 3Hakte temegkek eknaktáxésamaxche s'e: “Aptemegkek axta Abraham mey'áseyam Dios, ékeso eñamakxa apxéna axta Dios aptaha appéwomo.”#Gn 15.6; Gá 3.6. 4Enxet ektaha nak aptamheykha, háwe apxawé naksa m'a kélyanmagkaseso nak aptamheykha, akke kélyanmagkaseso eñama m'a aptamheykha ekpayhawo nak kólmések. 5Megkatnehek eyke m'a énxet aptémol'a mey'áseyam Dios segmasésesamol'a nelsexnánémaxche, exének cha'a Dios aptaha appéwomo xa énxet nak eñama mey'áseyam, melanyek eykhe xama aksok ekpayhawo nak exének Dios aptaha appéwomo. 6Apxeyenmék axta David ektaha apkeleñémo m'a énxet apxeyenma nak Dios aptaha appéwomo, meyke apkelyetsáteyak aptémakxa xama enxoho. 7Aptahak axta David se'e:
“¡Apkeleñémo agko' énxet'ák
meyakmagkáseykekxa nak Dios apkeltémakxa ekmaso,
tén han ma'a metnéseseykmoho nak exma Dios
eñama melya'asáxma!
8¡Apkeleñémo agko' énxet melyetsáteyak nak Dios
aptémakxa mey'asáxma!”#Sal 32.1-2.
9¿Wánxa enxoho sat eykel'a etnehek apkeleñémo m'a énxet'ák ekha nak kélkahaso, enxoho sat eykel'a nahan ma'a énxet'ák meyke nak kélkahaso? Nenxénchek axta negko'o apxeyenma Dios aptaha appéwomo Abraham eñama m'a mey'áseyam axta. 10¿Nátamen kélkahasóya axta Abraham apxéna Dios aptaha appéwomo, amonye kélkahaso enxoho axta eykel'a? Háwe axta natámen kélkahaso, amonye kélkahaso axta eyke. 11Kélkahasegkek#Gn 17.10. axta Abraham magkenatcheso apxeyenma Dios aptaha appéwomo eñama mey'áseyam. Cháxa ektahakxa axta aptaha Abraham apyap apyókxoho énxet'ák apteme nak melya'áseyam, méko eykhe m'a kélkahaso nak; cháxa ektahakxa nak han apxéna Dios aptaha apkelpéwomo xa énxet'ák nak. 12Abraham nahan apyap ma'a énxet'ák ekha nak kélkahaso, cham'a apkelyetleykekxo nak ma'a ektémakxa axta mey'áseyam Abraham negko'o egyap nano', cham'a megkólkahasamakxa axta makham.
Dios appekkencháseykekxa appeywa Abraham aptawan'ák neptámen
13Appekkencháseykekxek axta appeywa Dios Abraham tén han ma'a aptawan'ák neptámen, apkeltennasegkek axta egkeyásekxak keso náxop, cham'a appagkanchesama axta apmáheyo egkések;#Gn 17.4-6; 22.17-18; Gá 3.29. háwe axta eñama apkelyaheykekxoho Abraham segánamakxa appekkeneykekxo appeywa Dios, axta eyke keñamak ma'a apteme axta mey'áseyam; ékeso eñamakxa apxéna axta Dios aptaha appéwomo Abraham. 14Enxet'ák apkelyaheykekxoho eltémókxa antehek segánamakxa agkok ma'a peya nak kólmeyásekxak xa aksok kélpagkancheso nak, chakhók keytek negko'o m'a ektémakxa nak nenteme magya'áseyam, mékoho nahan katnekxak ma'a sempekkencháseykekxa axta appeywa Dios.#Gá 3.18. 15Hakte segánamakxa cha'a kañék senlegasáseykegkoho; keñe m'a meykexa nak segánamakxa, méko nahan katnehek ma'a ektémakxa nak megkólyaheykekxoho segánamakxa.
16Ekeso eñamakxa nenxawaya axta aksa meyke ekyanmaga m'a appekkencháseykekxa axta appeywa Dios Abraham tén han ma'a aptawan'ák neptámen, yakwayam enxoho megkamassegwomek kéláyo, eñama segwetaso magya'áseyam. Háwe eyke ekwánxa agkok appekkencháseykekxa appeywa Dios ma'a énxet'ák apkelyaheykekxoho nak ektémakxa segánamakxa, akke nahan ma'a énxet'ák apteme nak melya'áseyam, ekhawo ektémakxa axta mey'áseyam Abraham. Cháxa ektahakxa axta aptaha Abraham egyap negyókxoho xa,#Gá 3.7. 17ekhawo ektémakxa nak eknaktáxésamaxche s'e: “Ektemésesek axta exchep apyap ma'a apyókxoho énxet'ák nak.”#Gn 17.5. Cháxa Dios, aptéma axta mey'áseyam Abraham xa, cham'a Dios apnakxátekháseykmohol'a énxet'ák apkeletsapma, apkeláneyol'a m'a aksok magwetaya nak makham.
18Aptemegkek axta eyke Abraham mey'áseyam Dios, yetneyk axta elhaxneykha apwáxok, neyseksa kélanagko eyakhémo apteme mey'áseyam. Aptemék axta anhan “apyap apyókxoho énxet'ák”, ekhawo aptémakxa axta apkenagkama Dios se'e: “Sat katnehek apxámeykekxa aptawan'ák neptámen xép xa ektaha nak.”#Gn 15.3. 19Axta kayelkamáxchek apteme mey'áseyam Abraham, cien apyeyam apagkok axta eykhe weykmók,#Gn 17.17. apyekpelchémok axta anhan peya kañehémhok yetsapok Abraham tén han ma'a Sara, apyekpelchémok axta anhan megkapwagko étak apketche hakte elwanyamók axta m'a. 20Axta ey'áseykmok Abraham, axta anhan kamassegweykmok apteme apcháyo m'a appekkencháseykekxa axta appeywa Dios, yágweykmók axta aksa apteme mey'áseyam, tén han apcháyo. Apkeltemésesegkek axta apcheymákpoho Dios, 21neyseksa mey'áseyam ekyetna apmopwána elának Dios ma'a apxeyenma axta elána'. 22Ekeso eñamakxa apxéna axta Dios aptaha appéwomo Abraham.
23Háwe axta apwánxa apagko' Abraham apxeyenma Dios aptaha appéwomo eñama mey'áseyam, cham'a ekyetnama nak eknaktáxésamaxche; 24negko'o nahan nelxénamaxchek xa eknaktáxésamaxche nak, hakte magya'áseyam nahan negko'o xa keñamak senxeyenma Dios nentaha nelpéwomo, negko'o nentaha nak magya'áseyam ma'a apxátekháseykmo axta Jesús Wese' egegkok, 25cham'a apxawáya axta yakwayam emátog eñama m'a mólya'asáxma nak negko'o,#Is 53.4-5. cham'a kélxátekháseykmo axta anhan yakwayam hegkexakkasek negko'o ektémakxa nak nelsexnánémaxche.
Currently Selected:
ROMANOS 4: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
