ROMANOS 3

1¿Yaksak aksok ekyetnama énxet'ák judíos keñe méko m'a pók énxet'ák nak? ¿Kapasmoya nahan cha'a m'a kélkahaso kélyenyekhamol'a egyempehek? 2Xámok aksok ekpasmo xa énxet'ák nak. Appeywa axta sekxo' apmésók Dios xa énxet'ák judíos.#Sal 147.19-20. 3¿Háxko katnehek apyensakmo enxoho apkelyetlo Dios nápakha xa énxet'ák nak? ¿Ekxak enxeykel'a Dios eñama aptamhéyak xa? 4Ma', metnehek Dios xa. Melwatésemek eyke Dios apkelané cha'a m'a ektaha nak ekmámnaksoho agko', neyseksók eykhe aptamhéyak apkelmopwancha'a amya'a énxet'ák; hakte temék eknaktáxésamaxche weykcha'áhak se'e:

“Exénakpok sat xép ekpéwomo aptémakxa

eñama m'a ektémakxa nak appeywa.

Emallánek sat nahan xép

aptaha sat apyekpelchémo énxet'ák.”#Sal 51.4.

5Awanchek agkok henxekmósek nentémakxa ekmaso, ektaha ekpéwomo m'a aptémakxa nak Dios, ¿háxko sat antehek nempeywa? ¿Egwancheya anxének negko'o aptaha Dios megkapéwomo aptémakxa, hakte henlegásesagkohok cha'a? (Ektahak ko'o sekpeywa m'a ektémakxal'a cha'a appeywa énxet). 6Magwanchek antehek nempeywa xa. Kaxtemek axta megkapéwomo aptémakxa Dios, ¿háxko axta katnehek yepwának elyekpelkohok énxet'ák apheykha nak keso náxop?

7Wetáxchek agkok ektakmela aptaha apmámnaksoho Dios eñama megkaxnémo m'a sektémakxa nak sekmowána amya'a, ¿yaksak ektaha seltemésesama nak ko'o ekmaso sektémakxa? 8Nakso' agkok ektéma xa, ¿yaksak ektaha manlana nak aksok ekmaso yakwayam kawak aksok eltakmela nak? Cháxa sexeyenma nak cha'a nápakha énxet selxekmósama ko'o xa ektaha nak, yakwayam enxoho hetekkesesha aksa ekmaso sekwesey; payhawók eyke elyekpelcháseshok Dios xa énxet'ák nak.

Negyókxoho ekha nensexnánémaxche

9¿Háxko egwanchek antehek nempeywa? ¿Negko'oya aksa nenteme meyke seghémo, nenteme nak énxet'ák judíos, kaxnók ma'a pók énxet'ák nak? ¡Ma'!, ¡megkatnék xa! Hakte nenxekmósegkek negko'o ektaha nakso' sẽlmoma negyókxoho m'a mólya'asáxma nak, énxet'ák judíos, tén han ma'a metnaha nak judíos. 10Hakte temegkek eknaktáxésamaxche s'e:

“¡Méko enxama apkelané aksok ektakmela!

¡Méko m'a xama enxoho!

11Méko xama énxet ekha enxoho apya'áseyak,

méko nahan xama énxet apketamso enxoho Dios.

12Apyókxoho apkelyetlákxak ma'a eyesagkexa nak;

kesogwokmók agko' apkeltémakxa apyókxoho nak.

¡Méko enxama apkelané aksok ektakmela!

¡Méko m'a xama enxoho!#Sal 14.1-3; 53.1-3.

13Máxa takhaxpop megkólapeykekxa

átog ma'a apatña'ák nak,

apkelmopwancha'a amya'a nahan cha'a etnahagkok,#Sal 5.9.

máxa yéwa ekmáske sentakxo cha'a katnehek

ekteyapma appeywa xa énxet'ák nak,#Sal 140.3.

14Láneyok nahan apatña'ák ma'a

aptakneyeykegkoho nak pók,

sagko' nahan cha'a katnehek apkelpeywa ellók.#Sal 10.7.

15Ñohok nahan cha'a emawhok yakhek pók

16Enaktawasha cha'a apnámokkok,

etekkesesek nahan cha'a ekyentaxnamo apheykha apnámokkok,

17melya'ásegkok nahan ma'a ekyetnamakxa nak meyke

ektahakxa egwáxok.#Is 59.7-8.

18Megkaxének cha'a apwáxók eyéméxko antehek

negaye m'a Dios.”#Sal 36.1.

19Negya'ásegkok negko'o ekyókxoho ektémakxa nak ekxeyenma segánamakxa, xeyenmék cha'a m'a énxet'ák ektaha nak apcháyo ektémakxa segánamakxa, yakwayam enxoho elwanmeyagkok apyókxoho énxet, keñe sat Dios etnehek apkelyekpelchémo apyókxoho énxet. 20Mehenxének sat Dios nentaha nempéwomo eñama nensawhomo nenlané m'a eltémókxa nak antehek segánamakxa,#Sal 143.2; Gá 2.16. hakte wánxa aksa hegya'asásegwók cha'a negko'o segánamakxa nentaha ekha mólya'asáxma.

Nelwagkásamáxche teyp eñama magya'áseyam

21-22Egya'asásegwokmek eyke kaxwo' negko'o Dios megkañama segánamakxa m'a sentemésesama nak nelpéwomo, egwanchek agya'ásegwók ektaha nakso' xa, nelyetseta enxoho m'a weykcha'áhak eknaktáxésamaxche nak segánamakxa, tén han ma'a weykcha'áhak apnaktáxeséyak axta énxet'ák aptaha axta Dios appeywa apkellegaso: entemésesek negko'o nelpéwomo Dios eñama nenteme magya'áseyam ma'a Jesucristo;#Gá 2.16. etnéseshok nahan cha'a m'a apyókxoho énxet'ák apteme nak melya'áseyam; 23hakte negyókxoho cha'a nenlanak mólya'asáxma, teyépek negko'o neghágkaxa Dios ekha nak apcheymákpoho. 24Wánxa agkok, entemésesek eyke negko'o Dios nelpéwomo eñama segásekhayo, cham'a aptéma axta nahan segméso naksa, eñama m'a segyanmaga axta Cristo Jesús. 25Aptemésesek axta Dios Cristo yakwayam etnehek apmaseso mólya'asáxma, cham'a apyegkena axta éma apagkok, hegwetaksohok cha'a megkólyakmagkáseykekxa nentémakxa mólya'asáxma xa, eñama m'a magya'áseyam nak. Enxekmósek axta Dios ektaha ekpéwomo aptémakxa, cham'a apkelana axta xa, metnésesamók axta cha'axma Dios énxet'ák apkeláneyak melya'asáxma nano' axta, 26mepekhéso elwok axta keñamak aptéma xa ektaha nak. Apmokók axta exekmósek Dios ektémakxa sentemésesama cha'a nelpéwomo keso kaxwo' nak, aptemésesek nahan cha'a apkelpéwomo énxet'ák apteme nak melya'áseyam Jesús, ekhawo m'a aptémakxa nak appéwomo.

27¿Háxko ekyetnámxa kaxwo' ektémakxa nak apkeleymákpoho énxet nápakto' Dios? Kélmaseseykmek kaxwo'. ¿Yaksak ektéma? Háwe eñama apkeláneyak ma'a eltémókxa nak antehek segánamakxa, akke keñamak ma'a aptamhéyak nak melya'áseyam. 28Cháxa ektahakxa nak negya'ásegwokmo apxeyenma Dios aptaha apkelpéwomo énxet eñama melya'áseyam xa, meyke apkeltémo Dios esawhohok elának ma'a eltémókxa nak antehek segánmakxa.

29¿Wánxa enxeykel'a énxet'ák judíos Dios apagkok ma'a Dios? ¿Háweya nahan Dios apagkok ma'a apyókxoho énxet'ák nak? Neykhe anhan Dios apagkok ma'a apyókxoho énxet'ák nak, 30hakte Dios aptaha apwánxa xama;#Dt 6.4; Gá 3.20. cham'a Dios apxeyenmol'a aptaha apkelpéwomo énxet'ák apteme nak melya'áseyam, meyke apkelanyo m'a ekha nak kélkahaso esenhan ma'a meyke nak kélkahaso. 31¿Magya'áseyamya keñamak nenxéna negko'o ektaha mékoho m'a segánamakxa nak? Ma', nenxénchek negko'o ektaha ektakmela m'a eltémókxa nak antehek segánamakxa.

Currently Selected:

ROMANOS 3: LEGN

Highlight

Compare

Copy