ROMANOS 13
13
1Negyókxoho cha'a kéméxchek antehek negáyo m'a wese' apchásenneykha apkeláneykha yókxexma nak. Hakte apyókxoho kelwese'e apkeláneykha apchókxa apkeleñamak m'a Dios, Dios axta appekkenma xa kelwese'e nak. 2Enxet ektahakxa enxoho aptaknagko xa kelwese'e apkeláneykha nak yókxexma, apkenmexchek ma'a apxeyenma axta Dios. Kóllegásesagkohok sat énxet'ák ektahakxa enxoho apkenmexeykha xa kelwese'e nak; 3hakte melyegwakkasek cha'a kelwese'e apkeláneykha yókxexma m'a énxet'ák apkeláneyak nak aksok ektakmela, wánxa eyke cha'a elyegwakkasek ma'a énxet'ák apkeláneyak nak aksok ekmaso. ¿Apmenyeya exchep etnehek megyeye kelwese'e apkeláneykha nak yókxexma? Etakmelchesakpoho, yakwayam enxoho kalkohok apwáxók kelwese'e apkeláneykha yókxexma aptahakxa exchep. 4hakte apkelanak cha'a apkeltamheykha eñama Dios xa kelwese'e apkeláneykha yókxexma nak, yakwayam epasmok xép. Wánxa agkok, sagkók agkok aptahakxa exchep, keñe sat megkatnehek megyeye; hakte háwe eyakhémo eswok sókwenakte apagkok ma'a kelwese'e apkelásenneykha apkeláneykha yókxexma nak, yakwayam enxoho etnésesek ekpayhókxa etnésesek ma'a énxet apkelané nak aksok ekmaso. 5Ekeso eñamakxa eyéméxko nak antehek nelyaheykekxoho m'a kelwese'e apkelásenneykha apkeláneykha yókxexma nak, hakte ekpakmeteykha egwáxok cha'a kañék segya'asásegwayam eyéméxko antehek nelyaheykekxoho, háwe ekwánxa agkok ma'a negaye nak henlegásesagkoho'. 6Cháxa keñamak kélmésama nak kéxegkáxa selyakye yakwayam kólmések ma'a wese' apkeláneykha nak apchókxa, hakte apkelanak cha'a apkeltamheykha eñama Dios xa kelwese'e nak, cháxa apkeláneykegko nak cha'a.
7Kólmés cha'a kélmók ekpayhókxa enxoho kólmések. Kólmés cha'a selyakye yakwayam kólpasmok ma'a énxet ekpayhawo nak kólmések, kólmés cha'a selyakye wese' apkeláneykha apchókxa ekpayhawo nak kólmések; Kólteme cha'a kélaye m'a eyéméxchexa nak cha'a kólé', kólteme cha'a kéláyo m'a eyéméxchexa nak kóltehek kéláyo.#Mt 22.21; Mr 12.17; Lc 20.25.
8Nágkólteme megkólyánmagkaso m'a kélméyak nak aksok kélmók, wánxa agkok, kólásekhaxkoho aksa; negko'o ektahakxa enxoho negásekhayo egmók, nensawhawok nenlana m'a eltémókxa nak antehek segánamakxa. 9Temék eknaktáxésamaxche nelánemaxchexa nak antehek se'e: “Nágkóltawasha aksa ektémakxa nak sẽlyamhopma,#Ex 20.14; Dt 5.18. nágkólakha aksa kélmók,#Ex 20.13; Dt 5.17. nágkólmenyex aksa,#Ex 20.15; Dt 5.19. nágkatsep aksa kélnenyek aksok”.#Ex 20.17; Dt 5.21. Keso kélyepetcháseykekxo nak ekyókxoho ektémakxa eknaktáxésamaxche segánamakxa s'e: “Kólásekhoho kélmók ekhawo ektémakxa nak kélásekhamaxchekxoho kélagko'.”#Lv 19.18. 10Enxama ektahakxa enxoho apchásekhayo pók, melanaksek aksok ekmaso pók; negásekhayo keñamak eksawhomáxkoho ektéma m'a eltémókxa nak antehek segánamakxa.
11Kaxénmakha cha'a kélwáxok ektémakxa nak negha keso kaxwo' nak, kólya'asagkoho wokmek kaxwo' nenxátekheykxa. Hakte chágketwa'ak kaxwo' yakwánxa nak ólwagkasaxchek teyp, eyeynamo m'a sekxo' axta nentéma magya'áseyam. 12Yeyk'ak kaxwo' axta'a, ketó' ekteyapmakxa ekhem; ólwataksek hana nenlané aksok elánamáxkohol'a ekyaktésakxaxma, ólmekxak hana nelmeykha eleñama nak neyseksa elseyexma, ektémakxal'a sẽlpextétamo apkelmeykha. 13Kólteme cha'a kéltakmelchásamáxkoho, nentémakxal'a neyseksa ekteyapma ekhem, mantehek sat anmenát'ák, mólmahagkek sat cha'a m'a apkelyeykhásamákpexa nak apmayheyak etawagkok aptéyak énxet yetlo ekyennamáxma, tásek manlának cha'a ekmaso nentémakxa mansexta, tén han magyeykhasaxkók ma'a nentémakxa nak, tén han mantehek nelenmexamaxche, tén han mantehek nelyásekkáseykha. 14Kólteme kélahakkásamáxche Wese' egegkok Jesucristo,#Ef 6.11-17. nágkóllána kaxwo' ma'a ektémakxa nak aksok ekmaso ekyespagko negyókxa.
Currently Selected:
ROMANOS 13: LEGN
Highlight
Share
Compare
Copy
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
