ROMANOS 1
1
Ekxeyenma ewáxok
1Ko'o Pablo, sekteme Jesucristo apkeláneykha, ektáxesek ko'o keso weykcha'áhak. Ewóneyha axta ko'o Dios, epagkanchek axta anhan, yakwayam hetnésesek seykha amya'a, yakwayam enxoho altennaha amya'a ektakmela eñama nak Dios.
2Nano' axta apxeyenma Dios xa amya'a nak, eñama apkellegaso m'a énxet'ák ektaha axta apkellegaso Dios appeywa, ekyetnama nak eknaktáxésamaxche m'a amya'a aptemésesama axta ekpagkanamaxche Dios. 3-4Cháxa amya'a ekxeyenma nak Jesucristo Wese' egegkok xa, aptaha nak Dios Apketche. Enxet axta apyetchesamakpohok Jesucristo aptéma Wese' apwányam David#Mt 1.1; 12.23. aptáwen neptámen, wánxa agkok, apxeyenmék axta Dios aptaha Apketche, hakte espíritu appagkanamap apkeñama Dios axta m'a, tén han eñama m'a apxátekháseyam axta, apxakak axta anhan ekyawe apmopwána.
5Jesucristo keñamak segkésama aksa ko'o Dios yakwayam atnehek seykha amya'a apagkok, tén han atnehek seltenneykha apwesey, yakwayam enxoho etyapok énxet apteme mey'áseyam Dios nepyeseksa m'a apyókxoho pók aptémakxa énxet nak, tén han etnehek apkelyaheykekxoho. 6-7Kélháha nahan kéxegkáxa nepyeseksa xa énxet'ák nak, kéxegke kéleñama nak tegma apwányam Roma. Apkelásekha'awok kéxegke Dios, apkelwóneyha axta anhan kéxegke peya etnésesek Jesucristo énxet'ák apagkok, tén han etnésásekxak Dios énxet'ák apagkok. Dios Egyap tén han Jesucristo, sat egkések kéxegke apméso naksa m'a ektémakxa nak segemleykekxoho, tén han meyke ektahakxa kélwáxok.
Pablo apmáheyo etnehek meyk'a tegma apwányam Roma
8Eyeynókxa, ekmések ko'o ekxeyenma ewáxok Dios kéxegke eñamakxa, yetlo sekxeyenma apwesey Jesucristo, hakte ekyókxoho yókxexma xénaxchek cha'a ektémakxa nak megkólya'áseyam kéxegke. 9Dios aptaha apwetayo mehelwagkágweykmo cha'a kéxegke neyseksa sekteme nempeywa nelmaxnagko, cham'a seláneykencha'a nak ko'o yetlo ekmáheyo agko' ewáxok, neyseksa seklegaso m'a appeywa ekxeyenma nak Apketche. 10Elmaxnakkek cha'a ko'o Dios seltamho hegkések yakwayam atnehek meyk'a kéxegke, cham'a ektaha enxoho apmopmenyého apagko'. 11Hakte emenyék ko'o alwetak kéxegke, emenyék nahan apasmok, yakwayam enxoho kólxawak aksok segmésamol'a Espíritu Santo, tén han kayágwomhok kélteme megkólya'áseyam; 12yakwayam enxoho nahan ólyáteyaxkoho' eñama xa megkólya'áseyam ekyetna nak kéxegke, keso ekyetna nak han ko'o xa.
13Elyáxeg, emenyék kólya'ásegwomhok kéxegke ekxeyenma cha'a ko'o ewáxok atnehek meyk'a kéxegke yakwayam alweta',#Hch 19.21. makhemek eyke makham ekyetno aksok meheyhayo cha'a axog ko'o, ekwokmoho kaxwo' nak. Emenyék eykhe ko'o wanchásekxak aksok eltakmela eleñama nak néten kélnepyeseksa kéxegke, ekhawo ektahakxa axta seyancháseykekxa nepyeseksa m'a énxet'ák apheykha nak mók yókxexma. 14Xénchek eyke ko'o ewáxok seyánémaxko altennaha amya'a ektakmela nepyeseksa apyókxoho énxet, cham'a ekha kélxekmóso nak, tén han ma'a megkólxekmósama nak makham, tén han ma'a ekha nak apkelya'áseyak, tén han ma'a meyke nak apkelya'áseyak. 15Ekeso eñamakxa sekmoko hagko' nak altennasha kéxegkáxa tásek amya'a kélheykha nak tegma apwányam Roma.
Tásek amya'a ekmowána
16Mamegkayhek#Mr 8.38. ko'o axének tásek amya'a, hakte cháxa Dios apmopwána xa,#1 Co 1.18. yakwayam enxoho elwagkasakpok teyp apyókxoho énxet apteme nak melya'áseyam, eyeynamókxa m'a énxet'ák judíos, wokmók eyke nahan ma'a énxet'ák metnaha nak judíos. 17Hakte cháxa amya'a senxekmósama nak negko'o ektémakxa apmasésama Dios ma'a ektémakxa nak nelsexnánémaxche: eñama m'a magya'áseyam nak, wánxa aksa m'a magya'áseyam nak. Hakte temék eknaktáxésamaxche s'e: “Etak sat ekyennakte apnenyek énxet apteme nak appéwomo eñama mey'áseyam.”#Hab 2.4.
Ektémakxa apkelsexnánémap énxet
18Negwet'ak negko'o ekxegakmo eñama néten Dios senlegasáseykegkoho ekmaso agko' takhapxet apyókxoho énxet'ák elmasagcha'a nak apkeltémakxa, tén han ma'a énxet'ák melpéwomo nak, cham'a énxet'ák megyahayo nak kólyekpelchágwomhok aksok ekmámnaksoho, eñama m'a apkeltémakxa ekmaso nak. 19Apkelya'ásegkok aksok negmowána nak agya'asagkohok eñama Dios xa énxet'ák nak, hakte Dios apagko' axta apxekmóso; 20egwanchek agyekpelchágwók ma'a aksok magwetayo nak eñama Dios, ekxéna enxoho egwáxok ma'a aksok ektaha axta Dios apkelané. Tásek ekwetamaxche aptaha Dios ma'a Dios, eyeynamókxa m'a sekxo' axta elánamáxko keso náxop, megkamassegwomek nahan ma'a ektémakxa nak apmopwána. 21Apkelya'áseykegkók axta eykhe énxet'ák ma'a Dios, axta eyke etnék apcháyo, cham'a ekpayhawo nak eykhe antemésesek Dios, axta anhan egkésók ekpayheykekxa apwáxok. Wánxa agkok kesogwokmók axta eyke ektémakxa elchetamso apwáxók énxet'ák, máxa ekyaktesóxma apwáxók axta aptamheykegkok.#Ef 4.17-18. 22Exénhok axta cha'a aptaha ekha apkelya'áseyak xa énxet'ák nak, wánxa agkok elyéháxma axta eyke; 23hakte apkelyakmagkaseykmek axta ektémakxa apkelyetlo Dios xa énxet'ák nak, cham'a Dios ekha nak apcheymákpoho#Sal 106.20; Jer 2.11. tén han megyetsapma, eñama apkelyetlo m'a aksok kéleykmáseso kélheyáseykegkoho nak ma'a énxet apketsapmo nak, ekweykmoho nak han kélheyáseykegkoho m'a náta, tén han ma'a aksok nawha'ák hawók nekha amagkok nak, tén han ma'a aksok nawha'ák elpexyawéyak nak xóp kaxog.#Dt 4.16-18.
24Ekeso eñamakxa apkexaya axta aksa Dios xa énxet'ák nak, yakwayam enxoho keytek nepyeseksa aksok ekmaso apkelyespagko nak, apkeláneykegkek nahan cha'a m'a aksok segmegkasamo nak. 25Wánxa aksa aptegyágko m'a aksok megkamámnaksoho nak yakwayam eykhe ektamok ma'a aksok ekmámnaksoho eñama nak Dios, aptemék cha'a apcháyo m'a aksok ektaha axta Dios apkelané, apkelpeykásawok nahan cha'a, keñe melpeykásawo m'a Dios aptaha axta apkelané xa aksok nak, cham'a Dios eyéméxko nak han cha'a kóltemésesek apcheymákpoho megkatnegwayam enéxa. Katnahagkok sat.
26Ekeso eñamakxa apkexaya axta aksa Dios xa énxet'ák nak, yakwayam enxoho elanagkok ma'a aksok apkelmopmenyého segmegkasamo nak. Wokmók axta nahan kelán'ák ekyakmagkaso m'a ektémakxal'a kelán'a, eñama ekyetleykekxa m'a ektaha nak elmexma ektémakxa agko' nak kelán'a; 27hawók nahan ma'a apkelennay'a nak, apyakmagkaseykmek axta ektémakxal'a apkelané kelán'a, yágwokmók axta kalmopsexta'a appehewákxo m'a apkelennay'a xamo' nak. Apkenna xamo' cha'a apkelánegkok ma'a aksok segmegkasamo nak, apkellegágkok axta nahan cha'a eñama ellegasáseykegkoho m'a megyakhémo nak apkeltémakxa.
28Mopmenyék elyekpelkohok Dios xa énxet'ák nak. Ekeso eñamakxa apkexaya axta aksa Dios yakwayam kayeykhágwomhok ekmaso elchetamso apwáxók, yakwayam enxoho anhan elanagkok ma'a aksok megkeyméxko nak anlána'. 29Yeykhágweykmók apkeláneyak ma'a apkeltémakxa megkapéwomo nak, apkeltémakxa ekmanyása, apkeltémo eyeykhasakpohok aksok, tén han ekmaso apkeltémakxa. Apteme nahan apkelyásekkáseykha, apchakhe pók, apkelenmexamap, apkelyexancháseykha pók, apmopwána elanagkok aksok ekmaso, tén han aptekkesáseykha aksa apwesey pók. 30Sagkek cha'a katnehek apxeyenma apnámokkok, apkenmexeykha nahan cha'a Dios, megkeyxnegwomek nahan cha'a apkelpeywa, eleymáxkoho apwáxók nahan tén han apkeleymákpoho; eyánchesagkohok nahan cha'a apkeltémakxa ekmaso, metnehek nahan cha'a apcháyo apyepmeyk, 31mopmenyék nahan cha'a elyekpelchágwók, melanagkek nahan cha'a aptahakxa enxoho apkelpeywa, megyásekhók nahan cha'a xama énxet enxoho, eyakmagkásekxak nahan cha'a kéltemésesakxa ekmaso, megkapyósek nahan cha'a elanok pók. 32Apkelya'ásegkok nahan apxeyenma Dios eyéméxko eletsapok énxet'ák ektaha nak apkeláneyak xa aksok nak; wánxa agkok, apkelenxáneykmek eyke aptamhéyak xa ektaha nak, kalkohok nahan cha'a apwáxók étak etnahagkok énxet xa ektaha nak.
Currently Selected:
ROMANOS 1: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
