APOCALIPSIS 20
20
Mil apyeyam
1Ekwet'ak axta ko'o xama Dios apchásenneykha, apweywento apkeñama m'a néten, máxek ekmatawóneg ketchesama átog agkok axta apmeykha, tén han cadena elyawe. 2Apmágkek axta yéwa ekwányam xa Dios apchásenneykha nak, cham'a nano' yéwa#Gn 3.1. ektaha nak kelyekhama' agko' ekwesey nak Satanás, aptetchek axta nahan ekweykmoho mil apyeyam. 3Apyenyenték axta kañe' máxek ekmatawóneg agko', apchahakkásekxeyk axta nahan átog, keñe axta apchapa xama aksok ma'a átog yakwayam enxoho megkalyexanchesha apyókxoho énxet'ák ekwokmoho ekyeyk'a mil apyeyam, yeyk'ak sat agkok xa mil apyeyam nak, keñe sat kólyenyekxak yakwatakxoho agko' xa yéwa ekwányam nak.
4Ekwet'ak axta ko'o taháno ektakmalma yetlo apheykha néten ma'a apkelxawágko axta kélyaheykekxoho yakwayam etnehek apkelyekpelchémo apyókxoho énxet'ák.#Dn 7.9,22,27; Mt 19.28; Lc 22.30. Ekwet'ak axta nahan ko'o aphagák ma'a ektaha axta kélyaktencháseyak apyespa'ák eñama meyenseyam apkeltenneykha Jesús apwesey tén han ma'a amya'a eñama nak Dios.#Ap 6.9. Axta elpeykesamok aksok nawhak eklo xa énxet'ák nak, axta nahan elpeykesamok ma'a kéleykmáseso kélheyásekegkoho nak aksok nawhak eklo, axta nahan yahayók keytek elkahaso#Ap 13.16-17; 14.9. aksok nawhak eklo m'a ekpayhakxa nápát, esenhan ma'a apmek. Ekwet'ak axta nahan ko'o apnakxétekhágwokmo xa énxet'ák nak. Kelwese'e axta aptamhágkok xamo' Cristo ekweykmoho mil apyeyam. 5Wánxa agkok axta eyke enakxétehágwokmok nápakha m'a ektaha axta apkeletsapma megkayeyk'a xa mil apyeyam nak. Cháxa ektaha nak émha amonye nennakxétekhágwayam xa. 6Apkeleñémo agko' ektaha nak apmonye kélxátekháseyam eñama apteme Dios énxet'ák apagkok.#Ap 1.6; 5.10. Megkatnehek sat nahan ánet apkeletsapeykekxoho xa énxet'ák nak, appasmo apkelmaxnéseso Dios énxet'ák apagkok sat etnahagkok, tén han appasmo apkelmaxnéseso m'a Cristo énxet'ák apagkok, etnahagkok sat nahan kelwese'e xamo' Cristo ekweykmoho mil apyeyam.
Kélyenyeykekxa kelyehama'
7Yeyk'ak sat agkok mil apyeyam, kólyenyekxak sat Satanás ma'a ekmomaxchexa nak. 8Katyapok sat yakwayam kalyexanchesha apyókxoho énxet'ák apheykha nak keso náxop; kalyexanchesha sat ma'a Gog tén han ma'a Magog,#Ez 38.2,9,15. cham'a apxámokma nak sẽlpextétamo apagkok ektémol'a xóp ánek neyáwa wátsam ekwányam. Yaknekxak sat yakwayam yempakha'.
9Apsawhekxók axta ekyókxoho keso náxop, apwakha'ak axta nahan ma'a Dios énxet'ák apagkok nak apkelpakxeneyak, axta anhan apwakha'ak ma'a tegma apwányam apchásekhayókxa nak Dios. Wánxa agkok teyekmek axta eyke táxa eñama néten, apsawhekpók axta nahan apkelmeta xa sẽlpextétamo nak. 10keñe axta kélyenyawa neyseksa táxa ekpaxkamaxche aksok ánek eyálewomol'a m'a kelyekhama' ektaha axta elyexancháseykha énxet'ák, cham'a kélyenyawakxa axta nahan aksok nawhak eklo, tén han ma'a énxet aplegaso axta amya'a megkamámnaksoho nak, cháxa yakwánxa nak han kóllegásesagkohok ekyókxoho ekhem tén han ekyókxoho axta'a xa megkatnegwayam enéxa.
Kélteme kélyekpelchémo énxet'ák ekyetnakxa m'a taháno ekmopé ekyawe nak
11Ekwet'ak axta ko'o taháno ekmopé ekyawe, tén han ma'a ektaha axta apha néten. Massék axta aksa xóp tén han néten apwakto m'a ektaha axta apha néten xa taháno nak, massawók axta ekwetáxko cha'a. 12Ekwet'ak axta ko'o apchakneyncha'a amonye ekyetnakxa taháno ektakmalma énxet'ák apkeletsapma axta, cham'a meyke kéláyo nak tén han ma'a ekyawe kéláyo nak. Kélmeykásegkek axta weykcha'áhak, axta anhan kélmeykásak ma'a mók weykcha'áhak eknaktáxésamaxchexa nak apkelwesey m'a peya nak elxawagkok ekyennakte apnenya'ák.#Sal 69.28; Ap 3.5. Kéltemék axta sekxo' kélyekpelchémo énxet'ák, cham'a ektémakxa enxoho aksok apkeláneyak, keñe axta anhan kéltaha kélyekpelchémo m'a ektémakxa nak ekyetno weykcha'áhak eknaktáxésamaxche apkeltémakxa xa énxet'ák ektaha axta apkeletsapma.#Dn 7.9-10. 13Wátsam ekwányam axta nahan apkelenyektak ma'a ektaha axta apkeletsapwayam kañe' wátsam ekwányam, ektémakxa wese' ekwányam nétsapma axta anhan apkelenyektak ma'a ektaha axta apkeletsapma; kéltemék axta nahan kélyekpelchémo apyókxoho xa énxet'ák nak, cham'a ektémakxa axta aksok apkeláneyak. 14Keñe axta kélyenyawa neyseksa táxa m'a ektémakxa nak wese' nétsapma, cham'a ektahakxa nak ánet nétsapma,#Mt 25.41; Ap 2.11; 21.8. 15cham'a kélchexeykxa axta nahan énxet'ák megkaxneykegko nak apkelwesey m'a weykcha'áhak eknaktáxésamaxchexa nak apkelwesey énxet'ák peya nak elxawagkok ekyennakte apnenya'ák.
Currently Selected:
APOCALIPSIS 20: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
