ROMANOS 2
2
Ekmámnaksoho m'a ektémakxa nak apyekpelchémo Dios
1Ekeso eñamakxa megkeytna exchep yakwánxa etnehek appeywa yátegmowagkok amya'a apxénamap, megkeyxek ma'a aptémakxa enxoho exchep, aptaha nak cha'a apyekpelchémo aptémakxa pók. Aptemék agkok cha'a exchep apyekpelchémo pók, apsexnánémap apagko' etnehek xép xa,#Mt 7.1; Lc 6.37. hakte kaxhok xép xa apkelané aksok ma'a ektémakxa nak apkeláneyak énxet'ák. 2Negya'ásegkok eyke negko'o ektaha ekpéwomo m'a ektémakxal'a apyekpelchémo Dios, cham'a apkellegasásegkoho enxoho m'a énxet'ák ektaha nak apkeláneyak xa ektaha nak. 3Xép aptaha nak cha'a apyekpelchémo pók, hawók xép xa apkelané aksok ektémakxa nak apkeláneyak xa énxet'ák nak, nágkaxén aksa apwáxok peya yegketakpok xép neyseksa m'a Dios senlegasáseykegkoho nak. 4Etaknók cha'a exchep ma'a Dios segásekhayo megkamassegwayam nak, tén han ma'a mepekhéso nak elwok Dios, tén han ma'a ektémakxa nak mepekhésamap Dios, neyseksa mékpelche Dios segásekhayo, ektaha nak cha'a ekyentameykekxa yakwayam etnekxak mey'áseyam Dios. 5Wánxa agkok, kayhek eyke apwáxok xép, ékeso eñamakxa memoko nak etnekxak mey'áseyam Dios, apyanchásegkok aksa cha'a exchep yakwayam kóllegásesagkohok ma'a ekhem ekwa'a sat Dios aplo, cham'a yakwánxa sat exekmósakpohok Dios, yakwayam exének ekpéwomo yakwánxa kóltemésesek énxet, 6yakwayam enxoho kólhéshok mók ma'a ektémakxa axta cha'a apkeláneyak aksok apyókxoho énxet.#Sal 62.11-12; Pr 24.12; Jer 17.10; Ez 18.30; 33.20; Mt 16.27. 7Egkések sat Dios ekyennakte apnenyek megkatnegwayam enéxa m'a énxet'ák meyenseykmo axta apkeláneyak ma'a ekpayhawo nak anlána', cham'a apketamsama axta negeymáxkoho eñama nak Dios, tén han apketamsama m'a yakwayam nak etnésesek Dios ekha kéláyo, tén han apketamsama m'a mótsapma nak; 8wánxa agkok, ellegásesagkohok sat eyke Dios yetlo aplómo apagko' ma'a énxet'ák apchásekhamakpekxoho apagko' nak, cham'a melyaheykekxoho nak amya'a ekmámnaksoho, wánxa apchásekhayo m'a nentémakxa ekmaso nak. 9Keytek sat apkellegeykegkoho apyókxoho énxet'ák apkeláneyak nak ekmaso apkeltémakxa, tén han ekyentaxnamo agko' apwáxók, énxet'ák judíos, tén han ma'a énxet'ák metnaha nak judíos. 10Wánxa agkok, egkések sat Dios apkeleymákpoho m'a apyókxoho énxet'ák apkeláneyak nak aksok ektakmela, egkések sat nahan yakwayam etnahagkok ekha kéláyo, tén han meyke ektahakxa apwáxók, énxet'ák judíos tén han ma'a énxet'ák metnaha nak judíos. 11Hakte mehentemésesek cha'a negyeykhamaxche egmók Dios;#Dt 10.17. 12Apyókxoho énxet apkeláneyak nak melya'asáxma neyseksa melya'áseyak Moisés segánamakxa apagkok, megkólmaha sat nahan Moisés segánamakxa apagkok eletsapok xa énxet'ák nak; apkelánegkek agkok nahan melya'asáxma m'a énxet'ák apkelya'áseykegkoho nak ektémakxa Moisés segánamakxa apagkok, sat nahan kólmaha kóltehek kélyekpelchémo xa segánamakxa nak. 13Megkólmasésesek cha'a apsexnánémap énxet apháxenmo nak segánamakxa, akke m'a énxet'ák apkelyaheykekxoho nak eltémókxa antehek segánamakxa. 14Chakhawók agkok apkeltémakxa énxet'ák metnaha judíos ma'a eltémókxa nak antehek segánamakxa, cham'a melya'áseyak nak ektémakxa segánamakxa, cháxa segánamakxa apagkok apagko' xa, 15hakte kataxchek cha'a ekyetnama eknaktáxésamaxche segánamakxa apwáxók xa énxet'ák nak, eñama ekwetamaxche m'a apkeltémakxa. Ekha apkelya'áseyak cha'a kañék ekteméseso ekmámnaksoho xa, elchetamso apwáxók sat nahan keykpelchásesók aptaha apkelsexnánémap, kapasmok esenhan, 16cham'a ekhem yakwánxa sat etnehek apkelyekpelchémo Dios yetlo apchásenneykekxa Jesucristo m'a aksok appósamo nak énxet'ák, ekhawo ektémakxa nak seltenneykha cha'a ko'o tásek amya'a.
Enxet'ák judíos tén han Moisés segánamakxa apagkok
17Apxénchek xép aptaha judío tén han apkeláneya m'a eltémókxa nak antehek Moisés segánamakxa apagkok, cheyxkók cha'a exchep appeywa apxéna apyetlo Dios. 18Apya'ásegkok xép apkeltémókxa nak antehek Dios, segánamakxa nahan kewánesesók yakwayam elyésha m'a aksok ektakmela nak. 19Apkeneykek xép yepwának epékesesagkok apkelxega énxet'ák meyke apakta'ák nak, tén han apcháneya yepwának elsásesexma m'a énxet'ák apheykencha'a nak neyseksa ekyaktesakxaxma; 20apkenagkamchek nahan yepwának xép elxekmósagkok énxet'ák melya'áseyak aksok nak, tén han apkenagkama yepwának elxekmósek ma'a sakcha'a létkók nak, hakte yetneyk xép ma'a segánamakxa ekyetnamakxa nak negya'ásegwayam, tén han ekxekmósama m'a aksok ekmámnaksoho nak. 21Apkelxekmósek agkok xép apnámokkok, ¿yaksak ektaha melxekmowáseykpekxoho apagko' xép? Apkeltennáha agkok xép megkatakmela agmenyexek, ¿yaksak ektaha apmenyexa exchep? 22Apkeltennáha agkok xép megkatakmela antawasha sẽlyamhopma, ¿Yaksak ektaha aptawásencha'a nak xép elyamhopma? Aptaknókek agkok xép aksok kéleykmáseso nak, ¿yaksak ektaha apkelmenyexa nak aksok ekhéyak kañe' tegma kélnegkenmakxa nak aksok kéleykmáseso? 23Cheyxkók cha'a exchep appeywa apxéna m'a segánamakxa nak, aptawáseyha eyke exchep Dios apwesey, hakte melyaheykekxohok cha'a m'a eltémókxa nak antehek segánamakxa. 24Nakso' ektémakxa nak eknaktáxésamaxche s'e: “Kanmexmakha cha'a appeywa Dios ma'a énxet'ák melya'áseyak nak Dios, kéxegke eñamakxa.”#Is 52.5.
25Nakso' ektaha ekpasmo énxet'ák apkelyaheykekxoho Moisés segánamakxa apagkok ma'a kélyenyekhamol'a egyempehek hẽlkahaksek; agkok elyahákxohok ektémakxa nak segánamakxa, máxa katnehek ma'a méko enxoho kélkahaso kélyenyekhamol'a egyempehek. 26Apkelanak agkok énxet meyke kélkahaso m'a eltémókxa nak antehek segánamakxa, máxa sat kóltemésesek ma'a énxet ekhal'a kélkahaso, neyseksa meyke kélkahaso. 27Enxet apkelyaheykekxoho nak eltémókxa antehek segánamakxa, cham'a megkólyenyekháseso nak apyempehek kólkahaksek, etnehek sat apyekpelchémo m'a énxet apya'áseykegkoho nak ektémakxa segánamakxa tén han ma'a ekha nak kélkahaso kélyenyekhamol'a egyempehek, wánxa agkok melyahakxók eyke m'a eltémókxa nak antehek segánamakxa. 28Háwe senteméseso judío m'a kéltemésesamakxal'a egyempehek, keñe m'a kélkahasol'a egyempehek háwe ekwánxa agkok ma'a egyempoho nak. 29Akke ekteme ekmámnaksoho nenteme judío m'a ekweykmoho nak kaño' agko' egwáxok, kélkahásek agkok apyempehek xama énxet, kawomhok nahan kaño' agko' apwáxok:#Dt 10.16; 30.6; Jer 4.4. háwe ektekkeso weykcha'áhak eknaktáxésamaxche xa, Espíritu eyke aptekkeso. Enxet ekyetnakxa enxoho xa kélkahaso ekweykmoho nak kaño' agko' apwáxok, kalkohok apwáxok Dios aptahakxa, keñe megkalchehek apwáxók ma'a énxet'ák.
Currently Selected:
ROMANOS 2: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
