SANTIAGO 1
1
Santiago ekxeyenma apwáxok
1Ko'o Santiago#Mt 13.55; Mr 6.3; Hch 15.13; Gá 1.19. sekteme Dios apchásenneykha, sekteme nahan Jesucristo Wese' egegkok apchásenneykha, eyáphásesek ko'o ekxeyenma ewáxok doce pók aptémakxa énxet'ák Israel, apkexpakneykha nak keso náxop.#1 P 1.1.
Negya'ásegwayam eñama Dios
2Elyáxeg kéméxchek kéxegke kalpayhekxak agko' kélwáxok kélwet'a enxoho ekyekkóna m'a ekyókxoho ektémakxa nak segyekkónma. 3Kélya'ásegkok kéxegke m'a ekyekkónamaxko enxoho ekwánxa nak kélteme megkólya'áseyam, kaltámeyagkok kélenmáxamáxkoho yetlo kélwaskápeykekxoho m'a kéllegeykegkoho nak. 4Kóllenxánem katnésesek kélpéwomo m'a ektémakxa nak kélwaskápeykekxoho, yakwayam enxoho kóltehek kéxegke ekyennakwayam agko' kélteme megkólya'áseyam, méko katnehek ma'a eyéméxchexa enxoho xama aksok.
5Yetneyk agkok kélxama kéxegke ekmasextoho nak apya'ásegwayam, kólmaxnéses Dios, Dios sat egkések ma'a apya'ásegwayam eyéméxchexa nak, hakte hegméshok cha'a Dios nenxámokxoho xa negya'ásegwayam nak meyke apmeyagweykekxa, mehenxénchásekxók nahan cha'a nentémakxa.#Pr 1—9; Stg 3.13-17. 6Tásek eyke kólmaxnak yetlo megkólya'áseyam, meyke kélya'áseyam xama enxoho. Enxama ektahakxa enxoho apya'áseyam, máxa etnehek ma'a ektémol'a kayeykesek yegmen exchahayam wátsam ekwányam.#Mt 7.7-11; Jn 16.23-24. 7Enxet ektahakxa enxoho apya'áseyam, nágkaxén aksa apwáxok peya exkak ma'a aksok eñama nak Wese' egegkok, 8hakte sakhem kaxének apwáxok xama aksok, keñe mók ekhem kaxénekxak makham apwáxok mók aksok, kayakmagkasagkok cha'a mók aptémakxa.
9Egyáxeg apteme enxoho meyke aksok apagkok, kéméxchek kapayhekxak aksa apwáxok ma'a aptemésesa enxoho Dios néten nepyeseksa apnámokkok;#Jer 9.24. 10Keñe m'a egyáxeg ekxákma nak aksok apagkok, kéméxchek kapayhekxak aksa apwáxok aptemésesa enxoho Dios meyke aksok apagkok, hakte énxet ekxákma nak aksok apagkok apteme apyetchesamakpoho m'a pánakte exnók megkatépeyák la'a. 11Tekkek agkok ekhem, mexneyk agkok nahan, keñe keymek ma'a axchapok, katyamok nahan exnók, kamassegwók ma'a ektémakxa nak ektakmalma.#Is 40.6-7. Cháxa ektémakxa nak han énxet ekxákma nak aksok apagkok, emassegwók sat neyseksa apkelyanmagkásamap.
Segyekkónma tén han ma'a aksok ekyentaxno segahapwayol'a
12Apkeleñémo énxet ektaha nak apkelenmáxamákpoho ekyekkónma yetlo apwaskápeykekxoho, hakte apyeyk'ak agkok ektémakxa aksok ekyekkónma, exkak sat ekyennakte apnenyek apxawé naksa, ektaha nak aksok ektakmela, cham'a apxeyenma axta egkések Dios ma'a ektaha nak apchásekhayo. 13Xénchek agkok apwáxok enxama apmoko elának aksok ekmaso, nágkaxén aksa apwáxok eñama Dios ma'a ektémakxa nak ekyekkónma, hakte yawanchek keykkónek Dios ma'a nentémakxa ekmaso nak, megkaxének nahan apwáxok Dios yának elának aksok ekmaso énxet. 14Egyekkónchek cha'a negko'o eñama m'a negmamenyého nak anlának aksok ekmaso, ektaha nak ekma cha'a egwáxok, ektaha nak han segyentameykekxa cha'a. 15Katekkeshok cha'a mólya'asáxma xa aksok ekmaso negyespagko nak, keñe m'a mólya'asáxma nak, katekkesek cha'a nétsapma, cham'a ekwokmo enxoho néxa ekyawe mólya'asáxma.
16Elyáxeg selásekhayo, nágkólteme aksa megkólakhémo kéltémakxa kéxegke. 17Ekyókxoho aksok eltakmela tén han ma'a elpéwomo nenxawáya nak negko'o keleñamak ma'a néten, keleñamak ma'a aphamakxa nak Dios aptaha axta apkelané ekyókxoho aksok elsasóxma nak ma'a néten, meyakmagkasemek aptémakxa nak Dios,#Nm 23.19; Mal 3.6. megkaxnawok ma'a ektémakxal'a ekyakmagkáseyak ekyetnamakxa pesese. 18Egmések axta negko'o Dios ekyennakte egnenyek eñama m'a amya'a apagkok ektaha nak ekmámnaksoho,#1 P 1.23. cháxa apkepmenyého axta Dios hegmések negko'o xa, yakwayam enxoho antehek negko'o máxa émha amonye ekyexna kélpagkanchesamol'a Dios, neyseksa m'a aksok apkelané axta Dios.
Ekmámnaksoho ektémakxa nelpeykesamo Dios
19Elyáxeg selásekhayo, kaxén kélwáxok se'e: kéméxchek kólpencheshok kélláneykekxa kéltahakxa kélyókxoho kéxegke yakwayam kóleyxho amya'a; wánxa agkok kéméxchek eyke kóltehek kéxegke megkólpekhéso kólpakmétek, tén han kóltehek megkólpekhéso kóllók. 20Enxet apló nak, melanyek ma'a aksok ekpeykesáseykekxoho nak apwáxok Dios anlána'. 21Kólyenyaw kéxegke m'a ekyókxoho nentémakxa ekmanyása nak, tén han ma'a nentémakxa ekmaso negwet'a nak ekyágwokmoho kaxwo', kólma yetlo megkeymáxkoho kélwáxok ma'a amya'a kélpekkenchesama axta kélwáxok kéxegke, hakte awanchek kalwagkasek teyp kéxegke xa amya'a nak.
22Kóllána cha'a m'a ektémakxa nak amya'a kéllegaso, nágkólteme kélháxenmo aksa, hakte megkólakhémo kélagko' kóltehek kéxegke kéltahakxa, kéltaha enxoho kélháxenmo aksa. 23Negko'o ektahakxa enxoho negháxenmo aksa amya'a sẽllegaso, keñe manlanyek ma'a ektahakxa enxoho amya'a sẽllegaso, máxa antehek ma'a énxet apkelanyol'a nápát nelanyantáxama: 24étak ma'a ektémakxa nápát, keñe m'a appeynchákpo enxoho kalwagkámak ektémakxa nápát. 25Negko'o ektahakxa enxoho mehẽlwagkayam amya'a nenlegé, wánxa aksa antakmelcheshok nenlányo m'a ektémakxa nak segánamakxa ekpéwomo, cham'a segánamakxa segmésamol'a yakwayam hẽlyenyekxa', magyensemek nahan nenlané m'a eltémókxa nak antehek xa segánamakxa nak, kapayhekxak sat egwáxok eñama nenlané xa ektaha nak.
26Xénchek agkok apwáxok enxama aptaha apcháyo Dios, wánxa agkok megkeyxnegwomek eyke m'a appeywa, megyakhémo apagko' etnehek aptahakxa, aptaha enxoho xa, mékoho nahan katnehek ma'a ektémakxa nak apcháyo Dios. 27Ekmámnaksoho nelpeykesamo Dios, tén han meyke elenchahamaxche nentémakxa nápakto' Dios Egyap ekteme s'e: Nempasmo ektaha nak elyéheykha, tén han nempasmo m'a ektémakxa nak ellegeykegkoho tampé', tén han ma'a móghayo nak hegyepetchegwomhok ektémakxa nak keso náxop.
Currently Selected:
SANTIAGO 1: LEGN
Highlight
Copy
Compare
Share
Want to have your highlights saved across all your devices? Sign up or sign in
Lengua Sur (Enxet) New Testament © United Bible Societies, 1992.
