APOCALIPSIS 14
14
Apkelmeneykmaso ciento cuarenta y cuatro mil énxet'ák
1Ekwet'ak axta ko'o Nekkések Apketkok apkenmeyncha'a m'a néten egkexe Sión; ciento cuarenta y cuatro mil énxet'ák axta apkelxegexma'a, héyegkek axta nápakta'a kélkahaso apwesey m'a Nekkések Apketkok, tén han ma'a Apyap#Ez 9.4; Ap 7.3. apwesey nak. 2Keñe axta sekleg'a ko'o extegyawa eñama m'a néten, máxa axta extegyawa m'a ekteyeykenxal'a yegmen, máxa axta nahan ma'a elmahágweykmohol'a etyamok takha', máxa axta nahan entahak ma'a apxámakxa enxoho énxet yát'axpog apyawe apkelpáwaso. 3Apkelmeneykmásek axta nahan negmeneykmaso axnagkok keto' ekyetnakxa taháno ektakmalma, tén han nápakta'awo' ma'a hawók nápakha énxet apkeleñama nak néten, tén han nápakta'awo' ma'a apkelámha apmonye'e nak, méko axta eyewagko kaltameyk xa negmeneykmaso nak, wánxa axta aksa m'a ciento cuarenta y cuatro mil ektaha axta apkelwagkásamap teyp, nepyeseksa énxet'ák keso náxop. 4Axta etnéseseykmohóxma kelán'a xa énxet'ák nak, axta elánesók ekmaso nak nentémakxa mansexta, wánxa aksa apkelyetlama apmahágkaxa enxoho m'a Nekkések Apketkok. Apkelwagkáseykpek axta teyp xa énxet'ák nak nepyeseksa énxet'ák keso náxop, ektémol'a émha amonye aksok kélméso Dios,#Ex 23.19; Stg 1.18. tén han ma'a kélmésamol'a Nekkések Apketkok. 5Axta etnék nahan cha'a apkelmopwána amya'a#Sof 3.13. xa énxet'ák nak, hakte méko axta apkeltémakxa ekmaso xama enxoho.
Amya'a apkellegaso apkántanxo Dios apkelásenneykha
6Ekwet'ak axta ko'o pók Dios apchásenneykha apkempeyncha'a neyseksa yaphopé, apsókha axta nahan amya'a megkamassegwayam, yakwayam eñeksek ma'a ektaha nak apheykha keso náxop, cham'a apyókxoho pók aptémakxa énxet'ák nak, tén han ma'a mók ektémakxa nak apkelpakmeyesma, tén han ma'a apkeleñama nak mók yókxexma. 7Aptahak axta apyennaktésawo appeywa s'e: “Kólé' hana Dios, kólteméses apcheymákpoho, wa'ak kaxwo' ekhem yakwánxa nak hẽlyekpelkoho', kólpeykesho m'a ektaha axta apkelané néten, tén han keso náxop, tén han ma'a wátsam ekwányam nak, tén han ma'a ekteyapmakxa nak yegmen.”
8Apxegkek axta nahan pók Dios apchásenneykha aptéteyak xa pók nak. Aptahak axta appeywa s'e: “¡Apteyekme', apteyekme' kaxwo' tegma apwányam Babilonia,#Is 21.9; Jer 51.8; Ap 18.2. cham'a aptemesáseykegko nak máxa anmenát'ák apyókxoho énxet'ák eñama m'a apkelmopmenyého nak elanagkok ekmaso nentémakxa mansexta!”
9Apxegkek axta anhan pók Dios apchásenneykha aptéteyak xa pók nak, aptahak axta anhan apyennaktésawo appeywa s'e: “kelpeykásawok agkok ma'a aksok nawhak eklo nak, tén han kélpeykásó enxoho m'a kéleykmáseso kélheyáseykegkoho nak aksok nawhak eklo, tén han ma'a ektahakxa enxoho apchahayo kapekkenek elkahaso ekpayhakxa nápát esenhan ma'a apmek, 10kóllegásesagkohok sat ekmaso agko' eñama nak Dios senlegasáseykegkoho, cham'a Dios aplo kélxátama nak xama egheykok,#Is 51.17; Jer 25.15; Ap 16.19. kóllegásesagkohok sat neyseksa táxa tén han neyseksa m'a aksok ektawáseykencha'awol'a egyempehek,#Gn 19.24; Sal 11.6; Ez 38.22. nápakta'awo' ma'a Dios apkelásenneykha apkelpagkanamap nak, tén han nápakto' ma'a Nekkések Apketkok. 11Néten cha'a kamhagkok éten agkok kéllegasáseykegkoho ekmaso agko' xa énxet'ák nak, megkatnegwayam enéxa,#Is 34.10. megkalyetyapagkek nahan cha'a kéllegasáseykegkoho énxet'ák apkelpeykesamo nak aksok nawhak eklo, tén han ma'a apkelpeykesamo nak kéleykmáseso kélheyáseykegkoho nak, cham'a énxet'ák kélkaháseyak nak ekwesey aksok nawhak eklo, yókxoho ekhem, tén han yókxoho axta'a cha'a katnehek kéllegasáseykegkoho.”
12Sat kañék ekwetamaxche ektémakxa nak apkelwaskápeykekxoho Dios énxet'ák apagkok apkelpagkanamap nak, cham'a melwateseyam nak apkelané apkeltémókxa nak antehek Dios, cham'a meyenseyam nak han apteme mey'áseyam Jesús.
13Keñe axta sekleg'a ko'o kélpeywa eñama néten. Entahak axta amya'a s'e: “Etne aptáxéso s'e: ‘Apkeleñémo agko' kaxwo' énxet'ák peya nak eletsapok eñama apkelyepetcheyo Wese' egegkok. Apkeleñémo agko' sat nahan ma'a egmonye sat’ ”
“Nakso', —aptahak Espíritu—, kamaskok sat apkeltamheyncha'a, hakte pasmomchek ma'a ektémakxa axta apkeltamheykha.”
Eknakxamáxche ekyexna keso náxop
14Enmexawok axta ko'o néten, ekwet'ak axta yaphopé ekmopé, yetlo apha apyetchesamakpoho énxet ma'a néten.#Dn 7.13. Sawo ekyátekto elyenma axta nahan apketcheso apkátek, keñe axta xama ekhó yánsawo ekhaxé ekmahanta m'a apmeykha. 15Aptekkek axta nahan pók Dios apchásenneykha apkeñama kañe' tegma appagkanamap, aptahak axta apyennaktésawo appeywa appakhetchesa m'a apha axta néten yaphopé: “¡Ema sawo ekhaxé apagkok, elmekxa nahan ma'a aksok apnakxo nak ekyexna; hakte wokmek kaxwo' ekhem, makhetchek nahan kaxwo' ekyexna m'a aksok peya nak kanakxaxchek keso náxop!”#Jl 3.13. 16Apya'asakmek axta sawo ekhaxé apagkok náxop ma'a Dios apchásenneykha apha axta néten yaphopé, apkelmákxeyk axta aksok apnakxo keso náxop.
17Aptekkek axta nahan pók Dios apchásenneykha apkeñama m'a kañe' tegma appagkanamap apyetna nak néten, apsókha axta nahan ma'a sawo ekhaxé ekmahanta. 18Aptekkek axta nahan pók Dios apchásenneykha apkeñama m'a ekwatnamáxchexa axta cha'a aksok ektekyawa, aptaha axta cha'a elyaheykekxoho appeywa táxa, aptahak axta nahan apyennaktésawo appeywa appakhetchesa m'a ektaha axta apseykha sawo ekhaxé ekmahanta: “¡Emekxa sawo ekhaxé ekmahanta apagkok nak, elyaktén anmen yámet kélcheneykekxo nak keso náxop, hakte makhetchek kaxwo' ekyexna!” 19Apya'asakmek axta sawo ekhaxé apagkok Dios apchásenneykha keso náxop, apkelyakténchek axta anmen yámet ekyexna kélcheneykekxa nak keso náxop, keñe axta apxátawákxo m'a ekyawe kélxátamakxal'a yakwayam enxoho kólyakhápok. Cháxa ekyetchesamaxkoho nak Dios senlegasáseykegkoho ekxegakmo nak xa. 20Teyp tegma apwányam#Is 63.3; Lm 1.15; Jl 3.13; Ap 19.15. axta nahan kélyakhapwokmok xa anmen yámet nak, éma axta nahan tépak eñama m'a kélxátamakxal'a cha'a anmen yámet ekyexna, wokmók axta éma m'a kélatchesesamakxal'a yatnáxeg kélatcheseso apwáxok, trescientos kilómetros axta nahan wokmohok ekpayhegweykmoho.
Currently Selected:
APOCALIPSIS 14: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
